«Te likem tal ta akʼol skotol li lekil matanal xchiʼuk li tukʼil matanale, te likem tal ta stojolal li Totil yuʼun lus ta vinajel[e]» (Santiago 1:17). Li teksto liʼe, chakʼ iluk ti oy tajek slekil yoʼonton li Jeovae, ti jaʼ li Jtotik ta Vinajele. Akʼo mi ep matanaletik yakʼojbutik, pe oy jun ti mu kʼusi xkoʼolaj-oe. ¿Kʼusi jaʼ taje? Jaʼ li kʼusi laj yal Jesus ta Juan 3:16: «Yuʼun skʼanoj tajek krixchanoetik li Diose, jaʼ yuʼun laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil».

Li matanal mas lek akʼbilutike jaʼo kʼalal laj yakʼ Xnichʼon Dios ta jtojolaltike. Yuʼun koliyal taje, xuʼ xijkolutik li ta mulile, ta malubele xchiʼuk li ta lajelale (Salmo 51:5; Juan 8:34). Ti muʼyukuk laj yakʼ Xnichʼon li Diose, mu kʼusi xuʼ jpastik ti jechuke. Ta skoj ti toj echʼ noʼox skʼanojutik li Diose oy kʼusi la xchapan. Laj yakʼ ti akʼo xtal ta Balumil li Xnichʼon sventa tspojutike, te laj yakʼ iluk ti xuʼ xkuxiik sbatel osil li jchʼunej mantal krixchanoetike. Pe, ¿kʼusi jaʼ li pojelale? ¿Kʼu yuʼun chtun kuʼuntik? Xchiʼuk ¿kʼuxi xuʼ jtabetik sbalil?

Li jun pojelale jaʼ kʼalal oy kʼusi chichʼ tojel sventa xichʼ sutesel o sventa xichʼ koltael jun krixchano ti chukbil batele. Li Vivliae chal ti kʼalal la spas Adan xchiʼuk Eva li Diose oy ta yoʼonton ti xkuxiik sbatel osil ta jun paraiso Balumil xchiʼuk skotol li snitilulaltak chtal ta tsʼakale (Génesis 1:26-28). Pe kʼalal laj yiktaik xchʼunbel smantal Diose chʼay yuʼunik skotol xchiʼuk jpasmulil kʼotik. ¿Kʼusi kʼot ta stojolalik? Xi chal li Vivliae: «Ta jun noʼox vinik och talel li mulil ta balumile, jech ta skoj mulil och talel ek li lajelale, jaʼ yuʼun chcham skotol krixchanoetik ta skoj ti jpasmulil kʼot skotolike» (Romanos 5:12). Li Adane maʼuk la sjelubtasbe snitilulaltak li tukʼil kuxlejale, yuʼun jaʼ noʼox la sjelubtasbe li lajelale.

Ta sventa li jun pojelale, skʼan ti koʼoluk sbalil xichʼ tojel xchiʼuk li kʼusi chʼaye. Li Adane la saʼ smul kʼalal yolbaj muʼyuk la xchʼunbe smantal li Diose. Ta skoj taje, chʼay li tukʼil kuxlejal toʼox yuʼune. Li Vivlia chchapbe smelolal ti jsaʼ mulil krixchano kʼot xchiʼuk ti chchamik li snitilulaltak Adane. Sventa sta skolebalik li snitilulaltak Adane skʼan xichʼ akʼel jun tukʼil kuxlejal: ti jaʼ li xkuxlejal Jesuse (Romanos 5:19; Efesios 1:7). Ta skoj ti skʼanojutik li Diose laj yakʼbutik li pojelale. Ti muʼyukuk jech la spase, li krixchanoetike muʼyuk tstaik jechuk li kuxlejal kʼuchaʼal oy toʼox yuʼun li Adan xchiʼuk Evae: ti jaʼ li kuxlejal sbatel osil ta jun paraisoe (Apokalipsis 21:3-5).

Ta skoj ti xuʼ jtatik kuxlejal sbatel osil yuʼun li pojelale, xuʼ ta sjunul koʼonton chkaltik ti jaʼ li matanal mas lek yakʼojbutik li Diose. Sventa xkaʼibetik smelolal ti mu xkoʼolaj kʼuchaʼal li yan matanaletike, kalbetik batel skʼoplal ti laj yichʼ tsakel ta venta li chantos kʼusitik laj kaltik li ta mantal echʼe.

Jaʼ li matanal ti solel ta jkʼantike. Li krixchanoutike oy onoʼox ta koʼontontik tajek ti xijkuxiutik sbatel osile (Eclesiastés 3:11). Pe li kʼusi ta jkʼantike mu spas kuʼun jtuktik, kʼajom noʼox xuʼ  jtatik koliyal li pojelale. Yuʼun xi chal li Vivliae: «Li stojol mulile jaʼ li lajelale, yan li matanal chakʼ Diose jaʼ kuxlejal sbatel osil ta stojolal li Kristo Jesus ti jaʼ Kajvaltike» (Romanos 6:23).

Jaʼ li kʼusi chtun kuʼuntike. Mi junuk krixchano xtoj yuʼun li pojelale. Li ta Vivliae te chalbutik ti mu xtoj kuʼuntike, yuʼun toj ep stojol li kʼusi skʼan akʼele (Salmo 49:8). Ta skoj taje, chtun kuʼuntik tajek li koltael laj yakʼbutik Dios sventa spojutik ta mulil xchiʼuk lajelale. «Ta skoj li pojelal la stoj Kristo [Jesuse]», li Diose laj yakʼ li kʼusi chtun kuʼuntik sventa xijkolutike (Romanos 3:23, 24).

Ta yorail noʼox. Xi chal li Vivliae: «Yuʼun cham ta jtojolaltik Kristo kʼalal jpasmulilutik toʼoxe» (Romanos 5:8). Li Diose laj yakʼ li pojelal «kʼalal jpasmulilutik toʼoxe». Taje chakʼ iluk ti skʼanojutik tajek akʼo mi jsaʼ mulilutik. Akʼo mi chkil to jvokoltik yuʼun li mulile, pe li pojelale tspat koʼontontik sventa li kʼusi chtal ta tsʼakale.

Ta slekil yoʼonton laj yakʼ li kʼusi oy yuʼune. ¿Kʼu yuʼun laj yakʼ Xnichʼon li Dios sventa tspojutike? «Jaʼ yuʼun laj yichʼ akʼel ta ilel ta jtojolaltik li kʼanelal yuʼun Diose, yuʼun la stak talel ta balumil li jun noʼox Xnichʼon sventa jtatik li kuxlejal ta stojolale. Xi yelan li kʼanelale, mu yuʼunuk voʼotik la jkʼantik li Diose, moʼoj, yuʼun jaʼ la skʼanutik» (1 Juan 4:9, 10).

¿Kʼusi skʼan xapas sventa xavakʼ iluk ti oy sbalil chavil li matanal akʼbilutik ti mu kʼusi xkoʼolaj-oe? Vuleso ta ajol li kʼusi laj yal Jesus ta Juan 3:16, ti jaʼ noʼox la tsta skolebal «li buchʼu chakʼ xchʼunel yoʼonton ta stojolale». Li Vivliae chal ti xchʼunel oʼontonale jaʼ li kʼusi «malabil ti chkʼot onoʼox ta pasel ta persae» (Evreos 11:1). Sventa jmala ta sjunul koʼontontike tsots skʼoplal ti oyuk kuʼuntik li melel yojtikinobile. Jaʼ yuʼun, chavichʼ tijbel avoʼonton ti xavojtikin lek li Diose, ti jaʼ li Buchʼu yakʼojbutik li mas lekil matanale. Jech xtok, tsots skʼoplal ti xanaʼ kʼusi skʼan xapas sventa xa ta li kuxlejal sbatel osile, ti jaʼ ta jtatik koliyal li pojelal laj yakʼ Jesuse.

Yoʼ xavojtikin mas li Diose xuʼ xa och ta jpajinakutik ta Internet ta jw.org. Li stestigounkutik Jeovae ta sjunul koʼonton ta jkoltaotkutik. Mi la achanbe echʼel mas skʼoplal sventa li matanal akʼbilutike xchiʼuk li sbalil ta jtatike, tstij avoʼonton sventa xi xavale: «¡Koliyal Dios ta stojolal Jesukristo ti jaʼ Kajvaltike!» (Romanos 7:25).