1, 2. 1) ¿Kʼu yuʼun muʼyuk labal sba chkaʼitik ti laj yakʼ ta ilel Jesus ti lek noʼox sba skʼan jpastik li snaʼobil slajele? 2) ¿Kʼusi oxtos stalelal Jesus ta jkʼelbetik skʼoplal?

¿MI XCHOL ta alel avuʼun li kʼusitik ta jpastik ta Konmemorasione? Tana, yuʼun kakʼojtik venta ti lek noʼox sba ta jpastik li jun tsobajel taje. Pe xuʼ van oy buchʼu xi sjakʼbe sbae: «¿Kʼuxi xa noʼox ti jutuk tajek kʼusi ta jpastik li ta Snaʼobil slajel Kristo ti toj tsots skʼoplale?».

² Kʼalal ay ta balumil li Jesuse, toj lek snaʼ xchapbe smelolal li kʼusi tsots skʼoplal ta mantale xchiʼuk kʼun ta aʼiel (Mat. 7:28, 29). Jaʼ jech laj yakʼ kiltik xtok ta sventa li snaʼobil * slajele, yuʼun akʼo mi toj tsots skʼoplal, tskʼan ti lek noʼox sba jpastike. Jchajtik lek ta kʼelel kʼusi skʼan xal li Konmemorasione, li kʼusi la spase xchiʼuk li kʼusi laj yal Jesus kʼalal te tsobolike. Yuʼun jaʼ tskoltautik sventa epuk sbalil xkiltik ti bikʼit laj yakʼ sbae, ti oy stsatsal yoʼontone xchiʼuk ti laj yakʼ ta ilel kʼanelale. Ta jkʼeltik xtok kʼusi xuʼ jpastik sventa masuk to xijkoʼolaj kʼuchaʼal li Jesuse.

3. 1) Kʼalal ta jchantik Mateo 26:26 kʼalal ta 28, ¿kʼu yuʼun chkaltik ti lek noʼox sba la spas li snaʼobil slajel Jesuse? 2) ¿Kʼusi skʼan xal li pan ti chʼabal yichʼoj svolesobil xchʼute xchiʼuk li vinoe?

³ Li Jesuse jaʼo la slikes komel li snaʼobil slajel kʼalal te xchiʼuk li 11 ta voʼ tukʼil yajtakboltake. Li ta veʼel liʼe jaʼ la stunes li skomenal pan ti chʼabal yichʼoj svolesobil xchʼute xchiʼuk  li vino ti la stunesik ta kʼin Koltaele (kʼelo Mateo 26:26-28). Li Jesuse jutuk xa ox skʼan xakʼ xkuxlejal ta stojolal li yajtakboltake, jaʼ yuʼun laj yal ti jaʼ smelolal sbekʼtal xchiʼuk xchʼichʼel li uni chaʼtos kʼusi la stunese. Li jtakboletike muʼyuk chʼayal to kʼot yoʼontonik ta skoj ti lek noʼox sba la spasik li veʼlil ta bat kʼakʼale. ¿Kʼu yuʼun ti jech chkaltike?

4. Li Jesuse, ¿kʼusi tojobtasel laj yalbe Marta ti jaʼ chakʼ kiltik kʼu yuʼun ti lek noʼox sba chichʼ pasel li Konmemorasione?

⁴ Jvules ta joltik kʼusi kʼot ta pasel kʼalal oxib xa ox jabil yakal chchol mantal li Jesuse. Kʼalal jun chib toʼox u skʼan spasik li veʼlil ta bat kʼakʼale, bat svulaʼan li Lasaro, Marta xchiʼuk Maria ti jaʼ yamigotake, vaʼun te lik xchanubtasan. Akʼo mi te oy ek li Martae, pe chʼayem noʼox yoʼonton ta spasel veʼlil yoʼ xakʼbe li yajvulaʼal ti tsots skʼoplale. Li Jesuse ta yutsil yoʼonton la stukʼibtas xchiʼuk laj yalbe ti mu persauk smeltsan jun lekil veʼlile (Luk. 10:40-42). Ta mas tsʼakal kʼalal jutuk xa ox skʼan xakʼ xkuxlejale, jech la spas li kʼusi laj yalbe Martae, yuʼun lek noʼox sba la spas li veʼlil ta bat kʼakʼale. ¿Kʼusi chakʼ jchantik li kʼusi la spas Jesuse?

5. ¿Kʼusi chakʼ jchantik ta sventa Jesus ti lek noʼox sba la spas li snaʼobil slajele, xchiʼuk kʼuxi snitojbe sba skʼoplal li kʼusi chal Filipenses 2:5 kʼalal ta 8?

⁵ Skotol li kʼusi la spas xchiʼuk laj yal li Jesuse chakʼ ta ilel ti bikʼit yakʼoj sbae. Jech oxal mu labaluk sba chkaʼitik ti jaʼ jech laj yakʼ ta ilel kʼalal jun xa ox akʼobal skʼan xchame (Mat. 11:29). Li Jesuse snaʼoj ti muʼyuk buchʼu yan jech spasoj ti chakʼ xkuxlejal ta stojolal yantike xchiʼuk ti chchaʼkuxesat yuʼun li Stote xchiʼuk ti chchotanat ta Ajvalil ta vinajele. Akʼo mi jech, muʼyuk la skʼan ti tsots xa skʼoplal xichʼ ilele xchiʼuk ti yan xa sba kʼusi la spas li ta snaʼobil slajele. Mu jechuk la spas, yuʼun laj yalanbe yajtakboltak ti lekuk noʼox sba spasik jujun jabil li snaʼobil slajele xchiʼuk ti oyuk noʼox smelolale (Juan 13:15; 1 Kor. 11:23-25). ¿Kʼusi laj yakʼ ta ilel ti jech la spase? Jaʼ ti muʼyuk tstoy sbae. Kʼupil chkaʼitik ti bikʼit yakʼoj sba li Ajvalil kuʼuntik ta vinajele (kʼelo Filipenses 2:5-8).

6. Kʼalal chkil jvokoltike, ¿kʼuxi xuʼ jchanbetik stalelal Jesus ti bikʼit laj yakʼ sbae?

⁶ ¿Kʼuxi xuʼ jchanbetik Jesus ti bikʼit laj yakʼ sbae? Jaʼ ti masuk tsots skʼoplal xkiltik li yantike (Filip. 2:3, 4). Jnoptik li kʼusi la spas kʼalal jun xa ox akʼobal skʼan xchame. Li stuke snaʼoj ti chopol tajek ti kʼu yelan chichʼ milele, akʼo mi jech,  jaʼ mas la svul yoʼonton ta svokol li yajtsʼaklomtake. Vaʼun, lik spatbe yoʼonton li vaʼ akʼobale, la xchanubtasan xchiʼuk la stsatsubtasan (Juan 14:25-31). Jaʼ jech laj yakʼ ta ilel ti jaʼ mas tsots skʼoplal chaʼi ti lekuk oyik li yantike. Toj echʼ xa noʼox lek skʼelobil laj yakʼ ta ilel sventa bikʼit xkakʼ jbatike.

7. ¿Kʼuxi laj yakʼ ta ilel Jesus ti tsots yoʼonton kʼalal mu toʼox jaluk la slikes li Veʼlil ta bat kʼakʼal yuʼun Kajvaltike?

⁷ Kʼalal mu toʼox sjaliluk yechʼel ti la slikes Jesus li Veʼlil ta bat kʼakʼal yuʼun Kajvaltike, laj yakʼ ta ilel xtok ti tsots yoʼontone. Yuʼun jpʼel ta yoʼonton la spasbe yabtel li Diose, akʼo mi snaʼoj ti kʼexlal sba kʼu yelan chichʼ chopol kʼoptael xchiʼuk ti chichʼ milele (Mat. 26:65, 66; Lukas 22:41, 42). Tukʼ laj yakʼ sba xchiʼuk laj yakʼ ta ichʼel ta mukʼ li sbi Diose, la spakbe skʼoplal li ajvalilal yuʼun Stote xchiʼuk koltavan sventa staik kuxlejal sbatel osil li buchʼutik tsutes yoʼontonike. Pe maʼuk noʼox, yuʼun kak xa onoʼox la xchapan yajtakboltak ta sventa li kʼusitik poʼot xa ox snuptanike.

8. 1) ¿Kʼusi laj yalbe Jesus li tukʼil yajtakboltake? 2) Kʼalal oy xa ox jayibuk jabil xchamel li Jesuse, ¿kʼuxi laj yakʼik ta ilel yajtakboltak ti jech-o tsots yoʼontonike?

⁸ ¿Bu yan laj yakʼ ta ilel stsatsal yoʼonton li Jesuse? Jaʼ kʼalal muʼyuk laj yakʼ ta yoʼonton li svokol stuke, yuʼun jaʼ laj yakʼ ta yoʼonton li kʼusi chtun yuʼun li tukʼil yajtakboltake. Kʼalal laj xa ox yalbe Judas ti akʼo xlokʼ batel ti bu tsobolike, li Jesuse la spas uni jsetʼ juteb veʼel. Ti jech la spase, jaʼ sventa teuk-o ta sjolik li buchʼutik tʼujbil chbatik ta vinajel ti tstabeik sbalil ti la smal xchʼichʼel li Jesuse xchiʼuk ti te skʼoplalik li ta achʼ tratoe (1 Kor. 10:16, 17). Li Jesuse laj yalbe yajtakboltak kʼusi oy ta yoʼonton  xchiʼuk Stot ti akʼo spasik yoʼ tukʼuk xakʼ sbaike xchiʼuk ti te tsta sbaik ta vinajele (Juan 15:12-15). Laj yalanbe xtok ti tsnuptanik vokoliletike. Li stuke tsots yoʼonton echʼ, jaʼ yuʼun xi laj yalanbe li yajtakboltake: «¡Tsotsuk avoʼontonik!» (Juan 16:1-4a, 33). Ta mas tsʼakale, jech-o tsots yoʼonton laj yakʼik ta ilel kʼuchaʼal li Jesuse xchiʼuk oy kʼusitik tspasik sventa komon skolta sbaik akʼo mi xil-o svokolik (Evr. 10:33, 34).

9. ¿Kʼuxi xuʼ jchanbetik stsatsal yoʼonton li Jesuse?

⁹ Li avi eke, oy bu xuʼ xkakʼtik ta ilel stsatsal koʼontontik jech kʼuchaʼal la spas li Jesuse. Kaltik junchibuk ti bu xuʼ xkakʼtik ta ilele. Jtose jaʼ ti jkoltatik li ermanoetik ti chichʼik nutsel ta skoj li kʼusi xchʼunojike. Bateltike, jecheʼ noʼox chichʼik chukel li ermanoetike, jaʼ yuʼun jkoltatik ti bu kʼalal xuʼ kuʼuntike xchiʼuk jpakbetik skʼoplalik (Filip. 1:14; Evr. 13:19). Yan xtok ti kʼuxi xuʼ xkakʼtik ta ilele, jaʼ kʼalal tsots koʼontontik ta jcholtik mantale (Ech. 14:3). Jpʼeluk ta koʼontontik ti jcholtik-o li aʼyejetik sventa Ajvalilal jech kʼuchaʼal la spas li Jesuse akʼo mi xkichʼtik kontrainel xchiʼuk nutsel. Pe ¿kʼusi van xuʼ jpastik mi chʼabal lek stsatsal koʼonton chkaʼitike?

10. ¿Kʼusi skʼan jpastik kʼalal skʼan toʼox junchibuk xemana li Snaʼobil slajel Kristoe, xchiʼuk kʼu yuʼun?

¹⁰ Mi la jnopbetik skʼoplal li kʼusitik xuʼ jtatik ta jelavel ti jaʼ koliyal ti ay chamuk li Jesuse, jaʼ tskoltautik sventa tsotsuk lek li koʼontontike (Juan 3:16; Efes. 1:7). ¿Kʼusi ora xuʼ xkakʼtik ta ilel ti ta jtojtik tajek ta vokol li pojelale? Jaʼo kʼalal skʼan toʼox junchibuk xemana li Snaʼobil slajel Kristoe. Kakʼtik persa ti jchan Jvivliatik ta sventa li Konmemorasione xchiʼuk jchotan jbatik ta snopel li kʼusitik kʼot ta pasel kʼalal jutuk xa ox skʼan xchame. Vaʼun, kʼalal te xa ox oyutik ta tsobajele, chkaʼibetik  lek smelolal kʼusi skʼan xal li pan, li vino xchiʼuk li pojelal ti stuk noʼox jeche. Kʼalal chkakʼtik venta ti ta jtabetik sbalil xchiʼuk kutsʼ kalaltik li kʼusi spasojik ta jtojolaltik li Jeova xchiʼuk Jesuse, tstsatsub mas li spatobil koʼontontike xchiʼuk ch-ayan mas stsatsal koʼontontik sventa xkuch batel kuʼuntik kʼalal to ta slajebal (Evr. 12:3).

11, 12. ¿Kʼusi xa la jchantik talel?

¹¹ Jech kʼuchaʼal laj xa jchantik talele, li Veʼlil ta bat kʼakʼal yuʼun Kajvaltike maʼuk noʼox tsvules ta joltik ti toj tsots skʼoplal li pojelale, yuʼun chakʼ kiltik xtok ti bikʼit laj yakʼ sba li Jesuse xchiʼuk ti oy stsatsal yoʼontone. Xijmuyubaj tajek ti jech-o stalelal avi ti jaʼ xa chkʼopoj ta jtojolaltik kʼuchaʼal Bankilal Pale ta vinajele (Evr. 7:24, 25). Sventa jtojtik ta vokole, skʼan jechuk-o jpastik li snaʼobil slajel jech kʼuchaʼal laj yal komele (Luk. 22:19, 20). Ti jaʼo ta jpastik jujun jabil kʼalal jmoj chkʼot skʼakʼalil kuʼuntik li 14 yuʼun Nisane.

¹² Kʼalal ta jnopbetik skʼoplal ti lek noʼox sba chichʼ pasel li Veʼlil ta bat kʼakʼal yuʼun Kajvaltike, te chkiltik jtos stalelal Jesus ti jaʼ tijbat-o yoʼonton yoʼ xakʼ xkuxlejal ta jtojolaltike xchiʼuk ti jaʼ laj yichʼ-o ojtikinel kʼalal ay ta balumile. Jkʼeltik bu junukal.

13. Li Juan 15:9 xchiʼuk li 1 Juan 4:8 kʼalal ta 10, ¿kʼu yelan chalbe skʼoplal li kʼanelal laj yakʼik ta ilel Jeova xchiʼuk Jesuse, xchiʼuk buchʼutik tstabeik sbalil?

¹³ Ta skotol li kʼusi la spas Jesuse, te laj yakʼ ta ilel ti skʼanojutik tajek li Jtotik Jeovae (kʼelo Juan 15:9; 1 Juan 4:8-10). Pe li kʼusi mas tsots skʼoplal la spas li Jesuse, jaʼ ti laj yakʼ xkuxlejal ta jtojolaltik ta skoj ti skʼanojutike. Li kʼanelal laj yakʼbutik ta ilel Jeova xchiʼuk Jesus ta sventa li pojelale xuʼ me jtabetik sbalil jkotoltik akʼo mi tʼujbil chijbat ta vinajel o mi jaʼutik li yan chijetike (Juan 10:16; 1 Juan 2:2). Jkʼeltik to batel kʼuxi xvinaj ti skʼanoj xchiʼuk ti tstsak ta mukʼ yajtakboltak Jesus kʼalal la spasik li Veʼlil ta bat kʼakʼal yuʼun Kajvaltike.

14. ¿Kʼuxi laj yakʼ ta ilel Jesus ti skʼanoj li yajtakboltake?

¹⁴ Jech kʼuchaʼal laj xa kiltike, li Jesuse laj yalbe yajtsʼaklomtak ti tʼujbil chbatik ta vinajel ti lekuk noʼox sba spasik li snaʼobil slajele, mu persauk ti ep kʼusi spasike. Li jabiletik echʼem tale, yalel toyol kʼu yelan spasojik Snaʼobil slajel Kristo li ermanoetike, junantike te ta yut chukinab spasojik (Apok. 2:10). ¿Mi kuchem van yuʼunik spasel li kʼusi laj yal komel Jesuse? Kuchem yuʼunik.

15, 16. Akʼo mi tsots kʼusi snuptanoj junantik ermanoetike, ¿kʼusi spasojik sventa xetʼesik li Konmemorasione?

¹⁵ Li melel yajtsʼaklomtak Kristoe jech-o chakʼik persa spasel li Snaʼobil slajel Kristoe. Akʼo mi tsots kʼusi tsnuptanik bakʼintik, pe chchʼunik-o li kʼusi laj yal Jesuse. Kalbetik skʼoplal li ermano Harold King. Ta skoj ti te tikʼil ta chukel ta Chinae, la snop kʼuxi xuʼ sjelubtas li Konmemorasione. Li jsetʼjuteb kʼusi x-ayan yuʼune jaʼ la stunes sventa smeltsan ta mukul li kʼusi chtun yuʼune. Jech xtok, tskʼelbe lek yorail ti koʼoluk xkʼot xchiʼuk li Konmemorasione. Vaʼun kʼalal tsta yoraile, chlik kʼejinuk stuk, tspas orasion xchiʼuk chetʼes jun mantal.

¹⁶ Kalbetik yan skʼelobil. Kʼalal jaʼo xyaket li Xchibal Mukʼta Paskʼop ta spʼejel Balumile, oy uni jtsop ermanaetik ti takbilik batel ta spasel tsatsal abtelale, laj yakʼ ta vokol xkuxlejalik sventa spasik li Konmemorasione. Ta skoj ti lek noʼox sba chichʼ pasele, jaʼ koltaatik sventa ta mukul sjelubtasik. Xi  chal sloʼilike: «Yoʼ jlechankutik li skʼelobiltak chichʼ tunesele, la jtuneskutik jun bikʼit mexa xchiʼuk la jlambekutik jun sakil manta, vaʼun la joy jbakutik li ta mexae. Ta skoj ti xuʼ x-ilvanik tal mi tsanal li jluskutike, la jtsankutik jun kantila. [...] Te la jchaʼ kalbekutik Jeova ti kakʼoj jbakutik ta stojolal sventa xkakʼkutik persa xchʼultajesbel li sbie». ¡Toj echʼ xa noʼox tsots xchʼunel yoʼontonik! Ta melel, jaʼ svinajeb ti skʼanojutik Jesus kʼalal chketʼestik li Konmemorasione akʼo mi jaʼo tsots kʼusi ta jnuptantik.

17. ¿Kʼusi xuʼ jakʼbe jbatik?

¹⁷ Xiuk jakʼbe jbatik yoʼ to mu xkʼot yorail li Konmemorasione: «¿Kʼuxi xuʼ xkakʼ ta ilel kʼanelal kʼuchaʼal la spas li Jesuse? ¿Mi jaʼ chkakʼ mas ta koʼonton li svokol kermanotake? ¿Mi ta jtsak ta venta li kʼusi spas noʼox yuʼunike o mi ep kʼusi ta jkʼan ti akʼo spasike?». Jchanbetik-o stalelal li Jesuse xchiʼuk kaʼibetik xkʼuxul svokol li yantike (1 Ped. 3:8).

18, 19. 1) ¿Kʼusi ti chvul to ta joltike? 2) ¿Kʼusi chavakʼ persa spasel li avie?

¹⁸ Chkʼot me skʼakʼalil ti muʼyuk xa ta jpastik yan velta li Snaʼobil slajel Kristoe. ¿Kʼusi ora chkiktatik spasel li Konmemorasione? Jaʼo mi vul talel li Jesus li ta mukʼta tsatsal vokolile, yuʼun jaʼo chikʼ muyel ta vinajel «li buchʼutik tʼujbil yuʼun» ti liʼ to oyik ta balumile (1 Kor. 11:26; Mat. 24:31).

¹⁹ Kʼalal muʼyuk xa ox ta jpastik li Veʼlil ta bat kʼakʼal yuʼun Kajvaltike, chvul to me ta joltik li tsobajel taje xchiʼuk ti jaʼ svinajeb ti stuk noʼox jech bikʼit laj yakʼ sba li Jesuse, ti oy stsatsal yoʼontone xchiʼuk ti snaʼ xkʼanvane. Ta melel, li buchʼutik laj toʼox spasik li Snaʼobil slajel Kristoe jaʼ xa chalbeik li buchʼutik muʼyuk laj yilik kʼu yelan chichʼ pasele. Xuʼ jchʼuntik ti tstabeik to sbalil eke. Pe ¿kʼusi van xuʼ jpastik avi sventa jtabetik sbalile? Jaʼ ti kakʼtik persa ti bikʼit xkakʼ jbatik kʼuchaʼal li Jesuse, ti oyuk tsatsal koʼontontike xchiʼuk ti jnaʼuk xijkʼanvane. Mi jech la jpastike, jpʼel skʼoplal ti chakʼ jmotontik li Jtotik Jeovae (2 Ped. 1:10, 11).