XCHANOBIL 26
«Sutanik tal ta jtojolal»
«Sutanik tal ta jtojolal, vaʼun chisut tal ta atojolalik ek» (MAL. 3:7).
KʼEJOJ 102 ‹Jkoltatik li buchʼutik kʼunike›
LI KʼUSI TA JCHANTIKE *
1. ¿Kʼu yelan chaʼi sba Jeova kʼalal tsut talel junuk yajtunele?
LI XCHANOBIL echʼe, la jchantik ti xkoʼolaj ta jun lekil jchabichij li Jeovae, ti ta slekil yoʼonton chchabi li yuni chijtake xchiʼuk ti tsaʼ li bu chʼayemike. Xi laj yalbe j-israeletik kʼalal jaʼo namajemik ta stojolale: «Sutanik tal ta jtojolal, vaʼun chisut tal ta atojolalik ek». Li avie, jech-o stalelal, yuʼun xi chale: «Muʼyuk chijel» (Mal. 3:6, 7). Jech xtok, li Jesuse laj yal ti xkuxet tajek yoʼonton Jeova xchiʼuk yaj-anjeltak kʼalal tsut talel junuk yajtunel ti namajem toʼoxe (Luk. 15:10, 32).
2. ¿Kʼusi ta jkʼelbetik skʼoplal li ta xchanobil liʼe?
2 ¿Kʼusi ta jkʼelbetik skʼoplal li ta xchanobil liʼe? Ta jkʼeltik oxib lokʼolkʼop laj yal Jesus ti chakʼ ta ilel kʼu yelan xuʼ jkoltatik li buchʼutik namajemik ta stojolal Jeovae. Ta jkʼeltik xtok kʼusi talelaletik skʼan oyuk kuʼuntik sventa jkoltatik yoʼ sutik talel xchiʼuk kʼusi sbalil ta jtatik mi laj kakʼtik persa ta skoltaelike.
JSAʼTIK LI TAKʼIN TI CHʼAYEME
3, 4. Li ants chal ta Lukas 15:8 kʼalal ta 10, ¿kʼu yuʼun xjotet ta saʼel li jsep stakʼine?
3 Sventa jtatik li buchʼutik oy ta yoʼonton tsutik tal ta stojolal Jeovae, skʼan xkakʼ kipaltik ta saʼel. Li ta S-evanjelio Lukase, te laj yal Jesus jun lokʼolkʼop ta sventa jun ants ti tsaʼ jsep drakma takʼin ti chʼay yuʼune. Li kʼusi mas tsots skʼoplal chakʼ kiltike jaʼ ti xjotet ta saʼel li jsep takʼine (kʼelo Lukas 15:8-10).
4 Kʼalal jaʼo kuxi li Jesuse, oy junantik meʼiletik ta Juda ti chakʼbeik lajunsep drakma takʼin li stsebik kʼalal chmalijike. Li ants ta lokʼolkʼope yikʼaluk van ja’ chʼay yu’un jsep li tak’in taje. La snop ti tsʼuj o pʼaj yalel ta lumtike, vaʼun la stsan skantil xchiʼuk la saʼ ta spat xokon, pe muʼyuk la sta. Yikʼaluk van muʼyuk mas chakʼ xojobal li skantile, jaʼ yuʼun mu sta ta ilel li stakʼine. Jech oxal, lik smes lek li snae. Jaʼ to laj yile, oy kʼusi te stsʼayayet li ta pukuke: ¡jaʼ li jsep stakʼine! Li Jesuse laj yal ti xkuxet tajek yoʼonton li antse, vaʼun la stak ta ikʼel yamigatak xchiʼuk slakʼnatak sventa xalbe ti laj xa sta li kʼusi chʼayem yuʼune.
5. ¿Kʼu yuʼun skʼan xkakʼ kipaltik saʼel li buchʼutik yiktaoj sbaik ta mantale?
5 ¿Kʼusi chakʼ kiltik li lokʼolkʼop laj yal Jesuse? Jaʼ ti skʼan xkakʼ kipaltik saʼel li kʼusi chchʼay kuʼuntike. Jaʼ jech skʼan jpastik ek ta stojolal li buchʼutik yiktaoj sbaik ta mantale, yuʼun xuʼ van jal xa tajek muʼyuk chkʼotik li ta tsobobbaile. Yikʼaluk van la sjel snailik, vaʼun mu xa x-ojtikinatik yuʼun yan ermanoetik. Pe junantike oy tajek ta yoʼonton tsutik tal ta stojolal Jeova li avie. Tskʼan chtunik ta stojolal Jeova yan velta xchiʼuk voʼotik, pe skʼan jkoltatik.
6. ¿Kʼuxi xuʼ jkolta jbatik ta saʼel li buchʼutik yiktaoj sbaik ta mantale?
6 Jkotoltik xuʼ jkolta jbatik ta saʼel li buchʼutik yiktaoj sbaik ta mantale: xuʼ xkoltavanik li yutsʼ yalaltake, li moletike, li prekursoretike xchiʼuk li jcholmantaletike. ¿Mi oy junuk kamigotik o kutsʼ kalaltik ti yiktaoj sba ta mantale? Kʼalal ta jcholtik mantal ti bu oy ep krixchanoetik (predicación pública) o ta naetike, ¿mi oy jtaojtik li buchʼu yiktaoj sba ta mantale? Mi oy ta yoʼonton ti xichʼ vulaʼanele, kalbetik ti xuʼ xkakʼbetik moletik li snumeroal stelefono o ti bu nakale. Pe skʼan jtsaktik ta venta li kʼusi chal li smantaltak ajvalile.
7. ¿Kʼusi chakʼ jchantik li kʼusi tspas Thomase?
7 Li moletike, ¿kʼusi skʼan spasik sventa staik li buchʼutik tskʼan tsutik talel ta stojolal Jeovae? Jkʼeltik kʼusi laj yal jun mol ta tsobobbail ta España ti Thomas * sbie. Skoltaoj mas ta 40 ermanoetik sventa sutik tal ta tsobobbail. Xi chale: «Li kʼusi baʼi ta jpase jaʼ ti ta jakʼbe jayvoʼuk ermanoetik mi snaʼojik bu xa nakal li buchʼu yiktaoj sba ta mantale. O ta jakʼbe ermanoetik mi oy buchʼu yilojik ti yiktaoj sba ta tsobajeletike. Jutuk mu skotolikuk xmuyubaj noʼox chkoltavanik. Kʼalal chbat jvulaʼan junuk ermano o ermana ti yiktaoj sba ta mantale, ta jakʼbe kʼu yelan oy li yalab xnichʼnabik o yutsʼ yalaltake. Junantike chikʼik toʼox bal ta tsobajeletik li yalab xnichʼnabike xchiʼuk jaʼik toʼox van jcholmantaletik. Skʼan xichʼik koltael ek yoʼ sutik tal ta stojolal Jeova».
JKOLTATIK YOʼ SUTIK TAL TA STOJOLAL JEOVA
8. Li jun totil chal ta Lukas 15:17 kʼalal ta 24, ¿kʼu yelan laj yil skerem kʼalal la sutes yoʼontone?
8 ¿Kʼusi talelaletik skʼan oyuk kuʼuntik yoʼ jkoltatik li buchʼutik tskʼan tsutik tal ta stojolal Jeovae? Jkʼeltik kʼusi chakʼ jchantik li lokʼolkʼop ta sventa li chʼayemal kereme (kʼelo Lukas 15:17-24). Li Jesuse laj yal ti vul xchʼulel ta tsʼakal li kereme xchiʼuk la snop ti tsut batel ta snae. Li totile bat snup ta be ta anil li skereme xchiʼuk la smey sventa xakʼbe yil ti muʼyuk sjipoj ta yoʼontone. Ta skoj ti chopol tajek chaʼi sba li kereme, xi laj yalbe li stote: «Mu xa jta-o ti chapʼisun ta anichʼone». Li totile kʼuxubaj ta yoʼonton ti jech albat yuʼun li skereme xchiʼuk ti sutesoj yoʼontone. Laj yal mantal ti spasik mukʼta veʼel xchiʼuk ti xichʼbeik tal jlikuk natil kʼuʼil ti bu mas leke. Jamal xvinaj ti maʼuk la spʼis ta jun yaj-abtele, yuʼun jaʼo xnichʼon laj yil ti skʼanoj tajeke.
9. ¿Kʼu yelan skʼan xkakʼ ta ilel jtalelaltik yoʼ jkoltatik li buchʼutik yiktaoj sbaik ta mantale? (Kʼelo li rekuadro « ¿Kʼuxi xuʼ jkoltatik li buchʼutik tskʼan tsutik tale?»).
9 Li Jeovae jaʼ jech stalelal kʼuchaʼal li totil ta lokʼolkʼope. Skʼanoj li kermanotaktik ti yiktaoj sbaik ta mantale xchiʼuk oy ta yoʼonton ti sutik tal ta stojolale. Mi la jchanbetik stalelal li Jeovae, xuʼ xijkoltavan sventa sutik tal. Jaʼ yuʼun, skʼan oyuk smalael kuʼuntik, kaʼibetik smelolal kʼu yelan chaʼi sbaik xchiʼuk jnaʼuk xijkʼanvan. ¿Kʼu yuʼun skʼan jechuk jtalelaltik xchiʼuk kʼu yelan xuʼ xkakʼtik ta ilel?
10. ¿Kʼu yuʼun skʼan oyuk smalael kuʼuntik yoʼ jkoltatik li buchʼu yiktaoj sba ta mantale?
10 ¿Kʼu yuʼun skʼan oyuk smalael kuʼuntik? Yuʼun li buchʼu namajem ta stojolal Jeovae mu ta aniluk tstsatsub ta mantal. Ep ermanoetik ti yiktaoj toʼox sbaik ta mantale laj yalik ti ep ta velta ay vulaʼanatikuk yuʼun moletik xchiʼuk ermanoetik sventa sutik tal ta tsobobbaile. Xi laj yal jun ermana ta Asia ti Nancy sbie: «Oy jun kamiga ta tsobobbail ti la skoltaun tajeke. Skʼanojun tajek xchiʼuk xkoʼolaj kʼuchaʼal xvix laj yilun. La svulesbun ta jol li kʼusitik jmoj la jpaskutike. Oy smalael yuʼun kʼalal chkalbe ti kʼu yelan chkaʼi jbae xchiʼuk tstojobtasun. Ta melel, jaʼ jun jlekil amiga xchiʼuk skotol ora la skoltaun».
11. ¿Kʼu yuʼun skʼan xkaʼibetik smelolal kʼu yelan chaʼi sba li yantike?
11 Kʼalal chkaʼibetik smelolal kʼu yelan chaʼi sba li yantike, xkoʼolaj kʼuchaʼal poxil chaʼiik. Junantik ermanoetike laj yikta sbaik ta mantal ta skoj ti chopol kʼusi pasbatik yuʼun yan ermano xchiʼuk te-o snakʼoj skʼakʼal yoʼontonik. Jaʼ yuʼun, mu xa skʼan sutik tal ta stojolal Jeova. Yantike xuʼ van tsnopik ti muʼyuk tukʼ kʼusi pasbatike. Tskʼanik van ti oyuk buchʼu xchikintabatik ti kʼu yelan chaʼi sbaike xchiʼuk ti xaʼibeik smelolale (Sant. 1:19). Jun ermana ti María sbie xi chal kʼalal laj yikta sba ta mantal kʼuuk sjalile: «Ta jkʼan ti oyuk buchʼu xchikinta ti kʼu yelan chkaʼi jbae xchiʼuk ti oyuk buchʼu stoyun likele».
12. ¿Kʼuxi ti xkoʼolaj ta jlik chʼojon ti kʼu yelan skʼanojutik li Jeovae?
12 Li Vivliae chal ti xkoʼolaj ta jlik chʼojon ti kʼu yelan skʼanojutik li Jeovae. ¿Kʼuxi taje? Kalbetik junuk skʼelobil. Nopo noʼox ti lapʼaj yalel ta junuk natil chʼene. Mu xa kʼusi stakʼ xapas sventa xalokʼ talel. Jaʼ yuʼun, skʼan ti oyuk buchʼu sjipbot yalel jlikuk chʼojon xchiʼuk ti snitot lokʼele. Kʼalal namajik li j-israeletike, xi laj yal li Jeovae: «La jbeiltasik-o [...] ta xchʼojanaltak kʼanelal» (Os. 11:4). Li buchʼutik yiktaoj sbaik ta mantale xkoʼolaj ti pʼajemik yalel ta jun natil chʼene, yuʼun xlik xkaj noʼox li svokolike. Pe li Jeovae oy ta yoʼonton tsnit lokʼel yoʼ sutik tal ta stojolal xchiʼuk ti xakʼbe yil ti skʼanojan-oe. Jech xtok, xuʼ stunesutik yoʼ xakʼik venta ti kʼanbilik yuʼun li Jeovae.
13. ¿Kʼusi lek chkʼot ta pasel mi jnaʼ xijkʼanvane? Albo junuk skʼelobil.
13 Toj tsots skʼoplal ti xkakʼbetik yil ti kʼanbilik yuʼun Jeova xchiʼuk ti jkʼanojtik ek li buchʼutik yiktaoj sbaik ta mantale. Li Pablo ti laj kalbetik skʼoplal li ta xchanobil echʼe mas ta 30 jabil laj yikta sba ta mantal. Xi chal kaʼitike: «Jun velta kʼalal sob lilokʼ batel ta jnae, la jnup ta be jun ermana ti oy xa sjabilale, laj yakʼbun kil ti skʼanojune xchiʼuk ta slekil yoʼonton la skʼoponun. Solel li-okʼ tajek. Xi laj kalbee: ‹Jaʼ la stakot tal Jeova sventa xachiʼinun ta loʼil›. Te kʼot ta nopel kuʼun ti chisut ta stojolal li Jeovae».
JKʼUXUBINTIK LI BUCHʼU TSUT TALE
14. Li jchabichij chal ta Lukas 15:4 xchiʼuk 5, ¿kʼusi la spas kʼalal la sta li yuni chije?
14 Kʼalal tsutik tal ta stojolal Jeova li buchʼutik yiktaoj sbaik ta mantale, skʼan jechuk-o jkoltatik xchiʼuk jpatbetik yoʼontonik. Xuʼ van chopol tajek chaʼi sbaik jech kʼuchaʼal li chʼayemal kerem laj yalbe skʼoplal Jesuse. Jech xtok, xuʼ van kʼunibemik ta mantal ta skoj ti te toʼox oyik ta sbalumil Satanase. Skʼan jkoltatik yoʼ stsatsub yan velta li xchʼunel yoʼontonike. Li Jesuse laj yal ti kʼalal tsta yuni chij li jchabichije, tskajan batel ta snekeb xchiʼuk chikʼ sutel ti bu oy li yantike. Li jchabichij ta lokʼolkʼope la xchʼak skʼakʼal xchiʼuk laj yakʼ yipal sventa xbat saʼ tal li xchije. Pe ¿mi bal noʼox van? Moʼoj, yuʼun snaʼoj ti skʼan jechuk-o skolta ta skoj ti chʼabal yipal sventa xanav batele (kʼelo Lukas 15:4, 5).
15. ¿Kʼuxi xuʼ jkoltatik li buchʼutik tskʼan tsutik tal ta stojolal Jeovae? (Kʼelo li rekuadro « Jun lekil abtejebal»).
15 Sventa jkoltatik yoʼ stsatsubik ta mantal li buchʼutik namajemik ta stojolal Jeovae, skʼan van jchʼak jkʼakʼaltik xchiʼuk ti xkakʼ kipaltike (Rom. 15:1). Sventa spas kuʼuntike, chakʼbutik xchʼul espiritu li Jeovae, yakʼojbutik li Skʼope xchiʼuk slokʼesoj epal vunetik li s-organisasione. ¿Kʼuxi xuʼ jkoltatik? Xi chal jun mol ta tsobobbail ti ep kʼusi xchanoje: «Jutuk mu skotoluk li buchʼutik tsutik tal ta stojolal Jeovae skʼan xichʼik akʼbel estudio yan velta». * Mi laj yalbutik moletik ti xkakʼbetik estudio junuk ermano ti laj toʼox yikta sba ta mantale, ta sjunuluk koʼonton jchʼuntik. Xi to chal sloʼil li mol ta tsobobbaile: «Li buchʼu chakʼ estudioe skʼan xamigoin li ermano ti yiktaoj toʼox sba ta mantale xchiʼuk ti xakʼbe yil ti xuʼ spat yoʼonton ta stojolale».
CHAKʼ MUYUBAJEL KʼALAL OY BUCHʼU TSUT TALE
16. ¿Kʼuxi jnaʼojtik ti tskoltautik li anjeletike?
16 ¿Mi tskoltautik anjeletik yoʼ jtatik li buchʼutik tskʼan tsutik tal ta stojolal Jeovae? Tana, oy ep loʼiletik ti chakʼ ta ilel ti jaʼ jeche (Apok. 14:6). Kalbetik skʼoplal Silvio ti te nakal ta Ecuadore. Jun veltae, xi la skʼanbe vokol li Jeovae: «Koltaun sventa xisut ta atojolal». Kʼalal yakal toʼox tspas orasione, kʼot ta stiʼ sna chaʼvoʼ moletik. Vaʼun, ta sjunul yoʼonton lik skoltaik sventa sut tal ta stojolal Jeova.
17. ¿Kʼu yelan chkaʼi jbatik kʼalal oy buchʼu ta jkoltatik yoʼ sut tal ta stojolal Jeovae?
17 Ta melel, xijmuyubaj tajek kʼalal oy buchʼu ta jkoltatik yoʼ sut tal ta stojolal Jeovae. Jun prekursor ti Salvador sbie yakʼoj ta yoʼonton skoltael li buchʼutik yiktaoj sbaik ta mantale. Xi chale: «Kʼalal chkil ti tspoj lokʼel ta sbalumil Satanas jkotuk yuni chij li Jeovae xchiʼuk ti la jkolta jba ta saʼel eke, chtʼom-o kokʼel» (Ech. 20:35).
18. ¿Kʼusi skʼan teuk ta ajol mi namajemot ta stojolal Jeovae?
18 Mi namajemot ta stojolal Jeovae, naʼo me ti skʼanojot-o li Diose xchiʼuk oy ta yoʼonton ti xasut ta stojolale. Melel onoʼox ti oy kʼusitik skʼan xapase, pe teuk ta ajol liʼe: li Jeovae smalaoj ti xasut tal ta stojolale xchiʼuk ta sjunul yoʼonton chchʼamot jech kʼuchaʼal li totil ta lokʼolkʼope.
KʼEJOJ 103 Li moletike jaʼ matanal yakʼojan Jeova
^ par. 5 Li buchʼutik jal xa yiktaoj sbaik ta cholmantal xchiʼuk ti muʼyuk xa chkʼotik ta tsobajele xi ch-albatik yuʼun li Jeovae: «Sutanik tal ta jtojolal». Jkotoltik xuʼ jkolta jbatik yoʼ sutik tal ta stojolal Jeova li buchʼutik yiktaoj sbaik ta mantale. Li ta xchanobil liʼe, ta jkʼeltik kʼuxi xuʼ jkoltatik.
^ par. 7 Jelbil li jlom biiletike.
^ par. 15 Junantik ermanoetik ti laj toʼox yiktaik mantale xuʼ xkoltaatik mi la xchanik tuchʼkantik li livro Jkʼantik-o li Diose. Yantike xuʼ xchanik junantik kapitulo li ta livro Acerquémonos a Jehová. Li Komite sventa Abtelal ta Tsobobbaile jaʼ chal buchʼu xuʼ xakʼbe estudio li buchʼu laj toʼox yikta sba ta mantale.
^ par. 68 LI KʼUSI XVINAJ TA LOKʼOLE: Oxvoʼ ermano tskoltaik jun ermano ti tskʼan tsut tal ta stojolal Jeovae. Li june tskʼopon batel, li yane chakʼbe ta ilel ti kʼanbil-oe, li yan xtoke tsnop kʼu yelan chaʼi sba kʼalal chchiʼin ta loʼile.
