XCHANOBIL 23
«Akʼo yichʼ chʼultajesel li abie»
«Kajval Jeova, te oy-o sbatel osil li abie» (SAL. 135:13).
KʼEJOJ 10 ¡Kichʼbetik ta mukʼ sbi Jeova!
LI KʼUSI TA JCHANTIKE *
1, 2. ¿Kʼusi lek chkaʼitik yalbel skʼoplal?
LI STESTIGOUTIK Jeovae lek chkaʼitik yalbel skʼoplal ti kʼu yelan tspas mantal li Jeovae xchiʼuk ti xichʼuk chʼultajesbel li sbie, ¿kʼu yuʼun? Yuʼun toj tsots skʼoplal chkiltik. ¿Mi jelajtik kʼusi chalbe skʼoplal taje? Mu jechuk, yuʼun koʼol te nitil skʼoplal.
2 Jnaʼojtik ti skʼan xichʼ chʼultajesbel li sbi Diose xchiʼuk ti xichʼ akʼel ta ilel ti stuk noʼox toj lek tspas mantale. Toj tsots skʼoplal ti xkaʼibetik smelolale.
3. ¿Kʼusi te nitil skʼoplal li ta sbi Jeovae?
3 Skotol li kʼusitik tspas Jeovae te nitil skʼoplal li sbie, jech kʼuchaʼal ti kʼu yelan ch-ajvalilaje. Mi chkaltik ti skʼan chʼultajesbel li sbi Diose, yakal me chkaltik xtok ti stuk noʼox toj lek tspas mantale. Ta skoj ti jaʼ Mukʼul Jpasmantal li Jeovae, li sbie te nitil skʼoplal ti kʼu yelan tspas mantale (kʼelo li rekuadro « Li kʼusitik laj yichʼ chibal kʼoptaele»).
4. 1) ¿Kʼusi chakʼ kiltik Salmo 135:13 ta sventa li sbi Diose? 2) ¿Kʼusi chkalbetik skʼoplal li ta xchanobil liʼe?
4 Toj tsots skʼoplal li sbi Jeovae (kʼelo Salmo 135:13). ¿Kʼu yuʼun? ¿Bakʼin lik yichʼ chopol kʼoptabel li sbie? ¿Kʼusi spasoj Jeova sventa xchʼultajes? ¿Kʼuxi xuʼ jpakbetik skʼoplal ek? Jaʼ chkalbetik skʼoplal li ta xchanobil liʼe.
TOJ TSOTS SKʼOPLAL LI JUN BIILE
5. ¿Kʼusi xuʼ jakʼbe jbatik kʼalal chkaltik ti skʼan xichʼ chʼultajesel li sbi Diose?
5 Li Jesuse laj yal ti toj tsots skʼoplal ti xiuk xkaltik kʼalal ta jkʼopontik li Jeovae: «Akʼo yichʼ chʼultajesel li abie» (Mat. 6:9). ¿Kʼusi skʼan xal taje? Kʼalal oy kʼusi chichʼ chʼultajesele, skʼan sakuk xkom o ti chʼuluke. Pe xuʼ van xi ta jakʼbe jbatike: «¿Mi yuʼun muʼyuk chʼul o sak li sbi Jeovae? ¿Kʼu yuʼun skʼan chʼultajesel?». Sventa xkaʼibetik smelolale, skʼan jnoptik kʼusi chakʼ ta aʼiel li jun biile.
6. ¿Kʼu yuʼun toj tsots skʼoplal li jun biile?
6 Li jun biile maʼuk noʼox tsots skʼoplal ti kʼu yelan ta tsʼibaele o ti kʼu yelan ta alele. Xi chal li Vivliae: «Jaʼ mas lek mi la jtʼuj lek jbitike, jaʼ mu sta li epal kʼulejale» (Prov. 22:1, tsʼib ta yok vun; Ekl. 7:1). ¿Kʼu yuʼun toj tsots skʼoplal li jun biile? Yuʼun chakʼ ta aʼiel kʼu yelan skʼoplal li jun krixchanoe. Jaʼ yuʼun, li kʼusi mas tsots skʼoplale jaʼ li kʼusi tsnop yantik kʼalal chilik li jun biile o kʼalal chaʼiike.
7. ¿Kʼuxi xchopol kʼoptaojbeik li sbi Diose?
7 Kʼalal oy buchʼu chal jutbil kʼopetik ta stojolal li Jeovae, yakal me tsokbe skʼoplal o chikʼubtasbe li sbie. ¿Bakʼin lik yichʼ chopol kʼoptael li sbi Diose xchiʼuk ti laj yichʼ sokbel skʼoplale? Jaʼo li ta nichimaltik Edene. Jkʼeltik kʼusi chakʼ jchantik li kʼusi kʼot ta pasele.
LIK YICHʼ CHOPOL KʼOPTAEL LI SBI DIOSE
8. 1) ¿Kʼusitik snaʼojik li Adan xchiʼuk Evae? 2) ¿Kʼusitik xuʼ jakʼbe jbatik?
8 Li Adan xchiʼuk Evae snaʼojik ti Jeova sbi li Diose xchiʼuk oy to yan kʼusitik tsots skʼoplal snaʼojik ta stojolal. Jech kʼuchaʼal liʼe: snaʼojik ti jaʼ Jpasvaneje, ti jaʼ akʼbat xkuxlejalike, ti akʼbatik jun kʼupil sba balumil ti bu xuʼ xnakiike xchiʼuk ti jaʼik tukʼil krixchanoetike (Jen. 1:26-28; 2:18). Pe ¿mi jech-o tsnopbeik skʼoplal li kʼusitik akʼbatemik yuʼun Jeovae? ¿Mi mas to tskʼanik li Stotik ta vinajele xchiʼuk mi tstojbeik-o ta vokol? Kʼalal laj yichʼik akʼel ta prevae, te vinaj li kʼusi oy ta yoʼontonike.
9. 1) Jech kʼuchaʼal chal Jenesis 2:16, 17 xchiʼuk 3:1-5, ¿kʼusi albatik yuʼun Jeova li Adan xchiʼuk Evae? 2) ¿Kʼuxi la sokesbe skʼoplal Jeova li Satanase?
9 (Kʼelo Jenesis 2:16, 17; 3:1-5). Li Satanase la stunes jkot kiletel chon sventa xi sjakʼbe li Evae: «¿Mi melel ti laj yalboxuk Dios ti mu xuʼ xalobeik sat skotol li teʼetik liʼ ta nichimaltike?». Toj manya kʼu yelan loʼlavan li Satanase. Li Adan xchiʼuk Evae xuʼ stul sloʼik jeltos sat teʼetik, yuʼun kʼajomal noʼox jtekʼ teʼ ti albatik yuʼun Dios ti mu stakʼ sloʼike (Jen. 2:9). Toj lek yoʼonton li Jeovae, yuʼun jaʼ xa noʼox jtekʼ teʼ ti muʼyuk x-akʼbat sloʼike. Pe li kʼusi la sjakʼbe Eva li Satanase laj yakʼ ta aʼiel ti mu snaʼ xtʼolbij li Diose. Ta skoj taje, xuʼ van xi la snop li Evae: «¿Mi oy van kʼusi muʼyuk chakʼ jkʼupin li Diose?».
10. ¿Kʼuxi la xchopol kʼoptabe sbi Dios li Satanase, xchiʼuk kʼusi kʼot ta pasel ta skoj taje?
10 Akʼo mi jech la snuptan li Evae, tukʼ toʼox laj yakʼ sba ta stojolal li Jeovae. Jamal laj yalbe Satanas li kʼusi albatemik yuʼun Dios ti mu stakʼ spasike. Xchiʼuk laj yalbe ti mu stakʼ spikik jsetʼuk li jtekʼ teʼ taje. Snaʼoj lek Eva ti chchamik mi la stoy sbaik ta stojolal li Diose. Toj manya kʼu yelan loʼlavan li Satanase, yuʼun xi laj yale: «Ta melel, muʼyuk chachamik» (Jen. 3:2-4). Li Satanase la xchopol kʼoptabe li sbi Diose, yuʼun laj yakʼ ta aʼiel ti jaʼ jun jutkʼop li Jeovae. Vaʼun, pas ta Diablo li Satanas ti jaʼ skʼan xal jchopolkʼoptavaneje. Lek onoʼox laj yichʼ loʼlael li Evae, yuʼun la xchʼunbe li kʼusi laj yal Satanase (1 Tim. 2:14). Ta skoj ti maʼuk xa la spat yoʼonton ta stojolal Jeovae, oy kʼusi toj chopol kʼot ta nopel yuʼun: la stoy sba ta stojolal Dios xchiʼuk la sloʼ li sat teʼ ti mu stakʼ sloʼe. Laje, laj yakʼbe li Adan eke (Jen. 3:6).
11. ¿Kʼusi la spasik jechuk li Adan xchiʼuk Evae?
11 Jnopbetik skʼoplal kʼusi xuʼ ox la stakʼbe Satanas li Evae. Jnoptik noʼox ti xiuk laj yalbee: «Voʼote mu xakojtikinot, jaʼ noʼox xkojtikin lek li Jtot, Jeovae. Jkʼanoj tajek xchiʼuk jpatoj koʼonton ta stojolal. Jaʼ yakʼojbunkutik xchiʼuk jmalal li kʼusitik oy kuʼunkutike. ¿Kʼuxi xa noʼox ti chachopol kʼoptae? ¡Anchan xa jkʼantik!». Ti jechuk la stakʼe, xi van xmuyubaj laj yal li Jeovae: «Skʼanojun tajek li kuni tsebe xchiʼuk tukʼ yakʼoj sba» (Prov. 27:11). Pe li Adan xchiʼuk Evae muʼyuk la spakbeik skʼoplal li sbi Stotike, yuʼun muʼyuk skʼanojik ta melel.
12. ¿Kʼusi laj yakʼbe xchʼun Eva li Satanase, xchiʼuk kʼusi muʼyuk la spasik li Adan xchiʼuk Evae?
12 Li Satanase laj yakʼbe xchʼun Eva ti maʼuk jun lekil Totil li Jeovae, vaʼun jaʼ jech lik sokbe tal skʼoplal li Diose. Ta skoj ti muʼyuk la spakbeik skʼoplal sbi Dios li Adan xchiʼuk Evae, la xchʼunik li kʼusi laj yal Satanase xchiʼuk la stoy sbaik ta stojolal li Stotik ta vinajele. Jaʼ jech-o tspas li Satanas avie, yuʼun chchopol kʼoptabe li sbi Diose. Li buchʼutik chchʼunik li kʼusi jecheʼ chal Satanase chlik spʼajik ti kʼu yelan tukʼ tspas mantal li Jeovae.
CHCHʼULTAJES SBI LI JEOVAE
13. ¿Kʼusi mas tsots skʼoplal chal Vivlia jech kʼuchaʼal xvinaj ta Esekiel 36:23?
13 Mu teuk no’ox smeyoj kom skʼob Jeova k’alal laj yich’ chopol kʼoptaele. Li Vivliae chalbutik kʼusi spasoj Jeova sventa xakʼ ta ilel ti jecheʼ li kʼusi laj yal Satanas ta nichimaltik Edene (Jen. 3:15). Ta jpʼelchaʼpʼel noʼox li kʼusi mas tsots skʼoplal chal Vivliae jaʼ liʼe: li Jeovae tstunes li Ajvalilal yuʼun sventa xchʼultajes li sbie, ti jkʼupintik yan velta jun oʼontonal xchiʼuk tukʼilal ta balumile. Li Vivliae chakʼ kiltik kʼuxi chchʼultajes sbi li Jeovae (kʼelo Esekiel 36:23).
14. ¿Kʼuxi xchʼultajesoj sbi Jeova akʼo mi yichʼoj chopol kʼoptael?
14 Li Satanase ep ta tos kʼusi spasoj sventa smak ta be li kʼusi oy ta yoʼonton Jeovae, pe jecheʼ noʼox yakʼoj svokol. Li Vivliae chalbutik kʼusi spasoj li Jeovae xchiʼuk chakʼ kiltik ti jaʼ jun jkʼanvanej Totile xchiʼuk ti jaʼ jun lekil Ajvalile. Ta skoj li stoyobbail Satanas xchiʼuk li buchʼutik jmoj xa sjol xchiʼukike, yakʼojbeik yatel yoʼonton li Jeovae (Sal. 78:40). Akʼo mi yichʼoj chopol kʼoptabel li sbie, yakʼoj ta ilel spʼijil, smalael yuʼun xchiʼuk ti tukʼ li kʼusi tspase. Maʼuk noʼox, yuʼun ep ta tos kʼuxi yakʼoj ta ilel ti muʼyuk spajeb li sjuʼele. Jech xtok, kʼalal oy kʼusi tspase, jamal xvinaj ti skʼanojutike (1 Juan 4:8). Li Jeovae mu jecheʼuk noʼox te chotol, yuʼun ep kʼusitik spasoj sventa xchʼultajes li sbie.
Li Satanase la sjutbe smul Jeova kʼalal la skʼopon li Evae xchiʼuk jech-o xchopol kʼoptaoj talel li Diose. (Kʼelo parafo 9, 10, 15). *
15. ¿Kʼuxi yakal-o tsokesbe skʼoplal sbi Dios li Satanase, xchiʼuk kʼusi kʼotem ta pasel yuʼun?
15 Li Satanase jech-o yakal chchopol kʼopta li sbi Jeovae. Chakʼbe xchʼun krixchanoetik ti muʼyuk sjuʼele, ti muʼyuk tukʼ kʼusi tspase, ti muʼyuk spʼijile xchiʼuk ti mu snaʼ xkʼanvane. Jech kʼuchaʼal liʼe, chakʼbe snop krixchanoetik ti muʼyuk Diose. Pe mi oy buchʼu la xchʼune, chakʼbe snop ti muʼyuk lek li smantaltake xchiʼuk ti toj tsotsike. Chal xtok ti muʼyuk xkʼuxul yoʼonton li Diose, yuʼun chal ti chakʼbe stoj smul ta kʼatinbak li krixchanoetike. Li buchʼutik chchʼunik li kʼusi jecheʼ chal Satanase xuʼ van mas anil tsnopik ti muʼyuk lek ch-ajvalilaj li Jeovae. Li Satanase jech-o chchopol kʼopta li Jeovae xchiʼuk chakʼ persa tsnamajesutik ta stojolal, jaʼ to chikta sba mi laj yichʼ lajesele. ¿Mi tspas onoʼox yuʼun li kʼusi tskʼane?
XUʼ JKOLTA JBATIK TA XCHʼULTAJESBEL LI SBIE
16. ¿Kʼusi xuʼ jpastik ti mu jechuk la spasik li Adan xchiʼuk Evae?
16 Akʼo mi maʼuk tukʼil krixchanoutik, xuʼ jkolta jbatik ta xchʼultajesbel li sbi Jeovae. Xuʼ jpastik li kʼusi muʼyuk la spasik li Adan xchiʼuk Evae. Li krixchanoetik avie chchopol kʼoptabeik li sbi Jeovae. Pe xuʼ jpakbetik skʼoplal ti jaʼ jun chʼul Diose, ti tukʼ kʼusi tspase, ti lek yoʼontone xchiʼuk ti skʼanojutik tajeke (Is. 29:23). Xuʼ xkakʼtik ta ilel ti ta jkʼantik ti jaʼuk Ajvalil kuʼuntik li Jeovae. Kalbetik yantik ti stuk noʼox toj lek ch-ajvalilaje, ti chakʼ jun oʼontonal xchiʼuk muyubajel ta jelavele (Sal. 37:9, 37; 146:5, 6, 10).
17. ¿Kʼuxi laj yakʼ ta ojtikinel sbi Stot li Jesuse?
17 Kʼalal ta jpakbetik skʼoplal li sbi Jeovae, yakal me ta jchanbetik stalelal li Jesuse (Juan 17:26). ¿Kʼuxi laj yakʼ ta ojtikinel sbi Stot li Jesuse? Maʼuk noʼox laj yalilanbe li sbie, yuʼun la xchanubtas yantik kʼu yelan ta melel li Jeovae. Kalbetik junuk skʼelobil. Li jfariseoetike laj yalik ti toj tsots stalelal li Jeovae, ti toj jpʼel xale xchiʼuk ti muʼyuk xkʼuxul yoʼontone. Pe li Jesuse laj yalbe krixchanoetik ti xaʼibe smelolal kʼu yelan chkaʼi jbatik li Jeovae, ti oy smalael yuʼune, ti snaʼ xkʼanvane xchiʼuk ti oy xkʼuxul yoʼontone. Jech xtok, la xchanbe stalelal Stot, vaʼun jaʼ jech la skolta krixchanoetik sventa xojtikinik li Jeovae (Juan 14:9).
18. ¿Kʼuxi xuʼ jpakbetik skʼoplal li Jeovae?
18 Jchanbetik stalelal li Jesuse, kalbetik yantik li kʼusitik jnaʼojtik ta stojolal Jeovae: ti snaʼ xkʼanvane xchiʼuk ti oy xkʼuxul yoʼontone. Vaʼun, ta jpakbetik skʼoplal Jeova ti oy kʼusi jecheʼ albil ta stojolale xchiʼuk ti yichʼoj chopol kʼoptaele. Ta jchʼultajesbetik sbi li Jeovae xchiʼuk ta jkoltatik yantik sventa chʼuluk xilik eke. Xuʼ jchanbetik stalelal Jeova akʼo mi maʼuk tukʼil krixchanoutik (Efes. 5:1, 2). Kʼalal chkakʼbetik yil yantik xchiʼuk chkalbetik kʼu yelan ta melel li Jeovae, ta jkolta jbatik ta xchʼultajesbel li sbie. Mi ta jkoltatik yantik sventa sjelik li kʼusi jecheʼ xchʼunojik ta stojolal Diose, yakal me ta jpakbetik skʼoplal li sbi Jeovae. * Jech xtok, ta jchʼultajesbetik sbi Jeova kʼalal tukʼ chkakʼ jbatik akʼo mi maʼuk tukʼil krixchanoutik (Job 27:5).
Kakʼbetik yil kaj-estudiotik ti toj lek yoʼonton li Jeovae xchiʼuk ti snaʼ xkʼanvane. (Kʼelo parafo 18, 19). *
19. Kʼalal chkakʼtik estudioe, ¿kʼusi ti mas ep sbalil chkiltik jech kʼuchaʼal chal Isaias 63:7?
19 ¿Kʼuxi to yan xuʼ jkolta jbatik ta xchʼultajesbel li sbi Jeovae? Kʼalal chkakʼtik estudioe, ep ta velta chkalbetik skʼoplal ti kʼu yelan tspas mantal li Jeovae xchiʼuk ti stuk noʼox xuʼ x-ajvalilaj ta vinajel balumile. Melel onoʼox ti tsots skʼoplal ti xkalbetik yantik li smantaltak Diose, pe li kʼusi mas ep sbalile jaʼ ti jkoltatik sventa skʼanik li Jtotik ta vinajele xchiʼuk ti tukʼuk xakʼ sbaik ta stojolale. ¿Kʼuxi xuʼ jkoltatik? Kalbetik skʼoplal kʼu yelan stalelaltak li Jdiostik ti Jeova sbie (kʼelo Isaias 63:7). Mi jech la jpastike, chlik skʼanik Jeova xchiʼuk chchʼunbeik smantal ta skoj ti tskʼan tukʼ chakʼ sbaik ta stojolale.
20. ¿Kʼusi chkalbetik skʼoplal li ta yan xchanobile?
20 Li ta yan xchanobile, chkalbetik skʼoplal liʼe: ti kʼu yelan jtalelaltik xchiʼuk li kʼusi chkakʼtik ta chanele, ¿kʼuxi xuʼ xkichʼbetik-o ta mukʼ sbi Jeova xchiʼuk ti jkoltatik yantik sventa xnopajik ta stojolale?
KʼEJOJ 2 Jeova li abie
^ par. 5 ¿Kʼusi yichʼoj chibal kʼoptael ti jmakioj jkotoltik xchiʼuk li anjeletike? ¿Kʼu yuʼun toj tsots skʼoplal xchiʼuk kʼuxi xuʼ jkolta jbatik ta xchapanel? Oy to yan kʼusitik te nitil skʼoplal, mi laj kaʼibetik smelolale, tskoltautik yoʼ masuk to lek xkil jbatik xchiʼuk li Jeovae.
^ par. 18 Li jvuntike oy yaloj bakʼintik ti mu persauk xichʼ pakbel skʼoplal li sbi Jeovae, ¿kʼu yuʼun? Yuʼun muʼyuk buchʼu yaloj ti mu sta-o ti jech sbie. Pe li ta 2017 kʼalal echʼ li tsobajel chichʼ pasel jujun jabile, laj yichʼ alel ti jel xa ti kʼu yelan kaʼiojbetik tal smelolale. Xi laj yal li buchʼu sbainoj li tsobajele: «Mu chopoluk ti jkʼantik ta orasion ti xichʼuk pakbel skʼoplal li sbi Jeovae, yuʼun skʼan sakubtasbel li skʼoplale» (kʼelo ta jw.org® li programa sventa enero ta 2018, batan yoʼ bu chal VUNETIK XCHIʼUK YAN KʼUSITIK > JW BROADCASTING®).
^ par. 62 LI KʼUSI XVINAJ TA LOKʼOLE: Li Diabloe la xchopol kʼopta Jeova, yuʼun laj yalbe Eva ti tsjut kʼop li Diose. Jech-o chloʼlavan li Satanase, yuʼun chal ti muʼyuk xkʼuxul yoʼonton li Diose xchiʼuk ti maʼuk la spasutike.
^ par. 64 LI KʼUSI XVINAJ TA LOKʼOLE: Li ermano ti chakʼ estudioe chalbe skʼoplal li stalelaltak Diose.
