NOPO NOʼOX AVAʼI ti yakalot ta xanbal ta akʼobaltike. Akʼo mi bat xa tajek kʼakʼal muʼyuk bu chaxiʼ, yuʼun te avichʼoj ajoko ti lek xakʼ xojobale. Mi te noʼox atsanoj ti bu vaʼalote lek sakjaman chavil li kʼusi tee xchiʼuk mi te chavakʼ batel ti bu oy li bee lek sakjaman chavil batel.

Li Vivliae jaʼ jech xkoʼolaj kʼuchaʼal li joko taje. Jech kʼuchaʼal la jchantik li ta mantaletik echʼe, li Skʼop Diose tskoltautik sventa xkuch batel kuʼuntik li kʼusi ta jnuptantik liʼ ta balumil ti mu stakʼ naʼel kʼusi chkʼot ta pasele. Pe li Vivliae ep butik xuʼ xkoltavan, chakʼ kiltik kʼu yelan li jkuxlejaltik ta tsʼakale yuʼun xuʼ skoltautik sventa teuk xijxanav batel ti bu xuʼ jtatik-o li muyubajele (Salmo 119:105). ¿Kʼuxi tspas taje?

Jkʼelbetik batel chaʼtos skʼoplal ti kʼuxi xuʼ skoltautik li Vivlia sventa oyuk kʼusi lek jtatik li ta tsʼakale: 1 Chakʼ ti oyuk sbalil li jkuxlejaltike xchiʼuk 2 chchanubtasutik sventa lekuk-o xkil jbatik xchiʼuk li Jpasvanej kuʼuntike.

Li Vivliae yichʼoj lekil tojobtaseletik sventa jnaʼtik kʼusi xuʼ jpastik kʼalal oy jvokoltike, pe mas to me lek jech kʼuchaʼal jlik livro ti chakʼ koltaele. Chchanubtasutik sventa maʼukuk noʼox jnoptik li jvokoltike, yuʼun skʼan jnoptik ta stojolal li yantike. Mi jech ta jpastike mas me oy sbalil chkaʼi li jkuxlejaltike.

Nopbo skʼoplal ta sventa li beiltasel ta Vivlia liʼe: «Jaʼ mas xmuyubaj li buchʼu chakʼe, jaʼ mu sta li buchʼu chichʼe» (Echos 20:35). ¿Mi xvul ta ajol ti oy buchʼu la akolta kʼalal chil svokol ta takʼine? ¿O ti la achikintabe lek li kʼusi chal junuk avamigoe? ¿Mi mu jechuk ti lamuyubaj kʼalal oy buchʼu la akoltae?

Mas me chijmuyubaj mi muʼyuk kʼusi ta jkʼanbetik sutel li buchʼu ta jkoltatike. Xi laj yal jun jtsʼibajome: «Kʼalal oy kʼusi chkakʼbetik li yantike muʼyuk bu ta jkʼantik ti akʼo oyuk kʼusi xakʼbutik sutel eke, mi jech ta jpastike, jaʼ mas ep chkichʼtik akʼbel  sutel ti kʼu yepal chkakʼtike». Mi ta jkoltatik bu kʼalal xuʼ kuʼuntik li buchʼu muʼyuk kʼusi xuʼ stojbutik-o sutele, ta me jta jmotontik. Oy me kʼusi ta jpastik ti toj tsots skʼoplale, yuʼun jmoj chij-abtejutik xchiʼuk li Jpasvanej kuʼuntik ti oy yil chaʼi ta jtojolaltik kʼalal chkakʼbetik ta ilel slekil koʼontontik li yantike (Proverbios 19:17). Toj ep sbalil chil Dios kʼalal ta jkoltatik li buchʼutik chil svokolike, jaʼ yuʼun li stuke chal ta melel ti chakʼbutik jun kuxlejal sbatel osil liʼ ta Balumil ti pasem xa ox ta paraisoe. ¡Toj kʼupil sba li spatobil oʼontonal taje! (Salmo 37:29; Lukas 14:12-14). *

Li Vivliae chchanubtasutik ti sventa oyuk tajek sbalil chkaʼi li jkuxlejaltike skʼan xkichʼtik ta mukʼ li melel Dios, ti jaʼ li Jeovae. Li ta Skʼope tstij koʼontontik sventa xkalbetik smukʼulal, jkʼupil kʼoptatik, xkichʼtik ta mukʼ xchiʼuk ti jchʼunbetik li smantale (Eclesiastés 12:13; Apokalipsis 4:11). Kʼalal jech ta jpastike, xmuyubaj kuʼuntik li Jpasvaneje. Xi onoʼox tskʼanbutik li stuke: «Jnichʼon, bijan me, jech xcuxet noʼox coʼnton avuʼun» (Proverbios 27:11). ¿Mi oy jech anopoj junuk velta? Mi ta jtsaktik ta venta li beiltaseletik ta Vivlia kʼalal oy kʼusi ta jnop ta jpastike, ta me jmuyubtabetik yoʼonton li Jtotik ta vinajele. Pe, ¿kʼu yuʼun? Yuʼun li stuke chat yoʼonton ta jtojolaltik xchiʼuk tskʼan ti akʼo xkakʼ jbatik ta beiltasel yoʼ lekuk xbat li jkuxlejaltike (Isaías 48:17, 18). Muʼyuk yan jech chakʼbe sbalil jkuxlejaltik kʼalal chkichʼtik ta mukʼ xchiʼuk chkakʼtik muyubajuk li Mukʼul Jpasmantal ta vinajelbalumile.

Li Vivliae chchanubtasutik kʼuxi xuʼ xkʼot ta kamigotik li Jpasvanej kuʼuntike. Yuʼun xi chalbutike: «Nopajanik ta stojolal Dios, vaʼun chnopaj tal ta atojolalik ek» (Santiago 4:8). Xuʼ van toj vokol chkaʼitik ta xchʼunel ti xuʼ xijkʼotutik ta yamigo li Jpasvanej ti skotol xuʼ yuʼune. Pe li ta Vivliae chalbutik ti xuʼ jtatik li Dios mi la jsaʼtike, yuʼun «muʼyuk onoʼox bu nom oy ta jtojolaltik ta jujuntal» (Echos 17:27). Mi jaʼ la jpastik li kʼusi chal Vivlia ti xkamigointik li Diose, jaʼ me jech ta jchapan jbatik ta sventa li kʼusi chtal ta tsʼakale. ¿Kʼu yuʼun jech chkaltik taje?

Nopo avaʼi ta sventa liʼe: muʼyuk kʼusi stakʼ jpastik sventa jkolta jbatik lokʼel li ta kajkontratik ti jaʼ li lajelale (1 Korintios 15:26). Pe jaʼuk li Diose te oy-o sbatel osil, yuʼun mu snaʼ xcham xchiʼuk tskʼan ti xkuxiik sbatel osil li yamigotake. Xi ch-albatik yuʼun Jeova li buchʼutik tsaʼike: «Jun yoʼnton [...] chcuxiic ep jabil» (Salmo 22:26).

¿Kʼusi stakʼ xapas sventa xavamigoin ta sbatel osil li Diose? Jaʼ ti xachan li Vivlia sventa xavojtikin-o batele (Juan 17:3; 2 Timoteo 3:16). Kʼanbo koltael Dios sventa xavaʼi li kʼusi chal ta Skʼope. Yuʼun chalbutik ti chakʼ jpʼijiltik mi ta sjunul koʼontontik ta jkʼanbetike * (Santiago 1:5). Xchiʼuk akʼo persa ta yakʼel ta akuxlejal li kʼusi yakal chachane; vaʼun mi jech chapase li Skʼop Diose «jaʼ luz» chkʼot avuʼun sbatel osil xchiʼuk «jaʼ toj» chkʼot sventa xavil batel abe li avie (Salmo 119:105).