Li Jesus xchiʼuk yajchankʼoptake chopol kʼoptaatik yuʼun yajkontratak ta skoj noʼox taje. Li Smantal Moisese chal ti oy kʼusitik xuʼ x-ikʼubtasatik-o ta mantal li krixchanoetike. Junantik taje jaʼ mi oy kʼusi chlokʼ yuʼun jun vinik o jun antse, mi ip ta kʼaʼemal chamel o mi tspikik anima o chamem chonbolom. ¿Kʼusi xuʼ spas sventa sakub yan velta li jun krixchanoe? Li Mantale chal ti xuʼ la xakʼ milbil matanale xchiʼuk ti xchukʼ li skʼuʼ spokʼe (Levítico, kapitulo 11 kʼalal ta 15; Números, kapitulo 19).

Li jnitvanejetik ta relijion yuʼun judaetike mu baluk noʼox laj yaʼiik li mantaletik ti oy xa onoʼoxe, yuʼun laj to yakʼbeik xchiʼil xtok. Jlik livroe chal ti laj la yakʼik yan mantaletik sventa xichʼ naʼel kʼuxi xuʼ x-ikʼub li jun krixchanoe xchiʼuk chal xtok ti kʼuxi la xuʼ xikʼubtas li yantike. Jech xtok, lek xcholet laj yal ti kʼusitik xuʼ x-ikʼub-o yuʼun li jun krixchanoe, jech kʼuchaʼal li kʼusitik chtun ta yut nae o li yan kʼusitike. Lik spasik yan kʼusitik xtok sventa sakubtas sbaik yan velta li krixchanoetike.

Xi jakʼbat yuʼun yajkontratak li Jesuse: «¿Kʼu yuʼun muʼyuk tstsakik ta mukʼ avajchankʼoptak li kʼusitik nopem xaʼi tspas krixchanoetik ta voʼnee, ti ikʼ skʼob chveʼike?» (Mar. 7:5). Li jnitvanejetik ta relijion taje maʼuk noʼox me tskʼan chalik ti lekuk spok skʼobik sventa sakuk li sbekʼtal stakopalike. Yuʼun oy kʼusi la slikesik spasel sventa sakubtasbeik skʼob li jun krixchano kʼalal mi chveʼ xae, jaʼ ti persa skʼan smalbeik voʼ ta skʼobe. Li jlik livro laj kalbetik skʼoplale chal ti chlik-o la skʼopik jnitvanejetik ta relijion kʼalal tstʼujik kʼusi bochal tstunesike, kʼusi jtosukal voʼ mas lek, buchʼu la xuʼ xakʼ li voʼe xchiʼuk ti bu to la kʼalal skʼan spok li skʼobike.

¿Kʼusi van la snop Jesus ta sventa li mantaletik laj yakʼik li krixchanoetike? Xi laj yalbe li jnitvanejetik ta relijione: «Jloʼlavanejetik, ta melel jaʼ akʼoplalik li kʼusi laj yal j-alkʼop Isaias ti xi tsʼibabile: ‹Li jteklum liʼe ta yeik noʼox chichʼikun ta mukʼ, pe li yoʼontonike nom tajek oy ta jtojolal [jaʼ xkaltik, nom oyik ta stojolal Jeova]. Muʼyuk sbalil ti chichʼikun-o ta mukʼe, yuʼun jaʼ noʼox smantaltak krixchanoetik li kʼusi chakʼik ta chanele›. Chatenik komel li smantaltak Diose, pe jaʼ ta sjunul avoʼonton chapasik li kʼusitik nopem xaʼi tspas krixchanoetike» (Mar. 7:6-8).