1, 2. ¿Kʼuxi laj yakʼ ta ilel jtakbol Pablo ti tstoj ta vokol li slekil yutsil yoʼonton Diose?

LI JTAKBOL Pabloe laj toʼox skontrain li yajtsʼaklomtak Kristoe. Jech oxal, snaʼoj lek ti mu sta-o xkʼuxubinate. Jaʼ yuʼun xi laj yal ta sjunul yoʼontone: «Maʼuk jecheʼ li slekil yutsil yoʼonton [Dios] jtaoje» (kʼelo 1 Korintios 15:9, 10).

² Kʼalal poʼot xa ox xcham li Pabloe, xi laj yalbe li Timoteoe: «Ta jtojbe ta vokol Kajvaltik Kristo Jesus ti laj yakʼbun juʼele, yuʼun tukʼ laj yilun kʼalal laj yakʼbun kabtele» (1 Tim. 1:12-14). ¿Kʼusi li abtelal akʼbate? Xi laj yalbe moletik ta tsobobbail ta Efeso li Pabloe: «Maʼuk tsots skʼoplal chkil li jkuxlejale jaʼ noʼox venta mi tsuts li anilajel kuʼune xchiʼuk li abtelal ti laj kichʼ ta stojolal li Kajvaltik Jesuse, ti skʼan lek tsʼakal chkalbe skʼoplal li mantal sventa li lekil aʼyejetik ta sventa li slekil yutsil yoʼonton Diose» (Ech. 20:24).

3. ¿Kʼusi abtelal tsots skʼoplal akʼbat li Pabloe? (Kʼelo li lokʼol ta slikebale).

³ ¿Kʼusi «li lekil aʼyejetik» la xchol Pabloe? ¿Xchiʼuk kʼu yuʼun xuʼ  xkaltik ti jaʼ svinajeb slekil yutsil yoʼonton Dios li lekil aʼyejetik la xchole? Xi laj yalbe yajtsʼaklomtak Kristo ta Efeso li Pabloe: «Avaʼiojbeik skʼoplal li kʼusi jbainoj ta sventa li slekil yutsil yoʼonton Dios ti li-akʼbat ta akojike» (Efes. 3:1, 2). Li kʼusi akʼbat sbain yuʼun Jesus li Pabloe jaʼ ti xcholbe mantal li krixchanoetik ti maʼuk judaetike. Jtos ti kʼusi chalbe li krixchanoetike jaʼ ti stakʼ xchiʼinik ta ajvalilal li Mesiase (kʼelo Efesios 3:5-8). Xmuyubaj noʼox la xchol mantal li Pabloe, jaʼ yuʼun toj lek ti jechuk jpastik eke. Vaʼun jaʼ jech laj yakʼ ta ilel ti ‹mu jecheʼuk li slekil yutsil yoʼonton Diose›.

4, 5. Kʼalal ta jcholtik «li lekil aʼyejetik ta sventa li [Ajvalilale]», ¿kʼu yuʼun jaʼ chkalbetik skʼoplal li slekil yutsil yoʼonton Diose?

⁴ Li ta slajebal kʼakʼal liʼe, yakʼoj jtos kabteltik li Jeova eke, jaʼ ti jcholtik «li lekil aʼyejetik ta sventa li Ajvalilal» yuʼun Diose. Skʼan xkaltik batel «ta spʼejel balumil sventa xaʼi skotol li jteklumetike» (Mat. 24:14). «Li lekil aʼyejetik ta sventa li Ajvalilal» taje koʼol xchiʼuk «li lekil aʼyejetik ta sventa li slekil yutsil yoʼonton Diose». ¿Kʼu yuʼun jech chkaltik? Yuʼun skotol li bendision chakʼbutik li Ajvalilal yuʼun Diose, jaʼ koliyal li slekil yutsil yoʼonton Jeovae (Efes. 1:3). ¿Kʼu yelan la stojbe ta vokol slekil yutsil yoʼonton Dios li Pabloe? Jaʼ ti xmuyubaj noʼox la xchol mantale. ¿Mi jaʼ jech xijmuyubaj ta jcholtik mantal ek? (Kʼelo Romanos 1:14-16).

⁵ Li ta yan xchanobil echʼe te laj kalbetik skʼoplal ti kʼuxi xuʼ jtabetik sbalil li slekil yutsil yoʼonton Dios manchuk mi jpasmulilutike. Jech xtok, la jchantik ti ep ta jtatik bendision yuʼun li slekil yutsil yoʼontone. Jech oxal, oy me kʼusi toj tsots skʼoplal jbainojtik ek, jaʼ ti xkalbetik krixchanoetik ti skʼanojutik li Jeovae xchiʼuk ti kʼusi skʼan spasik sventa stabeik sbalil li slekil yutsil yoʼonton Diose. ¿Kʼuxi xuʼ jkoltatik sventa stojik ta vokol taje?

6, 7. Kʼalal chkalbetik krixchanoetik ti cham ta jtojolaltik li Jesuse, ¿kʼu yuʼun jaʼ yakal chkaltik li slekil yutsil yoʼonton Diose?

⁶ Ep krixchanoetike muʼyuk bu chopol chaʼi sbaik kʼalal tspas smulike. Jaʼ yuʼun, mu xaʼibeik smelolal kʼuxi xuʼ stabeik sbalil ti cham ta jtojolaltik li Jesuse. Jech xtok, mas xa toj ep krixchanoetik ti muʼyuk noʼox bu xkuxet yoʼontonike. Pe kʼalal chchiʼinatik ta loʼil yuʼun li stestigotak Jeovae, jlome jaʼ to chaʼibeik smelolal kʼusi jaʼ li mulile, ti kʼuxi ch-akʼbat svokolike xchiʼuk ti kʼusi skʼan spasik sventa xkolik lokʼel ta yok skʼob li mulile. Jaʼ yuʼun, mi oy ta yoʼontonik ta melele, jaʼ chtijbat yoʼontonik ta stojel ta vokol ti la stak tal ta Balumil Xnichʼon li Jeovae, taje jaʼ sventa spojutik lokʼel li ta mulile xchiʼuk li ta lajelale. Jech xtok, chchanik ti jaʼ ta skoj ti skʼanojutik tajek Jeova xchiʼuk ti toj echʼem slekil yutsil yoʼonton ti jech la spase (1 Juan 4:9, 10).

⁷ Jkʼeltik avil kʼusi laj yal Pablo ta sventa li Xnichʼon Jeova ti skʼanoj tajeke: «Ta stojolal Dios la jtatik kolebal ta skoj pojelal ta sventa li xchʼichʼel Xnichʼone, jech, la jtatik perton ta skoj li jmultike». Laj yal xtok ti jaʼ koliyal slekil yutsil yoʼonton Dios ti la jtatik kolebale (Efes. 1:7). Ti bu mas laj yakʼ ta ilel ti skʼanojutik tajek li Diose xchiʼuk ti toj echʼem slekil yutsil yoʼontone, jaʼ kʼalal laj yakʼ ta matanal li Kristoe. Xkuxet to koʼontontik kʼalal chkaʼitik taje, yuʼun mi chkakʼ xchʼunel koʼontontik ti cham ta jtojolaltik li Jesuse, tspas perton jmultik li Jeovae xchiʼuk lek sak jol koʼontontik (Evr. 9:14). ¡Jaʼ jun lekil aʼyej ta melel! ¿Mi mu jechuk ti oy ta koʼonton chkalbetik skotol krixchanoetike?

8. Ta skoj ti jpasmulilutike, ¿kʼusi skʼan jpastik yoʼ xchaʼta yav ti kʼu yelan xkil jbatik xchiʼuk Diose?

⁸ Skotol li krixchanoetik ti muʼyuk chakʼ xchʼunel yoʼontonik ta stojolal li matanal laj yakʼ Jesuse, jaʼ yajkontratak chil li Jeovae. Jaʼ yuʼun, voʼotik me oy ta jbatik yalbel kʼusi skʼan spasik yoʼ xkʼotik ta yamigo li Diose. Xi la stsʼiba li jtakbol Juane: «Tsta xkuxlejal sbatel osil li buchʼu chakʼ xchʼunel yoʼonton ta stojolal li Nichʼonile; pe li buchʼu mu xchʼunbe smantal li Nichʼonile muʼyuk bu chil li kuxlejale, jaʼ noʼox te oy-o ta stojolal li skʼakʼal yoʼonton Diose» (Juan 3:36). Ta melel, ti laj yakʼ sba ta matanal li Kristoe, jaʼ sventa xijkʼot ta yamigo li Diose. Xi laj yalbe smelolal li Pabloe: «Nom toʼox oyoxuk xchiʼuk jkontrainvanejoxuk toʼox, yuʼun jaʼ toʼox te avakʼoj anopbenik li ta abtelal ti toj chopole, la xchaʼta yav yuʼun Dios ti kʼu yelan xavil abaik xchiʼuke, taje jaʼ ta skoj li sbekʼtal Jesus ti chame» (Kol. 1:21, 22).

9, 10. 1) ¿Kʼusi abtelal akʼbatik yuʼun Kristo li buchʼutik tʼujbil chbatik ta vinajele? 2) ¿Kʼuxi chkoltavanik li yan chijetike?

⁹ Akʼbil yabtelik yuʼun Kristo li buchʼutik tʼujbil chbatik ta vinajel ti liʼ to oyik ta Balumile, jaʼ ti xalik batel «li lekil aʼyejetik ta sventa li jun oʼontonale». Xi albatik yuʼun li Pabloe: «Likem talel ta stojolal Dios skotol li kʼusitike, yuʼun jaʼ stuk laj yakʼ ta stojolal Kristo ti chchaʼta yav ti kʼu yelan xkil [jbatik] xchiʼuke, jech xtok yakʼoj [kabteltik] ta yalel batel li lekil aʼyejetik ta sventa li jun oʼontonale, jaʼ xkaltik, ta stojolal Kristo ti chchaʼta yav ti kʼu yelan xil sba Dios xchiʼuk li krixchanoetike, muʼyuk bu chchapbe li smulike xchiʼuk spatoj yoʼonton ta [jtojolaltik] ti xuʼ [xkaltik] batel li lekil aʼyejetik ta sventa li jun oʼontonal taje. Jaʼ yuʼun, [kʼotemutik] ta xkʼexol Kristo, voʼon [yajkʼopojelutik], xkoʼolaj kʼuchaʼal chtakvan ta ikʼel Dios ti jaʼ [tstunesutike]. [Jaʼutik] xkʼexol Kristo ti xi ta [jkʼantik] vokole: ‹Akʼo xchaʼta yav ti kʼu yelan xavil abaik xchiʼuk li Diose›» (2 Kor. 5:18-20).

¹⁰ Jaʼ jun mukʼta matanal chaʼi yan chijetik ti tskoltaik li buchʼutik tʼujbil chbatik ta vinajel sventa spasik li abtelal taje (Juan 10:16). Kʼalal jech chkoltavanike, jaʼ jech chkʼotik ta yajkʼopojel li Kristoe. Ti melel xkaltike, jaʼ mas ep chcholik mantal xchiʼuk chchanubtasvanik ta Vivlia li yan chijetike. Vaʼun jaʼ jech tskoltaik yan krixchanoetik sventa xkʼotik ta yamigo li Diose. Taje toj tsots me skʼoplal ti jech tspasike, yuʼun jaʼ yakal chcholbeik skʼoplal «li slekil yutsil yoʼonton Diose».

11, 12. ¿Kʼu yuʼun jaʼ jun lekil aʼyej chaʼi krixchanoetik ti chchikinta j-orasiontik li Jeovae?

¹¹ Ep krixchanoetike tspasik orasion sventa junuk noʼox yoʼonton xaʼi sbaik, pe muʼyuk xchʼunojik mi chaʼi j-orasiontik ta melel li Diose. Jaʼ yuʼun, skʼan me xaʼibeik smelolal ti ta onoʼox xaʼi j-orasiontik li Diose. Xi laj yalbe Jeova ta jun kʼejoj li Davide: «Voʼot chavaʼibun li jcʼopcutique; voʼot noʼox xuʼ chtal ta atojol scotol li cristianoetique. Li cʼusitic chopole tscʼan chistsalun, pero voʼot noʼox chapasbuncutic perdón ti bu chijelovcutic ta atojole» (Sal. 65:2, 3).

¹² Xi laj yalbe yajchankʼoptak ta sventa orasion li Jesuse: «Kʼusiuk noʼox ti chakʼanbeik li Totile, jaʼ chakʼboxuk ta jbi» (Juan 16:23). Jaʼ jech laj yakʼ ta aʼyel Jesus ti stakʼ jkʼanbetik Jeova ti kʼusi oy ta koʼontontike xchiʼuk ti tstakʼbutik mi jaʼ jech ta jkʼantik kʼuchaʼal tskʼan yoʼontone. Li Juane xi laj yalbe skʼoplal li Jeovae: «Liʼe jaʼ li kʼusi jpatoj-o koʼontontik ta stojolale, yuʼun kʼusiuk noʼox ti ta jkʼanbetike chaʼibutik mi jech ta jkʼanbetik jech kʼuchaʼal tskʼan yoʼontone» (1 Juan 5:14). Xijmuyubaj noʼox chkalbetik krixchanoetik  ti maʼuk noʼox sventa junuk koʼonton xkaʼi jbatik yuʼun li orasione. Moʼoj, yuʼun kʼalal ta jkʼopontik li Jeovae, «chijnopaj ta stojolal li chotlebal sventa ajvalilal ta sventa li slekil yutsil oʼontonale» (Evr. 4:16). Jaʼ yuʼun, skʼan jchanubtastik ti kʼu yelan skʼan spasik orasion li krixchanoetike, ti buchʼu skʼan skʼoponike xchiʼuk ti kʼusi stakʼ xal ta s-orasionike. Vaʼun jaʼ jech ta jkoltatik sventa xkʼot ta yamigoik li Jeovae xchiʼuk ti sta spatobil yoʼontonik kʼalal chil svokolike (Sal. 4:1; 145:18).

13, 14. 1) ¿Kʼusi toj labal sba yutsil tstaik li buchʼutik tʼujbil chbatik ta vinajele? 2) ¿Kʼusi labal sba abtelal tspasik ta stojolal li krixchanoetike?

¹³ Mi laj xa ox yichʼ akʼbel slajeb li kʼusitik chopole, mas to me chakʼ ta ilel Jeova li slekil yutsil yoʼontone. ¿Kʼu yelan tspas? Baʼyuke jaʼ ti tstaik jun mukʼta matanal li 144 mil ti chchiʼinik ta ajvalil ta vinajel li Kristoe. ¿Kʼusi li mukʼta matanal tstaike? Xi laj yalbe smelolal li Pabloe: «Ta skoj ti lek tajek chkʼuxubinvan li Diose xchiʼuk ti la skʼanutik ta skoj ti toj mukʼ li kʼanelal yuʼune, jmoj laj yakʼ chijkuxi yan velta xchiʼuk Kristo kʼalal chamemutik toʼox ta skoj jpaltailtike, laj xa avichʼik koltael lokʼel ta skoj li slekil yutsil oʼontonale. Jech xtok, jmoj la xchaʼkuxesutik xchiʼuk jmoj la xchotanutik te ta vinajel ti jmoj oyutik xchiʼuk li Kristo Jesuse, sventa mi vul li achʼ balumile xuʼ xakʼbutik ta ilel ti mu xa noʼox albajuk li slekil yutsil yoʼonton ta skoj li xkʼuxul yoʼonton ta jventatik ti voʼotik jmoj oyutik xchiʼuk li Kristo Jesuse» (Efes. 2:4-7).

¹⁴ Solel mu xa noʼox xnop kuʼuntik kʼu to yutsil li matanal ch-akʼbatik li buchʼutik tʼujbilik kʼalal mi ch-ajvalilajik xa ox ta vinajel xchiʼuk li Kristoe (Luk. 22:28-30; Filip. 3:20, 21; 1 Juan 3:2). Ta melel, «mu xa noʼox albajuk li slekil yutsil yoʼonton» Dios ch-akʼbatike. Yuʼun jaʼ chkʼotik li ta «Achʼ Jerusalene» xchiʼuk li ta «jnupunel tseb» sventa xnupunik xchiʼuk li Kristoe (Apok. 3:12; 17:14; 21:2, 9, 10). Jech xtok, koʼol ch-abtejik xchiʼuk Kristo ‹sventa xpoxtaik li lumetike›. Taje jaʼ skʼan xal ti tskoltaik lokʼel ta yok skʼob mulil xchiʼuk ta lajelal li krixchanoetike, vaʼun tspasik ta tukʼil krixchano (kʼelo Apokalipsis 22:1, 2, 17).

15, 16. ¿Kʼuxi chakʼ ta ilel slekil yutsil yoʼonton Dios ta stojolal li yan chijetike?

¹⁵ Li ta Efesios 2:7 chal ti chakʼ ta ilel slekil yutsil yoʼonton Dios li ta «achʼ balumile». Li vaʼ kʼakʼale, «mu xa noʼox albajuk li slekil yutsil yoʼonton» Dios tskʼupinik skotol li buchʼutik chkuxiik ta Balumile (Luk. 18:29, 30). Jtos ti kʼu yelan chakʼ ta ilel slekil yutsil yoʼonton li Jeovae, jaʼ ti chchaʼkuxes li animaetike (Job 14:13-15; Juan 5:28, 29). ¿Buchʼutik ti chchaʼkuxiike? Junantike jaʼ li tukʼil yajtuneltak Jeova ti chamik kʼalal skʼan toʼox xcham li Kristoe. Jech xtok, li yan chijetik ti chchamik ta slajebal kʼakʼale, chchaʼkuxiik ek. Vaʼun jmoj xa chtunik ta stojolal li Jeovae.

¹⁶ Jech xtok, ta smiyonal xa noʼox krixchanoetik chichʼik chaʼkuxesel ti muʼyuk xojtikinik li Diose. Xi la stsʼiba li Juane: «Laj kil ta bikʼit ta mukʼ li buchʼutik chamemik ti te vaʼajtik ta yeloval li chotlebal sventa ajvalilale xchiʼuk lik jamuk balbalvunetik. Pe jam yan balbalvun; jaʼ li sbalbalvunal kuxlejale. Vaʼun li buchʼutik chamemike laj yichʼik chapanel jech kʼuchaʼal li kʼusi te tsʼibabil ta balbalvunetike, jaʼ ti kʼu yelan la spasike. Vaʼun li nabe la skolta lokʼel li buchʼutik te chamemik ta stojolale, jech ek li lajelal xchiʼuk li Mukinale la skoltaik lokʼel li buchʼutik te chamemik ta stojolalike, vaʼun ta jujuntal laj yichʼik chapanel jech kʼuchaʼal la spasike» (Apok. 20:12, 13). Li buchʼutik chchaʼkuxiike jaʼ to te chojtikinik li Jeovae xchiʼuk jaʼ to te chakʼik ta ilel ti tskʼan jaʼuk x-ajvalilaj yuʼunik li Jeovae. Skʼan me xakʼ ta xkuxlejalik li beiltaseletik ta Vivliae xchiʼuk li  kʼusitik achʼ «tsʼibabil ta balbalvunetike». Li achʼ mantaletik taje jaʼ yan svinajeb li slekil yutsil yoʼonton Diose.

17. ¿Kʼusi skʼan teuk ta joltik kʼalal ta jcholtik mantale?

¹⁷ Poʼot xa me xlaj skʼoplal skotol li kʼusitik chopole. Jaʼ yuʼun, mas xa me toj tsots skʼoplal ti jcholtik avi ‹li lekil aʼyejetik› ta sventa li Ajvalilal yuʼun Diose (Mar. 13:10). Mu me xchʼay ta joltik ti jaʼ sventa chkichʼtik ta mukʼ Jeova kʼalal ta jcholtik mantale. ¿Kʼuxi chkichʼtik ta mukʼ? Jaʼ ti xkalbetik krixchanoetik ti jaʼ koliyal slekil yutsil yoʼonton Jeova li lekilal ta jtatik ta Paraisoe.

18, 19. ¿Kʼuxi chkakʼtik ta ichʼel ta mukʼ li slekil yutsil yoʼonton Jeovae?

¹⁸ Kʼalal ta jcholtik mantale kalbetik krixchanoetik li kʼusitik chkʼot ta pasel kʼalal mi lik sventain Balumil li Jesuse. Yuʼun li vaʼ orae, ta me jtabetik lek sbalil ti laj yakʼ sba ta matanal li Jesuse xchiʼuk ti ta kʼunkʼun chijpas ta tukʼil krixchanoe. Xi chal Vivlia ta sventa taje: «[Chichʼik] koltael ta mosoil yuʼun mulil xchiʼuk ta lajelal li kʼusitik pasbil eke, sventa staik li jun yutsil kolelal jech kʼuchaʼal tstaik li xnichʼnab Diose» (Rom. 8:21). Skotol li lekilal ta jtatik ta achʼ balumile, jaʼ ta skoj li slekil yutsil yoʼonton Jeovae.

¹⁹ Ta melel, jaʼ me jun mukʼta matanal chkaʼitik kʼalal chkalbetik krixchanoetik li kʼusi jamal chal Jeova ta Apokalipsis 21:4 xchiʼuk 5. Yuʼun xi chal li kʼusi poʼot xa spas ta stojolal li krixchanoetike: «Tskusbat skotol yaʼlel satik yuʼun li Diose, muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux ta aʼiel. Jelav xa skʼoplal skotol li kʼusitik oy toʼoxe». Xi laj yal Jeova ti te chotol li ta chotlebal sventa ajvalilale: «¡Kʼelo avil!, ta jpas ta achʼ skotol li kʼusitike». Xi laj yal xtoke: «Tsʼibao, yuʼun tukʼ xchiʼuk melel li kʼusitik laj yichʼ alele». Jaʼ yuʼun chaʼa, xijmuyubajuk noʼox me jcholbetik skʼoplal li lekil aʼyejetik taje, vaʼun jaʼ jech chkichʼtik ta mukʼ li slekil yutsil yoʼonton Jeovae.