MANTAL TA SLIKEBALTIK PAJINA: ¿MI OY VAN SBALIL TI MU JUTIK KʼOPE?
¿Mi chʼabal xa van buchʼu tsjut kʼop li avie?
Li Hitoshie te toʼox ch-abtej ta jun Departamento de contabilidad sventa bu tsaʼ yabtel li krixchanoetik ta Japone. Jun veltae, kʼalal jaʼo yakalik xchapel takʼine, albat yuʼun li bankilal bu ch-abtej ti akʼo mu xal skotol li kʼusitik spasojike. Pe li Hitoshie, laj yal ti mu x-akʼbat spas yuʼun li sjol yoʼontone. Pe li buchʼu bankilal yuʼune albat ti mi mu la spas jeche, ta la slokʼesat li ta yabtele, pe lokʼesat onoʼox.
Kʼalal echʼ jun chibuk ue, li Hitoshie chibaj yoʼonton kʼalal muʼyuk bu sta junuk abtel ti bu mu persauk sjut kʼope. Jech kʼuchaʼal liʼe, kʼalal bat saʼ yabtele, laj yal ti mu skʼan spas junuk abtelal ti bu skʼan xichʼ jutel kʼope. Xi laj yal li buchʼu la sjakʼbe yabtele: «¡Toj yan xa-o chkaʼi ti kʼu yelan chanope!». Li yutsʼ yalal xchiʼuk yamigotake laj yalbeik ti akʼo mu xchibaje, pe li stuke mu xa snaʼ mi jaʼ mas lek li kʼusi tspase. Xi chal stuke: «Lik jakʼbe jba mi jaʼ van mas lek ti mu xkal li kʼusi jchʼunoje».
Li kʼusi kʼot ta pasel ta stojolal li Hitoshie, chakʼ ta ilel ti mu skotoluk oy sbalil chaʼiik ti mu jutik kʼope. Melel onoʼox ti mu kʼusi tstaik-o chaʼiik li junantik buchʼutik chpʼolmajike. Xi laj yal jun ants ta Sudafricae: «Li bu chi-abteje skotol tsjutik kʼop li jchiʼiltak ta abtele xchiʼuk skotolik tskʼanik ti jech ta jpas eke».
Li jutbil kʼop o nopbil kʼope, jaʼ li kʼusi mas nopem xaʼiik spasel li krixchanoetike. Kʼalal la sjakʼbeik skʼoplal leʼ xa van ta jayibuk jabil li Universidad de Massachusetts ta sventa taje, li psicólogo Robert Feldman kʼot ta nopel yuʼun ti 60% li yijil krixchanoetike sjutojik xaʼox kʼop junuk velta kʼalal chloʼilajik lajunebuk minutoe. Xi laj yal li doktor Feldmane: «Labal to sba laj kaʼikutik. Muʼyuk bu jnopojkutik mi toj ep chichʼ jutel kʼop li ta jkuxlejaltik jujun kʼakʼale». ¿Kʼu van yuʼun ti akʼo mi skotol krixchanoetik spʼajojik ti chjutbatik kʼope, pe ti nopem tajek xaʼiik li jut kʼope?
¿Kʼu yuʼun epajem tajek li jut kʼope, li elekʼe xchiʼuk li yan kʼusitik bu chichʼ jutel kʼope? ¿Kʼusi chkʼot ta pasel yuʼun li jut kʼop ta stojolal li krixchanoetike? Li kʼusi mas tsots skʼoplale, ¿kʼusi xuʼ jpastik sventa mu jpastik jech?
