1, 2. ¿Kʼusi yaloj Jeova ta sventa ti kʼu yelan ch-epaj li stestigotake?

LI TA spʼejel Balumile oy jun organisasion ti stuk noʼox jeche, jaʼ li stestigotak Jeova ti skʼanojik tajek Diose xchiʼuk ti chtunik ta stojolale. Akʼo mi oy spaltailik, chbeiltasatik yuʼun Jeova ta xchʼul espiritu. Jkʼeltik avil kʼu yelan yakʼojbe bendision li steklumale.

² Juteb toʼox tajek yajtuneltak Jeova li ta 1914. Pe laj yakʼbe bendision li cholmantal tspasike. Jaʼ yuʼun, ta smiyonal xa noʼox krixchanoetik lik xchanik li Vivliae xchiʼuk kʼotik ta stestigo Jeova. Xi onoʼox laj yalbe skʼoplal ti kʼusi chkʼot ta pasel li Diose: «Acʼo me toj jutebic, pero chcʼot cʼalal ta jmil; acʼo me solel muʼyuc epic, pero chcʼot ta jun mucʼta lum. Vuʼun li Mucʼul Diosune, ta xcacʼ cʼotuc ta pasel ta ora noʼox cʼalal me la sta scʼacʼalile» (Is. 60:22). Jamal lek xvinaj ti yakal chkʼot ta pasel avi li albil kʼop taje. Xkoʼolaj kʼuchaʼal jun mukʼta lum li steklumal Jeovae. Ta melel, oy epal mukʼta lumetik ta spʼejel Balumil ti mas jutuk yajvale, ti jaʼ mas epik li stestigotak Jeovae.

3. ¿Kʼuxi yakʼojik ta ilel ti skʼanoj sbaik li yajtuneltak Diose?

³ Li ta slajebal kʼakʼale skoltaoj yajtuneltak Jeova sventa  skʼan sbaik ta jujuntal. Yuʼun li stuke «jaʼ kʼanelal», jech oxal jaʼ chchanbeik stalelal (1 Juan 4:8). Xi onoʼox laj yalbe mantal yajchankʼoptak li Jesuse: «Kʼano me abaik ta jujuntal». Xi to laj yale: «Mi chakʼan abaik ta jujuntale, jaʼ jech tsnaʼ skotolik ti voʼoxuk kajchankʼopoxuke» (Juan 13:34, 35). Jamal vinajem tal ti skʼanoj sbaik li yajtuneltak Jeovae, yuʼun muʼyuk tstikʼ sbaik ta paskʼop kʼalal tsaʼik kʼop li mukʼta lumetike. Jech kʼuchaʼal li ta Xchibal Mukʼta Paskʼop ta spʼejel Balumile, chamik jutuk mu 55 miyon krixchanoetik. Pe li yajtuneltak Jeovae muʼyuk bu stikʼ sbaik li ta paskʼop taje (kʼelo Miqueas 4:1, 3). Jaʼ jech ‹muʼyuk la sta smulik ta sventa xchʼichʼel li krixchanoetike› (Ech. 20:26).

4. ¿Kʼu yuʼun toj labal sba ti kʼu yelan epajem li yajtuneltak Jeovae?

⁴ Yakal ch-epaj-o batel li yajtuneltak Diose, akʼo mi toj tsots sjuʼel li yajkontraik ti jaʼ li Satanase. Taje jaʼ li «dios ta sventa li kʼusitik oy ta balumil liʼe» (2 Kor. 4:4). Li Satanase jaʼ tspas ta mantal li organisasionetik sventa politika xchiʼuk li kʼusitik chlokʼ ta television, ta Internet o ta yan kʼusitike. ¿Kʼu yuʼun? Jaʼ sventa tsmak ta be li cholmantale, pe mu xuʼ yuʼun. Akʼo mi jech, snaʼoj ti mu xa jaluk ch-abteje, jaʼ yuʼun chakʼbe tajek yipal chchibajes krixchanoetik yoʼ mu xichʼik ta mukʼ li Jeovae (Apok. 12:12).

5. ¿Kʼu yuʼun yikʼaluk jyayijesbe jba koʼontontik? (Kʼelo li lokʼol ta slikebale).

⁵ Oy kʼusi toj tsots skʼoplal ch-akʼbat xchanik li yajtuneltak Diose, jaʼ ti skʼanik li Jeovae xchiʼuk li xchiʼiltakike. Xi laj yal li Jesuse: «‹Skʼan xakʼan ta sjunul avoʼonton li Jeova Dios avuʼune, ta sjunul akuxlejal xchiʼuk ta sjunul anopben›. Liʼe jaʼ li baʼyel mantale xchiʼuk ti mas tsots skʼoplale. Li xchibale xkoʼolajtik kʼuchaʼal li baʼyele, jaʼ liʼe: ‹Skʼan me xakʼan achiʼil jech kʼuchaʼal akʼanoj aba atuke›» (Mat. 22:35-39). Pe li Vivliae jamal chakʼ ta ilel ti naka jpasmulil chij-ayan ta skoj li Adane (kʼelo Romanos 5:12, 19). Jech oxal, yikʼaluk van oy kʼusi xal o spas junuk ermano ti syayijes koʼontontike. Kʼalal jeche, ¿kʼusi van ta jpastik? ¿Mi jkʼanojtik-o van li Jeovae? ¿Mi tukʼ-o chkakʼ jbatik ta stojolal xchiʼuk ta stojolal li steklumale? Li Vivliae chalbe skʼoplal yajtuneltak Dios ti la syayijesbeik yoʼonton yantik ta skoj ti oy kʼusi chopol la spasik o laj yalike. Jkʼeltik avil kʼusi chakʼ jchantik.

6. ¿Kʼusi muʼyuk lek la spas li Elie?

⁶ Jech kʼuchaʼal Elí ti tun ta bankilal pale ta Israele, muʼyuk la xchʼunbeik smantal Jeova li chaʼvoʼ skeremotake. Xi chal li Vivliae: «Li xnichʼnabtac Elie puru chopol viniquetic; muc xichʼic ta mucʼ li Mucʼul Diose» (1 Sam. 2:12). Snaʼoj Elí ti chopol kʼusitik tspas li xnichʼnabe. Akʼo mi jech, te noʼox skʼeloj li kʼusitik tspasike, muʼyuk bu tsots xakʼbe mantal. Pe kʼot yorail ti akʼbatik mantal yuʼun Jeova xchiʼuk li xnichʼnabe. Jech xtok, muʼyuk xa xtunik ta bankilal pale li snitilulaltak ta mas tsʼakale (1 Sam. 3:10-14). Ti jaʼuk-o lijkuxi ta skʼakʼalil Elie xchiʼuk ti lajuk kaʼitik ti te noʼox skʼeloj li kʼusitik tspas xnichʼnabe, ¿mi laj van xchibajesutik? ¿Mi laj van skʼunibtas xchʼunel koʼontontik xchiʼuk mi laj van kikta jbatik ta spasbel yabtel li Jeovae?

7. ¿Kʼusi tsatsal mulil la spas li Davide, xchiʼuk kʼusi la spas Dios ta sventa taje?

⁷ Toj lek tajek stalelal echʼ li Davide, jaʼ yuʼun kʼanbil tajek yuʼun li Jeovae (1 Sam. 13:13, 14; Ech. 13:22). Akʼo mi jech, oy kʼusi toj chopol la spas. Kʼalal jaʼo batem ta paskʼop li Uriase, la xchiʼinbe ta vayel yajnil ti Betsabe sbie (Bat-seba), vaʼun la  xchiʼin yol. Pe li Davide mu skʼan xakʼ ta aʼiel li kʼusi kʼot ta pasele. Jaʼ yuʼun laj yal mantal ti akʼo sut tal ta sna li Uriase, sventa te xtal vayuk. Yuʼun li kʼusi oy ta yoʼonton Davide, jaʼ ti xchiʼin ta vayel yajnil li Uriase xchiʼuk ti snopik krixchanoetik ti jaʼ yuʼun li olole. Pe bu chata, muʼyuk skʼan xbat vayuk ta sna li Uriase. Jech oxal, li Davide la skʼel lek kʼusi stakʼ spas sventa teuk xcham ta paskʼop li Uriase. Ta skoj ti toj tsots smul la spas li Davide, toj ep laj yil svokol xchiʼuk yutsʼ yalal (2 Sam. 12:9-12). Akʼo mi jech, li Jeovae la xkʼuxubin li Davide xchiʼuk laj yakʼ ta perton, yuʼun snaʼoj ti jaʼ oy ta yoʼonton spasel li kʼusi tukʼe (1 Rey. 9:4). Ti jaʼuk-o lijkuxi ta skʼakʼalil Davide, ¿kʼu van yelan laj kaʼi jbatik ta sventa li kʼusi la spase? ¿Mi laj van kikta jbatik ta spasbel yabtel Jeova ta skoj taje?

8. 1) ¿Kʼusi muʼyuk xkʼot ta pasel yuʼun li Pedroe? 2) ¿Kʼu yuʼun jech-o tunesat yuʼun Jeova li Pedroe?

⁸ Yan skʼelobil ta Vivliae jaʼ li jtakbol Pedroe. Li Jesuse la stʼuj ta yajtakbol. Akʼo mi jech, jelav onoʼox ye li Pedroe xchiʼuk oy kʼusitik chopol la spas. Jech kʼuchaʼal liʼe, laj yal ta jamal ti muʼyuk onoʼox tskomtsan li Jesuse, manchuk mi x-iktavan li yantike (Mar. 14:27-31, 50). Pe kʼalal la xchukik batel li Jesuse, iktavan skotolik li jtakboletike, jaʼ jech la spas li Pedro eke. Maʼuk noʼox, yuʼun oxib to velta laj yal ti mu xojtikin li Jesuse (Mar. 14:53, 54, 66-72). Pe la sutes yoʼonton. Jaʼ yuʼun akʼbat perton yuʼun li Jeovae xchiʼuk jech-o tunesat batel. Ti jaʼukutik yajchankʼop Jesus li vaʼ kʼakʼale, ¿mi muʼyuk xa van tukʼ chkakʼ jbatik ta stojolal Jeova ta skoj li kʼusi la spas Pedroe?

9. ¿Kʼu yuʼun jpatoj koʼontontik ta stojolal Jeova ti tukʼ chchapanvane?

⁹ Kʼuchaʼal laj xa kakʼtik ventae, oy kʼusitik chopol la spas li yajtuneltak Jeova ta voʼnee xchiʼuk ep buchʼutik la syayijesbeik yoʼonton. Pe ¿kʼusi van skʼan jpastik kʼalal jech ta jnuptantik eke? ¿Mi muʼyuk xa van chijbat ta tsobajel o mi ta van xkiktatik li Jeovae xchiʼuk li s-organisasione? ¿O mi ta van xkakʼtik venta ti oy xkʼuxul  yoʼonton ta stojolal li jpasmulile xchiʼuk ti smalaoj tsutes yoʼontone? Ta melel, oy onoʼox buchʼutik ti toj chopol kʼusitik tspasike xchiʼuk ti mu skʼan sutes yoʼontonike. Mi jeche, ¿mi ta van jpat koʼontontik ta stojolal Jeova ti jaʼ chchapan stuk mi la sta yoraile? Yuʼun mi jech skʼan chile, ta me slokʼes li ta tsobobbaile. Jaʼ yuʼun, ¿mi jpatoj koʼontontik ta stojolal Jeova ti tukʼ chchapanvane?

10. ¿Kʼusi la snop Jesus kʼalal oy kʼusi chopol la spas li Judas Iskariote xchiʼuk li Pedroe?

¹⁰ Li ta Vivliae ep buchʼutik chalbe skʼoplal ti tukʼ-o laj yakʼ sbaik ta stojolal li Jeovae xchiʼuk ta stojolal li steklumale, manchuk mi oy jlom yajtuneltak Jeova ti toj tsots la spas smulik li vaʼ kʼakʼale. Jaʼ jech kʼot ta stojolal li Jesuse. Sjunul akʼobal la spas orasion sventa stʼuj li lajchaʼvoʼ yajtakboltake. Pe oy jun ti valopatinate, jaʼ li Judas Iskariotee. Jech xtok, li Pedroe laj yal ti mu xojtikin li Jesuse (Luk. 6:12-16; 22:2-6, 31, 32). Akʼo mi chopol laj yaʼi Jesus li kʼusi la spas junantik yajtakboltake, muʼyuk la snop ti jaʼ ta smul Jeova o li yan yajchankʼoptake. Moʼoj, li kʼusi la spase, jaʼ ti nopol laj yakʼ sba ta stojolal li Stote xchiʼuk ti tukʼ-o yoʼonton tun batel ta stojolale. Vaʼun akʼbat smoton yuʼun li Jeovae, chaʼkuxesat xchiʼuk vaʼanat ta Ajvalil ta vinajel (Mat. 28:7, 18-20).

11. ¿Kʼusi yaloj xa onoʼox Vivlia ta sventa li yajtuneltak Jeova avie?

¹¹ Ti kʼu yelan echʼ li Jesuse chakʼ jchantik ti skʼan tukʼuk-o koʼontontik ta stojolal li Jeovae xchiʼuk ta stojolal li steklumale. Oy lek srasonal kuʼuntik ti jechuk jpastike. Yuʼun jamal xvinaj ti yakal tsbeiltas yajtuneltak Jeova li ta slajebal kʼakʼale. Tskolta sventa xcholik batel ta spʼejel Balumil li mantale xchiʼuk jaʼ noʼox stukik ti jech tspasike. Jech xtok, jmoj noʼox oyik xchiʼuk jun noʼox yoʼontonik ta skoj ti jaʼ chchanubtasatik yuʼun li Jeovae. Xi onoʼox yalojbe skʼoplal Vivlia taje: «Ti stuquique xlaetic noʼox xmuyubajic ta qʼuejimol ta sventa ti muʼyuc cʼusi xal ti yoʼntonique» (Is. 65:14, Ch).

12. ¿Kʼu yelan skʼan xkiltik li spaltail yantike?

¹² Ta melel, xijmuyubaj noʼox ta skoj ti tsbeiltasutik xchiʼuk tskoltautik li Jeovae, sventa jaʼuk jpastik li kʼusitik leke. Jaʼuk li krixchanoetik ti te stikʼoj sbaik ta sbalumil Satanase, muʼyuk xmuyubajik xchiʼuk chʼabal spatobil yoʼontonik. Jaʼ yuʼun, muʼyuk me lek mi jaʼ chkiktatik-o Jeova xchiʼuk steklumal ta skoj ti oy buchʼu chopol kʼusi laj yal o la spase. Jaʼ lek tukʼuk xkakʼ jbatik ta stojolal li Jeovae xchiʼuk jchʼunbetik me li smantale. Jech xtok, skʼan me jnoptik lek mi chkakʼ xchibajesutik li spaltail yantike.

13, 14. 1) ¿Kʼu yuʼun skʼan jtsʼikbetik li spaltail yantike? 2) ¿Kʼusi skʼan teuk ta joltik?

¹³ ¿Kʼusi van ta jpastik mi oy kʼusi chopol laj yalbutik o la spasbutik junuk ermano ti solel kʼux laj kaʼitike? Xi tspʼijubtasutik li Vivliae: «Mu me ta aniluc noʼox xaʼilin, yuʼun li ilinele jaʼ jech stalelic li bochʼotic bolique» (Ecl. 7:9). Melel onoʼox chaʼa, jpasmulilutik jkotoltik xchiʼuk oy kʼusi chopol chbat ta pasel kuʼuntik. Jaʼ yuʼun teuk me ta joltik ti oy onoʼox kʼusi chopol chal o tspas li kermanotaktike. Pe muʼyuk me lek mi mu jchʼay ta koʼontontik li spaltailike. Yuʼun mi mu jchʼay ta koʼontontike, mu xa me ta muyubajeluk chijtun ta stojolal li Jeovae. Li kʼusi mas to chopole, jaʼ ti skʼunibtas li xchʼunel koʼontontike xchiʼuk ti xkiktabetik li s-organisasion Jeovae. Yuʼun mi jech ta jpastike, oy me kʼusi toj tsots skʼoplal chchʼay kuʼuntik, jaʼ li matanal ti chijtun ta stojolal  Jeovae xchiʼuk ti chʼabal xa ta jtatik li kuxlejal ta achʼ balumile.

¹⁴ Jaʼ yuʼun chaʼa, ¿kʼusi van tskoltautik sventa xijmuyubajuk noʼox xijtun ta stojolal Jeova kʼalal oy buchʼu tsyayijes koʼontontike? Jaʼ ti skʼan teuk ta joltik li spatobil koʼontontik liʼe: «Aʼyo avaʼyic, ta xcacʼ ayinuc achʼ vinajel banamil. Li pocoʼe muʼyuc xa bochʼo ta snaʼ o; muʼyuc xa bochʼo ta snopilan o» (Is. 65:17; 2 Ped. 3:13). Pe jaʼ noʼox me tstaik bendision li buchʼutik tukʼ chakʼ sbaik ta stojolal li Jeovae.

15. ¿Kʼusi skʼan jtsaktik ta venta kʼalal oy buchʼu tsyayijes koʼontontike?

¹⁵ Akʼo mi jech, muʼyuk to te oyutik li ta achʼ balumile. Jaʼ yuʼun, mi oy kʼusi lij-albat o lijpasbat ti kʼux laj kaʼitike, skʼan me jnoptik kʼusi tskʼan akʼo jpastik li Jeovae. Jun tojobtasel ti skʼan jtsaktik ta ventae, jaʼ li kʼusi laj yal Jesus liʼe: «Mi chapasbeik perton smul li krixchanoetike jaʼ jech ta spasboxuk perton amulik ek li Atotik ta vinajele; pe mi muʼyuk chapasbeik perton smul li krixchanoetike jaʼ jech muʼyuk tspasboxuk perton amulik ek li Atotik ta vinajele». Jech xtok, kʼalal la sjakʼ Pedro ‹mi vukub to velta› skʼan xakʼ pertone, xi takʼbat yuʼun li Jesuse: «Muʼyuk chkalbot ti vukub to ta veltae, moʼoj, 77 to ta velta skʼan jech xapas». Li kʼusi chakʼ jchantik Jesuse, jaʼ ti mu vokoluk xkaʼitik yakʼel pertone (Mat. 6:14, 15; 18:21, 22).

16. ¿Kʼu yelan stalelal echʼ li Josee?

¹⁶ Li buchʼu toj lek xuʼ jchanbetik stalelale jaʼ li Josee, li sba yolik Rakel xchiʼuk Jakobe. Laj yil chaʼvoʼ skeremik. Pe oy lajunvoʼ xchabankiltak li Josee, li stuke jaʼ kʼanbil tajek yuʼun li stote. Jaʼ yuʼun itʼixaj li sbankiltake. Ta skoj ti toj echʼ xa noʼox chopol chilik li Josee, la xchonik batel ta mosoil ta Ejipto. Pe kʼalal echʼ xa ox jayibuk jabile, laj yichʼ akʼbel tsots yabtel li ta Ejiptoe, yuʼun lek tajek kʼusitik tspas. Ta mas tsʼakale, te tal smanik veʼlil ta Ejipto li sbankiltak ta skoj ti tal viʼnale. Pe muʼyuk xakʼik venta mi jaʼ Jose kʼalal laj yilike, pe li stuke laj yakʼ venta ti jaʼ sbankiltake. Akʼo mi toj chopol kʼusi pasbat yuʼun li sbankiltake, muʼyuk bu la spak sutel. Kʼajomal noʼox la skʼelbe yoʼonton mi sjeloj xa stalelalik. Kʼalal laj yakʼ venta ti jelelik xae, laj yal ta jamal ti buchʼue xchiʼuk la spatbe yoʼonton li sbankiltake. Xi laj yale: «Mu me xaxiʼic. Vuʼun ta xcacʼboxuc aveʼelic achiʼuc li avalab anichʼnabique» (Gén. 50:21).

17. ¿Kʼusi skʼan jpastik kʼalal oy buchʼu chopol kʼusi chal o tspase?

¹⁷ Ta skoj ti jpasmulilutike yikʼaluk me jyayijesbetik yoʼonton li kermanotaktik eke. Jaʼ yuʼun, mi laj kakʼtik venta ti oy buchʼu la jyayijesbetik yoʼontone, skʼan me jchʼuntik li beiltasel ta Vivlia ta sventa taje. Albo ti akʼo yakʼot ta pertone xchiʼuk akʼo persa ta slajesbel yoʼonton (kʼelo Mateo 5:23, 24). Ta melel, ta jtojtik ta vokol kʼalal chakʼutik ta pertone. Jaʼ me jech skʼan jpastik ta stojolal li kermanotaktik eke. Xi chal Kolosenses 3:13: «Jechuk-o me tsʼikbo abaik ta jujuntal xchiʼuk mu me xajalanbe abaik ta jujuntal ti chapasbe abaik pertone, akʼo mi oy buchʼu tsaʼ smul ta atojolalik. Jech kʼuchaʼal muʼyuk la sjalanboxuk perton li Jeovae, jech me skʼan xapasik ek». Jech xtok, mi jkʼanoj li kermanotaktike ‹muʼyuk ta jchaptik batel li kʼusi chopol tspasbutike› (1 Kor. 13:5). Mi chkakʼtik ta perton li yantike, jaʼ jech chakʼutik ta perton li Jeova eke. Jaʼ yuʼun chaʼa, mi oy buchʼu chopol kʼusi laj yal o la spase, oyuk me xkʼuxul koʼontontik ta stojolal jech kʼuchaʼal tspas li Jeovae (kʼelo Salmo 103:12-14).