1-3. 1) ¿Kʼuxi yakʼoj ta ilel yajtsʼaklomtak Kristo ti toj tsots skʼoplal chilik li tsobajele? (Kʼelo li lokʼol ta slikebale). 2) ¿Kʼusi ta jchantik li ta xchanobil liʼe?

KʼALAL yichʼoj xa ox vuklajuneb jabil li Corinnae, chukbat batel smeʼ sventa xbat spas tsatsal abtelal. Pe ta mas tsʼakale, ikʼat batel ta namal lum ek ti Siberia sbie. Jaʼ te tsots abtej ta jun rancho ti ilbaj x-utat kʼuchaʼal jun mosoile. Bakʼintike tsujat ta abtel ta osiltik ti solel sik tajeke xchiʼuk ti chʼabal lek pim skʼuʼ spokʼe. Akʼo mi toj tsots chil svokol li Corinnae, la xchap skʼopik xchiʼuk jun ermana ti chbatik ta tsobajel ti nom to tajeke.

² Xi chal li Corinnae: «Mal xa tajek kʼakʼal la jkechan komel li kabtelkutike, vaʼun lixanavkutik batel te van 25 kilometrouk sventa xbat jtsakutik li trene. Yuʼun ta chib ora ta sob chlokʼ xchiʼuk vakib ora chichʼ batel yuʼun. Kʼalal liyalkutik ta trene, lixanavkutik to batel lajuneb kilometro sventa xibatkutik ti bu ch-echʼ tsobajele». ¿Mi la stabe sbalil ti nom xanav li Corinnae? Xi chale: «Li ta tsobajele te la jchankutik Li Jkʼel osil ta toyole xchiʼuk likʼejinkutik. La spat tajek koʼontonkutik xchiʼuk la stsatsubtas xchʼunel koʼontonkutik». Vaʼun sutik tal ta yoxibal kʼakʼal  li ermanaetik taje, pe li buchʼu sbainoj ranchoe, muʼyuk xakʼ venta mi oy bu ayik.

³ Toj tsots onoʼox skʼoplal chilik tsobajel li yajtuneltak Jeovae. Li baʼyel yajtsʼaklomtak Kristoe oy tajek ta yoʼonton tstsob sbaik sventa xichʼik ta mukʼ li Jeovae (Ech. 2:42). Jaʼ jech oy tajek ta koʼontontik ek. Pe jech kʼuchaʼal tsots chaʼiik jlom ermanoetike, jaʼ jech tsots chkaʼitik bakʼintik ek ti xijbat ta skotol tsobajeletike. Yikʼaluk van skʼan ep xij-abtej, ep van kʼusitik skʼan jpastik o toj lubem chkaʼi jbatik. Jaʼ yuʼun, ¿kʼusi van xuʼ skoltautik sventa mu jchʼaytik junuk tsobajel? ^[1] ¿Kʼuxi xuʼ xkalbetik yantik xchiʼuk li buchʼutik chkakʼbetik estudio ti toj tsots skʼoplal li tsobajeletike? Li xchanobil liʼe chakʼ kiltik kʼu yuʼun skʼan xijbat li ta tsobajeletike. Oy oxib srasonal, 1) ta jtabetik sbalil, 2) tstabeik sbalil li yantike xchiʼuk 3) lek chil li Jeovae. ^[2]

4. ¿Kʼuxi tskoltautik li jtsobajeltik sventa masuk to xkojtikintik li Jeovae?

⁴ Ep kʼusitik ta jchantik li ta jtsobajeltike. Ep kʼusitik ta jchantik ta sventa Jeova li ta jujun tsobajele. Kʼalal la jchantik ta jtsobobbailtik li livro «Tey me comanic o ta stojol ti scʼuxul yoʼnton ti Diose», ¿mi mu masuk to la jkʼantik Jeova kʼalal laj kaʼitik ti kʼu yelan stalelale xchiʼuk kʼalal laj kaʼibetik sloʼil li kermanotaktik ti ta sjunul yoʼonton chalike? Kʼalal chijkʼot ta tsobajeletik xtoke, mas to ep kʼusitik ta jchantik ta Vivlia kʼalal chkaʼitik ch-echʼ li mantaletike, li demostrasionetike xchiʼuk kʼalal ta jtsʼet chikintatik lek li tekstoetik chichʼ kʼelele (Neh. 8:7, 8). Jech xtok, toj ep me kʼusi ta jchantik li ta Skʼelel Vivlia jujun xemanae xchiʼuk kʼalal chkaʼitik kʼusitik tekstoal kʼot ta yoʼontonik li ermanoetike.

5. ¿Kʼuxi skoltaojot ta akuxlejal xchiʼuk ta cholmantal li tsobajele?

⁵ Li tsobajeletik ch-echʼ kuʼuntike tskoltautik ta yakʼel ta jkuxlejaltik li kʼusi chal Vivliae, jech kʼuchaʼal li Xchanel Li Jkʼel osil ta toyole (1 Tes. 4:9, 10). ¿Mi xvul ta ajol kʼu yelan la skoltaot junuk xchanobil sventa masuk xapasbe yabtel li Jeovae, ti xatojobuk mas ta spasel orasione o ti x-ayanuk mas ta avoʼonton yakʼel pertone? Toj ep kʼusi chakʼ jchantik xtok li tsobajeletik ch-echʼ kuʼuntik ta xokol kʼakʼale, yuʼun te ta jchantik kʼuxi ta jcholtik mantal xchiʼuk kʼuxi xuʼ xkalbetik lek smelolal li kʼusi chal ta melel Vivliae (Mat. 28:19, 20).

6. ¿Kʼuxi tspat koʼontontik xchiʼuk chakʼ kipaltik li tsobajele?

⁶ Tspat koʼontontik li tsobajeletike. Li sbalumil Satanase chchibajes yaʼi koʼontontik xchiʼuk tslubtsanutik. Yan li jtsobajeltike tspat koʼontontik xchiʼuk chakʼ kipaltik sventa xijtun-o batel ta stojolal li Jeovae (kʼelo Echos 15:30-32). Ep te chichʼ albel smelolal kʼu yelan kʼotem ta pasel li albil kʼopetik ta Vivliae. Vaʼun jaʼ tskoltautik sventa jpat koʼontontik ti jpʼel onoʼox skʼoplal chkʼot ta pasel yuʼun Jeova li kʼusi yaloje. Jech xtok, tspat koʼontontik kʼalal chkaʼitik li mantal chetʼes ermanoetike. Pe maʼuk noʼox me un, yuʼun chkʼot ta koʼontontik xtok kʼalal chkaʼitik chakʼ sloʼilike xchiʼuk kʼalal ta sjunul yoʼonton chkʼejinike (1 Kor. 14:26). Oy to kʼusi ti xkuxet noʼox koʼontontik yuʼune, jaʼo kʼalal ta jchiʼin jbatik ta loʼil kʼalal mu to chlik o kʼalal chlaj li tsobajele, yuʼun te chkakʼtik venta ti ep tajek kamigotaktik ti oyutik ta yoʼontone (1 Kor. 16:17, 18).

7. ¿Kʼu yuʼun skʼan xijbat li ta tsobajele?

⁷ Tskoltautik chʼul espiritu li ta tsobajele. Sventa tsbeiltas tsobobbailetik li Jesuse, jaʼ tstunes li xchʼul espiritu Diose. Jaʼ yuʼun xi chale: «Akʼo yaʼi li kʼusi ch-albat  yuʼun chʼul espiritu li tsobobbailetike» (Apok. 2:7). Li chʼul espiritue jaʼ tskoltautik sventa stsal kuʼuntik li akʼel ta prevae, ti tsotsuk koʼonton jcholtik mantale xchiʼuk ti lekuk kʼusi xkʼot ta nopel kuʼuntike. Jech oxal, skʼan me xkakʼbetik yipal ti xijbat ta tsobajel sventa xakʼbutik xchʼul espiritu li Diose.

8. ¿Kʼuxi xuʼ jpatbetik yoʼonton ta tsobajel li kermanotaktike? (Kʼelo xtok li rekuadro «Xkuxet xa chkaʼi kʼalal chisut tal ta tsobajele»).

⁸ Kʼalal chijbat ta jtsobajeltike jaʼo me xuʼ xkakʼbetik yil kermanotaktik ti jkʼanojtike. Ep ermanoetik ta jtsobobbailtike tsnuptanik tsatsal vokoliletik. Xi la stsʼiba li jtakbol Pabloe: «Skʼan me oyuk ta koʼonton jbatik ta jujuntal» (Evr. 10:24, 25). Kʼuchaʼal chkakʼtik ventae, skʼan me xkakʼbetik yil kermanotaktik ti oyik ta koʼontontike, jtos ti kʼuxi xuʼ jpastike jaʼ kʼalal chijbat ta tsobajel sventa jpatbe jba koʼontontik ta jujuntale. Yuʼun kʼalal chijbat ta tsobajele chkakʼtik ta ilel ti xijmuyubaj noʼox ti te jchiʼuktike xchiʼuk ti ta jchiʼintik ta loʼil sventa jkoltatike. Jech xtok, ta me jpatbetik yoʼontonik kʼalal chkakʼ kuni loʼiltike xchiʼuk kʼalal ta sjunul koʼonton chijkʼejine (Kol. 3:16).

9, 10. 1) Jech kʼuchaʼal chal Juan 10:16, ¿kʼu yuʼun toj tsots skʼoplal ti xijbat ta tsobajele? 2) Kʼalal muʼyuk ta jchʼay jbatik ta junuk tsobajele, ¿kʼuxi tstabeik sbalil li ermanoetik ti stuk chkʼotike?

⁹ Kʼalal chijbat ta jtsobajeltike ta jkolta jbatik sventa jmojuk oyutik (kʼelo Juan 10:16). Li Jesuse laj yal ti xkoʼolaj kʼuchaʼal jun jchabichije xchiʼuk ti jaʼ jtsop xchijtak li yajchankʼoptake. Pe jnoptik avaʼi ti ta jot-o vits chveʼ chaʼkot chije, chaʼkot ta stenlejaltik xchiʼuk yan-o bu oy li jkote, ¿mi xuʼ van xkaltik ti jaʼik jtsop chij ta melele? Ta melel maʼuk, yuʼun skʼan jmoj oyikuk ti jechuke xchiʼuk skʼan jmoj stsʼakliik batel li jchabichij yuʼunike. Jaʼ jech li voʼotik eke, mi ta jkʼan ta jtsʼaklitik batel li Jchabichij kuʼuntike, skʼan me mu jchʼak jbatik lokʼel. Jaʼ yuʼun, skʼan me xijkʼot ta tsobajel sventa ‹jtsop noʼox chij xijkʼot, vaʼun jun jchabichij chkʼot kuʼuntik›.

¹⁰ Li jtsobajeltike jaʼ tskoltautik sventa jaʼukutik kʼuchaʼal jun utsʼ alalil ti skʼanoj sbaike (Sal. 133:1). Jlom ermanoetike kontrainbil yuʼun stot smeʼik o xchiʼiltakik ta vokʼel ta skoj ti jaʼik stestigo Jeovae. Akʼo mi jech, laj yal ta jamal Jesus ti ch-akʼbatik yutsʼ yalalik ti lek yoʼontonike xchiʼuk ti chchabiatike (Mar. 10:29, 30). Jaʼ yuʼun mi nopem xkaʼitik chijkʼot ta tsobajele, ta me xijkʼot ta sbankil o yitsʼin, ta xvix o yixlel, ta smeʼ o stot li buchʼutik stuk chkʼotik ta tsobajele. Jech oxal, kʼalal ta jnopbetik lek skʼoplal taje jaʼ me tskoltautik sventa xkakʼtik persa ti mu jchʼay jbatik ta junuk tsobajele.

11. ¿Kʼusi chkakʼbetik Jeova kʼalal chijkʼot ta tsobajele?

¹¹ Kʼalal chijbat ta jtsobajeltike jaʼ sventa xkakʼbetik Jeova li kʼusi sta-oe. Ta skoj ti jaʼ Jpasvanej kuʼuntike, skʼan jtojbetik ta vokol, xkichʼtik ta mukʼ xchiʼuk ti jkʼupil kʼoptatike (kʼelo Apokalipsis 7:12). Jaʼ jech ta jpastik kʼalal ta jkʼopontik li Jeovae, kʼalal ta jkʼejintatike xchiʼuk kʼalal chkalbetik skʼoplale. Ti chijbat ta tsobajel sventa xkichʼtik ta mukʼe, ¡jaʼ jun mukʼta matanal!

12. ¿Kʼu yelan chil Jeova kʼalal ta jchʼunbetik smantale?

¹² Ta skoj ti jaʼ la spasutik li Jeovae, sta-o me ti jchʼunbetik smantale. Jaʼ chalbutik ti akʼo xijbat ta tsobajeletike, mas to avi ti solel poʼot xa xlaj li kʼusitik chopole. Vaʼun xkuxet me tajek yoʼonton kʼalal ta jchʼunbetik smantale (1 Juan 3:22). Yiloj me ti oy tajek ta koʼontontik ti chijbat kaʼitik li ta tsobajele xchiʼuk toj ep me sbalil chil ti chkakʼbetik yipale (Evr. 6:10).

13, 14. ¿Kʼuxi chijnopaj-o ta stojolal Jeova xchiʼuk Xnichʼon kʼalal chijbat ta tsobajele?

¹³ Kʼalal chijbat ta jtsobajeltike chkakʼbetik yil Jeova ti ta jkʼan chijnopaj ta stojolale xchiʼuk ta stojolal li Xnichʼone. Kʼalal chijkʼot ta tsobajele ta jchantik li Vivliae, ta jchantik li kʼusi tskʼanbutik Jeovae xchiʼuk ti kʼu yelan tskʼan chijkuxie (Is. 30:20, 21). Kʼalal ta krixchanoetik ti maʼuk stestigotak Jeovae, chakʼik venta ti jaʼ tsbeiltas Jeova li jtsobajeltike (1 Kor. 14:23-25). Ta melel, li Jeovae jaʼ tsbeiltas ta xchʼul espiritu li jtsobajeltike xchiʼuk jaʼ te chlik tal ta stojolal li kʼusi ta jchantik tee. Jaʼ yuʼun kʼalal chijbat ta tsobajele, jaʼ te tskʼoponutik li Jeovae xchiʼuk chkiltik kʼu yelan skʼanojutik, vaʼun jaʼ chijnopaj-o mas ta stojolal.

¹⁴ Xi chal Jesus ti jaʼ li Jolil ta tsobobbaile: «Ti bu oyik chaʼvoʼ o oxvoʼ ta jventae, te oyun ta oʼlol ti bu oyike» (Mat. 18:20). Li Vivliae chal xtok ti «te chanav ta oʼlol» tsobobbailetik li Jesuse (Apok. 1:20–2:1). Jamal xvinaj ti jaʼ tstsatsubtasutik Jeova xchiʼuk Jesus li ta jtsobajeltike. ¿Kʼu van yelan chaʼi sba Jeova xanaʼ kʼalal chil ti chkakʼbetik yipal sventa xijnopaj ta stojolal xchiʼuk ta stojolal li Xnichʼone?

15. ¿Kʼuxi chkakʼtik ta ilel ti jaʼ ta jkʼan ta jchʼunbetik smantal Jeova kʼalal chijbat ta tsobajele?

¹⁵ Kʼalal chijbat ta tsobajele chkakʼbetik yil Jeova ti ta jkʼan ta jchʼunbetik smantale. Li Jeovae muʼyuk tsujutik ta spasel li kʼusi chalbutike (Is. 43:23). Pe kʼalal chkʼot ta nopel kuʼuntik ti ta jchʼunbetik smantale, chkakʼbetik yil ti jkʼanojtike xchiʼuk ti jchʼunojtik ta melel ti lek li kʼusi chalbutike (Rom. 6:17). Jaʼ yuʼun jnoptik avaʼi liʼe: ¿Kʼusi van ta jpastik mi chalbutik jpatrontik ti akʼo xij-abtejutik tajeke, ti mu xa xakʼ ora xijbat ta tsobajele? ¿O kʼusi van ta jpastik mi xi chalbutik li ajvalile: «Li buchʼu chbat ta tsobajel sventa chichʼ ta mukʼ Jeovae, skʼan me stoj smulta, xbat ta chukel xchiʼuk chichʼ akʼbel stoj smul», ti xie? Jech xtok, xuʼ van mu jkʼan xijbat ta tsobajel ta skoj ti oy kʼusi ta jkʼan ta jpastike. Veno, li kʼusi oy ta yoʼonton Jeovae jaʼ ti jnop lek jtuktik kʼusi ta jpastik mi jech la jnuptantike (Ech. 5:29). Pe mi kʼot ta nopel kuʼuntik ti jaʼ ta jchʼunbetik smantal li Jeovae, xkuxet noʼox me yoʼonton kuʼuntik (Prov. 27:11).

16, 17. 1) ¿Kʼu yuʼun jnaʼojtik ti toj tsots skʼoplal laj yilik tsobajel li baʼyel yajtsʼaklomtak Kristoe? 2) ¿Kʼusi laj yal George Gangas ta sventa li tsobajele?

¹⁶ Kʼalal echʼ xa ox li kʼin Pentekostes ta sjabilal 33, jech-o la stsob sbaik sventa chichʼik ta mukʼ Jeova li baʼyel yajtsʼaklomtak Kristoe. Xi chal Vivlia ta sventa taje: «Jech-o laj yakʼ ta yoʼontonik li chanubtasel yuʼun jtakboletike, koʼol tstsob sbaik»  (Ech. 2:42). Jech xtok, kʼalal laj yichʼik kontrainel yuʼun li ajvalil ta Roma xchiʼuk li jnitvanejetik ta relijione, muʼyuk bu xikta sbaik li ta tsobajele. Jaʼ jech, manchuk mi tsots laj yil svokolik muʼyuk xlubtsajik, jech-o laj yakʼbeik yipal li tsobajele.

¹⁷ Jaʼ jech li yajtuneltak Jeova avi eke, xmuyubaj noʼox ti chbatik ta tsobajele xchiʼuk tstojik tajek ta vokol. Jun ermano ti George Gangas sbie, ti tun mas ta 22 jabil ta Jtsop Jbeiltasvaneje, xi chale: «Jtos ti kʼusi toj tsots skʼoplal chkaʼie xchiʼuk ti tspatbun tajek koʼontone, jaʼ ti chikʼot ta tsobajele. Ta jkʼupin tajek ti chibat ta Salon sventa Tsobobbaile, mi xuʼ chkile sob noʼox chikʼot xchiʼuk ta slajeb to chilokʼ tal. Solel ximuyubaj tajek kʼalal ta jchiʼin ta loʼil li ermanoetike. Xkoʼolaj kʼuchaʼal kutsʼ kalaltak chkaʼi ti jmoj nakalunkutike xchiʼuk oyun ta jun paraiso yaʼeluk xchiʼuk li kermanotake». Xi to chale: «Ta melel, li kʼusi oy tajek ta koʼontone, jaʼ ti xibat ta tsobajele».

18. ¿Kʼu yelan chavil li tsobajele, xchiʼuk kʼusi jpʼel ta avoʼonton chapas batel?

¹⁸ ¿Mi jech oy tajek ta avoʼonton tsobajel jech kʼuchaʼal li ermano taje? Mi jeche, mu me xavikta li tsobajele, manchuk mi xanuptan vokolil. Vaʼun jaʼ jech chavakʼ ta ilel ti jaʼ jech chavaʼi aba kʼuchaʼal li ajvalil David ti xi laj yale: «Mucʼul Dios, jun noʼox coʼnton yuʼun li achʼulna bu nacalote» (Sal. 26:8).