¿Kʼuxi xuʼ jkoltatik li buchʼutik ip ta snopbenike?
LI KʼUSI CHAL VIVLIAE: «Li melel amigoile skotol ora chakʼ ta ilel ti chkʼanvane xchiʼuk jaʼ jchiʼiltik ta vokʼel chkʼot kʼalal oy jvokoltike» (PROVERBIOS 17:17).
¿Kʼusi skʼan xal?
Kʼalal ip ta snopben junuk kamigotike, stalel onoʼox ti mu xa jnaʼ kʼusi ta jpastike. Pe kakʼbetik ta ilel ti jkʼanojtik tajeke xchiʼuk jkoltatik sventa xkuch yuʼun batel li xchamele.
¿Kʼuxi xuʼ jkoltatik?
«Oyuk ta avoʼontonik xchikintael» (SANTIAGO 1:19).
Jtos ti kʼuxi xuʼ xakolta li avamigoe jaʼ ti xachikintabe li kʼusi chale. Mu persauk ti xachapanbe skotol li svokole, li kʼusi mas tsots skʼoplale jaʼ ti xachikinta li kʼusi chale xchiʼuk ti xavakʼ ta ilel ti oy ta avoʼonton ta melele. Akʼo persa ti xavaʼibe smelolal ti kʼu yelan chaʼi sbae xchiʼuk mu xalaban. Teuk ta ajol ti bakʼintike mu snaʼ lek kʼusi chal li avamigoe xchiʼuk ti xuʼ chopol chaʼi sba ta tsʼakal ta skoj li kʼusi laj yale (Job 6:2, 3).
«Patbeik me yoʼonton li buchʼutik chat yoʼontonike» (1 TESALONISENSES 5:14).
Yikʼaluk van li avamigoe tsvul yoʼonton xchiʼuk muʼyuk sbalil chaʼi sba, jaʼ yuʼun akʼbo ta ilel ti oy ta avoʼontone. Jaʼ me jech chapatbe yoʼonton avamigo akʼo mi mu xanaʼ lek kʼusi chavalbe.
«Li melel amigoile skotol ora chakʼ ta ilel ti chkʼanvane» (PROVERBIOS 17:17).
Albo ti oy ta avoʼonton chakoltae. Mu teuk noʼox akʼeloj li kʼusi chtun yuʼun li avamigoe, Galatas 6:2).
jakʼbo kʼusi xuʼ xapas sventa xakolta. Yikʼaluk van mu snaʼ kʼuxi chal li kʼusi chtun yuʼune. Jaʼ yuʼun, albo li kʼusi xuʼ koʼol xapasike, jech kʼuchaʼal ti xalokʼik ta xanvile. Jech xtok, albo ti chbat a mantal ta chʼivit li kʼusi chtun yuʼune, ti xakolta ta xchʼubael snae o yan kʼusitik («Tsʼikbeik me» (1 TESALONISENSES 5:14).
Xuʼ van mu skʼan xloʼilaj bakʼintik li avamigoe. Pe albo ti xuʼ avuʼun xchikintael ti kʼusi ora tskʼan chloʼilaj jlikeluke. Ta skoj li xchamele, xuʼ van oy kʼusi xal o oy kʼusi spas ti muʼyuk xa lek chavaʼi-o aba yuʼune. Jech xtok, xuʼ van muʼyuk tspas li kʼusi achapoj xa ox chapasike o ti jecheʼ noʼox xkapet sjole. Oyuk smalael avuʼun kʼalal chakolta li avamigoe xchiʼuk aʼibo smelolal ti kʼu yelan chaʼi sbae (Proverbios 18:24).
Xuʼ me xlekub-o mi chakoltae
«Chkakʼ persa ti jkolta-o li kamigae. Mu onoʼox xchapaj kuʼunbe skotol li svokoltake, pe ta jchikintabe kʼalal tskʼan chloʼilaje. Ep ta velta lek chaʼi-o sba kʼalal jech ta jpase» (Farrah a ti oy jun yamiga ti ip ta trastornos alimentarios, ansiedad xchiʼuk depresión clínica).
«Oy jun kamiga ti lekik kʼusi tsnope, xmuyubaj noʼox xchiʼuk skʼanojun. Jun kʼakʼale, laj yikʼun batel ta sna xchiʼuk la smeltsanbun jun muil veʼlil. Ta skoj ti jun tajek koʼonton laj kaʼi jba yuʼune, laj kalbe skotol li kʼusi ta jvul-o koʼontone. ¡Xpatet xa koʼonton lisut tal!» (Ha-eun ti ip ta depresión clínica).
«Tsots skʼoplal ti oyuk smalael kuʼuntike. Kʼalal oy kʼusi tspas kajnil ti chopol chkaʼi jba yuʼune, ta jvules ta jol ti maʼuk yolbaj tspase, ti jaʼ ta skoj li xchamele. Taje jaʼ tskoltaun sventa mu xi-ilin-o xchiʼuk ti xkaʼibe smelolal ti kʼu yelan chaʼi sbae» (Jacob ti ip yajnil ta depresión clínica).
«Li kajnile tskoltaun tajek xchiʼuk tspatbun koʼonton. Kʼalal ta jvul koʼontone, muʼyuk tsujun ta spasel li kʼusi mu jkʼan jpase. Bakʼintike jaʼ xa muʼyuk tspas li kʼusitik tskʼupine. Lek tajek yoʼonton xchiʼuk ep kʼusitik tspas sventa tskoltaun. ¡Stuk xa noʼox jech!» (Enrico ti ip ta ansiedad).
a Jelbil li jlom biiletike.