1, 2. 1) ¿Kʼusi smakoj li matanal laj yakʼbutik Diose? 2) ¿Kʼusitik ta jtakʼtik li ta xchanobil liʼe?

TOJ echʼ xa noʼox skʼanojutik li Jeovae, yuʼun la stak tal ta Balumil li Xnichʼon ti skʼanoj tajek sventa xcham ta jtojolaltike (Juan 3:16; 1 Juan 4:9, 10). Spajebal xa noʼox smukʼul li matanal lij-akʼbate. Jaʼ yuʼun laj yal jtakbol Pablo ti «mu xa noʼox xlaj ta alel li matanal» taje (2 Kor. 9:15). ¿Kʼusi smelolal li kʼusi laj yale?

² Li Pabloe snaʼoj ti persa chkʼot ta pasel li kʼusi yaloj tspas Dios ta skoj ti cham li Jesuse (kʼelo 2 Korintios 1:20). Jaʼ yuʼun chaʼa, li matanal ti «mu xa noʼox xlaj ta alel» taje te tsakal skʼoplal ti skʼanojutik li Diose xchiʼuk li kʼusitik lek chakʼbutike. ¡Batsʼi toj labal xa noʼox sba ti mu x-al kuʼuntik kʼu to yutsil li matanal laj yakʼ Diose! ¿Kʼu van yelan chkaʼi jbatik yuʼun? ¿Xchiʼuk kʼusi van skʼan jpastik ti poʼot xa li Snaʼobil slajel Kristoe? Li jabil liʼe ch-echʼ ta mierkoles 23 yuʼun marso.

3, 4. 1) ¿Kʼu yelan chkaʼi jbatik kʼalal oy kʼusi chijkʼelanbate? 2) ¿Kʼuxi xuʼ sjel jkuxlejaltik kʼalal oy kʼusi chijkʼelanbate?

³ Jkotoltik xijmuyubaj yuʼun kʼalal oy kʼusi chijkʼelanbate. Pe oy jlom matanal ti xuʼ sjel jkuxlejaltike. Kalbetik junuk skʼelobil, jnoptik avaʼi ti oy kʼusi chopol la apase, vaʼun chalik ti chavichʼ milel ta skoje. Pe ¿kʼu van yelan chavaʼi aba ti oy buchʼu xakʼ xkuxlejal ta atojolal ti mu xavojtikine?

⁴ Tstij avoʼonton sventa xajel akuxlejal. Jech xtok xuʼ van mas chavakʼ ta ilel ti akʼanoj li yantike, mas xa chavakʼ ta ilel slekil avoʼonton xchiʼuk ta van xavakʼ ta perton li buchʼutik spasoj smul ta atojolale. Ta melel, ti kʼu sjalil kuxulote chavakʼ ilel ti chatoj ta vokol li kʼusi la spas ta atojolal li jun krixchano ti mu xavojtikine.

5. ¿Kʼu yuʼun ti mu kʼusi xkoʼolaj-o li matanal yakʼojbutik Diose?

⁵ Li matanal yakʼojbutik Diose mas to mukʼ skʼoplal, jaʼ mu sta li matanal naka to laj kaltike (1 Ped. 3:18). Ta skoj ti jkotoltik jpasmulilutike chijchamutik (Rom. 5:12). Pe skʼanojutik tajek li Diose, jech oxal la stak tal Xnichʼon sventa xcham ta jkojtik (Evr. 2:9). Oy to yan kʼusi chakʼ kʼotuk ta pasel li matanal laj yakʼ Kristoe: ¡Jaʼ ti tslajesbe skʼoplal ta j-echʼel li lajelale! (Is. 25:7, 8; 1 Kor. 15:22, 26). Jaʼ yuʼun chaʼa, li buchʼutik chakʼ xchʼunel yoʼontonik ta stojolal li Jesuse xmuyubaj noʼox me chkuxiik xchiʼuk tsta slekilalik sbatel osil, jlome te chkuxiik xchiʼuk Kristo ta vinajel, li yantike liʼ chnakiik ta Balumile (Rom. 6:23; Apok. 5:9, 10). Maʼuk noʼox taje, yuʼun oy to kʼusitik lekik ta jtatik yuʼun li matanal yakʼoj Diose.

6. 1) ¿Kʼusi oy ta avoʼonton chakʼupin ta tsʼakal li voʼote? 2) ¿Kʼuxi xuʼ xkakʼtik ta ilel ti ta jkʼan ta jtojtik ta vokol ti skʼanojutik tajek li Diose?

⁶ ¿Kʼusi to yan lekik ta jtatik yuʼun li matanal yakʼojbutik Diose? Jaʼ ti chkʼataj ta paraiso li Balumile, ti chpoxtaj li buchʼutik ip chaʼiike xchiʼuk ti chchaʼkuxiik li animaetike (Is. 33:24; 35:5, 6; Juan 5:28, 29). Jech oxal jkʼanojtik tajek Jeova xchiʼuk Jesus ta skoj li matanal ti «mu xa noʼox xlaj ta alel[e]». ¿Kʼuxi chkakʼtik ta ilel ti oy ta koʼonton ta jtojtik ta vokole? Baʼyuke jaʼ ti jchanbetik stalelal li Kristoe. Xchibale jaʼ ti jkʼan li kermanotaktike xchiʼuk li yoxibale jaʼ ti ta sjunuluk koʼonton xkakʼtik ta perton li yantike.

7, 8. 1) ¿Kʼusi ch-ayan ta koʼontontik mi ta jtojbetik ta vokol ti laj yakʼ ta ilel ti skʼanojutik li Jesuse, xchiʼuk kʼusi skʼan jpastik?

⁷ Baʼyuke jaʼ ti tstij koʼontontik ti akʼo jtunes jkuxlejaltik sventa jmukʼibtasbetik skʼoplal Jesus ta skoj ti skʼanojutik tajek li Diose. Xi laj yal li jtakbol Pabloe: «Jaʼ tsuju[tik] li kʼanelal yuʼun Kristoe» (kʼelo 2 Korintios 5:14, 15). Yuʼun li Pabloe snaʼoj ti mi oy ta koʼonton ta jtojbetik ta vokol Jesus ti kʼu yelan skʼanojutike, jaʼ me ch-ayan-o ta koʼontontik ti akʼo jkʼantike xchiʼuk ti jmukʼibtasbetik skʼoplale. Kʼalal chkaʼibetik lek smelolal li kʼusi spasoj Jeova ta jtojolaltike jaʼ me tstij koʼontontik ti mu xa ta jventauk jtuktik xijkuxie, ti jaʼuk xa ta sventa Jesuse. ¿Kʼuxi chkakʼtik ta ilel taje?

⁸ Jaʼ ti ‹jtsʼaklibetik batel› lek stalelal li Kristoe (1 Ped. 2:21; 1 Juan 2:6). Kʼalal ta jchʼunbetik smantal Dios  xchiʼuk Kristoe chkakʼtik ta ilel ti jkʼanojtike. Xi laj yal li Jesuse: «Jaʼ skʼanojun li buchʼu xchʼamoj li jmantaltak xchiʼuk ti chchʼune. Jech xtok, chkʼanat yuʼun Jtot li buchʼu skʼanojune, vaʼun ta jkʼan ek xchiʼuk jamal chkakʼ jba ta ilel ta stojolal» (Juan 14:21; 1 Juan 5:3).

9. ¿Kʼusi sujel ta jnuptan jkotoltik?

⁹ Ta skoj ti poʼot xa li Snaʼobil slajel Kristoe skʼan me jnoptik lek li kʼusi yakalutik spasele. Xi jakʼbe jbatike: «¿Kʼusitik stalelal jchanojbe xa li Jesuse? ¿Mi oy to bu xuʼ jtukʼibtas batel li jtalelale?». Toj tsots me skʼoplal ti jechuk jakʼbe jbatike, yuʼun chkichʼtik sujel ti jaʼuk jchanbetik stalelal li yan krixchanoetike (Rom. 12:2). Mi muʼyuk la jkʼel jbatike, xuʼ van jaʼ xlik jchanbetik stalelal li pʼijil krixchanoetike, li buchʼutik lek ojtikinbilike xchiʼuk li buchʼutik lek chanemik ta tajimole (Kol. 2:8; 1 Juan 2:15-17). ¿Kʼuxi xuʼ stsal kuʼuntik taje?

10. 1) ¿Kʼusitik skʼan jakʼbe jbatik li ta yuilal Snaʼobil slajel Kristoe? 2) ¿Mi oy van kʼusi skʼan jel ta jkuxlejaltik? (Kʼelo li lokʼoletik ta slikebale).

¹⁰ Li ta yuilal Snaʼobil slajel Kristoe lek me ti jkʼeltik ti kʼu yelan li jkʼuʼ jpokʼtike, li kʼusi sonal ta jchikintatike, li pelikulaetik ta jkʼeltike, ti kʼusitik jtikʼoj ta jselulartike, ta jkomputadoratik xchiʼuk ta jtavletatike. Xi jakʼbe jbatike: «Ti xilun kʼu yelan jlapoj jkʼuʼ jpokʼ li Jesukristoe, ¿mi ta van xikʼexav?» (kʼelo 1 Timoteo 2:9, 10). «¿Mi jamal van xvinaj ta jkʼuʼ jpokʼ ti yakal ta jchanbe stalelal li Kristoe? ¿Mi lek van chil Jesus li pelikulaetik ta jkʼele xchiʼuk mi lek van chaʼi li son ta jchikintae? ¿Mi ta sjunul van koʼonton chkakʼbe xchʼamun jselular o jtavleta li Jesuse? ¿Mi xuʼ van xkakʼbe yil li videojuegoetik chitajin-oe xchiʼuk ti xkalbe ti kʼu yuʼun lek chkile?». Mi jkʼanojtik li Jeovae, ta me jchʼak lokʼel ta jtojolaltik skotol li kʼusitik muʼyuk leke, manchuk mi toj vokol chkaʼitik (Ech. 19:19, 20). Kʼalal laj kakʼbe jkuxlejaltik li Jeovae laj kalbetik ta jamal ti maʼuk xa ta jpastik li kʼusi ta jkʼan jtuktike, jaʼ xa li kʼusi tskʼan Kristoe. Jaʼ yuʼun chaʼa, muʼyuk me ta jpastik li kʼusi xuʼ smakutik ta xchanbel stalelal li Jesuse (Mat. 5:29, 30; Filip. 4:8).

11. 1) ¿Kʼusi yan stakʼ jpastik mi jkʼanojtik li Jeova xchiʼuk Jesuse? 2) ¿Kʼuxi stakʼ jkoltatik li ermanoetik ta jtsobobbailtike?

¹¹ Oy to yan kʼusi stakʼ jpastik mi jkʼanojtik li Jeova xchiʼuk Jesuse, jaʼ ti xijmuyubajuk noʼox kʼalal ta jcholtik mantale xchiʼuk kʼalal chijchanubtasvane (Mat. 28:19, 20; Luk. 4:43). Li ta yuilal Snaʼobil slajel Kristoe, ¿mi xuʼ van xijtun ta prekursor auksiliar sventa jcholtik mantal 30 o 50 ora? Kalbetik skʼoplal jun meʼon ermano ti 84 xa sjabilale. Ta skoj ti mol xa xchiʼuk ti ip noʼox chaʼie, la snop ti mu stsʼaki yuʼun li yorae. Pe li prekursoretik ti te noʼox nopol nakalike la skoltaik sventa xikʼik batel ta cholmantal xchiʼuk la stʼujbeik lek ti bu xuʼ xchol mantale. Koliyal ti laj yichʼ koltaele la xchol mantal 30 ora ta jun u. ¿Mi oy van buchʼu stakʼ jkolta ta jtsobobbailtik ek sventa xtun ta prekursor li ta marso o avrile? Melel onoʼox ti mu jkotoltikuk xuʼ kuʼuntik xijtun ta prekursore, pe xuʼ jchʼak jkʼakʼaltik xchiʼuk xkakʼ kipaltik sventa masuk ep xij-abtej ta stojolal li Jeovae. Mi jech ta jpastike, ta me xkakʼtik ta ilel ti ta jtojtik ta vokol ti skʼanojutik li Kristoe, jech kʼuchaʼal la spas li jtakbol Pabloe. ¿Kʼusi  yan stakʼ jpastik sventa jtojtik ta vokol ti skʼanojutik li Diose?

12. ¿Kʼusi skʼan jpastik sventa skʼanutik li Diose?

¹² Ta xchibale jaʼ ti tstij koʼontontik ti akʼo jkʼan kermanotaktik ta skoj ti skʼanojutik li Diose. Xi la stsʼiba li jtakbol Juane: «Mi jech la skʼanutik li Diose persa skʼan jkʼan jbatik ta jujuntal ek» (1 Juan 4:7-11). Mi ta jkʼan ti akʼo skʼanutik li Diose skʼan me jkʼan li kermanotaktik eke (1 Juan 3:16). ¿Kʼuxi xuʼ xkakʼtik ta ilel?

13. ¿Kʼusi laj yakʼ kiltik li Jesuse?

¹³ Li Jesuse laj yakʼ kiltik kʼuxi xuʼ jkʼantik li yantike. Yuʼun kʼalal ay ta Balumile jaʼ mas la skolta li krixchanoetik ti bikʼit yakʼoj sbaike. La xpoxta li buchʼutik ip chaʼiike, li koxoetike, li maʼsatetike, li pakʼchikinetike xchiʼuk li umaʼetike (Mat. 11:4, 5). Li Jesuse mu xkoʼolaj kʼuchaʼal li jnitvanejetik ta relijione, yuʼun li stuke toj lek xaʼi xchanubtas li krixchanoetik ti oy ta yoʼonton chojtikinik li Diose (Juan 7:49). Skʼanojan li buchʼutik bikʼit yakʼoj sbaike xchiʼuk laj yakʼbe yipal ta skoltael (Mat. 20:28).

14. ¿Kʼusi stakʼ jpastik sventa xkakʼtik ta ilel ti jkʼanoj li kermanotaktike?

¹⁴ Li ta yuilal Snaʼobil slajel Kristoe lek me ti jnoptik kʼuxi xuʼ jkoltatik li kermanotaktik ta tsobobbaile, mas to li buchʼutik oy xa sjabilalike. ¿Mi xuʼ van xbat jvulaʼantik, xkichʼbetik batel jsetʼjutebuk kʼusi slajesik, jkoltatik ta spasel li kʼusitik skʼan pasel ta snaike, xkikʼtik batel ta tsobajel o ti xbat jchiʼintik ta cholmantale? (Kʼelo Lukas 14:12-14). Ta skoj ti skʼanojutik li Diose, jaʼ tstij koʼontontik sventa jkʼan li kermanotaktike.

15. ¿Kʼusi skʼan xkakʼtik venta jkotoltik?

¹⁵ Ta yoxibale jaʼ ti tstij koʼontontik ti akʼo xkakʼtik ta perton kermanotaktik ta skoj ti skʼanojutik li Diose. Jkotoltik jpasmulilutik xchiʼuk chijchamutik ta skoj li Adane, jaʼ yuʼun muʼyuk buchʼu xuʼ xal ti muʼyuk chtun yuʼun ti laj yakʼ xkuxlejal li Jesuse. Manchuk mi solel tukʼ yakʼoj sba li jun yajtunel Diose ta onoʼox xtun yuʼun ek. Jaʼ yuʼun skʼan me xkakʼtik venta jkotoltik ti xchʼayoj ep kiltik li Diose. ¿Kʼu yuʼun toj tsots skʼoplal ti xkakʼtik ventae? Te ta jtabetik stakʼobil ta yan parafo.

16, 17. 1) ¿Kʼusi chakʼ jchantik Jesus li ta lokʼolkʼop laj yale? 2) ¿Kʼusi skʼan jpastik mi ta jtojtik ta vokol ti tspasutik ta perton li Jeovae?

 ¹⁶ Li Jesuse lik yal jun lokʼolkʼop ta sventa jun mosoil ti oy 60 miyon ta sep denario yile. Pe chʼaybat yil yuʼun li ajvalile. Akʼo mi jech, muʼyuk bu la xchʼaybe yil jun xchiʼil ta mosoil ti kʼajomal noʼox 100 ta sep denario yile. Ti oyuk ta yoʼonton tstoj ta vokol ti chʼaybat yil yuʼun ajvalil li mosoil taje, la xchʼaybe yil jechuk li xchiʼil ta mosoile. Jaʼ yuʼun ilin ta jyalel kʼalal laj yaʼi li ajvalile, vaʼun la stak ta ikʼel li chopol mosoile xchiʼuk xi laj yalbee: «La jchʼaybot skotol li avil kʼalal xavokolet la-ay ta jtojolale. ¿Kʼu yuʼun ti muʼyuk xkʼuxubaj ta avoʼonton li achiʼil ta mosoil jech kʼuchaʼal laj kakʼ ta ilel xkʼuxul koʼonton ta atojolale?» (Mat. 18:23-35). ¿Kʼusi chakʼ jchantik Jesus li ta lokʼolkʼop taje? Jaʼ ti xkoʼolaj kʼuchaʼal chchʼay ep kiltik kʼalal tspasutik ta perton li Jeovae. Jech oxal, mi ta jtojtik ta vokole, ¿kʼusi van skʼan jpastik ek?

¹⁷ Xiuk me jnoptik kʼalal yakal ta jchapan jbatik ta sventa li Snaʼobil slajel Kristoe: «¿Mi oy junuk ermano ti chopol kʼusi spasojbune? ¿Mi vokol chkaʼi yakʼel ta perton?». Mi jeche, jchanbetik stalelal li Jeovae, yuʼun li stuke «ta [xchʼay] ti mulil coloʼile» (Sal. 86:5, Ch; Neh. 9:17). Mi ta jtojtik ta vokol ti chakʼutik ta pertone, ta sjunul me koʼontontik chkakʼtik ta perton li yantike. Jech xtok, mi ta jkʼantik ti akʼo skʼanutik xchiʼuk ti akʼo xakʼutik ta perton li Jeovae, skʼan me jkʼantik xchiʼuk xkakʼtik ta perton li kermanotaktike (Mat. 6:14, 15). Kʼalal chkakʼtik pertone, melel onoʼox ti maʼuk chchʼay-o ti kʼux laj kaʼitik li kʼusi lijpasbate, pe jaʼ me tskoltautik sventa xijmuyubajuk noʼox ta mas tsʼakal.

18. ¿Kʼusi koltaat-o Lili sventa stsʼikbe li spaltailtak Carolinae?

¹⁸ Bateltike toj vokol chkaʼitik ta stsʼikbel li spaltail kermanotaktike (kʼelo Efesios 4:32; Kolosenses 3:13, 14). Kalbetik skʼoplal jun ermana ti Lili sbie. ^[1] Li stuke ta sjunul yoʼonton laj yalbe ti tskʼan tskolta jun meʼon ermana ti Carolina sbie. Chikʼ batel ta buyuk noʼox xchiʼuk tskolta ta smanel li kʼusitik chtun yuʼune xchiʼuk ep ta tos kʼutik yelan tskolta. Akʼo mi chkoltavan tajek li Lilie, pe chchopol kʼoptavan li Carolinae xchiʼuk mu noʼox kʼusi skʼan. Jaʼ yuʼun vokol chaʼi bateltik li ermanae. Pe ti kʼusi la spase jaʼ ti la snopbe lek skʼoplal li slekil talelaltak Carolinae. Koliyal ti jech la spase, ep jabil la skolta, vaʼun ipaj xchiʼuk cham li Carolinae. Li Lilie oy tajek ta yoʼonton ti akʼo xa xchaʼkuxi tal li Carolinae, yuʼun tskʼan tskʼel yaʼi kʼalal tukʼil ants xaʼoxe. Mi ta jtojbetik ta vokol ti skʼanojutik Diose, ta me jtsʼikbetik ek li spaltail kermanotaktike. Jech xtok, li kʼanelal taje jaʼ me tskoltautik ti junuk koʼonton jmalatik mi lijpas ta tukʼil krixchanoe.

19. ¿Kʼusi skʼan jpastik mi ta jtojbetik ta vokol Dios li kʼusi spasoj ta jtojolaltike?

¹⁹ Ta melel, toj echʼ xa noʼox lek li matanal yakʼojbutik Jeovae. Li ta yuilal Snaʼobil slajel Kristoe, jnopbetik me lek smelolal li kʼusi spasoj Jeova xchiʼuk Jesus ta jtojolaltike. Kakʼtik me ta ilel jujun kʼakʼal ti ta jtojtik ta vokole. Jchanbetik me stalelal li Kristoe, jkʼan me li kermanotaktike xchiʼuk ta sjunuluk me koʼonton xkakʼtik ta perton.