XCHANOBIL 5
«Chbat jchiʼinotkutik»
«Ta jkʼan chbat jchiʼinotkutik, yuʼun laj kaʼikutik ti te oy ta atojolalik li Diose» (SAK. 8:23).
KʼEJOJ 26 Voʼon la apasbeikun
LI KʼUSI TA JCHANTIKE *
Li yan chijetike («lajunvoʼ viniketik») lek chaʼiik ti jmoj chtunik ta stojolal Jeova xchiʼuk li buchʼutik tʼujbilike (li «juda vinike»). (Kʼelo parafo 1, 2).
1. ¿Kʼusi yaloj Jeova ti chkʼot ta pasel ta jkʼakʼaliltike?
XI LAJ yalbe skʼoplal Jeova li kʼusi chkʼot ta pasel ta jkʼakʼaliltike: «Li vaʼ kʼakʼale, oy lajunvoʼ viniketik ta skotol jeltos kʼopetik ta mukʼtik lumetik ti tstsakbeik lek yok skʼuʼ spokʼ jun juda vinike xchiʼuk ti xi chalbeike: ‹Ta jkʼan chbat jchiʼinotkutik, yuʼun laj kaʼikutik ti te oy ta atojolalik li Diose›» (Sak. 8:23). Li «juda vinike» jaʼ skʼoplal li yajtsʼaklomtak Kristo ti tʼujbilik ta chʼul espiritu ti Israel yuʼun Dios sbi xtoke (Gal. 6:16). Yan li lajunvoʼ viniketike jaʼ skʼoplal li buchʼutik spatoj yoʼonton chkuxiik sbatel osil ta balumile. Snaʼojik ti jaʼ tʼujatik yuʼun Jeova li buchʼutik chbatik ta vinajele xchiʼuk jaʼ jun matanal chaʼiik ti jmoj chichʼik ta mukʼ Diose.
2. ¿Kʼusi smelolal ti chbat xchiʼinik li buchʼutik tʼujbil chbatik ta vinajel li lajunvoʼ viniketike?
2 Akʼo mi mu jnabetik sbi skotol li buchʼutik liʼ to oyik ta balumil ti tʼujbil chbatik ta vinajele, * xuʼ «chbat» jchiʼintik. ¿Kʼusi smelolal taje? Li Vivliae xi chalbe skʼoplal li lajunvoʼ viniketike: «Tstsakbeik lek yok skʼuʼ spokʼ jun juda [vinik]» xchiʼuk xi chalike: «Ta jkʼan chbat jchiʼinotkutik, yuʼun laj kaʼikutik ti te oy ta atojolalik li Diose». Kʼuchaʼal chkakʼtik ventae, li versikuloe chalbe skʼoplal jun juda vinik. Pe maʼuk noʼox skʼoplal jun krixchano, yuʼun li lajunvoʼ viniketike xi chalike: «Chbat jchiʼinotkutik» xchiʼuk «te oy ta atojolalik». Taje chakʼ ta aʼiel ti epike, jaʼ yuʼun xuʼ xkaltik ti jaʼ skʼoplal skotol li buchʼutik tʼujbil chbatik ta vinajele. Li buchʼutik liʼ chkuxiik ta balumile jmoj yakal chtunik ta stojolal Jeova xchiʼuk li juda vinike. Pe maʼuk skʼan xal ti yuʼun jaʼ jnitvanej yuʼunike, moʼoj, snaʼojik ti jun noʼox li Jnitvanej ti jaʼ li Jesuse (Mat. 23:10).
3. ¿Kʼusi ta jkʼelbetik skʼoplal li ta xchanobil liʼe?
3 Oy to jayvoʼuk liʼ oyik ta balumil li buchʼutik tʼujbil chbatik ta vinajele. Jaʼ yuʼun, xuʼ van xi chkaltike: ¿kʼu yelan skʼan xakʼ ta ilel stalelalik li buchʼutik tʼujbilike?, ¿kʼu yelan skʼan xkiltik mi oy buchʼu chlik sveʼ pan xchiʼuk chuchʼ vino li ta Konmemorasione? xchiʼuk ¿mi chopol van chkaʼitik mi yantik x-epaj jujun jabil li buchʼutik tʼujbilike? Jaʼ ta jkʼelbetik batel skʼoplal li ta xchanobil liʼe.
¿KʼU YELAN SKʼAN STALELALIK LI BUCHʼUTIK TʼUJBILIKE?
4. ¿Kʼusi pʼijubtasel chal 1 Korintios 11:27 kʼalal ta 29 ti skʼan stsakik ta venta li buchʼutik tʼujbilike, xchiʼuk kʼu yuʼun?
4 Li ta 1 Korintios 11:27 kʼalal ta 29 (kʼelo), te chal jun pʼijubtasel ti skʼan stsakik ta venta li buchʼutik tʼujbilike. Yuʼun mi oy buchʼu tsveʼ pan xchiʼuk chuchʼ vino li ta Konmemorasione, pe ti muʼyuk chakʼ ta ilel ta xkuxlejal ti chchʼunbe smantal li Jeovae, mu me sta-o ti jech tspase (Ebr. 6:4-6; 10:26-29). Li buchʼutik tʼujbilike snaʼojik lek ti skʼan tukʼ-o xakʼ sbaik sventa staik «li takel ta ikʼel ta akʼol yuʼun Dios ta stojolal Kristo Jesuse» (Filip. 3:13-16).
5. ¿Kʼu yelan skʼan xakʼ ta ilel stalelalik li buchʼutik tʼujbilike?
5 Li xchʼul espiritu Jeovae tskolta krixchanoetik sventa masuk to bikʼit xakʼ sbaik, maʼuk sventa xlik stoy sbaik (Efes. 4:1-3; Kol. 3:10, 12). Jaʼ yuʼun, mu jaʼuk ti mas xa xtojob chaʼi sbaik li buchʼutik tʼujbilike. Snaʼojik ti mu skotoluk velta ch-akʼbatik mas chʼul espiritu ti jaʼ jutuk xa chichʼik li yan ermanoetike. Muʼyuk bu tsnopik xtok ti jaʼ xa mas xaʼibeik smelolal li Vivliae. Mi jaʼuk xi chalbeik li yantike: «Tʼujbilot sventa chabat ta vinajel ek, skʼan xalajes li pan xchiʼuk vino ta Konmemorasione». Moʼoj, yuʼun bikʼit yakʼoj sbaik, snaʼojik ti jaʼ noʼox Jeova xuʼ stak ta ikʼel li buchʼu chbat ta vinajele.
6. ¿Kʼusi skʼan skʼel-o sbaik li buchʼutik tʼujbilik jech kʼuchaʼal chal 1 Korintios 4:7 xchiʼuk 8?
6 Akʼo mi jaʼ jun matanal chaʼiik ti takbilik ta ikʼel yoʼ xbatik ta vinajel li buchʼutik tʼujbilike, mu skʼanik ti toj echʼ xa noʼox ch-ichʼatik ta mukʼ yuʼun li yantike (Filip. 2:2, 3). Snaʼojik ti muʼyuk pukbat skʼoplalik yuʼun Jeova kʼalal laj yichʼik tʼujele. Jech oxal, mu labaluk sba chaʼiik mi mu xchʼun yantik ti laj yichʼik tʼujel yuʼun Dios yoʼ xbatik ta vinajele. Jech onoʼox chal Vivlia ti mu stakʼ jchʼuntik ta ora mi oy buchʼu chal ti akʼbil tsots yabtel yuʼun Jeovae (Apok. 2:2). Jech xtok, kʼalal oy buchʼu jaʼ to chojtikinike, mu xiuk chalbeik sventa xlik tsakatikuk ta ventae: «Tʼujbilun me sventa chibat ta vinajel». Mi jaʼuk ti xtoyet xa chaʼi sbaik ta skoj li smoton staojike (kʼelo 1 Korintios 4:7, 8).
7. ¿Kʼusitik muʼyuk tspasik li buchʼutik tʼujbilike, xchiʼuk kʼu yuʼun?
7 Muʼyuk bu tsnopik xtok ti skʼan parte xa stsob sbaik li buchʼutik tʼujbilike. Mi jaʼuk ti yolbaj xa tsaʼ sbaik sventa sloʼiltaik ti kʼuxi laj yichʼik tʼujele o sventa xchan stukik li Vivliae (Gal. 1:15-17). Ti jechuk tspasike, ta me xchʼak sba yuʼunik li tsobobbaile. Maʼuk noʼox, yuʼun maʼuk yakal tspasik li kʼusi tskʼan chʼul espiritu ti jaʼ tskoltautik sventa junuk noʼox koʼontontik li ta tsobobbaile xchiʼuk ti jmojuk oyutike (Rom. 16:17, 18).
¿KʼU YELAN SKʼAN XKILTIK LI BUCHʼUTIK TʼUJBILIKE?
Mu tsotsuk xa tajek skʼoplal xkiltik li buchʼutik tʼujbilike o li buchʼutik tsbeiltasutike. (Kʼelo parafo 8). *
8. ¿Kʼu yuʼun skʼan ta smeloluk noʼox xkichʼtik ta mukʼ li buchʼutik tʼujbilike? (Kʼelo xtok li tsʼib ta yok vune).
8 ¿Kʼu yelan skʼan xkiltik li ermanoetik xchiʼuk ermanaetik ti yichʼojik tʼujele? Chopol me mi oy buchʼu ta jtoybetik tajek skʼoplal akʼo mi jaʼ jun yermano Kristo ti tʼujbil chbat ta vinajele (Mat. 23:8-12). Li Vivliae chalbutik ti akʼo jchanbetik «xchʼunel yoʼontonik» li moletike, pe muʼyuk bu chal ti skʼan jtsʼaklitik junuk krixchanoe (Ebr. 13:7). Melel onoʼox ti chal Vivlia ti oy buchʼutik skʼan xkichʼtik lek ta mukʼe, pe maʼuk ta skoj ti tʼujbil chbatik ta vinajele, jaʼ ta skoj ti «chkʼelvanik leke» xchiʼuk ti «tsots ch-abtejik ta skʼopojelik xchiʼuk ti chchanubtasvanike» (1 Tim. 5:17). Mi toj mas xa noʼox chkichʼtik ta mukʼ o ta jkʼupil kʼoptatik tajek li buchʼutik tʼujbil chbatik ta vinajele, xuʼ me chopol chaʼi sbaik kuʼuntik. * Pe li kʼusi mas to chopole, jaʼ ti xuʼ xlik stoy-o sbaik kuʼuntike (Rom. 12:3). ¡Mu jkʼantik ti tsots spas smul kuʼuntik li buchʼutik chbatik ta vinajele! (Luk. 17:2).
9. ¿Kʼuxi chkakʼtik ta ilel ti chkichʼtik ta mukʼ li buchʼutik tʼujbilike?
9 ¿Kʼuxi chkakʼtik ta ilel ti chkichʼtik ta mukʼ li buchʼutik tʼujbilike? Oy jaytosuk. Jtose jaʼ ti mu xiuk jakʼbetike: «¿Kʼuxi laj avichʼ tʼujel?». Taje jaʼ noʼox snaʼoj stukik ti mu stakʼ jtikʼ jbatike (1 Tes. 4:11; 2 Tes. 3:11). Mu me jnoptik xtok ti chbatik ta vinajel ek li snup xchiʼilike, li stot smeʼike xchiʼuk li yan yutsʼ yalalike. Yuʼun kʼalal oy buchʼu chtʼujat yuʼun Diose, muʼyuk bu tsta ta makiel li yutsʼ yalal eke (1 Tes. 2:12). Jech xtok, muʼyuk ta jakʼtik li kʼusi xuʼ chopol-o xaʼi sba kuʼuntik li yantike. Jech kʼuchaʼal liʼe, muʼyuk bu xi ta jakʼbetik yajnil li buchʼu chbat ta vinajele: «¿Kʼu yelan chavaʼi aba ti muʼyuk bu te chachiʼin ta Paraiso li amalale?». Yuʼun jpatoj koʼontontik ti chakʼbutik Jeova li kʼusi ta jkʼantik kʼalal mi teutik xa ox li ta achʼ balumile (Sal. 145:16).
10. ¿Kʼu yuʼun skʼan xkichʼ jpʼijiltik sventa mu jtoybetik tajek skʼoplal junuk ermanoe?
10 Oy sbalil kʼalal parejo noʼox chkichʼtik ta mukʼ li ermanoetike, yuʼun jaʼ chchabiutik. ¿Kʼu yuʼun ti jech chkaltike? Yuʼun li Vivliae chal ti xuʼ van mu xa tukʼuk chakʼ sbaik jlomuk li buchʼutik tʼujbilike (Mat. 25:10-12; 2 Ped. 2:20, 21). Pe mi chkichʼ noʼox jpʼijiltik ti kʼu yelan chkalbetik skʼoplal yantike, jaʼ xkaltik, ti mu jtoybetik tajek skʼoplale, muʼyuk me chbat jtsʼaklitik junuk ermano ta skoj ti tʼujbil chbat ta vinajele, ti lek ojtikinbile o ti jal xa tunem tal ta stojolal Jeovae (Jud. 16). Vaʼun, akʼo mi chikta sbaik ta mantal li ermanoetik taje o mi muʼyuk xa tukʼ chakʼ sbaike, muʼyuk bu chkʼunib xchʼunel koʼontontik mi jaʼuk ta jtentik komel li Jeovae.
¿MI CHOPOL CHKAʼITIK TI CH-EPAJ LI BUCHʼUTIK TʼUJBILIKE?
11. ¿Kʼusitik kʼotem ta pasel li ta Konmemorasione?
11 Leʼ olon tale, mas xa ox chjutukaj li buchʼutik tsveʼik pan xchiʼuk chuchʼik vino li ta Konmemorasione. Pe jaʼtik toe, xcholchun noʼox talel. ¿Mi chopol van chkaʼitik taje? Moʼoj. Jkʼeltik batel kʼu yuʼun.
12. ¿Kʼu yuʼun muʼyuk chopol chkaʼitik ti yantik x-epaj li buchʼutik tʼujbilike?
12 «Li Jeovae xojtikin li buchʼutik jaʼ yuʼune» (2 Tim. 2:19). Li stuke snaʼoj li buchʼutik tʼujbil yuʼune. Pe li ermanoetik ti chchapik jayvoʼ tsveʼik pan xchiʼuk chuchʼik vino li ta Konmemorasione mu snaʼik. Jaʼ yuʼun, kʼalal chichʼ chapele, te ch-och skʼoplalik ek li buchʼutik tsnopik ti tʼujbilike, pe ti mu jechuk ta melele. Avie, oy xa buchʼutik laj yiktaik sveʼel pan xchiʼuk yuchʼel vino. Yantik xtoke xuʼ van ip ta snopbenik, vaʼun tsnopik ti chbat xchiʼinik ta ajvalil li Kristoe. Ta skoj taje, mu jnaʼtik lek jayvoʼ to liʼ oyik ta balumil li buchʼutik tʼujbilike.
13. Kʼalal mi lik li mukʼta tsatsal vokolile, ¿mi chal Vivlia jayvoʼ to liʼ oyik li buchʼutik tʼujbilike?
13 Kʼalal mi sut tal Jesus yoʼ xikʼ muyel ta vinajel li buchʼutik tʼujbilike, spukoj sbaik ta spʼejel balumil chvul sta (Mat. 24:31). Li Vivliae chakʼ ta ilel ti oy to jayvoʼuk liʼ kuxulik ta slajebal kʼakʼal li buchʼutik tʼujbilike (Apok. 12:17). Pe jaʼ muʼyuk bu chal jayvoʼ liʼ oyik kʼalal mi lik li mukʼta tsatsal vokolile.
¿Kʼu yelan skʼan xkiltik mi oy buchʼu chlik sveʼ pan xchiʼuk chuchʼ vino li ta Konmemorasione? (Kʼelo parafo 14).
14. ¿Kʼusi chakʼ kiltik Romanos 9:11 xchiʼuk 16 kʼalal oy buchʼu chichʼ tʼujele?
14 Jaʼ tsnop stuk Jeova kʼusi ora tstʼuj li buchʼu chbat ta vinajele (Rom. 8:28-30). Jaʼo lik stʼuj jlom krixchanoetik kʼalal chaʼkuxiem xa ox li Jesuse. Yileluke, naka tʼujbil chbatik ta vinajel li yajtsʼaklomtak Kristo ta baʼyel sigloe. Ta mas tsʼakale, ta sienal xa noʼox jabil ep buchʼutik chalik ti jaʼik yajtsʼaklomtak Kristoe, pe ti mu jechuk ta melele. Akʼo mi jech, li Jeovae laj onoʼox stʼuj li jayvoʼ melel yajtsʼaklomtak Kristo li vaʼ kʼakʼale. Ta melel, xkoʼolajik kʼuchaʼal li trigo laj yalbe skʼoplal Jesus ti te kapal chchʼi xchiʼuk «li chopol tsʼiʼlele» (Mat. 13:24-30). Ti kʼu xa sjalil yechʼel tal li slajebal kʼakʼale, oy to buchʼutik yakal tstʼuj Jeova sventa teuk skʼoplalik li ta 144 mile. * Jaʼ yuʼun chaʼa, mi la snop to tstʼuj jayvoʼuk krixchanoetik kʼalal poʼot xa tajek xlaj li kʼusitik chopole, ¿kʼusi kabteltik mi chopol chkiltik ti jech tspase? (Kʼelo Romanos 9:11, 16). * Mu jkʼan jechuk jtalelaltik kʼuchaʼal li j-abteletik laj yalbe skʼoplal Jesuse. Yuʼun li stukike «lik skʼanbeik parte» li yajval abtel ta skoj ti lek laj yichʼ ta mukʼ li j-abteletik ti slajeb xa kʼotike (Mat. 20:8-15).
15. ¿Kʼuxi jnaʼojtik ti maʼuk «tukʼil xchiʼuk pʼijil mosoil» skotol li buchʼutik tʼujbilike?
15 Mu skotoluk te skʼoplalik li ta «tukʼil xchiʼuk pʼijil mosoil» li buchʼutik chbatik ta vinajele (kʼelo Mateo 24:45-47). Li ta baʼyel sigloe, jlom noʼox la skolta sbaik ta stsʼibael li Tsʼibetik ta Griego Kʼop li buchʼutik chbatik ta vinajele. Jaʼ jech li avi eke, li Jeova xchiʼuk Jesuse jayvoʼ noʼox buchʼutik tstunesik sventa smakʼlinik o sventa xchanubtasik li epal krixchanoetike. Jaʼ yuʼun, jayvoʼ noʼox staoj yabtelik ta yakʼbel sveʼel ta yorail li steklumal Diose.
16. ¿Kʼusi la jchantik li ta xchanobil liʼe?
16 ¿Kʼusi la jchantik li ta xchanobil liʼe? Jaʼ ti jutuk mu skotoluk yajtuneltak Jeova liʼ tskʼupin xkuxlejalik sbatel osil ta balumile xchiʼuk ti oy jlom chbat xchiʼinik ta ajvalil ta vinajel li Jesuse. Parejo chakʼ jmotontik li Diose: mu ventauk mi jaʼ jkʼoplaltik li «juda vinike» o mi jaʼ li lajunvoʼ viniketike. Jaʼ noʼoxe, skʼan jmojuk jchʼunbetik smantal li Jeovae, ti koʼoluk tukʼ xkakʼ jbatike, ti bikʼituk xkakʼ jbatike xchiʼuk ti jmojuk xijtun ta stojolale. Maʼuk noʼox, yuʼun skʼan komon jkolta jbatik sventa oyuk jun oʼontonal li ta jtsobobbailtike. Jutuk xa tajek skʼan xtal slajeb li chopol balumile, jech oxal kakʼbetik-o me yipal sventa xijtun ta stojolal Jeova xchiʼuk jtsʼaklitik batel Jesus sventa xijkʼot kʼuchaʼal «jtsop noʼox» uni chij (Juan 10:16).
^ par. 5 Li Konmemorasion avi jabile ch-echʼ ta martes 7 yuʼun avril. ¿Kʼu van yelan skʼan xkiltik mi oy buchʼu chlik sveʼ pan xchiʼuk chuchʼ vino li ta Konmemorasione? ¿Mi chopol van chkaʼitik mi yantik x-epaj jujun jabil li buchʼutik tʼujbilike? Jaʼ chkalbetik skʼoplal li ta xchanobil liʼe ti te laj yichʼ lokʼesel tal li ta revista Li Jkʼel-osil ta toyol ta enero ta 2016.
^ par. 2 Li ta Salmo 87:5 xchiʼuk 6, chakʼ ta ilel ti xuʼ van chakʼ ta naʼel Dios ta mas tsʼakal kʼusi sbiik li buchʼutik chchiʼinik ta ajvalil li Jesuse (Rom. 8:19).
^ par. 8 Kʼelo li rekuadro ta revista Li Jkʼel-osil ta toyol ta enero ta 2016, pajina 27 ti bu chal: «Li kʼanelale ‹maʼuk ti mu xichʼ smelolal ti kʼu yelan tspas sbae›».
^ par. 14 Li ta Echos 2:33, chakʼ ta ilel ti jaʼ chakʼ talel chʼul espiritu li Jesuse, akʼo mi jech, jaʼ onoʼox chtakvan ta ikʼel stuk li Jeovae.
^ par. 14 Chatabe mas yaʼyejal li ta revista La Atalaya ta 1 yuʼun mayo ta 2007, pajina 30 xchiʼuk 31 ti bu chal: «Preguntas de los lectores».
KʼEJOJ 34 Tukʼ-o koʼnton chkakʼ jba
^ par. 56 LI KʼUSI XVINAJ TA LOKʼOLE: Nopo noʼox avaʼi liʼe: li ta asambleae, talik jun nupultsʼakal ti tsots kʼusi sbainojik li ta smeʼ nail abtelale, sbuset tal ermanoetik ta skoj ti tskʼan tslokʼta sbaik xchiʼukike. Ta melel, ¡toj kʼexlal sba ta kʼelel!
