1, 2. ¿Kʼu yuʼun tsvul tajek yoʼonton li Jesuse?

KʼALAL slajeb xa ox kʼakʼal liʼ oy ta balumil li Jesuse, solel tsvul tajek yoʼonton. ¿Kʼu yuʼun? Yuʼun snaʼoj ti jutuk xa ox skʼan x-akʼbat svokol yuʼun li yajkontratake xchiʼuk ti chichʼ milele. Pe maʼuk noʼox taje, yuʼun oy tajek ta yoʼonton tspas li kʼusi tskʼan yoʼonton Stot ta skoj ti skʼanoj tajeke. Mi tukʼ laj yakʼ sbae, snaʼoj lek ti xuʼ xakʼ ta ilel ti jaʼ noʼox sta-o ichʼel ta mukʼ li Jeovae xchiʼuk ti mu meleluk li kʼusitik chopol yichʼoj alel ta stojolale. Jech xtok, skʼanoj ta jyalel li krixchanoetike xchiʼuk te ta sjol ti jaʼ noʼox xuʼ jtatik-o kuxlejal sbatel osil mi tukʼ chame.

² ¿Mi mu xa van snaʼ kʼusi tspas Jesus ta skoj ti tsvul yoʼontone? Moʼoj, laj yakʼ persa ti junuk noʼox yoʼontone. Xi onoʼox laj yalbe li yajtakboltake: «Chkakʼboxuk li jun oʼontonal kuʼune» (Juan 14:27). Li buchʼu lek xil sba xchiʼuk Diose jun noʼox yoʼonton, taje jaʼ jech laj yaʼi sba Jesus li ta snopben xchiʼuk ta yoʼontone, yuʼun yichʼoj «li jun oʼontonal yuʼun [Diose]» (Filip. 4:6, 7).

3. ¿Kʼusi ta jkʼelbetik skʼoplal li ta xchanobil liʼe?

³ Akʼo mi maʼuk jech tajek ta jnuptantik kʼuchaʼal kʼot ta stojolal li Jesuse, pe ta onoʼox xkil jvokoltik ek (Mat. 16:24, 25; Juan 15:20). Ta melel, xuʼ van ta jvul koʼontontik bakʼintik jech kʼuchaʼal laj yaʼi sba li Jesuse. Pe ¿kʼusi xuʼ jpastik sventa mu slajesutik li vul oʼontone xchiʼuk ti mu xchʼay kuʼuntik li jun oʼontonale? Ta jkʼelbetik skʼoplal oxtos kʼusi la spas Jesus kʼalal ay ta balumile xchiʼuk ta jkʼeltik kʼuxi xuʼ jchanbetik kʼalal tsots tajek chkil jvokoltike.

4. Jech kʼuchaʼal chal 1 Tesalonisenses 5:17, albo junantik skʼelobil bu chakʼ ta ilel ti ep ta velta la spas orasion Jesus kʼalal slajeb xa ox kʼakʼal kuxule.

⁴ (Kʼelo 1 Tesalonisenses 5:17). Li Jesuse ep ta velta la spas orasion kʼalal slajeb xa ox kʼakʼal kuxule. Kalbetik junchibuk skʼelobil. Kʼalal laj yakʼbe yil yajchankʼoptak kʼu yelan ta pasel li snaʼobil slajele, la spas jun orasion kʼalal la sjelubtas li pane xchiʼuk jech la spas xtok ta sventa li vinoe (1 Kor. 11:23-25). La spas jun orasion xtok kʼalal chlokʼik xa ox batel ti bu laj yetʼesik li kʼin Koltaele (Juan 17:1-26). Jech xtok, kʼalal batik li ta Jetsemanie, ep ta velta la spas orasion (Mat. 26:36-39, 42, 44). Xchiʼuk laj to skʼopon Stot kʼalal jutuk xa ox tajek skʼan xchame (Luk. 23:46). Ta melel, li Jesuse skotol ora la skʼopon Stot kʼalal slajeb xa ox kʼakʼal kuxule.

5. ¿Kʼu yuʼun laj stsatsal yoʼontonik li jtakboletike?

⁵ Jun srasonal ti kuch yuʼun Jesus li kʼusitik la snuptane jaʼ ti muʼyuk laj yikta sba ta skʼanbel koltael li Stote. Pe li yajtakboltake mu jechuk la spasik li vaʼ akʼobale, vaʼun kʼalal la snuptanik prevae, laj stsatsal yoʼontonik (Mat. 26:40, 41, 43, 45, 56). ¿Kʼusi chakʼ jchantik taje? Jaʼ ti skʼan jpastik orasion jech kʼuchaʼal la spas Jesus sventa tukʼuk xkakʼ jbatik kʼalal ta jnuptantik prevaetike. Pe ¿kʼusi xuʼ jkʼan li ta j-orasiontike?

6. ¿Kʼu yuʼun tskoltautik li xchʼunel koʼontontik yoʼ junuk noʼox koʼontontike?

⁶ Xuʼ me jkʼanbetik Jeova ti akʼo xakʼbutik mas xchʼunel koʼontontike (Luk. 17:5; Juan 14:1). Li Satanase te xjoyet tskʼel kʼuxi chakʼ ta preva skotol li yajtsʼaklomtak Kristoe, jaʼ yuʼun toj tunel ti oyuk xchʼunel koʼontontike (Luk. 22:31). Jech xtok, jaʼ me tskoltautik sventa junuk noʼox koʼontontik akʼo mi xlik xkaj noʼox li jvokoltike.  ¿Kʼu yuʼun ti jech chkaltike? Yuʼun mi kakʼojtik xa persa stsalel jtosuk vokolile, li xchʼunel koʼontontike jaʼ tskoltautik sventa mu jvul koʼontontik xchiʼuk ti xkiktabetik ta yok skʼob li Jeovae. Kʼalal te ta joltik ti jaʼ noʼox Jeova xuʼ skoltautike, muʼyuk xa te xvulvun li jnopbentik xchiʼuk li koʼontontike (1 Ped. 5:6, 7).

7. ¿Kʼusi chakʼ jchantik li kʼusi chal Roberte?

⁷ Li orasione tskoltautik sventa junuk noʼox koʼontontik akʼo mi oy kʼusi ta jnuptantik. Kalbetik skʼoplal Robert ti mas xa ta 80 sjabilale xchiʼuk ti jaʼ jun mol ta tsobobbaile. Xi chalbutik li kʼusi tspas yoʼ junuk noʼox yoʼontone: «Li kʼusi chal Filipenses 4:6 xchiʼuk 7 skoltaojun ta stsalel epal vokoliletik. Kiloj jvokol ta takʼin xchiʼuk oy kʼuk sjalil ti muʼyuk xa litun kʼuchaʼal mol ta tsobobbaile». Xi to chal xtoke: «Chlik jkʼopon Dios kʼalal ta jvul koʼontone. Kakʼoj venta ti mas jun koʼonton chkaʼi jba kʼalal nopolik noʼox ta jpas orasion xchiʼuk mi xivokolet ta jkʼopon li Jeovae».

8. Jech kʼuchaʼal chal li Juan 8:29, ¿kʼu yuʼun jun noʼox yoʼonton li Jesuse?

⁸ (Kʼelo Juan 8:29). Li Jesuse jun noʼox yoʼonton kʼalal laj yichʼ nutsele. ¿Kʼu yuʼun? Yuʼun snaʼoj ti xmuyubaj yuʼun Stot mi tukʼ laj yakʼ sbae. Ta skoj ti skʼanoj ta jyalel li Stote, sil kʼakʼal la spasbe li yabtele. Jech-o tukʼ laj yakʼ sba akʼo mi oy kʼusitik tsots la snuptan. Kʼalal skʼan toʼox xtal ta balumile, jaʼ toʼox «jun bankilal j-abtel» yuʼun Dios (Prov. 8:30, TNM). Vaʼun kʼalal tal ta balumile, ta sjunul yoʼonton chanubtasvan ta sventa li Stote (Mat. 6:9; Juan 5:17). Xkuxet tajek laj yaʼi ti la spas li abtelal taje (Juan 4:34-36).

9. Kʼalal batem koʼontontik ta cholmantale, ¿kʼuxi tskoltautik sventa junuk noʼox koʼontontik?

 ⁹ Li voʼotike xuʼ me jchanbetik stalelal Jesus mi ta jchʼunbetik smantal li Jeovae xchiʼuk mi oy noʼox kʼusi ta jpastik «ta sventa li yabtel Kajvaltike» (1 Kor. 15:58). Mi chkakʼbetik «yipal» o mi batem noʼox koʼontontik ta cholmantale, tskoltautik sventa mu jaʼuk jun mukʼta vokolil xkiltik li kʼusi ta jnuptantike (Ech. 18:5). Yuʼun li ta cholmantale te chkakʼtik venta ti mas toj tsots xkuxlejal li krixchanoetike ti jaʼ mu sta li voʼotike. Vaʼun kʼalal chkiltik ti chlekub xkuxlejalik xchiʼuk ti xmuyubajik kʼalal tskʼanik li Jeovae xchiʼuk ti chchʼunbeik smantale, mas to ta jpat koʼontontik ta stojolal Jeova ti chchabiutik eke. Taje tskoltautik sventa junuk noʼox koʼontontik. Jaʼ jech laj yakʼ venta jun ermana ti ip ta at-oʼontone xchiʼuk ti mu noʼox kʼusi xtun-o chaʼi sbae. Xi chal kaʼitike: «Kʼalal batem noʼox koʼonton ta cholmantale, jaʼ tskoltaun sventa ximuyubaj noʼox xchiʼuk ti tsʼijiluk noʼox li jnopbene. Chkal noʼoxe, mas nopol chkaʼi jba ta stojolal Jeova kʼalal chilokʼ ta cholmantale».

10. ¿Kʼusi chakʼ jchantik li kʼusi chal Brendae?

¹⁰ Kalbetik skʼoplal yan ermana ti Brenda sbie. Li Brenda xchiʼuk stsebe ipik ta jun tsatsal chamel ti esclerosis múltiple sbie (jtos chamel ti chlik tal ta jchinabtike). Li ermanae ta siya de rueda oy xchiʼuk chʼabal lek yipal sbekʼtal. Kʼalal xuʼ yuʼun chaʼie, chlokʼ xchol mantal ta naetik, pe jutuk mu skotoluk velta ti ta karta chchol mantale. Xi chal sloʼile: «Kʼalal laj kaʼibe smelolal ti mu kʼusi stakʼ pasel sventa xikol li avie xchiʼuk ti muʼyuk xa mas la jnopbe skʼoplale, jaʼ to te lik jkʼupin li cholmantale. Ti melel xkaltike, chchʼay-o ta jol jvokoltak kʼalal chilokʼ ta cholmantale. Yuʼun jaʼ xa ta jnopbe skʼoplal kʼuxi xuʼ jkolta li krixchanoetik ti bu ta jcholkutik mantal xchiʼuk li jtsobobbaile. Jech xtok, tsvulesbun ta jol li kʼusi jmalaoj chtal ta jelavele».

11. ¿Kʼu yuʼun toj ep sbalil laj yil Jesus li yajtakboltake?

¹¹ Li Jesuse toj tsotsik kʼusi la snuptan ti kʼu sjalil la xchol mantale. Pe li tukʼil yajtakboltake jaʼ jech la spas stalelalik jech kʼuchaʼal chal li Proverbios 18:24 ta sventa li melel amigoiletike, xi chale: «Oy onoʼox bochʼo xjelov slequil yoʼnton jech chac cʼu chaʼal li jchiʼiltic ta voqʼuele». Li Jesuse toj ep sbalil laj yil li yamigotake. Li vaʼ orae, «li yitsʼinabe muʼyuk bu yakʼoj xchʼunel yoʼontonik ta stojolal» (Juan 7:3-5). Jun veltae, albat yuʼun yutsʼ yalaltak ti likem xchuvaje (Mar. 3:21). Pe mu jechuk la spasik li yajtakboltake. Jaʼ yuʼun xi albatik yuʼun Jesus kʼalal jun xa ox akʼobal skʼan xchame: «Li voʼoxuke liʼ achiʼinojikun-o kʼalal chkil jvokole» (Luk. 22:28).

12. ¿Kʼuxi laj yakʼ ta ilel jtakboletik ti jaʼ yamigoik ta melel li Jesuse, xchiʼuk kʼuxi la stabe sbalil li Jesuse?

¹² Li jtakboletike oy onoʼox kʼusi la spasik ti chopol laj yaʼi sba li Jesuse. Pe muʼyuk la stsak ta venta, jaʼ la skʼel ti oy xchʼunel yoʼontonik ta stojolale (Mat. 26:40; Mar. 10:13, 14; Juan 6:66-69). Xi laj yalanbe kʼalal slajeb xa ox akʼobal te xchiʼukane: «Kamigooxuk xa chkalboxuk, yuʼun laj xa kakʼ anaʼik skotol li kʼusitik kaʼioj tal ta stojolal li Jtote» (Juan 15:15). Jamal xvinaj ti patbat tajek yoʼonton yuʼun li yamigotake. Jech xtok, muyubaj tajek ti koltaat yuʼun yamigotak kʼalal la xchol mantale (Luk. 10:17, 21).

13. ¿Kʼuxi laj yakʼik ta ilel yantik ti jaʼ yamigoik li Jesuse, xchiʼuk kʼuxi la stabe sbalil li Jesuse?

¹³ Li Jesuse maʼuk noʼox koltaat yuʼun li yajtakboltake, yuʼun oy to yan yamigotak xchiʼuk yamigatak ti koltaat kʼalaluk  la xchol mantale. Junantike la xchʼam ta snaik sventa te xveʼ li Jesuse (Luk. 10:38-42; Juan 12:1, 2). Yantik xtoke la xchiʼinik ta xanbal xchiʼuk «laj yakʼbeik kʼusitik oy yuʼunik sventa tskoltaike» (Luk. 8:3). Li Jesuse jaʼ jun lekil amigoil, jaʼ yuʼun la sta lek yamigotak ek. Muʼyuk la skʼanbe ti akʼo spasik li kʼusi mu xuʼ yuʼunike xchiʼuk oy kʼusitik la spas ta stojolal li yantike. Li stuke jaʼ jun tukʼil krixchano, jaʼuk li yamigotake maʼuk, akʼo mi jech, la stojbe ta vokol li kʼusitik la spasik ta stojolale. Ta melel, koltaat yuʼun yamigotak yoʼ junuk noʼox yoʼontone.

14, 15. 1) ¿Kʼuxi xuʼ jta jlekil amigotik? 2) ¿Kʼuxitik tskoltautik li kamigotaktike?

¹⁴ Li lekil amigoiletike tskoltautik sventa tukʼuk xkakʼ jbatik ta stojolal li Jeovae. Pe sventa jta kamigotaktike, skʼan jaʼutik jun lekil amigoil ek (Mat. 7:12). Xuʼ jpastik liʼe: li Vivliae chal ti skʼan jkoltatik li yantike, pe mas to jech skʼan jpasbetik «li buchʼu oy kʼusi chtun yuʼune» (Efes. 4:28). Jkʼeltik buchʼutik chtun yuʼunik koltael li ta jtsobobbailtike. ¿Kʼusi xuʼ jpastik mi oy junuk jcholmantal ti mu xuʼ xlokʼ ta sna ta skoj chamel o ti yij xae? Xuʼ xbat jmanbetik tal li kʼusi chtun yuʼune. O mi oy junuk utsʼ alalil ti chil svokolik ta takʼine, xuʼ xkichʼbetik batel jsetʼ jutebuk kʼusi slajesik. Mi xijtojob stunesel li jpajinatik ta Internet jw.org^® xchiʼuk li aplikasion JW Library^®, xuʼ jkoltatik li ermanoetik sventa stabeik sbalil ek li kʼusitik oy tee. Mi jaʼ batem ta koʼontontik skoltael li yantike, xuʼ me mas xijmuyubaj (Ech. 20:35).

¹⁵ Li melel amigoiletike chchiʼinutik kʼalal oy kʼusi ta jnuptantike xchiʼuk tskoltautik sventa junuk noʼox koʼontontike. Li Eliue la xchikintabe Job kʼalal laj yal ti kʼu yelan  chaʼi sbae. Jaʼ me jech li kamigotaktik eke, ta sjunul yoʼonton chchikintaik kʼalal ta jcholbetik yaʼiik li kʼusi ta jvul-o koʼontontike (Job 32:4). Mu me jnoptik ti jaʼ tsnop kamigotaktik li kʼusi ta jpastike, pe mi ta jchikintatik li tojobtasel chakʼbutik jaʼ te chkakʼtik ta ilel ti pʼijutike (Prov. 15:22). Mi chtun kuʼuntik koltaele, jechuk xkakʼ ta ilel jtalelaltik kʼuchaʼal li ajvalil David ti muʼyuk la stoy sba kʼalal koltaat yuʼun li yamigotake (2 Sam. 17:27-29). Li amigoiletik ti jaʼ jech stalelalike jaʼ jun matanal yakʼojbutik li Jeovae (Sant. 1:17).

16. Jech kʼuchaʼal chal Filipenses 4:6 xchiʼuk 7, ¿kʼuxi xuʼ jtatik li jun oʼontonale? Albo smelolal.

¹⁶ (Kʼelo Filipenses 4:6, 7). Li teksto liʼe, ¿kʼu yuʼun chal ti xuʼ jtatik jun oʼontonal «ta stojolal li Kristo Jesuse»? Yuʼun sventa junuk noʼox koʼontontik xchiʼuk ti tsʼijiluk noʼox li jnopbentike, skʼan xkaʼibetik smelolal kʼusi yabtel staoj li Jesuse xchiʼuk skʼan xkakʼ xchʼunel koʼontontik ta stojolal. Kaltik junchibuk li kʼusi xuʼ spas Jesuse. Kʼalal chkaʼitik ti xuʼ xakʼutik ta perton koliyal ti laj yakʼ xkuxlejal ta jtojolaltike, xkuxet chkaʼi jbatik yuʼun (1 Juan 2:12). Kʼalal chkaʼitik xtok ti jaʼ xa Ajvalil ta Ajvalilal yuʼun Dios li Jesuse xchiʼuk ti tslajesbe skʼoplal li vokoliletik yakʼoj Satanas xchiʼuk li sbalumile, tspat tajek koʼontontik (Is. 65:17; 1 Juan 3:8; Apok. 21:3, 4). Li Jesuse yakʼoj ta jbatik jun abtelal li ta slajebal kʼakʼale, pe kʼalal chkakʼtik venta ti te oy ta jxokontik yoʼ skoltautike, jaʼ tstsatsub-o koʼontontik (Mat. 28:19, 20). Ta melel, sventa jkʼupintik li jun oʼontonale skʼan xkuxet noʼox koʼontontik, oyuk spatobil koʼontontik xchiʼuk skʼan oyuk stsatsal koʼontontik.

17. 1) ¿Kʼuxi xuʼ jun noʼox koʼontontik li yajtsʼaklomutik Kristoe? 2) Jech kʼuchaʼal chal Juan 16:33, ¿kʼusi tspas kuʼuntik mi jun noʼox koʼontontike?

¹⁷ Jaʼ yuʼun, ¿kʼuxi xuʼ jun-o koʼontontik kʼalal oy kʼusitik tsots ta jnuptantike? Jaʼ kʼalal ta jchanbetik stalelal li Jesuse. Baʼyel, skʼan mu xkikta jbatik ta spasel orasion. Xchibal, skʼan jchʼunbetik smantal Jeova xchiʼuk jcholtik-o mantal ta sjunul koʼontontik akʼo mi oy kʼusi tsots ta jnuptantike. Xchiʼuk yoxibal, jchʼamtik li koltael chakʼbutik kamigotaktike. Mi jech ta jpastike, li jun oʼontonal yuʼun Diose chchabi jnopbentik xchiʼuk koʼontontik. Vaʼun, xuʼ kuʼuntik stsalel kʼusuk preva jech kʼuchaʼal la spas li Jesuse (kʼelo Juan 16:33).