1, 2. ¿Kʼusi toj labal sba kʼot ta pasel li ta Pentekostes ta sjabilal 33?

LI TA sob domingo ta sjabilal 33, jaʼo li kʼin Pentekostes ta Jerusalene. Vaʼun, la stsob sbaik te van 120 ta voʼ yajchankʼop Kristo ta jun «kuarto ta akʼol ti bu chvayike» (Ech. 1:13-15; 2:1). Kʼalal junchib xa ox kʼakʼal skʼan xlik li kʼine, li Jesuse kak xa onoʼox yaloj mantal ti skʼan te xkomik ta Jerusalen li yajchankʼoptake, yuʼun tsta yuni motonik ti stuk xa noʼox jeche (Ech. 1:4, 5). ¿Kʼusi kʼot ta pasel?

² «Ta ora noʼox oy kʼusi nik ta vinajel, tsots tajek xjumumet jech kʼuchaʼal tsatsal ikʼ, laj yichʼ aʼiel ta spʼejel na ti bu chotolike». Li jchankʼopetike «oy kʼusi laj yilik ti xkoʼolaj kʼuchaʼal leb» kʼokʼ ti kʼot ta sjolike, «vaʼun skotolik lik ventainatikuk yuʼun chʼul espiritu» (Ech. 2:2-4). Toj echʼ xa noʼox labal sba ti kʼu yelan laj yakʼbe talel xchʼul espiritu Jeova li vaʼ jchankʼopetike (Ech. 1:8). Ta melel, jaʼik li buchʼutik baʼyel laj yichʼik tʼujel ta chʼul espiritu * xchiʼuk ti xuʼ jmoj ch-ajvalilajik xchiʼuk li Jesuse.

3. ¿Kʼu yuʼun xchʼunojik lek ti laj yichʼik tʼujel ta chʼul espiritu li ta Pentekostese?

³ Muʼyuk van chchʼay ta joltik li kʼusi kʼot ta pasel ta Pentekostes  ti teuk oyutik eke. Jnoptik noʼox li kʼusi kʼot ta joltik ti xkoʼolaj kʼuchaʼal leb kʼokʼe xchiʼuk ti lik kʼopojkutik ta yan kʼopetike (Ech. 2:5-12). Ta melel, muʼyuk xijchibet jutebuk ti laj kichʼtik tʼujel ta chʼul espiritue. Pe ¿mi skotol velta labal sba kʼu yelan chtʼujvan ta xchʼul espiritu li Jeovae? Mu jechuk. ¿Kʼu yuʼun ti jech chkaltike? Jkʼeltik batel.

4. ¿Mi koʼol yorail laj yichʼik tʼujel li yajtsʼaklomtak Kristo ta baʼyel sigloe? Albo smelolal.

⁴ Kalbetik skʼoplal kʼalal oy buchʼu chichʼ tʼujel ta chʼul espiritue. Li ta sjabilal 33, ¿mi stuk noʼox van laj yichʼik tʼujel li 120 yajtsʼaklomtak Kristoe? Moʼoj. Yuʼun li vaʼ kʼakʼale, laj to yichʼik chʼul espiritu te van oxmil krixchanoetik, jaʼ noʼoxe jaʼ to laj yichʼik tʼujel kʼalal yichʼojik xa ox voʼe (Ech. 2:37, 38, 41). Junchib jabil ta mas jelavele, laj yichʼik tʼujel ek li jsamariaetik kʼalal oy xa ox kʼuuk sjalil yichʼojik voʼe. Labal sba ta kʼelel ti maʼuk te laj yichʼik tʼujel li vaʼ orae (Ech. 8:14-17). Toj jelel li kʼusi kʼot ta stojolal li Kornelio xchiʼuk yutsʼ yalale, yuʼun kak xa onoʼox laj yichʼik tʼujel akʼo mi muʼyuk toʼox yichʼojik voʼ (Ech. 10:44-48).

5. ¿Kʼusi chkʼot ta stojolal li buchʼu chichʼ tʼujel ta chʼul espiritu jech kʼuchaʼal chal 2 Korintios 1:21 xchiʼuk 22?

⁵ Jaʼ xa kalbetik skʼoplal li kʼusi chkʼot ta stojolalik li buchʼutik chichʼik tʼujele. Junantike xuʼ van mu stakʼ chʼunel chaʼiik ti tʼujatik yuʼun li Jeovae xchiʼuk xuʼ van xi chalike: «¿Kʼu yuʼun voʼon la stʼujun?». Li yantik xtoke xuʼ van jelel kʼu yelan chaʼi sbaik. Pe kʼuuk noʼox yelan chaʼi sbaik li buchʼutik tʼujbilike, xi laj yalbe skʼoplal jtakbol Pablo li kʼusi chkʼot ta stojolalike: «Laj avichʼ aseyoalik * ek ta stojolal chʼul espiritu ti yaloj xa onoʼox chakʼ Dios ta stojolal Kristo kʼalal mi laj xa ox avakʼ xchʼunel avoʼontonike, ti jech kʼuchaʼal jun prental ti albil xa onoʼox skʼoplal ta sventa li jrextotike» (Efes. 1:13, 14). Li Jeovae tstunes xchʼul espiritu sventa xakʼbe snaʼik ti yuʼun jpʼel skʼoplal laj yichʼik tʼujele. Jech oxal, xuʼ xkaltik ti xkoʼolaj kʼuchaʼal «jun prental» li chʼul espiritue o ti jpʼel skʼoplal chbatik  ta vinajel ta tsʼakale, ti maʼuk liʼ chkuxiik ta balumile (kʼelo 2 Korintios 1:21, 22).

6. ¿Kʼusi skʼan spas li buchʼu yichʼoj tʼujel yoʼ xbat ta vinajele?

⁶ ¿Mi jpʼel xa skʼoplal chbat ta vinajel li buchʼu chichʼ tʼujel ta chʼul espiritue? Moʼoj, yuʼun jaʼ noʼox chakʼ ta ilel ti laj yichʼ tʼujel yoʼ xbat ta vinajele. Toj tsots me skʼoplal ti stsak ta mukʼ li pʼijubtasel liʼe: «Ermanoetik, akʼik me persa sventa tukʼ xavakʼ abaik ti jech takbiloxuk ta ikʼel xchiʼuk ti tʼujbiloxuke, yuʼun mu me jutebuk chayalik ta lum mi jech chapasik-o li kʼusitik taje» (2 Ped. 1:10). Jaʼ yuʼun, skʼan me tukʼ-o xakʼ sbaik li buchʼutik yichʼojik takel ta ikʼel yoʼ sta li smotonike (Filip. 3:12-14; Ebr. 3:1; Apok. 2:10).

7. ¿Kʼuxi tsnaʼ mi tʼujbil chbat ta vinajel li jun yajtsʼaklom Kristoe?

⁷ Vaʼun chaʼa, ¿kʼuxi tsnaʼ mi tʼujbil chbat ta vinajel li jun yajtsʼaklom Kristoe? Jkʼeltik kʼusi laj yalbe Pablo li ermanoetik ta Roma ti takbilik ta ikʼel sventa chʼul xkʼotike: «Li voʼoxuke muʼyuk laj avichʼik chʼul espiritu sventa mosoil ti chakʼ xiʼel yan veltae, yuʼun laj avichʼik chʼul espiritu sventa xakʼotik kʼuchaʼal xnichʼnab Dios, ti xi chij-avanutik ta sventa li chʼul espiritu taje: ‹¡Abba, Tot!›. Li xchʼul espiritu Diose jamal chalbe koʼontontik ti jaʼutik xnichʼnab Diose» (Rom. 8:15, 16; 1:7). Kʼuchaʼal chkakʼtik ventae, li Diose jaʼ tstunes xchʼul espiritu sventa xakʼbe snaʼ li buchʼutik yichʼojik tʼujel ti chbatik ta vinajele (1 Tes. 2:12).

8. Jech kʼuchaʼal chal 1 Juan 2:20 xchiʼuk 27, ¿kʼuxi jnaʼojtik ti mu persauk oy buchʼu x-albat ti yichʼoj tʼujel li jun ermanoe?

⁸ Jaʼ oy ta sba stuk Jeova sventa xakʼbe snaʼ li buchʼutik stʼujoj sventa xbatik ta vinajele (kʼelo 1 Juan 2:20, 27). Jkotoltik ta jkʼantik ti akʼo xchanubtasutik li Jeovae, skʼan chanubtasel ta tsobobbail ek li buchʼutik tʼujbilike. Pe mu persauk oy buchʼu x-albatik ti yichʼojik tʼujel yuʼun Diose, yuʼun jaʼ ch-akʼbat snaʼik lek yuʼun li Jeovae. Pe ¿kʼuxi tspas? Jaʼ tstunes li xchʼul espiritue, li yip ti mu kʼusi xkoʼolaj-oe.

9. Jech kʼuchaʼal chal Efesios 1:18, ¿kʼusi chkʼot ta stojolal li jun yajtsʼaklom Kristo kʼalal chichʼ tʼujel yuʼun Diose?

⁹ Jutuk mu jkotoltikuk mu xkaʼibetik lek smelolal kʼu yelan chaʼi sbaik li buchʼutik chichʼik tʼujel yuʼun Jeovae. Stalel onoʼox ti jech chkaʼi jbatik ta skoj ti muʼyuk kichʼojtik tʼujele. Jech xtok, laj kichʼtik pasel sventa xijkuxi ta balumil, maʼuk te ta vinajel (Jen. 1:28; Sal. 37:29). Akʼo mi jech, oy yichʼojik tʼujel junantik sventa xbatik ta vinajel. Kʼalal chtʼujatik yuʼun Diose, anil chjelbat snopbenik xchiʼuk ti bu smalaoj chkuxiike. Vaʼun, jaʼ xa oy ta yoʼontonik ti xbatik ta vinajele (kʼelo Efesios 1:18).

10. ¿Kʼusi skʼan xal ti chvokʼik ta achʼ li buchʼutik tʼujbilike? (Kʼelo xtok li tsʼib ta yok vune).

¹⁰ Li jun yajtsʼaklom Kristo ti chichʼ tʼujel ta chʼul espiritue xuʼ xkaltik ti «chvokʼ ta achʼe» o ti «chvokʼ tal ta akʼole». * Li buchʼutik muʼyuk yichʼojik tʼujel sventa chbatik ta vinajele mu xaʼibeik smelolal kʼu yelan chaʼi sbaik kʼalal chvokʼik ta achʼ li buchʼutik tʼujbilike o ti chvokʼik «ta chʼul espiritue», taje jech onoʼox laj yal li Jesuse (Juan 3:3-8, tsʼib ta yok vun).

11. ¿Kʼusi chjel ta snopben li jun yajtsʼaklom Kristo kʼalal chichʼ tʼujele?

¹¹ Kʼalal chichʼ tʼujel ta chʼul espiritu li jun yajtsʼaklom Kristoe, chjel tajek li snopbene. Yuʼun kʼalal muʼyuk toʼox yichʼoj tʼujele, oy  toʼox tajek ta yoʼonton ti xkuxi sbatel osil ta balumile, tskʼan xa tajek tskʼel yaʼi ti kʼuxi tstupʼbe skʼoplal vokoliletik li Jeovae xchiʼuk ti kʼu yelan tspas yan velta ta Paraiso spʼejel balumile. Jech xtok, xuʼ van tsnopbe toʼox skʼoplal kʼu yelan chchʼam junuk yutsʼ yalal o junuk yamigo kʼalal mi chaʼkuxi tale. Pe solel chjel ta jyalel snopben kʼalal chichʼ tʼujel sventa xbat ta vinajele. Maʼuk ta skoj ti yuʼun mu xa skʼupin chkuxi ta balumil ta skoj li vul oʼonton o li vokoliletik tsnuptane. Mi jaʼuk ta skoj ti yuʼun chakʼ xa chʼaj chaʼi ti liʼ chkuxi ta balumile. Li kʼusi kʼot ta pasele jaʼ ti jelbat snopben yuʼun Jeova ta xchʼul espiritu xchiʼuk jelbat ti bu smalaoj chkuxie.

12. ¿Kʼu yelan chaʼi sba li buchʼu chichʼ tʼujel jech kʼuchaʼal chal 1 Pedro 1:3 xchiʼuk 4?

¹² Xuʼ van xi tsnop ta yoʼonton li buchʼu chichʼ tʼujel sventa xbat ta vinajele: «Mu jta-o chkaʼi li mukʼta matanal liʼe». Akʼo mi jech, muʼyuk bu xnaʼet jsetʼuk ti tʼujbil yuʼun li Jeovae, moʼoj, solel xmuyubaj ti jaʼ jech staoj smotone xchiʼuk tstoj tajek ta vokol (kʼelo 1 Pedro 1:3, 4).

13. ¿Mi tskʼan xa van chchamik li buchʼutik tʼujbil chbatik ta vinajele?

¹³ Vaʼun chaʼa, ¿mi tskʼan xa van chchamik li buchʼutik tʼujbil chbatik ta vinajele? Jaʼ tstakʼbutik stuk li jtakbol Pabloe. Yuʼun xi laj yal kʼalal la skoʼoltas ta karpana li sbekʼtal buchʼutik tʼujbilike: «Voʼotik ti liʼ to oyutik ta karpanae chkat koʼontontik xchiʼuk kʼux chkaʼi ta koʼontontik; maʼuk ti ta jkʼan ta jlokʼtik li karpana liʼe, yuʼun jaʼ ta jkʼan ta jlaptik li yane sventa xichʼ bikʼel yuʼun kuxlejal li kʼusi snaʼ xchame» (2 Kor. 5:4). Jamal xvinaj ti muʼyuk oy ta yoʼontonik ti xchamike o ti echʼ xa yoʼontonik ti liʼ kuxulike. Mu jechuk, yuʼun lek chaʼiik ti liʼ oyik ta balumile xchiʼuk oy ta yoʼontonik ti jmojuk xtunik ta stojolal Jeova xchiʼuk yutsʼ yalalik xchiʼuk li yamigotakike. Akʼo mi ep kʼusitik tspasik, muʼyuk chchʼay ta sjolik li kʼusi albil tstaik ta mas tsʼakale (1 Kor. 15:53; 2 Ped. 1:4; 1 Juan 3:2, 3; Apok. 20:6).

14. ¿Kʼusitik chakʼ ta ilel ti muʼyuk tʼujbilutik sventa xijbat ta vinajele?

¹⁴ Yikʼaluk van xi chanope: «¿Mi tʼujbilun van sventa chibat ta vinajel?». Mi jech jutuk chavaʼie, lek me ti xi xajakʼbe abae: «¿Mi solel oy tajek ta koʼonton ta jpasbe li yabtel Jeovae?, ¿mi solel xkuxet tajek koʼonton kʼalal ta jchol mantale?, ¿mi ta jkʼupin tajek xchanel Vivlia sventa jchaj ‹kʼalal to ta yut li spʼijil Diose›?, ¿mi stuk xa noʼox jech chkaʼi ti kʼu yelan tskoltaun ta cholmantal li Jeovae?, ¿mi voʼon oy ta jba chkaʼi sventa jkolta yantik yoʼ xamigoinik li Jeovae?, ¿mi kiloj ti ep butik skoltaojun li Jeovae?» (1 Kor. 2:10). Mi «jech» xachie, ¿mi jaʼ van skʼan xal ti yuʼun tʼujbilot ta melele? Moʼoj, yuʼun xuʼ jech xaʼi sba skotol li yajtuneltak Jeova akʼo mi muʼyuk tʼujbilik. Jech xtok, li Jeovae parejo chakʼbe xchʼul espiritu sventa skolta li yajtuneltake, mu ventauk mi chbatik ta vinajel o mi liʼ chkuxiik ta balumile. Jaʼ yuʼun, mi xi chanope: «¿Mi tʼujbilun van sventa chibat ta vinajel?», mi xachie, jaʼ skʼan xal ti muʼyuke. Yuʼun li buchʼutik tʼujbilike jpʼel ta yoʼontonik ti jaʼ jeche, mi jsetʼuk bu xchibetik.

15. ¿Kʼuxi jnaʼojtik ti muʼyuk chbatik ta vinajel skotol li buchʼutik ch-akʼbatik chʼul espiritue?

¹⁵ Li Vivliae chalbe skʼoplal epal yajtuneltak Dios ti akʼbatik chʼul espiritue, pe ti muʼyuk bu xtʼujatik sventa xbatik ta vinajele. Jech kʼuchaʼal liʼe: li ajvalil Davide laj yichʼ akʼbel chʼul espiritu (1 Sam. 16:13). ¿Kʼusi koltaat-o taje? Jaʼ sventa xaʼibe lek smelolal li smantaltak Jeovae xchiʼuk ti xbeiltasat ta stsʼibael  jayvokʼuk livro ta Vivliae (Mar. 12:36). Akʼo mi jech, li jtakbol Pedroe laj yal ti «muʼyuk bu muy batel ta vinajel li Davide» (Ech. 2:34). Jech xtok, li Juan J-akʼ-ichʼvoʼe laj yichʼ ventainel yuʼun li chʼul espiritu eke (Luk. 1:13-16). Xi jamal laj yal stuk li Jesuse: «Muʼyuk buchʼu mas jelavem skʼoplal ti vokʼem tal ta stojolal junuk ants jech kʼuchaʼal li Juan J-akʼ-ichʼvoʼe», pe laj yal xtok ti muʼyuk laj yichʼ tʼujel sventa xbat ajvalilajuk ta vinajele (Mat. 11:10, 11). Kʼuchaʼal chkiltike, li Jeovae la stunes xchʼul espiritu sventa spasik kʼusitik labalik sba li viniketik taje, pe muʼyuk bu xichʼik tʼujel ta chʼul espiritu sventa xbatik ta vinajel. ¿Mi jaʼ van skʼan xal ti muʼyuk lek tukʼ laj yakʼ sbaike? Moʼoj. Ti kʼusie jaʼ ti liʼ chchaʼkuxesatik yuʼun Jeova ta balumile (Juan 5:28, 29; Ech. 24:15).

16. ¿Bu smalaoj chkuxiik jutuk mu skotoluk li yajtuneltak Jeovae?

¹⁶ Jutuk mu skotoluk li yajtuneltak Jeova avie muʼyuk bu chbatik ta vinajel. Liʼ smalaoj chkuxiik ta balumil kʼalal mi lik xa ox ventainvanuk li Ajvalilal yuʼun Diose. Tskʼanik xa tajek ti xkuxiik ta achʼ balumil jech kʼuchaʼal laj yaʼi sbaik li Abraan, Sara, David, Juan J-akʼ-ichʼvoʼ xchiʼuk li yan yajtuneltak Dios ta voʼnee (Ebr. 11:10).

17. ¿Kʼusi ta jkʼelbetik skʼoplal li ta yan xchanobile?

¹⁷ Oy van kʼusitik ta jnoptik ta skoj ti liʼ to kuxulik junantik li buchʼutik tʼujbil chbatik ta vinajele (Apok. 12:17). Li ta yan xchanobile, jaʼ ta jkʼelbetik batel skʼoplal li sjakʼobiltak liʼe: ¿kʼu yelan skʼan xakʼ ta ilel stalelalik li buchʼutik tʼujbilike?, ¿kʼu yelan skʼan xkiltik mi oy buchʼu chlik sveʼ pan xchiʼuk chuchʼ vino li ta Konmemorasione? xchiʼuk ¿kʼu van yelan chkaʼitik mi yantik x-epaj jujun jabil li buchʼutik tʼujbilike?