Li kʼusitik laj yichʼ alel liʼe jaʼ yalojik li buchʼutik ip ta snopbenike. ¿Mi oy jech avaʼioj aba ek o mi oy buchʼu xavojtikin ti jech yakal tsnuptane?

Mi jaʼ jeche, ¿mi anaʼoj xa ti mu atukuk noʼoxe? Ta spʼejel balumile ep krixchanoetik ip ta snopbenik o moʼoje chil svokolik ta skoj ti oy jech ip yutsʼ yalalike.

Jnaʼojtik ti «chtal tsots vokolil li ta slajebal xa kʼakʼale, toj echʼ noʼox xibal sba» jaʼ yuʼun ep kʼusi ta jvul-o koʼontontik xchiʼuk oy kʼusi kʼux chkaʼitik (2 Timoteo 3:1). Kʼalal la skʼelbe skʼoplal li Organización Mundial de la Salud ti jayvoʼ krixchanoetik ch-ipaj ta snopbenike, laj yichʼ ilel ti jaʼ jun ta vaxakvoʼe. Kʼalal echʼ li tsatsal chamel COVID-19 ta 2020, te van 78 miyon ipajik to mas li ta ansiedade xchiʼuk jaʼ jech yepal ti tsots ipajik li ta at-oʼontone o depresión.

Maʼuk mas tsots skʼoplal ti skʼan jnaʼtik jayvoʼ jech ipik li ta snopbenike, li kʼusi mas tsots skʼoplale jaʼ ti xanaʼ kʼusi xuʼ xapas mi oy jech avokol xchiʼuk li avutsʼ avalale.

Kʼalal chʼabal ip jnopbentike, xijmuyubaj noʼox, lek noʼox chkaʼi jbatik xchiʼuk spas noʼox kuʼuntik li kabteltik jujun kʼakʼale. Jech xtok, xkuch noʼox kuʼuntik li kʼusitik ta jnuptan ta jkuxlejaltike, baxbolutik ta abtel xchiʼuk x-echʼ noʼox kuʼuntik jujun kʼakʼal.

• MAʼUK ta skoj ti oy kʼusi chopol la jpastike.

• JAʼ JTOS chamel ti chakʼ jvokoltike, anil chjel yuʼun jnopbentik, jpʼelutik ta kʼop, mu kʼusi xkuch kuʼuntik xchiʼuk chjel jtalelaltik.

• Jech xtok, vokol xa chkaʼitik ti xkamigointik li yantike xchiʼuk vokol chkaʼitik spasel li kʼusitik jbainojtik jujun kʼakʼale.

• Li chamel taje buchʼuuk noʼox snuptan, mu ventauk jayib sjabilal, bu likem, kʼusi srelijion, mi chanunajem lek o mi oy stakʼin.

Li buchʼu ip ta snopbene bakʼintike chjel stalelal, chjel kʼu yelan chveʼ xchiʼuk ti kʼu sjalil chvaye. Jech xtok, toj tsots tajek tsvul yoʼonton xchiʼuk chat noʼox yoʼonton. Mi jaʼ jech yakal chanuptane o yan buchʼu ti xavojtikine, skʼan xasaʼ junuk doktor sventa xanaʼ kʼu yuʼun ti jech chavaʼi abae. Pe ¿bu xuʼ xata koltael?

Li Jesukristo ti stuk noʼox mas pʼij echʼ ta balumile xi laj yale: «Muʼyuk bu chtun yuʼunik doktor li buchʼutik muʼyuk ipike, jaʼ noʼox chtun yuʼunik li buchʼutik ipike» (Mateo 9:12). Li buchʼu ip ta snopbene skʼan saʼ junuk doktor ti xchanojbe lek skʼoplal li chamel ta jnopbentike, mi jech tspase mas me anil chlekub xchiʼuk jun xa yoʼonton yan velta. Mi jamal xvinaj ti ipot ta anopbene xchiʼuk ti jal xa atsʼikoje, mas me lek ti xasaʼ noʼox koltaele. a

Li Vivliae maʼuk slivroal poxil, pe li kʼusi chale tskoltautik onoʼox sventa mu xij-ipaj ta jnopbentik. Li yan mantaletik chtale, te chalbe smelolal ti kʼu yelan tskoltautik Vivlia sventa xkuch kuʼuntik mi iputik ta jnopbentike. Lek ti xakʼel batele.