1. ¿Kʼusi oy ta koʼontontik ti akʼo spasik li kutsʼ kalaltike?

¿MI OY avutsʼ avalaltak ti muʼyuk to chichʼik ta mukʼ li Jeovae? Xuʼ van jaʼ jech chavaʼi aba kʼuchaʼal jun ermana ti Pauline * sbie, xi chale: «Ti kʼuxi laj kojtikin li mantale, oy tajek ta koʼonton ti jmojuk tsobolunkutik ta Paraiso xchiʼuk skotol li kutsʼ kalale. Pe mas to oy ta koʼonton ti jmojuk xitunkutik ta stojolal Jeova xchiʼuk li jmalal ti Wayne sbie xchiʼuk li kuni keremkutike».

2. ¿Kʼusitik sjakʼobiltak ta jkʼelbetik skʼoplal li ta xchanobil liʼe?

² Mu xuʼ jsujtik li kutsʼ kalaltik sventa xchʼamik li mantale, pe xuʼ me jkoltatik sventa xaʼibeik smelolal li kʼusi chal Skʼop Diose (2 Tim. 3:14, 15). ¿Kʼu yuʼun skʼan jcholbetik mantal li kutsʼ kalaltike? ¿Kʼu yuʼun skʼan xkaʼibetik smelolal ti kʼu yelan chaʼi sbaike? ¿Kʼusi xuʼ jpastik sventa xlik skʼanik Jeova jech kʼuchaʼal jpasojtike? Xchiʼuk ¿kʼuxi xuʼ skoltautik li ermanoetik ta jtsobobbailtike?

3. ¿Kʼu yuʼun skʼan jcholbetik mantal li kutsʼ kalaltik jech kʼuchaʼal chal li 2 Pedro 3:9?

³ Jutuk xa skʼan sventa xakʼbe slajeb sbalumil Satanas li Jeovae, vaʼun jaʼ xa noʼox kuxul chkomik «li buchʼutik oy lek ta yoʼontonik stael li kuxlejal sbatel osile» (Ech. 13:48). Ta melel, ta jchʼakbetik lek yorail xchiʼuk chkakʼ kipaltik sventa jcholbetik mantal li krixchanoetik ta parajeetike, jaʼ yuʼun mas me oy srasonal  sventa jcholbetik mantal li kutsʼ kalaltik yoʼ xlik yichʼik ta mukʼ li Jeovae. Li jkʼanvanej Totil kuʼuntike «mu skʼan ti oy buchʼu xbat ta lajelal junuke; moʼoj, li kʼusi tskʼane jaʼ ti» sutes yoʼonton skotol li krixchanoetike (kʼelo 2 Pedro 3:9).

4. ¿Kʼusi van muʼyuk lek ta jpastik kʼalal ta jcholbetik mantal li kutsʼ kalaltike?

⁴ Teuk ta joltik liʼe: bakʼintike, xuʼ lek kʼu yelan chijkʼopoj kʼalal ta jcholtik li lekil aʼyeje o xuʼ van muʼyuk. Kalbetik junuk skʼelobil. Li buchʼutik mu xkojtikintike xuʼ van ta jkʼeltik lek kʼu yelan ta jchiʼintik ta loʼil, jaʼuk li kutsʼ kalaltike xuʼ van jamal tajek ti kʼu yelan chkalbetik li mantale.

5. ¿Kʼusi skʼan teuk ta joltik kʼalal ta jcholbetik mantal li kutsʼ kalaltike?

⁵ Xuʼ van xi chkaltik kʼalal ta jvules ta joltik ti kʼu yelan la jcholbetik mantal ta sba velta li kutsʼ kalaltike: «Chopol chkaʼi ti kʼu yelan laj kalbee, jechuke la jsabe lek smelolal kʼu yelan la jchiʼin ta loʼil». Xi la stojobtas yajtsʼaklomtak Kristo li jtakbol Pabloe: «Skotoluk me ora oyuk lek smuil li akʼopojelike, oyuk me lek yatsʼamil sventa xanaʼik kʼu yelan chatakʼbeik li jujun krixchanoe» (Kol. 4:5, 6). Skʼan teuk ta joltik li kʼusi laj yal Pablo kʼalal ta jchiʼintik ta loʼil li kutsʼ kalaltike, yuʼun mi mu jechuk chijloʼilaje, xuʼ me chopol xaʼi sbaik kuʼuntik, vaʼun muʼyuk xa bu chchikintabutik.

6, 7. Li buchʼu maʼuk yajtunel Jeova li snup xchiʼile, ¿kʼu yuʼun toj tsots skʼoplal ti xaʼibe smelolal ti kʼu yelan chaʼi sbae? Albo junuk skʼelobil.

⁶ Kaʼibetik kʼu yelan chaʼi sbaik. Xi to chal li Pauline ti naka to laj kalbetik skʼoplale: «Ta slikebale, naka sventa mantal ta jloʼiltabe li jmalale, jaʼ muʼyuk xa ta jakʼbe ‹li kʼusitik tspase›». Pe li Waynee jutuk tajek kʼusi snaʼ ta sventa li Vivliae, jaʼ yuʼun mu xaʼibe smelolal li  kʼusi ch-albate. Xchiʼuk la snop ti jaʼ xa batem ta yoʼonton srelijion li yajnile, vaʼun lik svul yoʼonton xchiʼuk la snop ti la stikʼ sba ta jun xibal sba relijione xchiʼuk ti jecheʼ noʼox chlaj ta loʼlaele.

⁷ Li Paulinee chal ti jutuk mu skotoluk bat kʼakʼal jaʼ mas chchiʼin li ermanoetike, jaʼ jech xtok li ta savado xchiʼuk ta domingoe, yuʼun chbat ta tsobajel, ta cholmantal xchiʼuk chchʼay yoʼontonik. Xi chal kaʼitike: «Bakʼintike, tsʼijil chkʼot sta jnakutik li jmalale, vaʼun stuk chaʼi sba». Stalel onoʼox ti tsnaʼ tajek yajnil xchiʼuk li yuni kereme, yuʼun mu xojtikin li buchʼutik te xchiʼinojane, jech oxal la snop ti jaʼ mas tsots skʼoplal chil yamigotak li yajnile ti jaʼ muʼyuk tsakbil ta venta li stuke. Jech oxal, li Waynee laj yalbe yajnil ti tskʼan chtuchʼ snupunel sventa sibtase. Jechuke, la snop lek Pauline ti kʼu yelan chaʼi sba li smalale.

8. ¿Kʼusi van tskʼel ta jtojolaltik li kutsʼ kalaltik jech kʼuchaʼal chal li 1 Pedro 3:1 xchiʼuk 2?

⁸ Kakʼtik ta ilel jlekil talelaltik. Jutuk mu skotoluk veltae, li kutsʼ kalaltike jaʼ tskʼel li kʼusi ta jpastike maʼuk li kʼusi chkaltike (kʼelo 1 Pedro 3:1, 2). Jaʼ jech laj yakʼ venta ta tsʼakal li Paulinee, xi chal kaʼitike: «Jnaʼoj ti skʼanojunkutik li jmalale xchiʼuk ti maʼuk jech oy ta yoʼonton ti jtuchʼ jnupunelkutike. Pe kʼalal la sibtasune, te laj kakʼ venta ti skʼan jech jpas kʼuchaʼal chal Jeova ta sventa li nupunele xchiʼuk ti mu voʼonuk echʼem xikʼopoje, yuʼun skʼan xkakʼ ta ilel jlekil jtalelal». Li Paulinee muʼyuk xa la suj smalal sventa xalbeik skʼoplal li Vivliae, jaʼ xa lik sjakʼbe li kʼusitik tspas jujun kʼakʼale. Li Waynee laj yakʼ venta ti mas xa manxo li yajnile xchiʼuk ti mas xa lek tspas sba li skereme (Prov. 31:18, 27, 28). Kʼalal laj yil ti jelbat xkuxlejal yuʼun Vivlia li yajnil xchiʼuk skereme,  mas xa ayan ta yoʼonton xchikintael li mantale (1 Kor. 7:12-14, 16).

9. ¿Kʼu yuʼun skʼan mu xijlubtsaj ta skoltael li kutsʼ kalaltike?

⁹ Mu xijlubtsaj ta skoltael li kutsʼ kalaltike. Li Jeovae chakʼ kiltik ti skʼan mu xijlubtsaje, yuʼun ep ta velta chalbe lekil aʼyej li krixchanoetik sventa staik li kuxlejal sbatel osile (Jer. 44:4). Li jtakbol Pablo eke laj yalbe Timoteo ti mu xikta sba ta skoltael li yantike xchiʼuk xi laj yalbee: «Mi jech chapase ta me xakol xchiʼuk ta me xkolik ek li buchʼutik chchikintabote» (1 Tim. 4:16). Ta skoj ti jkʼanojtik tajek li kutsʼ kalaltike, oy tajek ta koʼontontik ti xojtikinik li kʼusi chal ta melel li Vivliae. Li Paulinee toj lek kʼusi kʼot ta pasel yuʼun ta skoj li skʼopojele xchiʼuk li kʼusitik lek la spase. Avie, jun yoʼonton chtunik ta stojolal Jeova, jmoj chtunik ta prekursor xchiʼuk chtun ta mol ta tsobobbail li Waynee.

10. ¿Kʼu yuʼun skʼan oyuk smalael kuʼuntik?

¹⁰ Oyuk smalael kuʼuntik. Kʼalal chlik kakʼ ta jkuxlejaltik li smantaltak Diose, xuʼ van vokol chaʼi kutsʼ kalaltik ti ta jel jkuxlejaltike xchiʼuk li kʼusitik jchʼunojtike. ¿Kʼu yuʼun? Yuʼun chakʼik venta ti muʼyuk xa ta jchiʼintik ta spasel li kʼinetik sventa srelijionike xchiʼuk ti muʼyuk xa ta jtikʼ jbatik ta politikae. Jech oxal, xuʼ van xlik ilinuk junantik li kutsʼ kalaltike (Mat. 10:35, 36). Pe mu me jnoptik ti muʼyuk tsjel snopbenike, yuʼun mi muʼyuk xa la jkoltatik ta yaʼibel smelolal li kʼusi jchʼunojtike, xkoʼolaj ti yakal xa ta jchapantike xchiʼuk ti ta jnoptik ti mu staik-o li kuxlejal sbatel osile. Pe skʼan jvules ta joltik liʼe: li Jeovae jaʼ yakʼojbe ta sba Xnichʼon sventa xchapanvan, maʼuk li voʼotike (Juan 5:22). Mi oy smalael kuʼuntik ta stojolal li kutsʼ kalaltike, xuʼ van x-ayan ta yoʼontonik xchikintael lekil aʼyej li ta tsʼakale (kʼelo li rekuadro « Jtunestik li jpajinatik ta Internete»).

11-13. ¿Kʼusi chakʼ jchantik li kʼusi la spas ta stojolal stot smeʼ li Alice?

¹¹ Oyuk slekil koʼontontik, pe mu me jeltik li kʼusi jnopojtike (Prov. 15:2). Kalbetik skʼoplal li Alice. Li kermanatike laj yojtikin mantal kʼalal jaʼo te nakal ta yan lume, li stot smeʼe muʼyuk xchʼunojik Dios xchiʼuk tskʼupinik tajek ti tstikʼ sbaik ta politikae. Jaʼ yuʼun, laj yakʼ venta ti skʼan xalbe noʼox stot smeʼ li kʼusitik toj lekik yakal chchane. Xi chal kaʼitike: «Mi muʼyuk chavalbe ta anil atot ameʼ li kʼusitik achʼ chlik apase xchiʼuk li kʼusi chlik achʼune, mas to me ch-ilinik-o». Sventa stijbe yoʼonton stot smeʼ ta sventa li kʼusitik chal Vivliae, la stsʼibabe batel karta xchiʼuk oy kʼusitik tsjakʼbe, jech kʼuchaʼal ta sventa li kʼanelale (1 Kor. 13:1-13). Jech xtok, tstakbe batel smoton li stot smeʼe, tstojbe ta vokol ti tsʼitesate xchiʼuk ti chabiate. Kʼalal chbat ta vulaʼale, chakʼ persa skoltael smeʼ ta spasel li kʼusitik skʼan pasel ta snaike. Pe muʼyuk lek laj yaʼi stot smeʼ kʼalal laj yalbe li kʼusitik achʼ lik xchʼune.

¹² Jech-o la xchan jujun kʼakʼal Svivlia kʼalal te xchiʼuk stot smeʼ li Alice. Xi chale: «Kʼalal jech la jpase, laj yakʼ venta jmeʼ ti ep tajek sbalil chkil li Vivliae». Li stot eke la snop ti chchan jutuk Vivlia sventa xaʼibe smelolal kʼu yuʼun ti jelel xa li stsebe xchiʼuk tskʼel mi oy kʼusi chopol tsta li ta Vivliae. Xi to chal li Alice: «Laj kakʼbe jlik Svivlia li jtote xchiʼuk oy kʼusi te la jtsʼibabe sventa xtijbat yoʼonton». ¿Kʼusi kʼot ta pasel? Toj labal sba laj yil stot li kʼusi la xchan ta Vivliae xchiʼuk muʼyuk kʼusi chopol la sta.

¹³ Skʼan oyuk slekil koʼontontik, pe skʼan mu jeltik li kʼusi jnopoj ta jpastike akʼo mi xkil tsots jvokoltik (1 Kor. 4:12xchaʼvokʼal). Jaʼ jech la spas li Alice, yuʼun kontrainat yuʼun li smeʼe, xi chale: «Kʼalal laj kichʼ voʼe, laj yalbun jmeʼ ti pimil tsebune». ¿Kʼusi la spas li Alice? Xi chalbutike: «Muʼyuk lajel jloʼilkutik, moʼoj, laj kalbe ti jnopoj xa lek ti chipas ta stestigo  Jeovae xchiʼuk ti muʼyuk ta jsutes koʼontone. Laj kakʼ persa yoʼ xakʼ venta ti jkʼanoje, vaʼun te lik tʼomuk kokʼelkutik xchiʼuk la jmeltsanbe sveʼel ti lek mu chaʼie. Laj une, te lik yakʼ venta ti mas xa lek jtalelal ta skoj ti ta jchan li Vivliae».

14. ¿Kʼu yuʼun skʼan mu jchʼuntik kʼalal oy kʼusi tsujutik spasel li kutsʼ kalaltike?

¹⁴ Xuʼ van xjalij sventa xakʼik venta kutsʼ kalaltik ti jaʼ mas tsots skʼoplal chkiltik spasel li kʼusi tskʼan yoʼonton Jeovae. Jaʼ jech la snuptan li Alice, yuʼun kʼalal och ta prekursorae, lik okʼuk yan velta li smeʼ ta skoj ti maʼuk laj yakʼ ta yoʼonton li kʼusi xuʼ sta ta xkuxlejal ti jaʼ li kʼusi ox tskʼan yoʼonton stot smeʼe. Pe tukʼ laj yakʼ sba li Alice, xi chale: «Mi chachʼun ta anil li kʼusi tskʼan avutsʼ avalal ti akʼo xapase, xuʼ me sujoxuk ta spasel yan kʼusitik. Pe mi ta slekil avoʼonton chaval ti moʼoje xchiʼuk mi jpʼel ta avoʼonton chavakʼ ta ilele, xuʼ van chchikinta junantik avutsʼ avalal li lekil aʼyeje». Jaʼ jech kʼot ta stojolal li Alice, yuʼun jaʼik xa prekursoretik li stot smeʼe xchiʼuk chtun ta mol ta tsobobbail li stote.

15. Jech kʼuchaʼal chal Mateo 5:14 kʼalal ta 16 xchiʼuk 1 Pedro 2:12, ¿kʼuxi xuʼ xkoltaat kutsʼ kalaltik li kʼusitik lek tspas li ermanoetike?

¹⁵ Li Jeovae jaʼ tstunes li kʼusitik lek tspas yajtuneltak sventa xikʼ talel ta steklumal li yan krixchanoetike (kʼelo Mateo 5:14-16; 1 Pedro 2:12). Mi maʼuk stestigo Jeova li anup achiʼile, ¿mi xojtikin xa li ermanoetik ta atsobobbaile? Jaʼ jech la spas li Pauline ti laj xa kalbetik skʼoplal ta slikebale, yuʼun sventa xojtikinan ermanoetik li smalale, nopajtik noʼox chikʼ batel ermanoetik ta sna. Xi chal Wayne ti kʼuxi  koltaat yuʼun jun ermano sventa mu chopoluk kʼusi snop ta stojolal li yantike: «Oy jun ermanoe la skʼan svakasion ta yabtel sventa xtal skʼel tajimol ta jna. Vaʼun, laj kakʼ venta ti oy ta yoʼonton li yantike, ti maʼuk noʼox li srelijione».

16. ¿Kʼu yuʼun skʼan jtijbetik yoʼonton li kutsʼ kalaltik sventa xbat xchiʼinutik li ta tsobajeletike?

¹⁶ Yan ti kʼuxi xuʼ lek jkoltatik li kutsʼ kalaltike jaʼ ti jtijbetik yoʼontonik sventa xbat xchiʼinutik li ta tsobajeletike (1 Kor. 14:24, 25). Li sba velta ay ta tsobajel li Waynee jaʼo kʼalal jelav li Konmemorasione, yuʼun lokʼem xa ox ta yabtel xchiʼuk jlikel noʼox chjalij li tsobajele. Xi chal kaʼitike: «Muʼyuk laj kaʼi skotol li kʼusi echʼ ta tsobajele, pe xvul lek ta jol ti kʼu yelan la skʼoponikune, yuʼun nopajik ta jtojolal xchiʼuk lek la xchʼamikun. Laj kil ti lek yoʼontonike». Kʼalal chbat ta tsobajeletik xchiʼuk ta cholmantal li Paulinee, chkoltaat yuʼun jun nupultsʼakal sventa jmoj skʼelik li yuni kereme. Jaʼ yuʼun, kʼalal ayan ta yoʼonton Wayne ti xojtikinbe lek srelijion li yajnile, jaʼ laj yalbe li ermano sventa x-akʼbat s-estudioe.

17. 1) ¿Kʼusi mu stakʼ jnoptik ti jaʼ ta jmultike? 2) ¿Kʼu yuʼun skʼan mu xkikta jbatik ta skoltael li kutsʼ kalaltike?

¹⁷ Oy tajek ta koʼontontik ti xlik yichʼik ta mukʼ Jeova skotol li kutsʼ kalaltike. Pe skʼan teuk ta joltik xtok ti xuʼ van muʼyuk ch-ochik-o ta mantal akʼo mi chkakʼtik persa ta skoltaelike. Mi jech kʼot ta pasele, mu jnoptik ti jaʼ ta jmultik li kʼusi chkʼot ta nopel yuʼunike. ¿Kʼu yuʼun ti jech chkaltike? Yuʼun mu stakʼ buchʼu jsujtik sventa xchʼamik li kʼusi jchʼunojtike. Pe mi xijmuyubaj noʼox chilutik kutsʼ kalaltik ta skoj ti chijtun ta stojolal li Jeovae, xuʼ van lek kʼusi chkʼot ta pasel. Jpastik orasion ta stojolalik, ta slekiluk koʼontontik jcholbetik mantal xchiʼuk mu xijlubtsaj ta skoltaelik (Ech. 20:20). Jpat koʼontontik ti chakʼbutik sbendision Jeova ta skoj ti chkakʼtik persa skoltaelike. Vaʼun, mi ayan ta yoʼonton kutsʼ kalaltik sventa xchikintaik li lekil aʼyeje, ta me xkolik.