1. ¿Kʼusi pʼijubtasel laj yakʼbe Pablo li yajtsʼaklomtak Kristo ti tʼujbil chbatik ta vinajele?

LI JTAKBOL Pabloe xi laj yalbe li yajtsʼaklomtak Kristo ta baʼyel sigloe: «Mu xa me jechuk xapasik kʼuchaʼal tspas skotol li kʼusitik oy ta balumile» (Rom. 12:2). Li buchʼutik jech laj yalbe batel li jtakbol Pabloe jaʼik yajtsʼaklomtak Kristo ti yakʼoj sbaik ta stojolal Diose xchiʼuk ti tʼujbil chbatik ta vinajele. Pe ¿kʼu yuʼun jech pʼijubtasatik? (Rom. 1:7).

2, 3. 1) ¿Kʼusi tspas Satanas yoʼ xlik jtoy jbatik ta stojolal li Jeovae? 2) ¿Kʼuxi xuʼ jip lokʼel ta jnopbentik ‹li kʼusitik tsots yakʼoj yibeltake›?

² Li Pabloe la svul tajek yoʼonton, yuʼun oy junantik yajtsʼaklomtak Kristoe jaʼ la xchʼunik li spʼijil krixchanoetik xchiʼuk li rasonetik chal sbalumil Satanas ti naka chopolike (Efes. 4:17-19). ¿Mi xuʼ van jech xkʼot ta jtojolaltik ek? Xuʼ. Yuʼun li Satanase jaʼ sventainoj li kʼusitik oy ta sba balumile, jech oxal ep ta tos kʼusi tstunes yoʼ snamajesutik ta stojolal li Jeovae. Jtos li kʼusi tspase jaʼ ti tstij koʼontontik sventa jaʼuk jpastik li kʼusi chopol tskʼan koʼontontike o ti jkʼantik ti tsotsuk jkʼoplaltike. Jech xtok, sventa jechuk xlik jnoptik kʼuchaʼal li stuke, xuʼ jaʼ tstunes li kʼusi echʼem ta jkuxlejaltike, li kʼusi nopem xkaʼitik spasele xchiʼuk mi chanunajemutik leke.

³ ¿Mi xuʼ van jip lokʼel ta jnopbentik ‹li kʼusitik tsots yakʼoj yibeltake›? (2 Kor. 10:4). Xi tstakʼbutik li Pabloe: «Yakal ta jlilinkutik rasonetik xchiʼuk kʼusitik chmakvan ti skontrainoj li yojtikinobil Diose; xchiʼuk ta jchukutik skotol nopbenal sventa chchʼunbe smantal li Kristoe» (2 Kor. 10:5). Ta melel, xuʼ skoltautik Jeova sventa jkontraintik li  nopbenaletik ti muʼyuk leke. Jech kʼuchaʼal oy poxiletik ti xuʼ xtuchʼbe yip jtosuk venenoe, li Skʼop Dios eke xuʼ xtuchʼbe yip li kʼusitik xuʼ xikʼutik batel ta spasel li kʼusitik tskʼan sbalumil Satanase.

4. ¿Kʼusitik persa laj kiktatik spasel kʼalal lik jchantik li Skʼop Diose?

⁴ ¿Mi xvul ta ajol li kʼusitik la ajel ta akuxlejal kʼalal lik achan li Skʼop Diose xchiʼuk ti lik tunan ta stojolal Jeovae? Epal ermanoetike persa laj yiktaik spasel li kʼusitik chopole (1 Kor. 6:9-11). Jech oxal, ta jtojbetik tajek ta vokol Jeova ti la skoltautik ta yiktael li kʼusitik chopole.

5. ¿Kʼusi chaʼtos chal Romanos 12:2 ti skʼan jpastike?

⁵ Melel onoʼox ti kʼalal laj kichʼtik voʼe, laj kiktatik spasel li kʼusitik chopole. Pe taje maʼuk skʼan xal ti jun xa noʼox koʼontontike, moʼoj, yuʼun skʼan jkʼel-o jbatik sventa mu jchaʼpastik li kʼusitik kiktaojtik xae. Li Pabloe laj yal kʼuxi xuʼ spas kuʼuntik, xi laj yale: «Mu xa me jechuk xapasik kʼuchaʼal tspas skotol li kʼusitik oy ta balumile; jaʼ lek jelo anopbenik sventa xjel atalelalik» (Rom. 12:2). Jech oxal chaʼa, oy chaʼtos kʼusi skʼan jpastik: baʼyel, mu xa jkap jbatik xchiʼuk li balumile. Xchiʼuk xchibal, skʼan jel li jnopbentike.

6. ¿Kʼusi chakʼ jchantik li skʼelobil laj yal Jesus ta Mateo 12:43 kʼalal ta 45?

⁶ Kʼalal laj yal Pablo ti skʼan xijelutike, jaʼ yakal chalbe skʼoplal ti skʼan jeltik li kʼusi ta jnoptike xchiʼuk li kʼusi oy ta koʼontontike, maʼuk noʼox li jpat jxokontike (kʼelo li rekuadro « ¿Mi jelemutik xa o mi naka ta jmaktik satil?»). Jaʼ yuʼun, ti ta jel jnopbentike te skʼoplal li kʼusi oy ta koʼontontik staele, li jtalelaltike xchiʼuk li kʼusi chkaʼitik ta koʼontontike. Tsots skʼoplal ti xi jakʼbe jbatike: «¿Kʼusi yakal ta jpas yoʼ jchanbe stalelal li Kristoe? ¿Mi yakal ta jel ta melel li kʼusi oy ta  yut koʼontone o mi jaʼ noʼox li kʼusi xil yantike?». Tsots skʼoplal ti xijelutike. Ta Mateo 12:43 kʼalal ta 45 (kʼelo), li Jesuse laj yakʼ ta ilel kʼusi skʼan xal ti xijelutike. Li kʼusi laj yal Jesuse jamal chakʼ ta ilel ti maʼuk noʼox bal mi ta jiptik lokʼel li kʼusi chopol ta jnoptike, yuʼun jaʼ skʼan jtikʼtik ochel ta jnopbentik li kʼusitik lek chil Diose.

7. ¿Kʼusi xuʼ jpastik yoʼ jeltik li kʼusi oy ta yut koʼontontik xchiʼuk ta jnopbentike?

⁷ Pe ¿mi xuʼ xjel ta melel li kʼusi oy ta yut koʼontontik xchiʼuk ta jnopbentike? Xi tstakʼbutik li Skʼop Diose: «Skʼan jechuk-o achʼubuk batel ti kʼu yelan chanopike, xchiʼuk skʼan xalapik li achʼ talelal ti jech laj yichʼ pasel jech kʼuchaʼal la skʼan yoʼonton li Diose, ti laj yichʼ pasel ta batsʼi tukʼilal xchiʼuk ta stukʼil oʼontonale» (Efes. 4:23, 24). Taje chakʼ ta ilel ti xuʼ xijelutike, jaʼ noʼoxe xuʼ van vokol chkaʼitik spasel, yuʼun mu baluk noʼox ti mu jpastik li kʼusi chopol ta jkʼantike. Skʼan x-achʼub batel ti kʼu yelan ta jnoptike, jaʼ xkaltik, ti jkomtsantik li kʼusi ta jkʼantike, li kʼusi nopem xkaʼitik spasele xchiʼuk li kʼusitik tstij koʼontontike. Sventa spas kuʼuntike, skʼan jech-o xkakʼ kipaltik.

8, 9. Li kʼusi kʼot ta stojolal jun ermanoe, ¿kʼuxi chakʼ kiltik ti skʼan jeltik li kʼusi oy ta yut koʼontontik xchiʼuk ta jnopbentike?

⁸ Kalbetik skʼoplal jun ermano ti chuchʼ toʼox pox, ti simaron tajek xchiʼuk ti lek chaʼi tstikʼ sba ta kʼopetike. Pe la sjel xkuxlejal xchiʼuk laj yichʼ voʼ, vaʼun li krixchanoetik ta slumale laj yakʼik venta ti xuʼ sjel jkuxlejaltik li Vivliae. Pe oy kʼusi kʼot ta pasel kʼalal mu toʼox jaluk yichʼoj voʼe, yuʼun jun bat kʼakʼale, kʼot jun jyakubel ta sna ti tskʼan chmajvan yaʼie. Li ermanoe tsʼik toʼox yuʼun sventa mu stsak ta majel li jyakubele. Pe kʼalal laj yaʼi ti la xchopol kʼoptabe sbi Jeovae, xvaʼvun lokʼel ta sna xchiʼuk la stsak ta majel. ¿Kʼu yuʼun ti jech kʼot ta pasele? Yuʼun muʼyuk toʼox sjeloj li snopbene akʼo mi stsaloj xa li xchopol talelal koliyal ti chchan li Skʼop Diose. Ta jpʼel chaʼpʼel noʼoxe, jaʼ ti muʼyuk to sjeloj ta melel li kʼusi oy ta yut yoʼonton xchiʼuk ta snopbene.

⁹ Pe muʼyuk xchibaj li ermano kʼalal jech kʼot ta pasele (Prov. 24:16). Li moletike la skoltaik sventa jech-o xchʼi batel ta mantal, vaʼun pas yuʼun li kʼusi chichʼ kʼanel yoʼ xkʼot ta mol ta tsobobbaile. Pe oy to kʼusi la snuptan ti xkoʼolajtik li kʼusi kʼot ta stojolal ta slikebale, jun velta kʼalal ikʼ xa ox osile xchiʼuk ti jaʼo te oy ta stiʼ Salon sventa Tsobobbaile, te tal jun jyakubel ti tskʼan ox tsmaj jun mol ta tsobobbaile. ¿Kʼusi la spas li ermanoe? Ta slekil yoʼonton nopaj batel ta stojolal li jyakubele, rasonaj xchiʼuk, vaʼun bat yakʼ komel ta sna. ¿Kʼu yuʼun ti jech la spase? Yuʼun sjeloj xa ox ti kʼu yelan li snopbene. Xuʼ xkaltik ti pas ta jun achʼ krixchano ti oy smalael yuʼun xchiʼuk ti bikʼit yakʼoj sbae. Ti vaʼ yelan la sjel li xkuxlejale laj yichʼ-o ichʼel ta mukʼ li Jeovae.

10. ¿Kʼusi skʼan xal ti ta jeltik li kʼusi oy ta yut koʼontontik xchiʼuk ta jnopbentike?

¹⁰ ¿Mi jaʼ van skʼan xal ti xuʼ xjel jkuxlejaltik ta jun noʼox kʼakʼale? Moʼoj. Xuʼ van skʼan xkakʼtik persa jayibuk jabil yoʼ jechuk xkʼot ta pasele (2 Ped. 1:5). Maʼuk me tskoltautik mi oy xa jayibuk jabil kocheltik ta mantale. Yuʼun skʼan xkakʼtik persa sjelel li kʼusi oy ta yut koʼontontik xchiʼuk ta jnopbentike. ¿Kʼusi van xuʼ skoltautik? Jkʼeltik batel jaytosuk kʼusi xuʼ jpastik.

11. Li orasione, ¿kʼuxi tskoltautik ta sjelel li kʼusi ta jnoptike?

¹¹ Li kʼusi baʼyel xuʼ skoltautike jaʼ li orasione. Jechuk jkʼanbetik Jeova li kʼusi laj yal li jtsʼibajom yuʼun salmo liʼe: «Dios kuʼun, sakubtasbun koʼonton xchiʼuk achʼubuk li kʼusi oy ta koʼonton sventa skoltaun yoʼ tukʼuk xkakʼ jbae» (Sal. 51:10, TNM). Skʼan me teuk ta joltik ti persa skʼan x-achʼub li kʼusi ta jnoptike xchiʼuk ti jkʼanbetik koltael li Jeovae. ¿Mi xuʼ jpat koʼontontik ti tskoltautik li Jeovae? Xuʼ. Kʼalal jaʼo kuxi li Esekiele, li Jeovae xi laj yalbe ta jamal li j-israeletik ti pimik ta mantale: «Ta jelbe yoʼntonic; ta xcacʼbe achʼ stalelic [...]; ta xcacʼbe lec cʼun yoʼntonic» (Ezeq. 11:19). Tspat tajek koʼontontik li kʼusi laj yal Jeovae, yuʼun oy ta yoʼonton tskolta li j-israeletik yoʼ sjel li stalelalike. Jaʼ me jech li avi eke, yuʼun oy ta yoʼonton tskoltautik ek.

12, 13. 1) Jech kʼuchaʼal chal li Salmo 119:59, ¿kʼusi skʼan jnopbetik skʼoplal? 2) ¿Kʼusitik skʼan jakʼbe jbatik?

¹² Li xchaʼtosal kʼusi tsots skʼoplal skʼan jpastike jaʼ ti jnopbetik skʼoplal li kʼusi ta jchantike. Skʼan me jchantik sil kʼakʼal li Skʼop Diose xchiʼuk ti jchʼakbetik yorail sventa jnopbetik skʼoplal mi skʼan jel jnopbentik xchiʼuk li kʼusi oy ta koʼontontike (kʼelo Salmo 119:59; Evr. 4:12; Sant. 1:25). Jkʼeltik mi jaʼ jech ta jnoptik kʼuchaʼal li spʼijil krixchanoetike. Teuk ta joltik ti oy onoʼox kʼusitik vokol chkaʼitik stsalele xchiʼuk ti skʼan xkakʼtik persa yiktaele.

¹³ Xuʼ xi jakʼbe jbatike: «¿Mi oy kʼusi xpichʼet-o koʼonton yuʼun o mi jnaʼ xi-itʼixaj jutuk?» (1 Ped. 2:1). «¿Mi xitoyet chkaʼi jba ta skoj li kʼusi echʼem ta jkuxlejale, ti chanunajemun leke o ta skoj li kʼusi x-ayan kuʼune?» (Prov. 16:5). «¿Mi mas pekʼel skʼoplal chkil li buchʼutik mas jutuk kʼusi x-ayan yuʼunike o ti yan-o slumalike?» (Sant. 2:2-4). «¿Mi chpichʼaj-o koʼonton yuʼun li kʼusitik oy ta balumile?» (1 Juan 2:15-17). «¿Mi ta jkʼupin li chʼayob oʼontonaletik ti chakʼ ta ilel mulivajel xchiʼuk majbaile?» (Sal. 97:10; 101:3; Amós 5:15). Li sjakʼobiltak taje jaʼ tsvinajes ti bu skʼan xijelutike. Ta me jmuyubtabetik yoʼonton Jeova mi ta jiptik lokʼel li kʼusitik muʼyuk lek ti yakʼoj «tsots yibeltake» (Sal. 19:14).

14. ¿Kʼu yuʼun toj tsots skʼoplal ti jtʼujtik lek li kamigotaktike?

¹⁴ Li yoxtosal kʼusi xuʼ skoltautike jaʼ ti jtʼujtik lek li kamigotaktike. Yuʼun li buchʼu ta jchiʼintike xuʼ xjel yuʼun jtalelaltik akʼo mi mu xkakʼtik lek venta (Prov. 13:20). Toj ep krixchanoetik ta jchiʼintik li ta kabteltik o ta chanun ti muʼyuk bu tskoltautik sventa jechuk jnopbentik kʼuchaʼal li Jeovae. Pe li ta tsobajeletike xuʼ jtatik lekil amigoiletik ti tstij «koʼontontik sventa jkʼan jbatik xchiʼuk ti jpastik li kʼusitik toj leke» (Evr. 10:24, 25).

15, 16. ¿Kʼusi tspas Satanas sventa sjel li jnopbentike?

¹⁵ Jvules ta joltik ti oy tajek ta yoʼonton tsjel jnopbentik li Satanase. Jech oxal, tstunesan jeltos chanubtaseletik o nopbenaletik sventa skontrain li kʼusitik melel chal Skʼop Diose.

¹⁶ Li Satanase xi la sjakʼbe Eva li ta nichimaltik Edene: «¿Me ta melel laj yalboxuc Mucʼul Dios...?» (Gén. 3:1). Taje jaʼ jech-o tstunes avi li Satanase, yuʼun li krixchanoetik ti jaʼ sventainoje toj ep kʼusi tsjakʼbutik ti xuʼ van xijnaʼet xa chijkom  yuʼune. Jech kʼuchaʼal liʼe: «¿Mi jech ta melel ti muʼyuk lek chil Dios ti xikʼ sbaik li buchʼutik xchiʼil noʼox sbaik ta vinikal o ta antsile? ¿Mi jech ta melel ti mu xakʼ xapasik svokʼel Ninyo o kumpleanyo li Adiosike? ¿Mi jech ta melel ti mu xakʼ xavichʼik chʼichʼ li Adiosike? ¿Mi jech ta melel ti mu xakʼ Adiosik ti xachiʼinik li buchʼutik lokʼemik ta tsobobbaile?».

17. 1) ¿Kʼusi skʼan jpastik kʼalal oy kʼusitik chkichʼtik jakʼbel yoʼ xijchibaje? 2) Jech kʼuchaʼal chal Kolosenses 2:6 xchiʼuk 7, ¿kʼusi sbalil ta jtatik mi jech la jpastike?

¹⁷ Skʼan me jchʼuntik lek ti melel li kʼusi yakal ta jchantike. ¿Kʼu yuʼun? Yuʼun mi oy kʼusi ta jakʼbe jbatik pe mi te noʼox ta jnakʼ ta koʼontontike, xuʼ me xlik sjel o sokes jnopbentik xchiʼuk li xchʼunel koʼontontike. ¿Kʼusi van xuʼ jpastik? Li Skʼop Diose chal ti skʼan xkachʼubtastik li jnopbentik yoʼ xkakʼtik venta jtuktik «li kʼusi leke, li kʼusi chʼambile xchiʼuk li kʼusi tukʼ tskʼan yoʼonton Diose» (Rom. 12:2). Kʼalal nopoltik noʼox ta jchan Jvivliatike, jaʼ tskoltautik sventa jchʼuntik ti melel li kʼusi yakal ta jchantike xchiʼuk chkakʼtik venta ti oy sbalil li tojobtaseletik chakʼbutik Jeovae. Vaʼun, jaʼ jech chijkʼot kʼuchaʼal jtekʼ teʼ ti yakʼoj lek yibel xchiʼuk ti ‹tsots lek li xchʼunel koʼontontike› (kʼelo Kolosenses 2:6, 7).

18. ¿Kʼusi tskoltautik sventa jkontraintik li xchamel sbalumil Satanase?

¹⁸ Voʼotik me skʼan jtsatsubtastik li xchʼunel koʼontontike. Jaʼ yuʼun, jechuk-o jeltik batel li kʼusi ta jnoptike, nopoltik noʼox jkʼopontik li Jeovae xchiʼuk jkʼanbetik ti akʼo xakʼbutik li xchʼul espiritue. Jnopbetik skʼoplal xtok li kʼusi ta jchantike, jkʼeltik lek kʼu yelan oy li jnopbentike xchiʼuk li kʼusitik tstij koʼontontike. Jech xtok, jaʼuk jchiʼintik li buchʼutik lek stalelalike xchiʼuk ti tskoltautik ta sjelel li jnopbentike. Mi jech la jpastike, ta jkontraintik li xchamel sbalumil Satanase xchiʼuk ta jlilintik «rasonetik xchiʼuk kʼusitik chmakvan ti skontrainoj li yojtikinobil Diose» (2 Kor. 10:5).