TOJ tsots skʼoplal li mantal ta jcholtike. Akʼo mi jech, ep krixchanoetik ti muʼyuk bu tsots skʼoplal chaʼiike. Jech xtok, li krixchanoetik ti lek chaʼiik mantal eke, mu la persauk xichʼ estudio chaʼiik.

Jaʼ jech kʼot ta stojolal Gavin ti chkʼot ta tsobajeletike, pe mu skʼan xichʼ estudio. Xi laj yale: «Chikʼexav tajek chkaʼi mi laj yakʼik venta ti mu masuk jnaʼ li kʼusi chal Vivliae. Jech xtok, mu jkʼan sloʼlaikun xchiʼuk mu jkʼan xkakʼ ke ta xchanel li Vivliae». ¿Kʼusi van la anop ta stojolal Gavin ti lajuk avojtikinike? ¿Mi laj van anop ti muʼyuk bu chchan-o Vivlia junuk kʼakʼale? Moʼoj, jaʼ jnopbetik skʼoplal kʼu to yelan xuʼ xjelbat xkuxlejal yuʼun chanubtaseletik ta Vivlia li jun krixchanoe. Xi laj yalbe steklumal li Jeovae: «Li chanubtasel cuʼune jaʼ jech ta xyal jech chac cʼu chaʼal chyal job osil, jech chac cʼu chaʼal xlilet [o svitsʼvun] voʼ chcʼot ta tsʼiʼlaltic» (Deut. 31:19, 30; 32:2). Kalbetik skʼoplal kʼu to yutsil li job osile, yuʼun jaʼ tskoltautik sventa jcholbetik mantal skotol li krixchanoetike (1 Tim. 2:3, 4).

Kʼun tajek svitsʼvun chyal li job osile. Toj vokol tstsob sba, ta kʼunkʼun tspas ta uni jpʼaj voʼ. Li kʼusi laj yalbe steklumal li Jeovae xkoʼolaj kʼuchaʼal job osil. Yuʼun ta slekil yoʼonton la skʼopon, lek noʼox xlamet yutsil xchiʼuk jamal xvinaj ti ch-ichʼvan ta mukʼe. Jaʼ me ta jchanbetik stalelal mi ta jchikintabetik lek kʼusi chal li buchʼu ta jcholbetik mantale, jaʼ xkaltik, ti xkakʼtik akʼo rasonajuke xchiʼuk ti snop lek stuke. Mi jech ta jpastike, mas me oy ta yoʼonton chchikinta li kʼusi chkalbetike xchiʼuk lek me kʼusi chkʼot ta pasel kuʼuntik ta skoj ti kʼu yelan ta jcholtik mantale.

Siket tajek li job osile. Jaʼ me jech siket yoʼonton kuʼuntik krixchanoetik mi jaʼ chkalbetik li kʼusi oy ta yoʼontonike. Jech kʼuchaʼal la spas jun ermano ti Chris sbie, jaʼ li buchʼu ta slikebal onoʼox la xcholbe mantal li Gavine. Muʼyuk bu la suj, yuʼun la skʼel lek kʼusi stakʼ pasel sventa junuk yoʼonton xloʼilajik ta sventa li Vivliae. Laj yalbe smelolal ti jun noʼox li kʼusi mas tsots skʼoplal chal li Vivliae, yuʼun mi laj kaʼibetik lek smelolale, jaʼ chkoltavan sventa xkaʼibetik lek smelolal li kʼusi chjelav ta tsobajeletike. Xi laj yalbe xtoke: «Li kʼusi la jchʼun-o ti melel li kʼusi chal Vivliae jaʼ ti la jchan lek ti kʼuxi kʼotemik ta pasel li albil kʼopetike». Taje kʼot ta yoʼonton li Gavine, jech oxal la xchʼam jun chanubtasel ta Vivlia kʼalal te xa ox jayibuk velta loʼilajike.

Toj jtunel sventa jkuxlejaltik li job osile. Li ta Israele te van kʼuk sjalil ti toj kʼixin xchiʼuk te van jayibuk u ti muʼyuk chakʼ voʼe. Jaʼ yuʼun ti chʼabaluk job osile, chtakij li tsʼiʼleletike. Li Diose laj yal ti chaʼiik taki oʼontonal ta mantal li krixchanoetik avie (Amós 8:11). Pe jech xtok un, laj yal ti xkoʼolaj «cʼu chaʼal job osil chacʼ» Jeova li buchʼutik tʼujbil chbatik ta vinajele, yuʼun jaʼ chalbeik krixchanoetik li bendisionetik chakʼ Ajvalilal yuʼun Diose. Jaʼ jech tspasik ek li ‹yan chijetike› (Miq. 5:7; Juan 10:16). Ta melel, kʼalal chbat kalbetik lekil aʼyejetik li krixchanoetik ta sventa Ajvalilale, jaʼ me jech tsta xkuxlejalik ta mantal. ¿Mi toj tsots skʼoplal chkiltik li mantal taje?

Jaʼ jun bendision chakʼ Jeova li job osile. (Deut. 33:13). Li mantal ta jcholtike jaʼ me jun bendision chaʼiik li buchʼutik oy ta yoʼonton chchikintaike. Jaʼ jech kʼuchaʼal kʼot ta stojolal li Gavine, yuʼun kʼalal lik xchan Vivliae jaʼ to laj yaʼibe lek smelolal li kʼusitik mu toʼox snaʼe. Laj yichʼ noʼox voʼ. Li avi une, li Gavin xchiʼuk yajnil ti Joyce sbie, yakʼojbeik tajek yipal ta xcholel li lekil aʼyejetik ta sventa li Ajvalilal yuʼun Diose.

Kʼalal ta jnopbetik lek skʼoplal li job osile, jaʼ me tskoltautik sventa tsotsuk skʼoplal xkiltik li cholmantale. ¿Kʼu yuʼun? Yuʼun kʼalal uni jpʼaj noʼox li job osile mu kʼusi bal-o yilel, pe kʼalal ta smiyonal xa noʼoxe ta me xtʼuxij yuʼun li balumile. Jaʼ jech ek, xuʼ van muʼyuk noʼox mas sbalil chkiltik ti kʼu yepal ta jcholtik mantale. Pe kʼalal jmoj ta jcholtik mantal xchiʼuk li yan yajtuneltak Jeovae, li lekil aʼyejetik ta jcholtike chkʼot ta «skotol li jteklumetike» (Mat. 24:14). Jaʼ yuʼun mi lijlokʼ ta xcholbel mantal krixchanoetik li okʼom chaʼeje, ¿mi jaʼ jun bendision chaʼiik ti likem tal ta stojolal Jeova ti kʼu yelan ta jcholtike? Jaʼ jech chaʼiik mi xkoʼolaj yutsil kʼuchaʼal job osil ti kʼu yelan ta jcholtike, jaʼ xkaltik, ti ta slekil koʼontontike, ti chakʼ siketel oʼontonale xchiʼuk ti chakʼ kuxlejale.