LI TA skʼakʼalil Pabloe, jaʼ noʼox oy varkoetik sventa kuch ikatsil. Jech oxal, mi oy junuk krixchano ti oy bu tskʼan chbate skʼan sjakʼ mi oy jkotuk varko ti jaʼ te chbate xchiʼuk mi tskʼan chkuchvan batele (Ech. 21:2, 3). Xuʼ van mu jaʼuk te lek chbat li varko ti bu tskʼan chbat li jun krixchanoe, jaʼ yuʼun kʼalal chkʼot ta yan skotleb varkoe skʼan saʼ yan ti jaʼ te nopol ch-iktaat komele (Ech. 27:1-6).

Li varkoetike oy noʼox yuilal ti xuʼ xanave xchiʼuk muʼyuk lek yorail sventa stotsik batel. Kʼalal chʼabal kʼepele muʼyuk tstotsik batel, pe mu jaʼuk noʼox ta skoj taje, yuʼun junantik j-abteletik ta varko ti oy kʼusi xchʼunojike chpajik-o mi laj yaʼiik mi te xchʼechʼun jkotuk joj mut li ta varkoe o ta junuk skomenal varko ti mu xa xtune. Li varkoetike jaʼ noʼox chlokʼik batel mi lek kʼepele xchiʼuk mi oy lek ikʼe, yuʼun jaʼ chkoltavan sventa xanav batel. Kʼalal mi la sta junuk varko li krixchanoe, skʼan te xbat xchiʼuk yikats li ta skotlebe xchiʼuk skʼan smala kʼusi ora chlokʼ batel.

Xi chal li j-al-loʼil Lionel Cassone: «Li ta Romae oy kʼusi laj yichʼ chapanel sventa mu vokoluk sta svarko li krixchanoe, yuʼun te laj yakʼik jun skotleb varko ti bu chkʼot ta lokʼel li ukʼum Tibere, jech oxal mu persauk xbat xchol jakʼik li ta jujun skotleb varkoetike. Jech xtok, li ta nopol jteklum Ostiae, oy epal ofisinaetik ti oy ta sba skʼelel jayibuk skotleb varkoetike, jech kʼuchaʼal li Narbona [ti Francia sbi li lum avie], li Cartago [ti Túnez sbi avie], [...] xchiʼuk yantik. Sventa sta svarko li jun krixchanoe jaʼ noʼox te skʼan xbat sjakʼ ta junuk ofisina ti jaʼ oy ta sba skʼelel ti bu tskʼan chbate».

Li xanbal ta varkoe mas anil, pe toj xiʼel sba xtok. Kʼalal xanav ta varko li jtakbol Pablo sventa chbat xchol mantale, ep ta velta mutʼij li svarkoale (2 Kor. 11:25).