XCHANOBIL 25
«Voʼon chbat jsaʼ tal jtuk li jchijtake»
«Voʼon chbat jsaʼ tal jtuk li jchijtake xchiʼuk voʼon ta jchabiik» (ESEK. 34:11).
KʼEJOJ 105 «Jaʼ kʼanelal li Diose»
LI KʼUSI TA JCHANTIKE *
1. ¿Kʼu yuʼun la skoʼoltas sba kʼuchaʼal jun meʼil li Jeovae?
KʼALAL jaʼo kuxi li j-alkʼop Isaiase, xi laj yalbe steklumal li Jeovae: «Li jun antse, ¿mi xuʼ van xchʼay ta sjol li yol ti chchuʼun toe [...]? Akʼo mi oy antsetik ti jech chchʼay ta sjol li yolike, li voʼone mi jaʼuk onoʼox ta jchʼayot ta jol» (Is. 49:15). Akʼo mi mu masuk skoʼoltas sba kʼuchaʼal jun meʼil li Jeovae, pe avie jaʼ jech la spas. Sventa xakʼ ta ilel Jeova ti skʼanoj tajek li yajtuneltake, laj yalbe skʼoplal ti kʼu yelan xil sbaik jun meʼil xchiʼuk li yalabe. Jutuk mu skotoluk li meʼiletike jaʼ jech chaʼi sbaik kʼuchaʼal jun ermana ti Jasmín sbie: «Kʼalal chachuʼuntas li aneneʼe, muʼyuk chjel-o ti kʼu yelan chavil aba xchiʼuke».
2. ¿Kʼu yelan chaʼi sba Jeova kʼalal jun skerem o stseb chnamaj ta stojolale?
2 Li Jeovae chakʼ venta kʼalal muʼyuk xa chchol mantal xchiʼuk muʼyuk xa chkʼot ta tsobajel junuk skerem o stsebe. Ta melel, kʼux chaʼi Jeova kʼalal chil ti ta smilal noʼox yajtuneltak chikta sbaik ta mantal * jujun jabile.
3. ¿Kʼusi oy ta yoʼonton li Jeovae?
3 Ep ermanoetik tsutik tal li ta tsobobbaile xchiʼuk ta sjunul koʼontontik ta jchʼamtik. Li Jeovae oy ta yoʼonton ti sutik tale, jaʼ jech ta jkʼantik ek (1 Ped. 2:25). ¿Kʼuxi xuʼ xijkoltavan? Sventa jnaʼtike, baʼyel jkʼeltik kʼu yuʼun chikta sbaik ta tsobajel xchiʼuk ti muʼyuk xa chcholik mantale.
¿KʼU YUʼUN CHIKTA SBAIK TA MANTAL?
4. ¿Kʼusi chkʼot ta stojolal junantik ta skoj li yabtelike?
4 Junantike chbat tajek ta yoʼonton yabtelik. Jun ermano ta Asia ti Hung * sbie, xi chale: «Bat ta koʼonton li kabtele, yuʼun la jnop ti mas jun koʼonton chitun ta stojolal Jeova mi ep ta jpas kanale. Jech oxal, mas xa jal li-abtej xchiʼuk mas xa nopolik la jchʼay jba ta tsobajel. Ta tsʼakale, laj onoʼox kikta li tsobobbaile. Yileluke, li Satanase jaʼ tstunes li kʼusitik oy ta balumil sventa kʼunkʼun snamajes ta stojolal Dios li krixchanoetike».
5. ¿Kʼusi kʼot ta stojolal jun ermana ta skoj ti ep kʼusi la snuptane?
5 Junantik ermanoetike oy kʼusitik tsnuptanik ti tsvul-o yoʼontonike. Kalbetik skʼoplal jun ermana ta Gran Bretaña ti Anne sbie xchiʼuk ti oy voʼob yalabe. Xi chale: «Oy jun kol ti tsots onoʼox ip kʼalal vokʼe. Ta tsʼakale, lokʼ ta tsobobbail jun jtseb xchiʼuk tabat jtos chamel ta snopben jun jkerem. Ta skoj ti la jvul tajek koʼontone, laj kikta jba ta tsobajel, muʼyuk xa la jchol mantal, vaʼun laj kikta jba ta mantal». Kʼalal tsots chil svokol li kermanotaktik jech kʼuchaʼal li Anne xchiʼuk yutsʼ yalale, kʼux tajek chkaʼitik.
6. ¿Kʼusi xuʼ xkʼot ta pasel mi muʼyuk la jchʼuntik li kʼusi chal Kolosenses 3:13?
6 (Kʼelo Kolosenses 3:13). Junantik ermanoetike chopol chaʼi sbaik ta skoj ti oy kʼusi muʼyuk lek pasbatik yuʼun junuk ermanoe o ti muʼyuk tukʼ kʼusi laj yichʼik pasbele. Li jtakbol Pabloe laj yal ti oy onoʼox buchʼu tsaʼ smul ta jtojolaltik bakʼintike. Mi muʼyuk laj kichʼ jpʼijiltike, xuʼ van jnakʼ skʼakʼal koʼontontik xchiʼuk chijnamaj li ta steklumal Jeovae. Kalbetik skʼoplal jun ermano ta Sudamérica ti Pablo sbie. Ta skoj ti jutbat smule, chʼay li kʼusi sbainoj ta tsobobbaile. ¿Kʼusi la spas li Pabloe? Xi chale: «Kap tajek jol, vaʼun ta kʼunkʼun laj kikta komel li tsobobbaile».
7. ¿Kʼusi xuʼ xkʼot ta jtojolaltik mi oy-o jmul chkaʼi jbatike?
7 Li buchʼutik tsots spasoj smulik ta voʼne eke xuʼ van tsnopik ti muʼyuk akʼbilik-o ta pertone xchiʼuk ti mu staik-o ti xkʼanatik yuʼun li Jeovae. Akʼo mi la sutes yoʼontonik xchiʼuk laj yichʼik kʼuxubinel, xuʼ van tsnopik ti mu staik-o ti te oyik ta slumal Jeovae. Jaʼ jech laj yaʼi sba jun ermano ti Francisco sbie. Xi chale: «Laj kichʼ akʼbel tsatsal mantal ta skoj ti limulivaje. Muʼyuk toʼox laj kikta jba li ta tsobajeletike, pe lik jvul koʼonton xchiʼuk la jnop ti mu jta-o ti te oyun ta slumal Jeovae. Chopol tajek chkaʼi jba xchiʼuk jpʼel ta koʼonton ti muʼyuk yakʼojun ta perton li Diose. Ta tsʼakale, muʼyuk xa la jchol mantal xchiʼuk laj kikta li tsobajeletike». ¿Kʼu yelan chkiltik li ermanoetik ti jaʼ jech tsnuptan svokolik kʼuchaʼal laj xa kaltik tale? ¿Mi xkaʼibetik smelolal ti kʼu yelan chaʼi sbaike? Jech xtok, ¿kʼu yelan ch-ilatik yuʼun li Jeovae?
SKʼANOJ TAJEK XCHIJTAK LI JEOVAE
Li jchabichijetik ta voʼnee chat tajek yoʼontonik kʼalal chchʼay jkotuk xchijike (Kʼelo parafo 8, 9). *
8. ¿Mi chchʼay ta sjol Jeova li buchʼutik tunik toʼox ta stojolale? Albo smelolal.
8 ¿Mi chchʼay ta sjol Jeova li buchʼutik tunik toʼox ta stojolale? Muʼyuk, mi jaʼuk chchʼay ta sjol li yabtelike akʼo mi namajemik li avie (Ebr. 6:10). Sventa xal kʼu yelan chchabi xchiʼuk skʼanoj steklumal li Jeovae, li j-alkʼop Isaiase laj yal jun kʼupil sba skoʼoltasobil: «Xkoʼolaj kʼuchaʼal jun jchabichij ta xchabi li xchijtake. Ta stsob batel li neneʼ chijetike xchiʼuk te chakʼ batel ta stiʼ yoʼonton» (Is. 40:11). ¿Kʼu yelan chaʼi sba Jeova kʼalal chlokʼ batel ta skoral jkotuk xchije? Sventa xkaʼitike, xi laj yalbe yajchankʼoptak li Jesuse: «¿Kʼu xachiik? Mi oy jun vinik ti oy sien ta kot xchije, pe ti chʼay jkote, ¿mi mu teuk van chikta ta vitstik li 99 ta kot sventa chbat saʼ tal li jkot ti chʼayeme? Vaʼun, mi la stae, ta melel chkalboxuk avaʼiik ti mas to xkuxet yoʼonton ta stojolal li jkot taje, jaʼ mu sta jech ta stojolal li 99 ta kot ti muʼyuk bu xchʼaye» (Mat. 18:12, 13).
9. ¿Kʼu yelan tskʼel xchijtak li jun lekil jchabichije? (Kʼelo li lokʼol ta pajina 1).
9 Li Jeovae xkoʼolaj kʼuchaʼal li jchabichijetike, ¿kʼu yuʼun? Yuʼun li jun lekil jchabichije oy tajek ta yoʼonton li yuni chijtake. Kalbetik junuk skʼelobil. Li Davide la smil jkot leon xchiʼuk jkot oso sventa xchabi li yuni chijtake (1 Sam. 17:34, 35). Li jun lekil jchabichije chakʼ venta kʼalal chchʼay jkotuk xchije (Juan 10:3, 14). Kʼalal chbat saʼ talel li jkot chʼayeme, chikta komel ta skoral li 99 ta kote o tskʼubanbe komel yan jchabichij. Li Jesuse oy kʼusi tsots skʼoplal laj yakʼ ta chanel kʼalal laj yal li skoʼoltasobil taje, xi laj yale: «Muʼyuk lek chaʼi Jtot ta vinajel ek ti xlaj junuk li buchʼutik liʼ oy ti bikʼit chakʼ sbaike» (Mat. 18:14).
Jun jchabichij ta Israel tskʼel chchabi jkot yuni chij ti chʼayem toʼoxe (kʼelo li parafo 9).
LI JEOVAE TSAʼ LI XCHIJTAKE
10. Jech kʼuchaʼal chal Esekiel 34:11 kʼalal ta 16, ¿kʼusi tspas Jeova ta stojolal li xchijtak ti chʼayeme?
10 Skʼanojutik tajek ta jujuntal li Jeovae, skʼanoj ek li buchʼutik bikʼit yakʼoj sbaik ti namajemik ta stojolale. Li Jeovae jamal laj yal ta stojolal j-alkʼop Esekiel ti chbat saʼ tal li xchijtak ti chʼayemike xchiʼuk ti tskolta yoʼ lekuk xil sbaik yan veltae. Laj yal xtok kʼusitik tspas yoʼ xbat saʼ tale. Jaʼ jech tspas kʼuchaʼal jun jchabichij ta Israel kʼalal chchʼay jkot xchije (kʼelo Esekiel 34:11-16). Baʼyel, li jun jchabichije chbat saʼ tal li xchije akʼo mi jal chichʼ yuʼun xchiʼuk chakʼ yipal. Mi la sta une, chikʼ batel xchiʼuk li yan xchijtake. Jech xtok, mi yayijem la sta li xchije o mi chviʼnaje, ta slekil yoʼonton chakʼbe li kʼusi chtun yuʼune, chpixbe li syayijemale, tspet batel xchiʼuk tsmakʼlin. Li moletike xkoʼolajik «kʼuchaʼal jchabichij ti chachabibeik li xchijtak [Diose]», jaʼ yuʼun skʼan jechuk spasik ek kʼalal tskoltaik li buchʼutik yiktaoj sbaik ta mantale (1 Ped. 5:2, 3). Jaʼ chbat saʼvanikuk tal li moletike, tskoltaik yoʼ sutik tal ta tsobobbail xchiʼuk tskoltaik ta mantal yoʼ xilik ti kʼanbilike. *
11. ¿Kʼusi snaʼoj li jun lekil jchabichije?
11 Li jun lekil jchabichije snaʼoj onoʼox ti xuʼ xchʼay li xchijtake. Kʼalal jech chkʼot ta pasele, muʼyuk chkap sjol ta stojolal li xchije. Jkʼeltik kʼusi la spas Jeova k’alal namajik ta stojolal junantik yajtuneltak ta voʼnee.
12. Li Jeovae, ¿kʼusi la snop ta stojolal li Jonase?
12 Li j-alkʼop Jonase jatav batel kʼalal oy kʼusi akʼbat sbain yuʼun li Jeovae. Akʼo mi jech, muʼyuk pʼajat yuʼun li Diose. Jech la spas kʼuchaʼal jun lekil jchabichij li Jeovae, la skolta xchiʼuk laj yakʼbe yipal sventa spas yuʼun li kʼusi laj yakʼbe sbaine (Jon. 2:7; 3:1, 2). Jech xtok, sventa xakʼbe yil ti ep sbalil xkuxlejal li jujun krixchanoe, la stunes jpets tsu (Jon. 4:10, 11). ¿Kʼusi chakʼ jchantik? Li moletike skʼan mu snopik ti muʼyuk xa tsutik tal li buchʼutik yiktaoj sbaik ta mantale. Skʼan xakʼ yipalik ta yaʼibel smelolal kʼu yuʼun ti laj yiktaik li tsobobbaile. Kʼalal mi sutik tal ta stojolal Jeova li ermanoetik taje, skʼan jech-o xakʼbeik ta ilel ti oy ta yoʼontonike xchiʼuk ti skʼanojike.
13. ¿Kʼusi chakʼ jchantik ta stojolal Jeova ta sventa ti kʼu yelan laj yil li jtsʼibajom yuʼun Salmo 73?
13 Li jtsʼibajom yuʼun Salmo 73 chibaj-o kʼalal laj yil ti lek noʼox xkuxlejal yilel li chopol krixchanoetike. Lik snop ti muʼyuk sbalil ti chtun ta stojolal Diose (Sal. 73:12, 13, 16). ¿Kʼusi la snop li Jeovae? Muʼyuk chopol laj yil. Yuʼun laj yakʼ ti teuk tsʼibabil xkom ta Vivlia li kʼusi laj yale. Ta tsʼakale, li jtsʼibajom yuʼun salmoe laj yaʼibe smelolal ti jaʼ noʼox xuʼ xijmuyubaj-o mi chkamigointik li Jeovae (Sal. 73:23, 24, 26, 28). ¿Kʼusi chakʼ jchantik? Li moletike skʼan mu chopoluk kʼusi snopik ta anil ta stojolal junuk ermano mi chlik yal ti muʼyuk sbalil ti chijtun ta stojolal Jeovae. Li kʼusi skʼan spasike jaʼ ti skʼan xaʼibeik smelolal kʼu yuʼun jech chal xchiʼuk ti kʼu yuʼun jech chaʼi sbae. Vaʼun, xuʼ stunesik Vivlia sventa spatbeik yoʼonton.
14. ¿Kʼu yuʼun tskʼan koltael li Eliase, xchiʼuk kʼu yelan koltaat yuʼun li Jeovae?
14 Li j-alkʼop Eliase jatav ta stojolal li meʼ ajvalil Jesabele (1 Rey. 19:1-3). La snop ti muʼyuk xa yan yaj-alkʼoptak Jeova xchiʼuk ti muʼyuk sbalil li kʼusitik yakal tspase. Ta skoj ti laj yat tajek yoʼontone, «la skʼan ti akʼo chamuke» (1 Rey. 19:4, 10). Li Jeovae muʼyuk chopol laj yil li Eliase. Jamal laj yalbe ti mu stukuk oye, ti ch-akʼbat yipale xchiʼuk ti ep to kʼusitik skʼan spase. Ta slekil yoʼonton la xchikintabe Elias kʼalal laj yal li kʼusi tsvul-o yoʼontone xchiʼuk oy to kʼusitik yan laj yakʼbe sbain (1 Rey. 19:11-16, 18). ¿Kʼusi chakʼ jchantik? Jkotoltik skʼan xkakʼ ta ilel slekil koʼontontik ta stojolal li xchijtak Jeovae, mas to skʼan jech spasik li moletike. Mi oy buchʼu tsotsik xa chkʼopoj o mi tsnop ti muʼyuk akʼbil-o ta perton yuʼun li Jeovae, li moletike skʼan me xchikintaik kʼalal chkʼopoje. Vaʼun, tsvulesbeik ta sjol ti kʼanbil tajek yuʼun li Jeovae.
¿KʼU YELAN SKʼAN XKILTIK LI CHIJETIK TI CHʼAYEMIKE?
15. Jech kʼuchaʼal chal Juan 6:39, ¿kʼu yelan laj yilbe xchijtak Stot li Jesuse?
15 Li Jeovae ep sbalil chil li xchijtak ti chʼayeme, tskʼan ti jechuk xkiltik eke. Jaʼ jech laj yakʼ ta ilel li Jesuse, yuʼun la skolta «li chʼayemal chijetik ta jteklum [Israel]» sventa sutik tal ta stojolal li Jeovae (Mat. 15:24; Luk. 19:9, 10). Jech xtok, ta skoj ti jaʼ jun lekil jchabichije, laj yakʼ yipal sventa mu xchʼay jkotuk li xchijtak Stote (kʼelo Juan 6:39).
16, 17. Li moletike, ¿kʼu yelan skʼan xilik kʼalal tskoltaik li buchʼutik yiktaoj sbaik ta mantale? (Kʼelo li rekuadro « ¿Kʼu van yelan chaʼi sba li jkot chʼayemal chije?»).
16 Li jtakbol Pabloe laj yalbe moletik ta tsobobbail ta Efeso ti skʼan xchanbeik stalelal li Jesuse. Xi laj yale: «Kʼalal cha-abtejike, jaʼ jech xuʼ xakoltaik li buchʼutik kʼunike. Jech xtok, skʼan teuk ta ajolik li kʼusi xi laj yal stuk li Kajvaltik Jesuse: ‹Jaʼ mas xmuyubaj li buchʼu chakʼe, jaʼ mu sta li buchʼu chichʼe›» (Ech. 20:17, 35). Jamal xvinaj ti tsots kʼusi sbainojik li moletike. Xi chal jun mol ta tsobobbail ta España ti Salvador sbie: «Kʼalal ta jnopbe skʼoplal kʼu to yepal skʼanoj Jeova li xchijtak ti chʼayemike, jaʼ tstijbun koʼonton sventa jkoltaan. Jnaʼoj ta melel ti oy ta yoʼonton Jeova ti jchabibe li yuni chijtake».
17 Li buchʼutik yiktaoj sbaik ta mantal ti laj kalbetik skʼoplal li ta xchanobil liʼe laj yichʼik koltael xchiʼuk sutik tal ta stojolal Jeova. Li avi eke, ep buchʼutik tskʼan chchaʼsutik tal. Li ta yan xchanobile, ta jkʼeltik kʼuxi xuʼ xijkoltavan sventa sutik tal ta stojolal Jeova.
KʼEJOJ 139 Jun kʼupil sba achʼ balumil
^ par. 5 ¿Kʼu yuʼun chiktaik tsobobbail junantik ermanoetik ti jal xa tunemik tal ta stojolal Jeovae? ¿Kʼu yelan ch-ilatik yuʼun li Jeovae? Jaʼ ta jkʼelbetik skʼoplal li ta xchanobil liʼe. Ta jkʼeltik xtok kʼuxi xuʼ jchanbetik Jeova ta sventa ti kʼu yelan la skolta junantik yajtuneltak ta voʼne kʼalal namajik ta stojolale.
^ par. 2 LIʼE TSOTS SKʼOPLAL: ¿Kʼusi skʼan xal ti chikta sba ta mantal jun jcholmantale? Jaʼo kʼalal vakib xa ox u o mas muʼyuk chchol mantal o chakʼ estudioe. Akʼo mi jech, jaʼik-o kermanotik xchiʼuk jech-o jkʼanojtik.
^ par. 4 Jelbil li jlom biiletike.
^ par. 10 Li ta yan xchanobile, ta jkʼeltik kʼuxi xuʼ spas moletik li oxtos taje.
^ par. 60 LI KʼUSI XVINAJ TA LOKʼOLE: Jun jchabichij ta Israel chbat saʼ talel li xchij ti chʼayeme sventa xikʼ batel xchiʼuk li yan xchijtake. Taje jaʼ jech tspasik li moletik avi eke.
^ par. 64 LI KʼUSI XVINAJ TA LOKʼOLE: Jun ermana ti yiktaoj sba ta mantal ti te oy ta yut autovuse yakal tskʼel lokʼel chaʼvoʼ ermanoetik ti xmuyubaj noʼox chcholik mantal ta karritoe.
