Taje jech laj yal jun tseb ti 13 sjabilal kʼalal laj yichʼ kʼelanbel jkot bikʼit tsʼiʼe. Jun ants ti lek xbat yabtel ta s-empresae, laj yal ti jaʼ jelbat-o xkuxlejal li komputadora kʼelanbat yuʼun stot kʼalal chex tseb toʼoxe. Jun vinik ti achʼtik to snupunele, laj yal ti kʼalal lokʼ xa ox jun jabil snupunelike, akʼbat jun bikʼit vun ti jaʼ la stsʼiba stuk li yajnile, taje jaʼ la li matanal mas lek akʼbateme.

Jujun jabile, kʼalal oy kʼusi tsots skʼoplal chkʼot ta pasele, epal krixchanoetik chakʼik persa xchiʼuk chchʼakbeik lek yorail sventa sabeik jun lekil matanal li yamigoik o yutsʼ yalalike. Jutuk mu skotolikuk oy ta yoʼontonik ti lekuk x-ilbat li matanal chakʼik jech kʼuchaʼal li buchʼutik laj kalbetik skʼoplale. ¿Mi oy van ta avoʼonton ek ti jechuk xavakʼ junuk matanal o ti voʼot chavichʼ akʼbele?

Tstij koʼontontik li taje, yuʼun maʼuk noʼox ta xmuyubaj li buchʼu ta xichʼ akʼbel li matanale, moʼoj, yuʼun jech chaʼi sba ek li buchʼu chakʼe. Xi chal li Vivliae: «Jaʼ mas xmuyubaj li buchʼu chakʼe, jaʼ mu sta li buchʼu chichʼe» (Echos 20:35). Ta melel, mas to me xijmuyubaj kʼalal tstoj tajek ta vokol li buchʼu chichʼ li matanale.

¿Kʼusi xuʼ jpastik sventa xijmuyubaj yuʼun xchiʼuk ti xmuyubaj ek li buchʼu chkakʼbetik matanale? Mi mu xuʼ kuʼuntik yakʼbel li mas lekil matanal jun krixchanoe, ¿kʼusi xuʼ jpastik sventa jaʼuk xkakʼbetik li kʼusi chtun yuʼune?