Ta kʼelele, maʼuk, yuʼun li Satanase muʼyuk laj yalbe Eva ti jaʼ noʼox chcham sbekʼtal mi la sloʼ li sat teʼ ti yaloj Dios ti mu stakʼ loʼele, vaʼun ti jaʼ kuxul chkom li xchʼulele. Laj yalbe Eva ti jpʼel skʼoplal muʼyuk chchame xchiʼuk ti xuʼ to skʼupin xkuxlejal ta jun alakʼ sba balumil ti bu muʼyuk xa chventainat yuʼun Diose (Gén. 2:17; 3:3-5).

Ti mi maʼuk te lik talel ta nichimaltik Eden li kʼusitik chʼunbil ta sventa li chʼulelale, ¿bu lik tal un chaʼa? Mu jnaʼtik lek. Pe jnaʼojtik ti jaʼo te laj skʼoplal skotol li jecheʼ relijionetik xchiʼuk li kʼusi jecheʼ chakʼik ta chanel kʼalal tal li nojelal ta voʼe. Jaʼ xa noʼox kuxul komik li Noe xchiʼuk li yutsʼ yalal ti tukʼ yakʼoj sbaik ta stojolal Diose.

Li chanubtasel ti kuxul chkom jchʼuleltik mi lijchame jaʼo te lik tal kʼalal echʼem xa ox li nojelal ta voʼe. Kʼalal «la sc’atajesbe sc’op scotol» krixchanoetik li Dios te ta Babele, jaʼo te lik spuk sba batel li kʼusi xchʼunojik kʼalal la xchʼak sbaik ta spʼejel balumile (Gén. 11:8, 9). Jaʼ yuʼun, mu jnaʼtik lek bakʼin lik tal li vaʼ jecheʼ chanubtasele. Pe li kʼusi jnaʼojtik leke jaʼ ti jaʼ la slikes Satanase, yuʼun «jaʼ totil yuʼun li jutbil kʼope». Xchiʼuk lek tajek laj yil ti puk batel ta spʼejel balumile (Juan 8:44).