¿Mi xtakʼ avuʼun li kʼusitik la jchantik li ta revista Li Jkʼel-osil ta toyol ta 2019?

Xi yalojbutik ta jamal li Jeovae: «Muʼyuc spasojic jchopuc abtejebal ti xuʼ chayulesot oe», ¿kʼusi smelolal taje? (Is. 54:17).

Xuʼ jpat koʼontontik ti ta onoʼox xchabiutik Jeova ta stojolal li «simaronil jsaʼcʼopetique» (Is. 25:4, 5). Mi jaʼuk onoʼox bu tspasik-o kanal li kajkontratike (w19.01, paj. 6, 7).

Kʼalal laj yichʼik chapanel li jkanaanetik xchiʼuk j-israeletike, ¿kʼuxi laj yakʼ ta ilel ti tukʼ li Jeovae?

Li Jeovae laj yakʼbe stoj smul li buchʼutik chchiʼin sbaik ta vayel ti toj echʼ noʼox chopole xchiʼuk li buchʼutik chopol kʼusi tspasbeik li antsetik xchiʼuk ololetike. Pe laj yakʼbe bendision li buchʼutik la xchʼunik mantale xchiʼuk ti tukʼ kʼusi la spasike (w19.02, paj. 22, 23).

¿Kʼusi ta jpastik mi oy buchʼu tspas orasion, pe ti maʼuk stestigo Jeovae?

Xuʼ tsʼijil xijkom sventa xij-ichʼvan ta mukʼe. Pe mu me stakʼ xkaltik «jechuk» o ti jnitbe jba jkʼobtike. Jech xtok, xuʼ van jpastik orasion ta koʼontontik (w19.03, paj. 31).

¿Kʼu yuʼun jaʼ jun tsatsal mulil li yilbajinel ololetike?

Li buchʼu chilbajin jun olole tsaʼ smul ta stojolal: li buchʼu laj yilbajine, li tsobobbaile, li j-abteletike xchiʼuk ta stojolal li Diose. Mi oy jech mantal li ta slumalike, li moletik ta tsobobbaile chchʼunbeik smantal ajvalil ti skʼan xichʼ albel j-abteletik li kʼusi kʼot ta pasele (w19.05, paj. 9, 10).

¿Kʼuxi xuʼ jeltik li kʼusi ta jnoptike?

Oy oxtos: jpastik orasion, jnopbetik skʼoplal li kʼusi ta jchantik yoʼ jkʼeltik li kʼusi oy ta koʼontontike xchiʼuk jtʼujtik lek li kamigotaktike (w19.06, paj. 11).

¿Kʼusi skʼan jpastik yoʼ jchapan xa noʼox jbatik ta sventa li kontrainele?

Skʼan ti masuk to xkamigointik li Jeovae, teuk ta joltik ti skʼanojutike xchiʼuk ti muʼyuk bu chiktautike, jchantik jujun kʼakʼal li Vivliae xchiʼuk jpasilantik orasion. Jech xtok, jpat koʼontontik ti chkʼot ta pasel li kʼusitik yaloj tspas li Ajvalilal yuʼune, jkomes ta joltik li tekstoetik ti mas ta jkʼupintike xchiʼuk li kʼejojetike (w19.07, paj. 2-4).

¿Kʼuxi xuʼ jkolta kutsʼ kalaltik yoʼ xkolike?

Tsots skʼoplal ti xkaʼibetik ti kʼu yelan chaʼi sbaike, kakʼtik ta ilel jlekil talelaltik, oyuk smalael kuʼuntik xchiʼuk slekil koʼontontik (w19.08, paj. 15-17).

Jech kʼuchaʼal chal Mateo 11:28, ¿kʼu yuʼun chakʼ siketel koʼontontik li abtelal yakʼojbutik Jesuse?

Yuʼun toj lek yoʼonton li jchabivanejetik kuʼuntike, oy jlekil amigotaktik xchiʼuk jaʼ jun lekil abtelal (w19.09, paj. 23).

¿Kʼuxi chakʼ ta koʼontontik Dios spasel li kʼusi lek chile xchiʼuk ti xuʼuk kuʼuntik spasele? (Filip. 2:13).

Kʼalal ta jchantik Vivlia xchiʼuk ta jnopbetik skʼoplale, li Diose chakʼ ta koʼontontik spasel li kʼusi lek chile xchiʼuk ti xuʼuk kuʼuntik spasele. Xchiʼuk tskoltautik li xchʼul espiritu yoʼ jchantik mas li kʼusi xijtojob xa onoʼox spasele (w19.10, paj. 21).

¿Kʼusi xuʼ jpastik yoʼ lekuk kʼusi xkʼot ta nopel kuʼuntike?

Oy voʼtos: jkʼanbe jpʼijiltik li Jeovae, jsabetik lek skʼoplal, jkʼeltik lek ti kʼu yuʼun jech ta jpastike, jkʼeltik lek li kʼusi oy ta koʼontontik spasele xchiʼuk jnoptik lek mi spas kuʼuntik (w19.11, paj. 27-29).

Kʼalal la skʼopon Eva li Satanase, ¿mi jaʼ laj yalbe skʼoplal ti oy kʼusi kuxul chkom yuʼunik mi chamike?

Ta kʼelele, maʼuk. Li Satanase muʼyuk laj yalbe Eva ti jaʼ noʼox chcham sbekʼtale, yuʼun laj yalbe ti jpʼel skʼoplal muʼyuk chchame. Kʼalal tal li nojelal ta voʼe, jaʼo te laj skʼoplal skotol li jecheʼ chanubtaseletike. Jaʼ yuʼun, jaʼo van lik spukbeik skʼoplal ti kuxul chkom jchʼuleltik kʼalal la xchʼak sbaik li buchʼutik la svaʼanik li tayal kʼelob osil ta Babele (w19.12, paj. 15).