LI BUCHʼUTIK te chtunik li ta Beteletik ta Estados Unidos xchiʼuk ta Canadae laj yichʼik albel jun kʼupil sba aʼyej li ta sob mierkoles 24 yuʼun enero ta 2018. Albatik ti lik tunuk ta Jtsop Jbeiltasvanej yuʼun Stestigotak Jeova li ermano Kenneth Cook, nichʼonil.

Li ermano Cook te vokʼ xchiʼuk te chʼi ta Pensilvania (Estados Unidos). Laj yojtikin mantal koliyal jun xchiʼil ta chanob vun kʼalal jutuk xa ox skʼan stsuts yuʼun li chanob vun ta sekundariae. Li ermanoe laj yichʼ voʼ ta 7 yuʼun junio ta 1980, vaʼun li ta 1 yuʼun septiembre ta 1982, lik tunuk ta prekursor regular. Kʼalal echʼ chib jabile, takat ta ikʼel ta Betel xchiʼuk te lik tunuk ta Wallkill (Nueva York) ta 12 yuʼun oktuvre ta 1984.

Li ermano Kenneth Cook la sbain jeltos abtelaletik yoʼ bu tspasik imprimir li vunetike xchiʼuk li ta Betele, jaʼ jech tun 25 jabil. Vaʼun li ta 1996, nupun xchiʼuk jun ermana ti Jamie sbie xchiʼuk koʼol lik tunikuk li ta Wallkille. Jech xtok, li ta disiembre ta 2009, takat batel li ta Snail Chanob vun yuʼun Watchtower ta Pattersone, jaʼ te akʼbat sbain li departamento ti bu Tstakʼik li kʼusi chichʼ jakʼele. Pe li ta avril ta 2016, chaʼsutik kʼuuk sjalil ta Wallkill, pe mu xa jaluk te komik yuʼun takatik batel ta Brooklyn. Kʼalal jelav voʼob ue takatik batel li ta Smeʼ nail abtelal ta Warwicke, vaʼun li ta enero ta 2017, laj yichʼ biiltasel kʼuchaʼal yajkoltaobba Komite sventa Stsʼibael vunetik yuʼun li Jtsop Jbeiltasvaneje.