XUʼ XKALTIK ti jaʼ jechik kʼuchaʼal jsaʼoroetik li buchʼutik ta sjunul yoʼonton chchanik Vivliae. Yuʼun skʼan xakʼik tajek persa saʼel xchiʼuk yepajesel li pʼijilal ti toj ep sbalil ta jtatik ta Vivliae. Jkʼeltik oxtos kʼusitik xuʼ jtunestik yoʼ jsaʼtik li kʼusitik kʼupilik sbae xchiʼuk ta jkʼeltik kʼuxi te stsakojbe sba skʼoplal kʼalal ta jchan Jvivliatike.

Jnoptik noʼox avaʼi ti te chaxanav ta tiʼ ukʼume. Jaʼ to chavile te oy uni ton ti stsʼayayet tajek ta skoj li xojobal Kʼakʼale. Vaʼun la atam, jaʼ to avile, ¡jaʼ uni juteb oro! Mas to bikʼit kʼuchaʼal li sjol seriyoe, xchiʼuk mas to vokol ta saʼel, jaʼ kʼun noʼox ta saʼel li lekil diamanteetike. Jaʼ yuʼun te to xajotet ta saʼel, yuʼun chakʼan to chata yan.

Jaʼ jechtik kʼot ta atojolal kʼalal la svulaʼanot jun stestigo Jeova xchiʼuk kʼalaluk laj yakʼbot avil ta Vivlia li kʼusi yaloj chakʼbutik Dios ta tsʼakale. Xuʼ van xvul to lek ta ajol kʼalaluk la ata ta sba velta li avuni «juteb oro» ta mantale, taje jaʼo kʼalal la avil li sbi Dios ta Vivliae o kʼalal la achan ti xuʼ xijkʼot ta yamigoe (Sal. 83:18, TNM; Sant. 2:23). Ta anil noʼox la avakʼ venta ti oy kʼusi la ata ti xjelav to yutsile, ti jaʼ mu sta li oroe xchiʼuk chakʼan to chata yan.

Li buchʼutik baxbolik ta stsobel oroe, oy tstaik ta tsobel jayibuk kilo jujutiʼ oro ta jayibuk noʼox kʼakʼal, ti epal mil dolar stojole. Taje tstsob sba ta tiʼ ukʼumetik o ta bikʼtal ukʼumetik.

Kʼalaluk lik achan talel Vivlia xchiʼuk li stestigotak Jeovae, xuʼ van jech laj avaʼi aba kʼuchaʼal jun jsaʼoro ti chchij jiʼ sventa sta li kʼupil sba oroe. Li kʼusi la skoltaot ta yepajesel li yojtikinobil avuʼune xchiʼuk ti xa tsatsub-o talel ta mantale, jaʼ ti la anopbe skʼoplal li versikuloetik ta Vivlia chakʼelilane. Kʼalaluk mas la avaʼibe tal smelolal li kʼusitik kʼupilik sba ta Vivliae, mas to lanopaj ta stojolal li Jeovae xchiʼuk chavakʼ venta ti skʼanojot tajeke. Apatoj lek avoʼonton ti chakuxi sbatel osile (Sant. 4:8; Jud. 20, 21).

Jech kʼuchaʼal chakʼ tajek persa saʼel kʼupil sba tonetik ta ukʼum li jsaʼoroe, jaʼ van jech lek asaʼoj tal li kʼulejal ta mantal eke. Ta skoj ti jech apasoj tale xavojtikin xa li kʼusitik tsotsik skʼoplal chal Vivliae  xchiʼuk jaʼ van la stij avoʼonton sventa xavakʼ aba ta stojolal li Jeovae xchiʼuk ti xavichʼ voʼe (Mat. 28:19, 20).

Bakʼintik xtok li jsaʼoroetike, te tstaik juteb oro ta jtos tsatsal ton. Pe oy junantik li ta tonetik taje ep yichʼoj talel. Jaʼ yuʼun, tslilinik sventa slokʼesik li kʼupil sba oroe. Bakʼintike mu xvinaj mi oy oro ta yut li ta jtos ton taje, ¿kʼu yuʼun? Yuʼun xuʼ van ven mukʼ li tone ti xuʼ van jmil kilouk yalale. Pe mi laj yichʼ lilinel une xuʼ van kʼajomal noʼox lajuneb gramo chichʼ tael li oroe. Akʼo mi jech, li buchʼu jaʼ yabtel saʼele xlokʼ venta chil ti mu xlub-o ta saʼele.

Jaʼ jech ek, skʼan xkakʼ kiptik sventa maʼukuk noʼox jchantik «li kʼusitik kʼun ta chanel ta sventa li Kristoe» (Evr. 6:1, 2). Yuʼun skʼan xkakʼ ta koʼontontik kʼalal ta jchan li Jvivliatike yoʼ oyuk kʼusi achʼ jchantik xchiʼuk ti jtunel ta jkuxlejaltike. Akʼo mi jal xa avochel xchanel li Vivliae, ¿kʼusi skʼan xapas sventa xatabe-o sbalil kʼalal chachane?

Mu me xachʼajub ta xchanel li Avivliae. Bikʼitik xachaj ta saʼel li kʼusi chale. Akʼbo-o me yipal, mi jech chapase chata li kʼusi toj ep sbalile: li pʼijilal xchiʼuk li beiltasel likem talel ta stojolal Diose (Rom. 11:33). Mi la atunes li kʼusitik oy ta akʼop sventa xasabe mas skʼoplale, mas me ch-ayan li yojtikinobil avuʼun ta sventa Vivliae. Saʼo koltael xchiʼuk sabo stakʼobil li kʼusitik chajakʼbe aba ta sventa li Vivliae. Jech xtok, jakʼbo yantik kʼusi tekstoal xchiʼuk kʼusi vunal ti tunem yuʼunike xchiʼuk ti jaʼ tsatsubtasatik-oe. Albo yaʼiik li kʼusitik tsotsik skʼoplal avil kʼalaluk la achan li Skʼop Diose.

Ta melel, maʼuk noʼox me ep kʼusi ta jkʼan ta jchantik. Yuʼun xi pʼijubtasvan li jtakbol Pabloe: «Li yojtikinobile xuʼ xijtoyet xa chkaʼi jbatik yuʼun» (1 Kor. 8:1). Jaʼ yuʼun akʼo persa ti bikʼituk xavakʼ abae xchiʼuk tsatsubtaso li xchʼunel avoʼontone. Li yichʼel ta mukʼ Jeova ta avutsʼ avalale xchiʼuk kʼalal chachan Avivlia ta atuke, jaʼ me tskoltaot sventa xavakʼ ta akuxlejal li smantaltak Jeovae. Jech xtok jaʼ me tstij avoʼonton ta skoltael li yantike. Pe li kʼusi mas tsots skʼoplale, jaʼ ti chakʼbot xkuxetel avoʼontone yuʼun xanaʼ ti la ata li kʼusi xjelav to yutsile, ti jaʼ mu sta li oroe (Prov. 3:13, 14).