1, 2. ¿Kʼu yuʼun skʼan jchanubtastik yantik sventa spasik li abtelaletik ta tsobobbaile?

LI Jesuse laj yakʼ persa ta xcholel li lekil aʼyej ta sventa Ajvalilale. Akʼo mi jech, la xchʼakbe yorail sventa xchanubtas li yajchankʼoptake. La xchanubtas sventa xkʼotik ta lekil jchanubtasvanejetik xchiʼuk ti xchabiik li yajtuneltak Diose (Mat. 10:5-7). Jun yajtsʼaklom Kristo ti Felipe sbie mu noʼox xokob, yuʼun toj echʼ noʼox baxbol li ta cholmantale. Pe la xchanubtas ta xcholel mantal li stsebetake (Ech. 21:8, 9). Jaʼ yuʼun, skʼan me jchanubtastik li yantik eke. ¿Kʼu van yuʼun?

² Li ta tsobobbailetik ta spʼejel Balumile oy epal krixchanoetik ti jaʼtik to lik xchanik li Vivliae xchiʼuk ti muʼyuk to yichʼojik voʼe. Jaʼ yuʼun skʼan jchanubtastik, yuʼun skʼan xaʼibeik smelolal ti tsots skʼoplal ti skʼel xchiʼuk xchan li Svivliaike. Skʼan me jchanubtastik xtok ta cholmantal xchiʼuk ti xkʼotik ta lekil jchanubtasvanejetike. Li ermanoetik ti jaʼtik to laj yichʼik voʼe, skʼan me chanubtasel sventa xuʼ xkʼotik ta jtuneletik xchiʼuk ta moletik ta tsobobbail. Skotol  me jcholmantaletik xuʼ skoltaik li buchʼutik mas to achʼike (Prov. 4:2).

3, 4. 1) Jech kʼuchaʼal laj yal li Pabloe, ¿kʼuxi tskoltautik kʼalal ta jchanilantik li Vivliae? 2) ¿Kʼusi van skʼan jpastik sventa xchan Svivliaik li j-estudiotike?

³ Sventa jnaʼtik kʼusi oy ta yoʼonton tspas li Diose, skʼan onoʼox me jchan li Jvivliatike. Li jtakbol Pabloe laj yalbe yermanotak ta jteklum Kolosas ti kʼu yuʼun skʼan jech spasike. Xi la stsʼibae: «Mi jutebuk kiktaoj jbakutik ta spasel orasion ta atojolalik xchiʼuk ta skʼanel ti akʼo xavojtikinik lek li kʼusi tskʼan yoʼonton [Diose]». ¿Kʼu van yuʼun toj tsots skʼoplal skʼan skʼelik xchiʼuk xchan Svivliaik li yajtsʼaklomtak Kristoe? Jech kʼuchaʼal laj yal li Pabloe, yuʼun jaʼ ch-akʼbat spʼijilik xchiʼuk chkoltaatik ‹sventa oyuk lek smelolalik ta stojolal Jeova›, vaʼun lek ch-ilatik. Ta xkoltaatik xtok sventa spasik ‹li lekil abtelal› ti oy ta yoʼonton Jeova ti akʼo spasike, mas to ta sventa li cholmantale (Kol. 1:9, 10). Jaʼ yuʼun, mi oy buchʼu chkakʼbetik estudioe kalbetik ti mi la skʼelilan jujun kʼakʼal xchiʼuk mi la xchanilan li Svivliae, ta me xkoltaat sventa xtun ta stojolal Jeova.

⁴ Mi ta jkʼantik akʼo xchan Svivliaik li buchʼutik chkakʼbetik estudioe, skʼan me jech jpastik ek. Skʼan jkʼelilantik jujun kʼakʼal li Vivliae xchiʼuk ti jnopilanbetik skʼoplale, mi jech ta jpastike ta me skoltautik ta jkuxlejaltik xchiʼuk li ta cholmantale. Jech kʼuchaʼal liʼe, mi oy kʼusi tsots laj kichʼtik jakʼbel ta cholmantale, xuʼ me kuʼuntik stakʼbel ta Vivlia. Kʼalal ta jchantik ta Vivlia ti muʼyuk lubtsajik ta xcholel mantal li Jesus xchiʼuk Pabloe, ta me spat koʼontontik xchiʼuk ta me jcholtik-o mantal, akʼo mi vokol tajek chkaʼitik. Kʼalal chkalbetik yantik ta sventa li kʼusitik la jchantik ta Vivliae xchiʼuk ti kʼuxi skoltaojutike, xuʼ van xtijbat yoʼontonik ta sabel mas smelolal li Vivliae.

5. Alo kʼuxi xuʼ xnop xaʼiik xchanel Svivliaik li j-estudiotike.

⁵ Xuʼ van jakʼbe jbatik kʼuxi ta koltael j-estudiotik sventa xnop xaʼiik xchanel li Vivliae. Veno, xuʼ koʼol jchapantik li kʼusi ta jchantik xchiʼuke. Xuʼ van xkalbetik ti akʼo saʼ li versikuloetik ta parafoetike. Mi jaʼ ta jchantik xchiʼuk li livro Chchanubtasvan[e], xuʼ van xkalbetik ti akʼo skʼel li yan mantaletik ti muʼyuk ta jchantik xchiʼuke, jech kʼuchaʼal li apendisee. Mi laje xuʼ xkakʼbetik ta ilel kʼuxi ta chapanel li kʼusitik ta jkʼeltik ta tsobajeletike, taje jaʼuk me sventa xakʼ sloʼil li ta tsobajele. Xuʼ jtijbetik yoʼonton ti akʼo skʼel sliklej li revista ¡Despertad! xchiʼuk Li Jkʼel osil ta toyole. Jech xtok, xuʼ jchanubtastik ta saʼel stakʼobil li kʼusitik ta jakʼbe jbatik ta sventa li Vivliae, taje xuʼ te sta ta Watchtower Library o li ta VIVLIOTEKA TA INTERNET yuʼun Watchtower[e]. Mi jech la xchan li Svivliae, mas me tskʼupin xchiʼuk ch-ayan ta yoʼonton xchanel mas.

6. 1) ¿Kʼuxi van xuʼ jkoltatik sventa xlik skʼupin xchanel Vivlia li j-estudiotike? 2) ¿Kʼusi van xuʼ xtijbat-o yoʼonton spasel mi lik skʼupin xchanel li Vivliae?

 ⁶ Kʼalal oy buchʼu chkakʼbetik estudioe, oy ta koʼontontik ti xakʼik venta ti toj ep sbalil li Vivliae, yuʼun chkoltaatik sventa xojtikinik mas li Jeovae. Oy ta koʼontontik ti akʼo skʼupin kʼalal jaʼo ta jchanubtastike, jaʼ yuʼun mu me jsujtik. Mi mas la xchan ta sventa li Vivliae, mas me chmuib chaʼi. Vaʼun xuʼ van jech chaʼi sba kʼuchaʼal li jtsʼibajom yuʼun salmo ti xi laj yale: «Li vuʼune chinopaj ta atojol, yuʼun jaʼ toj lec chcaʼay. Voʼot noʼox cacʼoj jba o ta acʼob, Mucʼul Dios, voʼot li Cajvalote» (Sal. 73:28). Ta melel ta me xkoltaat yuʼun chʼul espiritu sventa xkʼot ta yamigo Jeova li j-estudiotike.

7. ¿Kʼuxi la xchanubtas yajtakboltak Jesus ta sventa li cholmantale? (Kʼelo li lokʼol ta slikebale).

⁷ Ep me kʼusitik chakʼ jchantik ti kʼu yelan la xchanubtas yajtakboltak li Jesuse. Yuʼun koʼol la xcholik mantal, vaʼun li jtakboletike laj yakʼik venta kʼuxi la xchanubtas li krixchanoetike. Li Jesus xtoke laj yalbe mantal jtakboletik ta sventa li cholmantale (Mateo, kapitulo 10). ^[1] Jaʼ yuʼun ta anil noʼox la xchanik kʼuxi chchanubtasvanik ta sventa li Diose (Mat. 11:1). Jkʼeltik chaʼtos kʼusitik xuʼ xkoltaatik ta cholmantal li buchʼutik achʼik toe.

8, 9. 1) ¿Kʼu yelan la xchiʼin ta loʼil krixchanoetik li Jesuse? 2) ¿Kʼusi xuʼ jpastik sventa snaʼik kʼuxi ta chiʼinel ta loʼil krixchanoetik li buchʼutik achʼik toe?

⁸ Kʼalal ta jchiʼintik ta loʼil li krixchanoetike. Maʼuk noʼox me la xcholbe mantal epal krixchanoetik li Jesuse. Yuʼun ep ta velta la xchanubtas ta jujuntal xtok. Pe kʼalal chchiʼinan ta loʼil krixchanoetik li Jesuse lek onoʼox yoʼonton laj yakʼ ta ilel. Jun skʼelobile jaʼo kʼalal la xchiʼin ta loʼil jun ants ti ay slup yaʼal ti te nopol xil li jteklum Sikare (Juan 4:5-30). Jun velta xtoke la xchiʼin ta loʼil jun jtsobpatan ti Mateo Levi sbie, vaʼun li Jesuse xi laj yalbee: «Laʼ tsʼakliun». Li Mateoe la xchʼam li takel ta ikʼel taje. Ta tsʼakale, li Mateoe laj yikʼ ta veʼel ta sna li Jesuse xchiʼuk yan krixchanoetik. Vaʼun te la xchiʼin ta loʼil epal krixchanoetik li Jesuse (Mat. 9:9; Luk. 5:27-39).

⁹ Jun vinik ti Natanael sbie oy toʼox kʼusitik chopol laj yal ta stojolal li krixchanoetik ta Nasaret ti jaʼ te slumal li Jesuse. Akʼo mi jech, lek onoʼox yoʼonton laj yakʼ ta ilel li Jesuse. Ta skoj taje jel li kʼusi snopoj toʼox ta stojolal li Jesuse xchiʼuk ayan ta yoʼonton yojtikinel mas (Juan 1:46-51). ¿Kʼusi chakʼ jchantik li Jesuse? Jaʼ ti chchikintaik krixchanoetik kʼusi chkalbetik mi chkakʼtik ta ilel slekil koʼontontike. ^[2] Jech jchanubtastik ek li buchʼutik achʼik toe sventa mas skʼupinik li cholmantale.

10-12. 1) ¿Kʼusi la spas Jesus sventa xkʼot ta yoʼonton krixchanoetik li lekil aʼyeje? 2) ¿Kʼuxi xuʼ jkoltatik sventa xkʼotik ta lekil jchanubtasvanejetik li buchʼutik achʼik toe?

¹⁰ Chanubtaso li buchʼutik oy ta yoʼontonike. Akʼo mi mu noʼox xokob li Jesuse, ta xchʼak skʼakʼal xchiʼuk ep kʼusitik ta xakʼanbe xchan kʼalal chil ti oy ta yoʼonton chchikintaik li krixchanoetike. Jun veltae te kʼot epal krixchanoetik ta tiʼ nab sventa xchikintaik li kʼusi chale. Vaʼun muy ta varko xchiʼuk li Pedroe, te lik xchanubtas tal li epal krixchanoetike. Laje oy kʼusi laj yakʼbe xchan li Pedroe. La spas jun skʼelobil juʼelal sventa stsak epal choyetik. Vaʼun xi laj yale: «Yuʼun liʼ ta ora xchiʼuk ta jelavele jaʼ xa chasaʼ kuʼun li kuxul krixchanoetik jech kʼuchaʼal chasaʼ choye». Li Vivliae chal ti anil noʼox «la slokʼesik ta tiʼ nab li svarkoike, te laj yiktaik skotol, vaʼun la stsʼakliik batel» Jesus li Pedro xchiʼuk li buchʼutik te xchiʼinojane. Vaʼun kʼotik ta yajchankʼoptak li Jesuse (Luk. 5:1-11).

¹¹ Jun vinik ti Nikodemo sbie oy ta yoʼonton chchan mas ta stojolal li Jesus eke. Pe li  vinik taje te ch-abtej ta snail chapanobbail ti mas tsots skʼoplal yuʼun li judaetike. Jaʼ yuʼun chiʼ mi laj yichʼ ilel ti ta skʼopon li Jesuse. Jech oxal ta akʼobaltik chbat skʼel li Jesuse. Pe ta sjunul yoʼonton la xchʼam li Jesuse, yuʼun la xchʼak skʼakʼal xchiʼuk laj yalbe li kʼusitik tsotsik skʼoplale (Juan 3:1, 2). Laj onoʼox xchʼak skʼakʼal sventa xchanubtasan ta sventa kʼusi melel li krixchanoetike xchiʼuk la stsatsubtasbe xchʼunel yoʼontonik. Li voʼotik eke skʼan me xkakʼtik persa sut jvulaʼantik li krixchanoetike, mu ventauk kʼusi ora ti tskʼanik vulaʼanele. Jchʼakbetik yorail xtok sventa jkoltatik ta yaʼibel smelolal li Vivliae.

¹² Kʼalal ta jtatik krixchanoetik ti oy ta yoʼontonik xchanel mas li Vivliae, sut me jvulaʼantik, mi jech la jpastike jech me tspasik ek li buchʼutik achʼik toe. Jech xtok, xuʼ xkikʼtik batel kʼalal chbat jkʼel jrevisitatik xchiʼuk kʼalal chkakʼtik estudioe. Vaʼun chkʼotik ta lekil jchanubtasvanejetik ta Vivlia xchiʼuk ta me xmuyubajik kʼalal tskoltaik ta yojtikinel Jeova li krixchanoetike. Ta me skʼupinik mi bat spas li srevisitaike xchiʼuk kʼalal mi laj yakʼbeik estudioe. Jech xtok, ta me x-ayan smalael yuʼunik xchiʼuk muʼyuk chlubtsajik kʼalal muʼyuk te tstaik li krixchanoetike (Gal. 5:22) (kʼelo li rekuadro « Muʼyuk xlubtsaj»).

13, 14. 1) ¿Kʼusi chakʼ jchantik li yajtuneltak Jeova ti la skoltaik li yantike? 2) ¿Kʼuxi van xuʼ jchanubtastik li kerem tsebetik xchiʼuk li buchʼutik achʼik to sventa skoltaik li ermanoetike?

¹³ Li Jeovae oy ta yoʼonton ti jkʼanojuk jbatik xchiʼuk ti jkolta jbatik ta jujuntale, ta skoj ti kermano jbatike (kʼelo Lukas 22:24-27; 1 Pedro 1:22). Li Vivliae chal ti Jesuse la skolta krixchanoetik ti bu kʼalal xuʼ yuʼune. Yuʼun laj yakʼ xkuxlejal ta stojolalik xtok (Mat. 20:28). Jun yajtsʼaklom Kristo ti Dorkas sbie nopem xaʼi «kʼusitik tspas xchiʼuk ep matanaletik chakʼ ta xkʼuxul yoʼonton» ta stojolal li yantike (Ech. 9:36, 39). Li Maria eke ‹tsots abtej ta stojolal› li yermanotak ta Romae (Rom. 16:6). ¿Kʼuxi xuʼ jkoltatik sventa xaʼibeik smelolal ti tsots skʼoplal ti skoltaik ermanoetik li buchʼutik achʼik toe?

¹⁴ Kʼalal mi bat jvulaʼantik li ermanoetik ti malubemik xae o ti ipike, xuʼ xkikʼtik batel li buchʼutik achʼik toe. Mi stakʼ chilik li totil meʼiletike xuʼ me xikʼik batel li yalab xnichʼnabik eke. Li moletik ta tsobobbaile xuʼ me xalbeik kerem tsebetik o li buchʼutik achʼik to ti xichʼbeik batel sveʼelik o mi oy kʼusi skʼan meltsanel ta snaik li buchʼutik malubemik xae. Mi laj yakʼik venta kerem tsebetik xchiʼuk li buchʼutik achʼik to ti tskolta sbaik ta jujuntal li ermanoetike, jech me tspasik ek. Jkʼeltik kʼusi la spas jun mol ta tsobobbail. Kʼalal jaʼo chchol mantal ta jun bikʼit lume, nopem xaʼi tsvulaʼan li ermanoetik tee. Oy jun kerem ti ta onoʼox xbat chiʼin li ermanoe, ta skoj taje lik snop kʼuxi van tskolta li ermanoetik eke (Rom. 12:10).

15. ¿Kʼu yuʼun tsots skʼoplal skʼan oyuk ta yoʼonton moletik ti xchanubtasik lek li ermanoetike?

¹⁵ Li Jeovae tstunes viniketik sventa xchanubtasvanik li ta tsobobbailetike. Jaʼ yuʼun tsots skʼoplal ti snaʼikuk lek yetʼesel mantaletik li ermanoetike. Li moletike xuʼ me skoltaik sventa xlekub ti kʼu yelan chchanubtasvanike. Xuʼ van xchikintabeik kʼalal chchanilan sdiskurso junuk jtunele (Neh. 8:8). ^[3]

16, 17. 1) ¿Kʼuxi laj yakʼ ta ilel Pablo ti oy ta yoʼonton ti lekuk chapal li Timoteoe? 2) ¿Kʼuxi van xuʼ xchanubtasik jtuneletik li moletike?

¹⁶ Chtun tajek ti xichʼik chanubtasel sventa xkʼotik ta moletik li ermanoetike. Li jtakbol Pabloe la xchanubtas li Timoteoe, pe laj yalbe ti akʼo xchanubtas li yantik eke. Xi la stojobtase: «Saʼilano batel atsatsal ta stojolal slekil yutsil oʼontonal ti te oy ta stojolal Kristo Jesuse, jech xtok, li kʼusitik laj avaʼi ta jtojolal ti jech chalik ek li epal testigoetike, kʼubanbo tukʼil viniketik li kʼusitik taje, vaʼun jaʼ  jech lek chapalik sventa chchanubtasik batel li yantike» (2 Tim. 2:1, 2). Ep kʼusitik la xchan ta stojolal Pablo li Timoteoe, ta skoj ti jaʼ mol xchiʼuk jtakbole. Li kʼusitik la xchane jaʼ ti snaʼuk lek xcholel mantale xchiʼuk ti kʼuxi xuʼ skolta li ermanoetik ta tsobobbaile (2 Tim. 3:10-12).

¹⁷ Li Pabloe ep la xchʼak skʼakʼal sventa xchanubtas li Timoteoe. Yuʼun tsots skʼoplal chil ti lekuk chapal ta spasel li yabtele (Ech. 16:1-5). ¿Kʼusi van xuʼ xchanbeik Pablo li moletik ta tsobobbaile? Jaʼ ti xikʼik batel junuk jtunel ti lek xa chanem sventa xbat svulaʼanik junuk ermanoe. Vaʼun ta me xchanik kʼuxi ta chanubtasel li yantike, ch-ayan smalael yuʼunik xchiʼuk mas me chlik skʼanik li ermanoetike. Jech xtok, ta me xchanik saʼel beiltasel ta stojolal Jeova sventa xchabibeik li xchijtake (1 Ped. 5:2).

18. ¿Kʼu yuʼun tsots skʼoplal ti xichʼik chanubtasel sventa spasbeik yabtel Jeova li ermanoetike?

¹⁸ Li ta slajebal xa kʼakʼal kuxulutike ep buchʼutik skʼanik chanubtasel sventa xlekub ti kʼu yelan chcholik mantale. Jech xtok, skʼan oyuk ermanoetik ti snaʼikuk kʼuxi ta chabiel li tsobobbaile. Li Jeovae tskʼan ti lekuk chapal skotol li yajtuneltake, jaʼ yuʼun yakʼojbutik jmotontik ta xchanubtasel li buchʼutik achʼik toe. Jech oxal tsots skʼoplal ti xkakʼtik persa ta xchanubtasel li yantike, jech kʼuchaʼal la spas li Jesus xchiʼuk Pabloe. Skʼan me jchanubtastik bu kʼalal xuʼ kuʼuntik skotol li ermanoetike, yuʼun ep to skʼan cholel mantal yoʼ to muʼyuk chtal li slajebal kʼusitik chopole.

19. ¿Kʼu yuʼun jnaʼojtik ti lek kʼusi chkʼot ta pasel mi la jchanubtastik li ermanoetike?

¹⁹ Skʼan jchʼak jkʼakʼaltik xchiʼuk xkakʼtik persa ta xchanubtasel li buchʼutik achʼik toe. Pe jnaʼojtik lek ti jaʼ Jeova xchiʼuk Jesus ti xuʼ skoltautik sventa jnaʼtik kʼuxi ta chapanel li ermanoetike. Ta me xakʼbutik muyubajel kʼalal chkiltik ti tsots ch-abtejik ta tsobobbail xchiʼuk ta cholmantal li buchʼutik achʼik toe (1 Tim. 4:10). Jech xtok, kakʼtik me persa spasel bu kʼalal xuʼ kuʼuntik sventa xijchʼi batel ta mantal, ti jlekubtas li jtalelaltike xchiʼuk ti xkamigointik mas li Jeovae.