Kʼalal laj yichʼ voʼ ta sjabilal 29 li Jesuse, jaʼo kʼot ta mero Bankilal Pale. ¿Kʼuxi jnaʼojtik? Yuʼun kʼalal laj yichʼ voʼe, laj yakʼ ta ilel ti tskʼan tspasbe li kʼusi «tskʼan yoʼonton» Diose, jaʼ xkaltik, lokʼ ta yoʼonton ti xakʼ ta matanal li xkuxlejale (Gal. 1:4; Ebr. 10:5-10). Li kʼusi «tskʼan yoʼonton» Diose xkoʼolaj ta skajleb matanal. Kʼalal laj yakʼ xkuxlejal li Jesuse, xkoʼolaj ti te laj yakʼ li ta skajleb matanal taje. Jaʼ yuʼun, xuʼ xkaltik ti kʼalal laj yichʼ voʼ li Jesuse, te lik tal skʼoplal li skajleb matanal xchiʼuk li mukʼta templo ta mantale. Pe ¿kʼusi jaʼ li mukʼta templo ta mantale? Jaʼ ti kʼu yelan xchapanoj Jeova sventa xichʼ ichʼel ta mukʼ jech kʼuchaʼal tskʼane, taje xuʼ jech jpastik ta skoj ti laj yakʼ xkuxlejal li Jesuse. Li ta temploe, toj tsots skʼoplal li skajleb matanale. Jaʼ jech ek li kʼusi «tskʼan yoʼonton» Diose, toj tsots skʼoplal sventa lekuk xkichʼtik ta mukʼ (Mat. 3:16, 17; Ebr. 5:4-6).

Skʼan oyuk jun mero bankilal pale li ta mukʼta templo ta mantale. Jaʼ yuʼun, li Jesuse «tʼujat yuʼun Dios ta chʼul espiritu xchiʼuk ta [juʼelal]» (Ech. 10:37, 38; Mar. 1:9-11). Pe ¿kʼuxi jnaʼojtik ti laj xa onoʼox yichʼ tʼujel kʼalal skʼan toʼox xcham xchiʼuk ti xichʼ chaʼkuxesele? Sventa jnaʼtike, jkʼeltik kʼusi ora laj yichʼik tʼujel li Aaron xchiʼuk li yan mero bankilal paleetike.

¿Buchʼu xuʼ x-och li ta Batsʼi Lekil Chʼul Kuarto ta axibalnae? Li Mantale chal ti jaʼ noʼox li mero bankilal palee. Ta mas tsʼakale, jaʼ jech laj yichʼ pasel li ta templo eke. Li Batsʼi Lekil Chʼul Kuartoe chʼakal ta jlik kortina xchiʼuk ti bu Chʼule, vaʼun li mero bankilal palee jaʼ to ch-och batel li ta Skʼakʼalil Stael Pertone (Ebr. 9:1-3, 6, 7). Li Aaron xchiʼuk li yan mero bankilal paleetike jaʼo laj yichʼik tʼujel kʼalal skʼan toʼox x-ochik batel li ta skortinail Batsʼi Lekil Chʼul Kuartoe. Jaʼ jech ek li Jesuse, jaʼo van laj yichʼ tʼujel ta mero Bankilal Pale li ta mukʼta templo ta mantal kʼalal skʼan toʼox xchame, laje och batel li ta kortinae, jaʼ xkaltik, kʼalal cham sventa xbat ta vinajele (Ebr. 10:20). Jech oxal, li jtakbol Pabloe laj yal ti «tal Kristo kʼuchaʼal mero bankilal pale», laje «jelav batel ta karpana ti mas mukʼ xchiʼuk ti mas tukʼ ti mu ta skʼobuk krixchano laj yichʼ pasele» xchiʼuk «och batel ta vinajel» (Ebr. 9:11, 24).

Kʼalal ayan sbalil li achʼ tratoe, jaʼo te lik ta abtel xtok. ¿Kʼu yuʼun jech chkaltik? Yuʼun kʼalal sut batel ta vinajel li Jesuse xchiʼuk kʼalal laj yalbe Stot ti xchʼambat li matanal laj yakʼ sventa spojutike, te lik ayanuk sbalil li achʼ tratoe xchiʼuk jaʼo te lik ta abtel xtok. ¿Kʼu yelan kʼot ta pasel taje?

Baʼi, ba xchiʼin Stot ta vinajel li Jesuse. Xchibal, laj yalbe Stot ti xchʼambat li matanal laj yakʼe. Yoxibal, li Jeovae la xchʼam li matanale. Vaʼun, kʼalal laj yichʼ pasel li oxtos taje, te lik abtejuk li achʼ tratoe.

Li Vivliae muʼyuk lek jamal chal kʼusi ora la xchʼam Jeova li matanal laj yakʼ Xnichʼone. Jaʼ yuʼun, mu jnaʼtik lek kʼusi ora ayan sbalil xchiʼuk lik ta abtel li achʼ tratoe. Pe jnaʼojtik liʼe: kʼalal skʼan toʼox lajuneb kʼakʼal li Pentekostese, jaʼo sut batel ta vinajel li Jesuse (Ech. 1:3). Li vaʼ ora taje, te van kʼusi kʼakʼalil laj yalbe Stot ti xchʼambat li matanal laj yakʼe, te une, la xchʼam li Jeovae (Ebr. 9:12). Xuʼ jech xkaltik ta skoj li kʼusi kʼot ta pasel ta Pentekostese (Ech. 2:1-4, 32, 33). Jamal vinaj ti te lik abtejuk li achʼ tratoe.

Vaʼun chaʼa, ¿kʼusi ora lik ayanuk sbalil xchiʼuk lik abtejuk li achʼ tratoe? Jaʼo kʼalal la xchʼam Jeova li matanal laj yakʼ Jesuse. Jech xtok, jaʼo te lik abtejuk ta Jkʼopojel li mero Bankilal Pale ti jaʼ li Jesuse (Ebr. 7:25; 8:1-3, 6; 9:13-15).