Li ta chib versikulo liʼe, chalbe skʼoplal baluntos talelaletik. Xi chale: «Li talelaletik chakʼ chʼul espiritue jaʼ liʼe: kʼanelal, kuxetel oʼontonal, jun oʼontonal, smalael, yutsil oʼontonal, slekil oʼontonal, xchʼunel oʼontonal, manxoal xchiʼuk pajesejbail». Pe muʼyuk te tsakal skotol li talelaletik chakʼbutik chʼul espiritue.

Jkʼeltik kʼusi laj yal jtakbol Pablo li ta baʼyel versikuloetike: «Li yabtel jbekʼtaltike [...] jaʼ liʼe: mulivajel, kʼusitik ibal sba, talelal toj kʼexlal sba, yichʼel ta mukʼ santoetik, espiritismo, kontrainejbail, tsakbail ta kʼop, itʼixajel, skʼakʼal oʼontonal, mu jmojuk kʼusi chichʼ nopel, chʼakbail, xchʼunel kʼusi chakʼik ta chanel krixchanoetik, xpichʼ oʼontael kʼusitik yuʼun yantik, yakubel, kʼinetik ti solel muʼyuk xa smelolale xchiʼuk yan kʼusitik kʼuchaʼal taje» (Gal. 5:19-21). Li Pabloe xuʼ ox laj yalbe skʼoplal yan kʼusitik ti te nitil skʼoplal ta «yabtel jbekʼtaltike», jech kʼuchaʼal laj yal ta Kolosenses 3:5. Jaʼ jech ek li baluneb talelaletik laj yalbe skʼoplal ta Galatas 5:22 xchiʼuk 23. Yuʼun muʼyuk la xchol ta alel skotol li talelaletik chakʼbutik chʼul espiritue.

Mi la jkoʼoltastik li kʼusi chal Galatas xchiʼuk li kʼusi la stsʼibabe batel tsobobbail ta Efeso li Pabloe, te chkakʼtik venta ti jaʼ jeche. Yuʼun xi laj yale: «Li luse jaʼ chakʼ skotol li yutsil oʼontonale, li tukʼilale xchiʼuk li kʼusi melele» (Efes. 5:8, 9). ¿Kʼusi chakʼ kiltik taje? Li luse jaʼ chakʼbutik «li yutsil oʼontonale, li tukʼilale xchiʼuk li kʼusi melele», pe li yutsil oʼontonale te nitil skʼoplal ek li ta «talelaletik chakʼ chʼul espiritue». Li Pabloe muʼyuk laj yalbe skʼoplal li tukʼilal xchiʼuk li kʼusi melel ta Galatas 5:22 xchiʼuk 23, akʼo mi jech, xuʼ ox laj yalbe skʼoplal.

Oy kʼusi chakʼ kiltik xtok li kʼusi laj yalbe Timoteo li Pabloe, yuʼun la stijbe yoʼonton sventa xakʼ ta ilel vaktos talelal: «Li kʼusitik tukʼe, li yichʼel ta mukʼ Diose, li xchʼunel oʼontonale, li kʼanelale, ti stsʼik avuʼune xchiʼuk ti manxoukote» (1 Tim. 6:11). Jaʼ noʼox oxtos te nitil skʼoplal li ta «talelaletik chakʼ chʼul espiritue»: li xchʼunel oʼontonale, li kʼanelale xchiʼuk li manxoale. Pe sventa xakʼ ta ilel Timoteo ti tukʼ kʼusi tspase, ti chichʼ ta mukʼ Diose xchiʼuk ti oy stsʼikemal yuʼune, skʼan xkoltaat yuʼun li chʼul espiritue (koʼoltaso xchiʼuk Kolosenses 3:12; 2 Pedro 1:5-7).

Jaʼ yuʼun, li Galatas 5:22 xchiʼuk 23 muʼyuk chchol ta alel skotol li talelaletik skʼan xkakʼtik ta ilele. Li chʼul espiritue xuʼ skoltautik sventa xkakʼtik ta ilel li baluntos talelal chal ta Galatase. Pe sventa xijchʼi ta mantal xchiʼuk ti jlaptik «li achʼ talelal ti jech laj yichʼ pasel jech kʼuchaʼal la skʼan yoʼonton li Diose, ti laj yichʼ pasel ta batsʼi tukʼilal xchiʼuk ta stukʼil oʼontonale», oy to yan talelaletik ti xuʼ skoltautike (Efes. 4:24).