Li Haykanushe jaʼ jun ants ti te nakal ta Armenia xchiʼuk smalale. Jaʼik jcholmantaletik ti muʼyuk to yichʼojik voʼe. Jun veltae, li Haykanushe te la sta jun pasaporte ta stsʼel sna. Li ta pasaporte taje te oy xtok jayibuk tarjeta sventa vanko xchiʼuk epal takʼin. Vaʼun laj yalbe smalal li kʼusi la stae.

Li nupultsʼakal taje jaʼo chʼabal tajek stakʼinik xchiʼuk ep yilik. Pe muʼyuk laj yichʼik komel li takʼine, li ta pasaportee te chal bu sdireksion li yajvale, vaʼun laj yakʼbeik sutel. Toj labal sba laj yilik li yajval takʼine xchiʼuk li yutsʼ yalale. Li Haykanush xchiʼuk smalale laj yalbeik ti yakal ta xchanik li Vivliae xchiʼuk la xchanik ti mu stakʼ x-elkʼajike. Vaʼun te lik yalbeik li kʼusitik tspasik li stestigotak Jeovae xchiʼuk laj yakʼbeik jaylikuk vunetik ti lokʼem ta Vivliae.

Ch-akʼbat xa ox takʼin li Haykanushe, pe muʼyuk la stsak. Ta yokʼomale, li yajnil yajval pasaportee ay svulaʼan li Haykanush xchiʼuk smalale. Sventa xakʼ ta ilel ti tstojbe tajek ta vokol li kʼusi la spase, laj yakʼbe jun aniyo ti oy sdiamanteile.

Jech kʼuchaʼal labal sba laj yilik li yutsʼ yalal yajval pasaportee, epal krixchanoetik toj labal sba van laj yaʼiik jechuk ti lajuk yilik ti mu snaʼ x-elkʼajik li Haykanush xchiʼuk smalale. ¿Mi labal van sba laj yil li Jeova eke? ¿Kʼusi van tsnop Jeova ta sventa li kʼusi la spasike? ¿Mi ta melel la stabeik sbalil ti muʼyuk x-elkʼajike?

Toj kʼun ta takʼel taje, ¿kʼu yuʼun? Yuʼun li yajtuneltak Diose snaʼojik lek ti xchanbel stalelal li Jeovae, ep tajek sbalil chil, ti jaʼ muʼyuk li oroe, li diamantee o li yan kʼusitik oy kuʼuntike. Li kʼusi muʼyuk noʼox sbalil chil li krixchanoetike, li Jeovae toj ep sbalil chil (Is. 55:8, 9). Toj ep sbalil chil li buchʼutik chakʼik persa sventa xchanbeik li stalelale.

Jkʼeltik kʼusi chal Vivlia ta sventa ti buchʼu lek pʼije xchiʼuk li buchʼu oy kʼusi lek snaʼ ti chal ta Proverbios 3:13 kʼalal ta 15: «Toj xcuxet noʼox yoʼnton li bochʼo ta sta lec sbijile; lec jun yoʼnton li bochʼo oy cʼusi lec snaʼe. Yuʼun jaʼ jeloven to cʼusi tsta o, jaʼ jutuc cʼusi tsta ta sventa li saquil taqʼuine; jaʼ toj ep cʼusi chlocʼ o yuʼun, jaʼ jutuc cʼusi tsta ta sventa li cʼanal taqʼuine. Jaʼ toj ven cʼupil sba cʼotem xchiʼuc; jaʼ xcom slequil li tonetic ti lec cʼupilic sbae. Mu xcoʼlaj xchiʼuc jech chac cʼu chaʼal li cʼusi toj cʼupilic sba chquiltique». Lek xvinaj ti ep sbalil chil Jeova li talelaletik taje, ti jaʼ muʼyuk sbalil li tonetik ti lek kʼupilik sbae.

Pe ¿kʼu yelan chil Jeova ta sventa ti mu jnaʼ xijloʼlavane?

Li Jeovae mu snaʼ xloʼlavan ek. Li Vivliae chal «ti mu snaʼ sjut kʼope» (Tito 1:2). Xchiʼuk jaʼ laj yakʼ ti akʼo stsʼiba jtakbol Pablo ta sventa li jtsop yajtsʼaklom Kristo liʼe: «Pasik-o me orasion ta jtojolalkutik, yuʼun jpatoj koʼontonkutik ti sak jol koʼontonkutike, yuʼun oy ta koʼontonkutik ti sakuk jtalelalkutik ta skotol li kʼusitike» (Evr. 13:18).

Jaʼ jech muʼyuk xloʼlavan li Jesus eke. Jun veltae, li mero bankilal pale ti Kaifas sbie, xi laj yalbe li Jesuse: «¡Jamal xaval ta sat kuxul Dios mi melel voʼot Kristoot, ti Xnichʼonot Diose!». Li Jesuse muʼyuk xloʼlavan, laj yal ta jamal ti jaʼ li Kristoe o li Mesiase. Laj yal ta jamal ta nail Mukʼta Chapanobbail yuʼun judaetik, akʼo mi snaʼoj ti xuʼ xpakʼtae ta jchopolkʼoptavanej xchiʼuk ti xuʼ xmilat-oe (Mat. 26:63-67).

Li voʼotik une, ¿mi ta van jutik kʼop o mu xa jamaluk xkaltik skotol mi ta jtabetik sbalil yilele?

Li ta slajebal xa kʼakʼal kuxulutike, xuʼ van vokol chkaʼitik ti mu xijloʼlavane, yuʼun epal  krixchanoetik ti jaʼ noʼox tsaʼ li kʼusi tskʼan yoʼonton stukike xchiʼuk ti jaʼ batem ta yoʼontonik li takʼine (2 Tim. 3:2). Kʼalal oy vokolil ta takʼin xchiʼuk kʼalal vokol ta tael abtelale, ep buchʼutik muʼyuk xa chopol chaʼiik ti x-elkʼajike o ti xloʼlavanike. Chalik ti jaʼ noʼox jech xuʼ staik kʼusitik tskʼanik mi tsjutik kʼop o mi ch-elkʼajike. Jlom yajtsʼaklomtak Kristoe oy jech spasojik ek. Ta skoj li kʼusi la spasike, muʼyuk xa lek ilbilik li ta tsobobbaile (1 Tim. 3:8; Tito 1:7).

Pe jutuk mu skotoluk li yajtsʼaklomtak Kristoe jaʼ ta xchanbeik stalelal li Jesuse. Yuʼun snaʼojik ti jaʼ mas tsots skʼoplal ti xakʼik ta ilel li stalelal Diose, ti jaʼ muʼyuk sbalil li kʼulejale o li kʼusi tskʼan yoʼontonike. Jaʼ yuʼun li kerem tsebetik ti chchanunajike muʼyuk tspasik kopiar o yan kʼusitik tspasik sventa lekuk xlokʼ li skalifikasionike (Prov. 20:23). Melel onoʼox ti mu skotoluk velta ta xakʼik jmotontik mi muʼyuk chij-elkʼaje, jech kʼuchaʼal kʼot ta stojolal li Haykanushe. Akʼo mi jech, li Diose jaʼ lek chil ti mu jutik kʼope xchiʼuk ti mu xij-elkʼaje. Taje jaʼ me tskoltautik sventa lekuk sak li jol koʼontontike, ti jaʼ li kʼusi ep sbalile.

Li kʼusi kʼot ta stojolal li Gagike, jaʼ jun skʼelobil ti jaʼ mas lek ti mu xijloʼlavane. Kʼalal maʼuk toʼox stestigo Jeovae, te toʼox ch-abtej ta jun mukʼta empresa. Sventa mu stojbe spatanil s-empresa li yajvale, muʼyuk jamal chal ti kʼu yepal tspas kanale. Ta skoj ti jaʼ direktor ta empresa li Gagike, jaʼ oy ta sba yakʼbel matanal takʼin li yaj-abtel ajvalil sventa mu kʼusi xal ta sventa li empresae. Ta skoj ti jech la spas li Gagike, laj yichʼ ojtikinel ti lek snaʼ xloʼlavane. Pe kʼalal lik xchan li Vivliae, laj yikta li yabtele, akʼo mi lek toʼox chichʼ tojel. Jaʼ yuʼun lik yakʼ spʼolmal stuk. Ta slikebal onoʼox la stojbe spatanil li spʼolmale, jech kʼuchaʼal chal li smantaltak ajvalile (2 Kor. 8:21).

Jech xtok, li Gagike jutuk xa tajek tspas kanal, ta skoj taje vokol laj yaʼi sventa smakʼlin li yutsʼ yalale. Akʼo mi jech, mas xa xmuyubaj xchiʼuk lek sak sjol yoʼonton ta stojolal li Jeovae. Lek kʼusi chakʼ ta ilel ta stojolal li xnichʼnabtake xchiʼuk oy kʼusi sbainoj li ta tsobobbaile. Jech xtok, lek stalelal laj yichʼ ilel yuʼun li yaj-abteltak ajvalile xchiʼuk li yan xchiʼiltak ta abtele, yuʼun laj yakʼik venta ti mu snaʼ xloʼlavane.

Tskʼanutik tajek Jeova mi ta jchanbetik stalelale, jech kʼuchaʼal ti mu snaʼ xloʼlavan xchiʼuk ti mu snaʼ sjut kʼope (Tito 2:10). Li Jeovae chalbutik ta jamal ti tskoltautik mi ta jchanbetik li stalelaltake. Jaʼ yuʼun laj yakʼ ti akʼo xi stsʼiba li ajvalil Davide: «Queremun toʼox, pero tana chimalub xa. Muʼyuc bu laj quil ti oy tscomtsanat stuc li bochʼo tucʼ yoʼntone; muʼyuc bu laj quil ti ch-ochic ta cʼan limosna li yalab xnichʼnabe» (Sal. 37:25).

Yan skʼelobil ti jech kʼot ta stojolal eke, jaʼ li Rute. Jaʼ jun ants ti muʼyuk laj yikta smeʼalib akʼo mi malubem xa oxe. Li Rute te bat xchiʼin ta naklej ta Israel li smeʼalibe, ti bu xuʼ xichʼ ta mukʼ li melel Diose (Rut 1:16, 17). Li Rute tsots abtej ta xkʼuxkʼultael trigo ta osiltik ti jaʼ chichʼ iktael ta sventa li buchʼutik abol sbaike, jech kʼuchaʼal chal li Smantal Moisese. Chabiat onoʼox yuʼun Jeova li Rute xchiʼuk li smeʼalibe, jech kʼuchaʼal la spas ta stojolal ajvalil David ta mas tsʼakale (Rut 2:2-18). Pe li Diose maʼuk noʼox la xchabi li Rute xchiʼuk ti xakʼbe li kʼusitik chtun yuʼune. Yuʼun laj yakʼ ti te xlik talel xtok ta yutsʼ yalal li ajvalil David xchiʼuk li Mesiase (Rut 4:13-17; Mat. 1:5, 16).

Li avie vokol tajek chaʼiik ta saʼel takʼin li yajtuneltak Diose. Akʼo mi jech, muʼyuk ta x-elkʼajik xchiʼuk muʼyuk ta sjutik kʼop sventa  staik li takʼine. Yuʼun li kʼusi tspasike jaʼ ti tsots ch-abtejike. Kʼalal jech tspasike, chakʼik ta ilel li stalelaltak Diose, ti mu snaʼ x-elkʼaj o sjut kʼope, yuʼun mas ep sbalil kʼuchaʼal li takʼine xchiʼuk li yan kʼusitike (Prov. 12:24; Efes. 4:28).

Ta spʼejel Balumile oy yajtsʼaklomtak Kristo ti jech tspasik kʼuchaʼal li Rute xchiʼuk chakʼik ta ilel ti spatoj yoʼontonik ta stojolal Jeova ti chchabiatike. Spatoj yoʼontonik ta sventa li kʼusi chal Jeova liʼe: «Muʼyuk chkiktaot jutebuk xchiʼuk muʼyuk ta jkomtsanot jutebuk» (Evr. 13:5). Yuʼun ep ta velta yakʼoj ta ilel Jeova ti ta onoʼox skolta li buchʼutik mu snaʼ xloʼlavanike xchiʼuk kʼotem ta pasel yuʼun ti chakʼbe kʼusitik chtun yuʼun li yajtuneltake (Mat. 6:33).

Toj ep sbalil chil krixchanoetik li diamanteetike xchiʼuk li yan kʼusitik ti kʼupilik sbae. Pe jaʼuk li Jtotik ta vinajele jaʼ ep sbalil chil ti mu xijloʼlavane xchiʼuk li yan lekil talelaletike, yuʼun xkom to sbalil maʼ li kʼusitik kʼupilik sba chil krixchanoetike.