1. ¿Kʼusi skʼan jpas jkotoltik?

MI IPUTIK o mi lubem noʼox chkaʼi jbatike, ¿mi ta van jtikʼ jbatik ta junuk anilajel ti toj tsotse? Mi jaʼuk. Pe li jtakbol Pabloe laj yal ti jkotoltik yakalutik ta jun anilajele (Ebr. 12:1). Mi ta jkʼan ta jtatik li jmotontik chakʼbutik Jeovae, skʼan xkuch kuʼuntik kʼalal to ta slajeb, mu ventauk mi ep xa jabilaltik o mi jutuk xa kipaltik (Mat. 24:13).

2. Jech kʼuchaʼal chal 2 Timoteo 4:7 xchiʼuk 8, ¿kʼu yuʼun oy lek yip li kʼusi laj yal Pabloe?

² Oy lek yip li kʼusi laj yal Pabloe, yuʼun laj yal ti tsutsem xa yuʼun li anilajele (kʼelo 2 Timoteo 4:7, 8). Pe ¿kʼusi anilajel laj yalbe skʼoplal li jtakbole?

3. ¿Kʼusi anilajel laj yalbe skʼoplal li Pabloe?

³ Sventa lekuk xchanubtasvan li Pabloe, bakʼintike, laj yalbe skʼoplal li tajimoletik chichʼ toʼox pasel ta voʼneal Gresiae (1 Kor. 9:25-27; 2 Tim. 2:5). Ep ta velta laj yal ti xkoʼolaj ta jun anilajel kʼalal chtun ta stojolal Jeova li jun yajtsʼaklom Kristoe (1 Kor. 9:24; Gal. 2:2; Filip. 2:16). ¿Bakʼin ta jlikestik li anilajel taje? Jaʼo kʼalal chkakʼbe jkuxlejaltik Jeova xchiʼuk ti chkichʼtik voʼe (1 Ped. 3:21). Jaʼ to tstsuts kuʼuntik mi laj yakʼbutik kuxlejal sbatel osil li Jeovae (Mat. 25:31-34, 46; 2 Tim. 4:8).

4. ¿Kʼusi ta jkʼeltik batel li ta xchanobil liʼe?

⁴ ¿Kʼu yelan li anilajel ta jpastike? Oy oxtos kʼusi xkoʼolaj-o xchiʼuk li buchʼu nat tajek ch-anilaj batele. Jaʼ ta jkʼeltik batel li ta xchanobil liʼe. Baʼyel, jaʼuk jtamtik batel li lekil bee. Xchibal, kakʼ ta koʼontontik stsutsesel li anilajele.  Yoxibal, jtsaltik komel li kʼusitik ta jnuptantik ta bee.

5. ¿Kʼusi beal skʼan jtamtik batel, xchiʼuk kʼu yuʼun?

⁵ Sventa sta smotonik li buchʼutik ch-anilajike, skʼan jaʼuk te xbatik li ta be bu albilike. Mi ta jkʼan ta jtatik li kuxlejal sbatel osil eke, skʼan jaʼuk jtamtik batel li lekil bee, jaʼ xkaltik, ti jchʼuntik li beiltaseletik ta Vivliae (Ech. 20:24; 1 Ped. 2:21). Pe li Satanas xchiʼuk li buchʼutik jmoj sjolike tskʼanik ti xijkʼejbuj ta bee. Li krixchanoetik taje jaʼ xa lek chaʼiik ti xbat jchiʼintik sventa jpastik li kʼusi tskʼan jbekʼtaltike (1 Ped. 4:4). Xi chlabanvanike: «¡Toj abol abaik! Mas lek jkuxlejalkutik li voʼonkutike, yuʼun kolemunkutik ta spasel li kʼusi tskʼan koʼontonkutike». Pe jecheʼ noʼox tsloʼla sbaik (2 Ped. 2:19).

6. ¿Kʼusi chakʼ jchantik li kʼusi la spas Briane?

⁶ Mi oy buchʼu chchanbe li kʼusitik tspas sbalumil Satanase, te chakʼ venta ti muʼyuk kolem ta melele, yuʼun jaʼ noʼox chmosoinat (Rom. 6:16). Kalbetik skʼoplal jun ermano ti Brian sbie. Kʼalal kʼox toʼoxe, chanubtasat ta mantal yuʼun li stot smeʼe. Pe kʼalal la sta svaʼleje, la snop ti muʼyuk jun yoʼontone. Vaʼun, lik xchanbe stalelal li buchʼutik jaʼ tspasik li kʼusi tskʼan yoʼonton Satanase. Xi chale: «Muʼyuk la jnop mi oy kʼusi chopol chmeʼin ta koʼonton ta skoj ti ta jkʼan kolemune». Li Briane lik slajes droga, lik yuchʼ pox xchiʼuk lik mulivajuk. Xi to chale: «Ta mas tsʼakale, lik jlajes droga ti mas to toj tsots yipe xchiʼuk meʼin tajek ta koʼonton junantik. Sventa xtoj kuʼun li kʼusitik taje, lik jchon droga». Ta mas jelavele, la xchʼunbe smantal Jeova, la sjel xkuxlejal xchiʼuk laj yichʼ voʼ ta 2001. Li avie, mas xa xmuyubaj ti jaʼ xa stamoj batel li anilajel sventa kuxlejale. *

7. ¿Kʼu yelan li chib be chal ta Mateo 7:13 xchiʼuk 14?

⁷ Toj tsots skʼoplal ti jaʼuk jtamtik batel li lekil bee. Pe li Satanase jaʼ lek chaʼi ti xijlokʼ li ta sbelel kuxlejal ti bikʼit stiʼe xchiʼuk ti jaʼuk jtamtik batel li mukʼta be ti ep buchʼutik te chbatike. Mas lek yilel li be taje, pe ch-ikʼvan batel ta lajelal (kʼelo Mateo 7:13, 14). ¿Kʼusi skʼan jpastik sventa mu kʼusi xjochutik lokʼel li ta lekil bee? Skʼan jpat koʼontontik ta stojolal Jeova xchiʼuk jchikintatik li kʼusi chale.

8. ¿Kʼusi tspasik li j-anilajeletik mi lomike?

⁸ Li buchʼutik nat tajek ch-anilajike tukʼ tskʼel batel sbeik yoʼ mu xmak yokike. Akʼo mi jech, xuʼ van x-och yokik ti bu lomolpotsʼole o xuʼ van oy buchʼu tsmak okil ti mu yolbajuk jech tspase. Mi lomike, tstam sbaik likel xchiʼuk ch-anilajik-o batel. Maʼuk chak’ ta yoʼontonik li kʼusi mak-o yokike, yuʼun tskʼan tstsutsesik li anilajele xchiʼuk ti sta li smotonike.

9. ¿Kʼusi skʼan jpastik mi lijlome?

⁹ Li ta anilajel yakalutik eke, xuʼ van ep ta velta ta jmak koktik ta skoj ti oy kʼusi chopol chkaltik, ti oy kʼusi chopol ta jpastik o ti oy kʼusi chopol la spasbutik junuk ermanoe. Oy onoʼox bakʼintik ti ta jmakbe jba koktike. Pe teuk ta joltik ti stalel onoʼox jeche, yuʼun maʼuk tukʼil krixchanoutik xchiʼuk jmoj yakal chij-anilaj li ta sbelel kuxlejale. Li Pabloe laj yal ti chijkap onoʼox bakʼintik ta stojolal li yantike (Kol. 3:13). Pe mu jaʼuk xkakʼ ta koʼontontik li kʼusi mak-o koktike, jaʼ lek jnopbetik skʼoplal li jmotontik ta jtatike. Mi lijlome, jtam jbatik likel xchiʼuk anilajkutik-o batel. Mi ta jnakʼ skʼakʼal koʼontontik xchiʼuk mi chkikta-o jbatik ta mantale, muʼyuk me tstsuts kuʼuntik li anilajele xchiʼuk muʼyuk ta jta li jmotontike. Jech xtok, xuʼ me jmakbetik-o yok li buchʼutik yakalik ta anilajel sventa kuxlejale.

10. ¿Kʼusi skʼan jpastik sventa mu jmakbetik yok li yantike?

¹⁰ Sventa mu jmakbetik yok li kermanotaktike, skʼan jtsaktik ta venta li kʼusi tsnopike xchiʼuk mu jsujtik ta spasel li kʼusi tskʼan koʼonton jtuktike (Rom. 14:13, 19-21; 1 Kor. 8:9, 13). ¿Kʼusi jelel-o li anilajel ta jpastik xchiʼuk li batsʼi anilajele? Li stukike tsalbail tspasik xchiʼuk chakʼik persa ti jaʼuk noʼox spasik kanale. Muʼyuk ta yoʼontonik li yantike, jaʼ yuʼun xuʼ van chujvanik komel sventa jaʼuk spasik kanale. Pe mu jechuk ta jpastik li voʼotike, yuʼun muʼyuk ta jtsal jbatik xchiʼuk li kermanotaktike (Gal. 5:26; 6:4). Li kʼusi ta jkʼantike jaʼ ti jkoltatik yantik sventa jmojuk stsuts kuʼuntik li anilajele xchiʼuk ti jtatik li kuxlejal sbatel  osile. Jaʼ yuʼun, chkakʼtik persa spasel li kʼusi laj yal Pablo liʼe: «Oyuk-o me ta avoʼontonik li yantike, maʼuk noʼox me xanop akʼoplal atukik» (Filip. 2:4).

11. ¿Kʼusi chakʼ ta yoʼontonik li j-anilajeletike, xchiʼuk kʼu yuʼun?

¹¹ Li j-anilajeletike maʼuk noʼox tukʼ tskʼel batel li sbeike, yuʼun chakʼ ta yoʼontonik stsutsesel li anilajele. ¿Kʼusi chkoltaatik yoʼ stsuts yuʼunike? Jaʼ tsnopbeik skʼoplal ti yakal xa chichʼ smotonik akʼo mi nom to skʼan xkʼotike.

12. ¿Kʼusi yalojbutik ta jamal li Jeovae?

¹² ¿Kʼusi tstaik skotolik li buchʼutik tstsuts yuʼunik li anilajele? Ta skoj ti skʼanojutik tajek li Jeovae, jamal yaloj ti chakʼbutik kuxlejal sbatel osil ta vinajel o liʼ ta balumile. Li Vivliae oy kʼusitik yaloj ti jaʼ chakʼ kiltik ti toj kʼupil sba li kuxlejal ta jtatike. Mi jaʼ chkakʼ ta koʼontontik li kʼusi jmalaojtike, muʼyuk me chkakʼ ti oyuk kʼusi smak koktik sventa stsuts kuʼuntik li anilajele.

13. ¿Bu ta jta kiptik sventa stsuts kuʼuntik li anilajele?

¹³ Li j-anilajeletik ta voʼneal Gresiae chakʼik-o persa ch-anilajik akʼo mi lubemik o mi oy kʼusi kʼux chaʼiik. Ta yipal stuk tspasik xchiʼuk jaʼ chkoltaatik ti kʼu yelan xchanojik tale. Li voʼotik eke chkichʼtik chanubtasel sventa xkuch kuʼuntik li anilajele. Pe ¿mi ta kipal jtuktik chij-anilaj batel? Moʼoj, yuʼun te likem tal ta stojolal Jeova li kipaltike xchiʼuk jech-o chakʼbutik batel. Jpat koʼontontik ta stojolal, yuʼun yalojbutik ti chchanubtasutik xchiʼuk tskoltautik sventa tsotsukutik-oe (1 Ped. 5:10).

14. ¿Kʼuxi tskoltautik 2 Korintios 12:9 xchiʼuk 10 kʼalal oy kʼusi ta jnuptantike?

¹⁴ Ep kʼusitik la snuptan li jtakbol Pabloe: labanel, kontrainel, mu xa xuʼ yuʼun laj yaʼi bakʼintik xchiʼuk la snuptan jtos svokol ti xkoʼolaj kʼuchaʼal chʼix ta sbekʼtal laj yaʼie (2 Kor. 12:7). Pe mu xiuk la snope: «Jecheʼ xa chkakʼ jvokol». Moʼoj, yuʼun laj yakʼbe yil Jeova ti spatoj yoʼonton ta stojolale (kʼelo 2 Korintios 12:9, 10). Ta skoj taje, koltaat-o yuʼun li Jeovae.

15. ¿Kʼusi chkakʼtik venta mi la jchanbetik li kʼusi la spas Pabloe?

¹⁵ Xuʼ van chkichʼtik labanel o kontrainel kʼuchaʼal la snuptan li Pabloe. Jech xtok, xuʼ van stsakojutik chamel o lubem noʼox chkaʼi jbatik. ¿Kʼusi chkʼot ta pasel mi la jchantik li kʼusi la spas jtakbole? Jaʼ ti xuʼ xkakʼtik venta ti skʼanojutik tajek Jeova xchiʼuk ti tskoltautik sventa xkuch batel kuʼuntik li jvokoltike.

16. ¿Kʼusi xuʼ spasik li buchʼutik stsʼikoj noʼox xchamelike?

¹⁶ Ep kerem tsebetik ti muʼyuk kʼusi ip chaʼiike yakalik ta anilajel li ta sbelel kuxlejale. ¿Mi xuʼ van te xbatik ek li buchʼutik te xa telel ta stemik, li buchʼutik ta siya de rueda oyik, li buchʼutik ip sjol yakanik o ti chmak xa batel satike? Xuʼ yuʼunik ek. Oy ep ermanoetik ti oy xa sjabilalike o ti te noʼox xkuchoj xchamelike yakalik ta anilajel sventa li kuxlejale. Pe ¿kʼuxi yutojik? Maʼuk ta yip stukik, yuʼun jaʼ chkoltaatik yuʼun li Jeovae. Li jlome chchikintaik ta telefono li kʼusi ch-echʼ ta tsobajele, li yantike tsyalesik ta Internet. Muʼyuk yiktaoj sbaik ta cholmantal xtok, yuʼun chcholbeik mantal yutsʼ yalalik, doktoretik xchiʼuk enfermeraetik.

17. ¿Kʼu yelan chil Jeova li buchʼutik mu xa epuk kʼusi spas yuʼunike?

 ¹⁷ Mi mu xa epuk kʼusi spas kuʼun chkaʼitike, mu me xijchibaj xchiʼuk mu jnoptik ti mu xa xuʼ xij-anilaj-o batele. Skʼanojutik tajek Jeova ta skoj ti oy xchʼunel koʼontontik ta stojolale xchiʼuk ti ep kʼusi jpasojtik talel ta stojolale. Kʼalal jech chkaʼi jbatike, jaʼo mas ta jkʼantik ti skoltautike xchiʼuk muʼyuk bu chiktautik, yuʼun mas to chnopaj talel ta jtojolaltik (Sal. 9:10). Kalbetik skʼoplal jun ermana ti tsots ip chaʼie, xi chal kaʼitike: «Muʼyuk xa mas ta jchol mantal ta skoj ti yantik xa tstsatsaj batel li jchamele. Pe xkuxet noʼox koʼonton, yuʼun jnaʼoj ti xmuyubaj yoʼonton kuʼun Jeova akʼo mi jsetʼ juteb xa li kʼusi spas kuʼune». Teuk ta joltik ti te xchiʼinojutik Jeova kʼalal chibajem chkaʼi jbatike. Jnopbetik skʼoplal li kʼusi la spas jtakbol Pabloe xchiʼuk li kʼusi laj yal ti tspat tajek koʼontontike: «Ximuyubaj-o kʼalal kʼunune, [...] yuʼun jaʼo tsotsun kʼalal kʼunune» (2 Kor. 12:10).

18. ¿Kʼusitik tsots yakal tsnuptan li junantik ermanoetike?

¹⁸ Oy to yan kʼusitik tsnuptanik li buchʼutik yakalik ta anilajel sventa kuxlejale. Junantike oy kʼusi yakal tsnuptan ta xkuxlejalik ti mu xakʼik venta li yantike o ti mu xaʼibeik smelolale, xuʼ van ipik ta at-oʼonton. ¿Kʼu yuʼun toj tsots chil svokol li buchʼutik jech tsnuptanike? Yuʼun li buchʼu kʼasem skʼob o li buchʼu oy ta siya de ruedae chkiltik li kʼusi yakal tsnuptane, vaʼun xuʼ van ta jkoltatik. Yanuk li buchʼutik ipik ta snopbenike o ti tsvul yoʼontonike mu xkiltik. Pe jaʼ jech xkʼuxul chaʼiik kʼuchaʼal li buchʼutik kʼasem sbakilike, akʼo mi jech, xuʼ van muʼyuk ta jkʼuxubintik xchiʼuk muʼyuk ta jkoltatik.

19. ¿Kʼusi chakʼ jchantik li kʼusi la snuptan Mefibosete?

¹⁹ Mi mu xa epuk kʼusi spas kuʼuntik ta skoj li kʼusitik yakal ta jnuptantike xchiʼuk mi mu xaʼibeik smelolal chkiltik li yantike, xuʼ me skoltautik li sloʼilal Mefibosete (2 Sam. 4:4). Akʼo mi tsots kʼusi la snuptan li Mefibosete, kuch yuʼun xtok kʼalal muʼyuk tukʼ kʼusi pasbat yuʼun li ajvalil Davide. ¿Mi lokʼ van ta saʼel yuʼun li kʼusitik la snuptane? Moʼoj xchiʼuk muʼyuk xkap-o sjol. Ep tajek sbalil laj yil li kʼusitik oy yuʼune. La svules ta sjol kʼalal kʼuxubinat yuʼun li Davide (2 Sam. 9:6-10). Muʼyuk la snakʼ skʼakʼal yoʼonton kʼalal muʼyuk tukʼ kʼusi pasbat yuʼun li ajvalile. ¿Mi ilin van ta stojolal David xchiʼuk Jeova ta skoj li kʼusi la snuptane? Muʼyuk, yuʼun jaʼ laj yakʼ ta yoʼonton skoltael li ajvalil ti jaʼ svaʼanoj  Jeovae (2 Sam. 16:1-4; 19:24-30). Sventa jchanbetik stalelal li Mefibosete, li Jeovae laj yakʼ ti teuk tsʼibabil xkom ta Vivlia li kʼusitik la spase (Rom. 15:4).

20. ¿Kʼu yelan chaʼi sbaik junantik li buchʼutik ipik ta at-oʼontone, xchiʼuk kʼusi skʼan teuk ta sjolik?

²⁰ Junantik ermanoetik ti ipik ta at-oʼontone muʼyuk lek chaʼi sbaik kʼalal chchiʼinik ta loʼil li yantike xchiʼuk chiʼik noʼox. Xuʼ van mu junuk yoʼontonik kʼalal te jmoj tsobolik xchiʼuk yantike, pe chkʼotilanik-o ta tsobajeletik xchiʼuk ta asambleaetik. Maʼuk noʼox, yuʼun vokol chaʼiik xchiʼinel ta loʼil yan krixchanoetik ti mu xojtikinike, pe yakʼojik-o persa xcholel mantal. Mi jech chkaʼi jbatik eke, maʼuk jtuktik ti jech kuni vokoltike, yuʼun ep buchʼutik jech tsnuptanik. Teuk ta joltik ti toj ep sbalil chil Jeova ti ta sjunul koʼontontik chijtun ta stojolale. Xvinaj ti yakal chakʼbutik sbendision li Jeovae xchiʼuk ti chakʼ kipaltike, yuʼun muʼyuk lubtsajemutik-o * (Filip. 4:6, 7; 1 Ped. 5:7). Chmuyubaj-o me kuʼuntik Jeova mi chijtun-o ta stojolal akʼo mi mu xa epuk kʼusi spas kuʼuntik o mi ta jvul noʼox koʼontontike.

21. ¿Kʼusi tspas kuʼuntik ta skoj ti tskoltautik li Jeovae?

²¹ Jech kʼuchaʼal laj xa jchantik tale, oy kʼusitik jelel-o li anilajel ta jpastik xchiʼuk li batsʼi anilajele. Yuʼun li j-anilajeletik ta voʼnee jun noʼox buchʼu tspas kanal. Pe jaʼuk li anilajel ta jpastik sventa kuxlejale jkotoltik ta jta jmotontik mi tukʼ laj kakʼ jbatike (Juan 3:16). Li ta batsʼi anilajele, skʼan lekuk oy li j-anilajeletike o tsotsikuk lek, yuʼun mi mu jechuke, xuʼ van mu spasik kanal. Yanuk li voʼotike chkuch-o batel kuʼuntik anilajel akʼo mi iputik noʼox (2 Kor. 4:16). ¡Tskoltautik Jeova sventa stsuts kuʼuntik li anilajel jtamojtike!