Ta smiyonal noʼox krixchanoetik chalik ti skʼinal Svokʼel Ninyoe (Navidad) jaʼo la skumpleanyo li Jesuse. Akʼo mi lek tajek la yil sbaik xchiʼuk Jesus li baʼyel yajtsʼaklomtake, ¿mi laj van spasik li skʼinal Svokʼel Ninyoe? ¿Mi xanaʼ kʼusi chal Vivlia sventa li kumpleanyoetike? Li stakʼobiltake jaʼ tskoltautik snaʼel mi stakʼ jpastik li skʼinal Svokʼel Ninyoe o mi muʼyuk.

Baʼyel, li ta Vivliae muʼyuk chal ti laj yichʼ pasbel skumpleanyo li Jesuse o li yantik tukʼil yajtuneltak Diose. Li Skʼop Diose kʼajom chalbe skʼoplal chib kumpleanyoetik, pe jaʼ la spasik krixchanoetik ti muʼyuk chichʼik ta mukʼ li Jeovae, ti jaʼ li Dios chalbe skʼoplal li Vivliae. Li ta kumpleanyoetik taje, toj echʼ noʼox chopol li kʼusitik kʼot ta pasele (Génesis 40:20; Markos 6:21). Li Encyclopædia Britannica chal ti baʼyel yajtsʼaklomtak Kristoe la spʼajik «li kumpleanyoetike, yuʼun likem tal ta stojolal krixchanoetik ti maʼukik jchʼunolajeletike».

Li Vivliae muʼyuk chal kʼusi ora ayan li Jesuse. Xi chal li Diccionario de historia de la Iglesia: «Chʼabal kʼusitik tsots skʼoplal tabil ti jamal chakʼ ta ilel kʼusi kʼakʼalil o ual ayan li Jesuse». Ti skʼanuk Jesus tspasbat skumpleanyo yuʼun li yajtsʼaklomtake, laj yal komel kʼusi ora ayan ti jechuke.

Xchibal, li Vivliae muʼyuk chal ti Jesuse o li yajtsʼaklomtake la spasik li skʼinal Svokʼel Ninyoe. Li New Catholic Encyclopedia chal ti skʼinal Svokʼel Ninyoe jaʼ to sba velta laj yichʼ albel skʼoplal ta «jun kalendario yuʼun jromaetik ti Cronógrafo yuʼun Filócalo, ti jaʼ chal li kʼusi van kʼot ta sjabilaltik 336». Pe li jabil taje, oy xa ox sjayibaluk siglo ayem li Jesuse xchiʼuk voʼne xa ox stsutsel stsʼibael li Vivliae. Ta skoj taje, li Cyclopedia de McClintock xchiʼuk Strong chal ti spasel skʼinal Svokʼel Ninyoe maʼuk jun mantal yakʼoj Dios xchiʼuk muʼyuk jech chal li ta Achʼ Testamentoe. *

Li Jesus ti jaʼ li Mukʼta Jchanubtasvaneje lek laj yal komel li kʼusitik skʼan spasik li yajtsʼaklomtake xchiʼuk te ta jtatik ta Vivlia. Pe chʼabal bu laj yal ti skʼan pasel li skʼinal Svokʼel Ninyoe. Li jun jchanubtasvaneje tskʼan ti yajchanuntake jaʼ noʼox spasik li kʼusitik yalojbe akʼo spasike. Li Jesus eke, tskʼan ti yajtsʼaklomtake jaʼ noʼox spasik li kʼusitik tsʼibabil ta Skʼop Diose (1 Korintios 4:6).

Akʼo mi muʼyuk bu chal Vivlia kʼusi ora vokʼ li Jesuse, pe jtos li kʼusi tsots skʼoplal laj yaʼiik li yajtsʼaklomtake, jaʼ ti teuk ta sjolik li Snaʼobil slajel Kristoe. Yuʼun li Jesuse laj yal kʼusi ora xchiʼuk laj yakʼ ta ilel kʼuxi ta pasel, ti te chal li ta Vivliae. Jech xtok, chal kʼusi kʼakʼalil cham li Jesuse (Lukas 22:19; 1 Korintios 11:25).

Kʼuchaʼal laj xa kiltike, li skʼinal Svokʼel Ninyoe jaʼ skʼinal kumpleanyo. Li yajtsʼaklomtak Kristoe muʼyuk bu la spasik, yuʼun likem talel ta stojolal krixchanoetik ti maʼukik jchʼunolajeletike. Li Vivliae muʼyuk chal mi la spas Jesus xchiʼuk li yan krixchanoetik li kʼin taje. Ta skoj li kʼusi laj xa jchanbetik skʼoplale, ta smiyonal noʼox yajtsʼaklomtak Kristo muʼyuk tspasik li skʼinal Svokʼel Ninyoe.