Jech, oy chopol anjeletik. ¿Kʼuxi xa noʼox ti jeche? Vuleso ta ajol ti akʼbat snopben stukik kʼalal pasatik yuʼun Dios li anjeletike. Kʼalal mu toʼox jaluk yichʼoj pasel li Adan xchiʼuk Evae, chopol kʼusi kʼot ta nopel yuʼun jun anjel xchiʼuk jaʼ la slikes li toybail ta Balumile. Kuch onoʼox yuʼun xkaltik, yuʼun la stijbe yoʼonton Adan xchiʼuk Eva sventa stoy sbaik ta stojolal Dios (Génesis 3:1-7; Apokalipsis 12:9). Li Vivliae muʼyuk chal kʼusi sbi li anjel taje, mi jaʼuk ti kʼusi yabtel te ta vinajel kʼalal mu toʼox tstoy sbae. Pe kʼalal laj xa ox stoy sbae, Satanas laj yichʼ biiltasel ti jaʼ skʼan xal «Jkontrainvanej» xchiʼuk Diablo ti jaʼ skʼan xal «jchopolkʼoptavanej» (Mateo 4:8-11).

Jaʼ jech lik stoy sbaik ta stojolal li Diose. Li ta skʼakʼalil Noee ep anjeletik ti «laj yiktaik li slekil avil» akʼbilik ta vinajel yuʼun li Diose, ti jaʼik toʼox yutsʼ yalale, yuʼun yalik tal ta Balumil xchiʼuk la skʼatajes sbaik ta krixchanoetik sventa muʼyuk xa noʼox xkʼexlal xmulivajik. Jaʼ jech la stenik komel ti kʼusi sventa pasbilike (Judas 6; Génesis 6:1-4; 1 Pedro 3:19, 20).

¿Kʼusi kʼot ta stojolal li chopol anjeletike? Kʼalal laj yakʼ taluk Nojelal ta voʼ sventa tsmes lokʼel choplejal ta Balumil li Diose, la skʼatajes sbaik ta kuxlejaletik yan velta ti mu xvinaj ta kʼelel li jtoyba anjeletik taje o li pukujetike. Pe muʼyuk xa laj yakʼ Dios ti sutik batel li ta «[yavil] akʼbatik ta slikebale», moʼoj, kʼajomal noʼox kʼexlaltasatik xchiʼuk «akʼatik ta ikʼal osil» ti Tartaro sbie (Judas 6; 2 Pedro 2:4). Jaʼ pasbilik ta mantal yuʼun Satanas li pukujetike, yuʼun «jaʼ li ajvalil yuʼun pukujetike», ti «jech-o tspʼis sba ta jun anjel ti xojobaj noʼoxe» (Mateo 12:24; 2 Korintios 11:14).

Li Vivliae chakʼ ta chanel ti lik ta ajvalil ta 1914 li Ajvalilal yuʼun Mesiase. * Kʼalal lik ta pasmantal li Ajvalilal yuʼun Diose laj yichʼ jipel yalel tal ta Balumil li Satanas xchiʼuk spukujtake, ti bu jutuk xa noʼox kʼusi stakʼ spasike. Ti kʼu xa yelan sokem tal li kuxlejale xchiʼuk ti toj echʼ xa noʼox chmulivaj li krixchanoetike, jaʼ svinajeb stalelal pukujetik ti lek xaʼiik spakel sutele xchiʼuk ti jaʼ noʼox oy ta yoʼonton chakʼbeik slajeb skotole (Apokalipsis 12:9-12).

Pe poʼot xa me xlaj skʼoplal ti jaʼ tsventainik balumil li pukujetik ti toj echʼ xa noʼox xibal sbae. ¿Kʼuxi jnaʼojtik? Jaʼ ti sokem xa tajek li kuxlejale, ti toj echʼ xa noʼox majbail xchiʼuk milbaile. Poʼot xa me xpajtsanatik yuʼun li Ajvalilal yuʼun Diose. Jech xtok, li Ajvalilal taje ta me spas ta paraiso li Balumile xchiʼuk ch-ajvalilaj jmil jabil. Mi laj li jmil jabile ta to xakʼik ta preva ta slajeb velta krixchanoetik li pukujetike, pe muʼyuk xa jal. Vaʼun ta xichʼik lajesel ta sbatel osil (Mateo 25:41; Apokalipsis 20:1-3, 7-10).