Li kʼusi chal Deuteronomio 22:25 kʼalal ta 27 maʼuk mas chalbe skʼoplal ti jaʼ oy smul li vinike, yuʼun jamal xa onoʼox xvinaj ti jaʼ jeche. Li ta mantal taje, jaʼ mas chakʼ ta ilel ti muʼyuk smul li tseb ti laj ta tsakele. Jkʼelbetik lek skʼoplal li loʼil taje.

Li ta versikulo 23 xchiʼuk 24, te chalbe skʼoplal jun vinik ti chchiʼin ta vayel jun tseb ti makbil xa li ta jteklume. Li buchʼutik makbilik xae xkoʼolaj ti malijemik xae, jaʼ yuʼun li vinike tsots tsta smul ta skoj ti chmulivaje. ¿Kʼusi chkʼot ta stojolal li buchʼu laj yichʼ tsatsal tsakele? Ta skoj ti muʼyuk x-avan li tsebe, muʼyuk buchʼu laj yaʼi sventa xtal koltaatuk. Jaʼ yuʼun, xchaʼvoʼalik oy smul chkomik.

Pe jelel kʼu yelan chichʼ chapanel li jun tseb ti chal ta Deuteronomio 22:25 kʼalal ta 27, xi chal kaʼitike: «Me oy jun vinic ti la sta ta teʼtic jun tseb ti stacʼoj xa malijele, me la stsatsal jip ta lume, me laj yacʼ persa laj yutsʼintae, jaʼ noʼox acʼo yichʼ milel li vinique yuʼun jaʼ ijipvan ta lum. Yan li tsebe muʼyuc cʼusi chichʼ pasbel yuʼun muʼyuc spasoj mulil ti xuʼ chcham oe. Jaʼ coʼol jech chac cʼu chaʼal jun vinic ti tsta ta teʼtic jun xchiʼil ta vinical ti te tsmil comele. Yuʼun stuc te la sta ta teʼtic li tsebe, acʼo me iʼavan, pero muʼyuc bochʼo icoltaat, yuʼun muʼyuc bochʼo te oy».

Kʼalal jech chkʼot ta pasele, li tsebe chchʼunbat yaʼyej yuʼun li jchapanvanejetike. ¿Kʼu yuʼun? Yuʼun tsnopik ti avane, «pero muʼyuc bochʼo icoltaat, yuʼun muʼyuc boch’o te oy». Vaʼun, muʼyuk chichʼ alel ti mulivaj li stuke. Yanuk li vinike oy smul chkom ta skoj ti tsatsal tsakvane xchiʼuk ti mulivaje.

Li mantal laj xa jkʼeltike jaʼ mas chalbe skʼoplal ti muʼyuk smul chkom li tsebe, pe jamal chakʼ ta ilel xtok ti oy smul li vinik ta skoj ti tsatsal tsakvane xchiʼuk ti mulivaje. Jnaʼojtik ti la sabeik lek skʼoplal li jchapanvanejetik ta voʼne sventa skʼelik li kʼusi kʼot ta pasele xchiʼuk ti la stsakik ta venta li smantal Jeova yoʼ lekuk kʼusi xkʼot ta nopel yuʼunike (Éx. 20:14; Deut. 13:14; 17:4).