Ta jun domingo ta bat kʼakʼal li Kenneth xchiʼuk Filomenae bat svulaʼanik jun nupultsʼakal ti chakʼbeik chanubtasel ta Vivlia ti te nakalik ta Curazaoe.

Xi chal li Kennethe: «Kʼalal likʼotkutike makal li stiʼ snaike xchiʼuk chʼabal te li skaroike. Pe la jkʼopon batel ta telefono li yajnile, akʼo mi mu jnaʼ kʼuchaʼal ti jech la jpase».

Li antse la stakʼ li telefonoe, vaʼun laj yal ti yakal ch-abtej li smalale. Pe kʼalal laj yaʼi ti te oyik ta stiʼ sna li Kenneth xchiʼuk Filomenae la sjam li snae, vaʼun laj yakʼ ti akʼo x-ochike.

Ta anil noʼox laj yakʼik venta ti yakal ta x-okʼ li antse. Kʼalal la spas orasion li Kenneth sventa tslikesik li estudioe lik ochuk ta okʼel yan velta. Vaʼun ta slekil yoʼonton la sjakʼbeik kʼusi ti yakal tsnuptane.

Li antse laj yal ti snopoj xa ox ta smil sba li vaʼ mal kʼakʼale xchiʼuk yakal xa ox ta stsʼibabe komel jlik uni vun li smalale, pe jaʼ pajtsanat-o ti laj yichʼ kʼoponel yuʼun li Kennethe. Laj yal ti ip ta at-oʼontone, jaʼ yuʼun la skʼelbeik jun chibuk teksto ti bu chpatbat-o yoʼontone. Li kʼusi albate jaʼ koltaat-o sventa mu smil sba.

Xi chal li Kennethe: «La jtojbekutik ta vokol Jeova ti la stij koʼontonkutik sventa jkʼoponkutik li ants ti jaʼo yakal chil svokole, ti jaʼ van la stunes junuk li yaj-anjele o li xchʼul espiritu kʼalal la jkʼoponkutike». *

Li Kenneth xchiʼuk Filomenae, ¿mi jech van ti chalik ti jaʼ laj yakʼ Dios ti akʼo skoltaik li ants taje, ti xuʼ van jaʼ la stunes junuk li yaj-anjele o li xchʼul espiritue, jaʼ xkaltik, li yip ch-abtej Diose? ¿Mi ta jech noʼox van kʼot ta pasel ti kʼopoj batel li Kennethe?

Akʼo mi mu xuʼ xkaltik mi jech ta melel, li kʼusi jnaʼojtike jaʼ ti tstunes yaj-anjeltak Jeova sventa tskolta ta mantal li krixchanoetike. Yuʼun li Vivliae chal ti Diose la stunes jun yaj-anjel sventa tsbeiltas jun yajtsʼaklom Kristo ti Felipe sbie, sventa xbat ta stojolal jun vinik ti yichʼoj yabtel ta spasobmantal ajvalil ta Etiopia ti tskʼan koltael ta mantale (Echos 8:26-31).

Oy epal relijionetik chakʼik ta chanel ti oy kuxlejaletik ti mu xkiltike, jlome lekik la ti jaʼ la tspasbeik li kʼusi tskʼan yoʼonton Diose o ti chchabiik li krixchanoetike. Epal krixchanoetike maʼuk noʼox xchʼunojik ti oy li anjeletike, yuʼun xchʼunojik xtok ti oy la kʼusi tspas ta xkuxlejalike. Pe oy buchʼutik xtok ti mu xchʼunik mi oy ta melele.

¿Mi oy li anjeletike? Mi jaʼ jeche, ¿kʼuxi lik tal? ¿Kʼusi chal Vivlia ta sventa taje? ¿Mi oy van kʼusi tspasik ta jkuxlejaltik? Kalbetik batel skʼoplal li kʼusitik kʼotem ta pasele.