Tsots skʼoplal chil Jeova ti «jechuk» xijchie
LI Jeovae toj tsots skʼoplal chil ti kʼu yelan ch-ichʼat ta mukʼ yuʼun li yajtuneltake. Jech oxal, akʼo mi mu toj yan xa sba ti kʼu yelan ch-ichʼat ta mukʼe, li stuke tstsʼet chikinta xchiʼuk yakʼoj lek venta kʼusi tspas li yajtuneltake (Mal. 3:16). Jnopbetik skʼoplal liʼe: ¿Jayib velta kalojtik li jpʼel kʼop «jechuk» xie? Yikʼaluk ep ta velta, pe ¿mi tstsak ta venta Jeova kʼalal chkaltik li jpʼel kʼop taje? Tana. Yoʼ xkiltik kʼu yuʼun tsots skʼoplal chile, jkʼeltik batel kʼusi skʼan xal xchiʼuk kʼu yelan tunesbil li ta Vivliae.
«‹JECHUC›, ACʼO XIICUC SCOTOL LI JCHIʼILTACTIQUE»
Li jpʼel kʼop ta español ti amén xie jaʼ skʼan xal «jechuk» o «ta melel». Jaʼ jpʼel kʼop ta Evreo ti jaʼ skʼan xal «tukʼ chkakʼ jbatik» o ti xuʼ «spat yoʼontonik ta jtojolaltike». Bakʼintike, jaʼ jech chalik ek kʼalal oy kʼusi chchapanik ta stojolal j-abteletike. Kalbetik junuk skʼelobil, kʼalal oy kʼusi chal ta jamal junuk krixchanoe, persa skʼan xal «jechuc» sventa xakʼ ta ilel ti melel li kʼusi laj yale xchiʼuk snaʼoj ti xuʼ sta-o svokol mi mu meleluk kʼopoje (Núm. 5:22). Kʼalal «jechuc» xi ta yeloval epal krixchanoetike, mas to oy srasonal sventa spas li kʼusi laj yale (Neh. 5:13).
Jun skʼelobil ti bu jamal laj yichʼ tunesel li jpʼel kʼop jechuk xie, jaʼ li ta kapitulo 27 ta slivroal Deuteronomioe. Kʼalal kʼotik xa ox ta Albil Balumil li j-israeletike, te la stsob sbaik ta yoʼlolil vits Ebal xchiʼuk li vits Guerisim sventa xchikintaik li Mantal ch-akʼbatike xchiʼuk ti jamaluk xalik ti chchʼunike. Jujukoj kʼalal ch-albatik kʼusi tsnuptanik mi mu xchʼunik mantale, xi tsots tstakʼike: «Jechuc», xiik (Deut. 27:15-26). ¿Mi xnop avuʼun kʼu to stsatsal xkaʼitik kʼalal jmoj tstakʼik li krixchanoetik ti ta smilal te tsobolike? (Jos. 8:30-35). Laj onoʼox spasik li kʼusi laj yalik vaʼ orae, yuʼun xi jamal ch-albat skʼoplalik li ta Vivliae: «Li israeletique jaʼ noʼox itunic o yuʼun Mucʼul Dios ti cʼalal cuxul li Josuee xchiʼuc ti cʼalal cuxulic ec li moletic ti laj yilic li Josuee, xchiʼuc ti laj yilic scotol cʼusi la spas Mucʼul Dios ta stojolique» (Jos. 24:31).
Li Jesus eke la stunes li jpʼel kʼop «jechuk» sventa xakʼ ta aʼiel ti melel li kʼusi chale, jaʼ noʼoxe, jelel jutuk kʼuxi la stunes. Li stuke jaʼo la stunes kʼalal mu to kʼusi chlik yale, maʼuk kʼalal oy xa ox kʼusi yaloje, taje jaʼ sventa xakʼ ta aʼiel ti melel li kʼusi chale. Bateltike chib to velta snitoj sba chal li jpʼel kʼop «jechuke», ti xi chichʼ jelubtasele: «ta melel» (Mat. 5:18; Juan 1:51). Kʼalal jech chale jaʼ svinajeb ti melel skotol li kʼusi chale. Ta sjunul yoʼonton chal yuʼun snaʼoj ti jaʼ akʼbil ta skʼob yoʼ xkʼot ta pasel li kʼusi yaloj li Jeovae (2 Kor. 1:20; Apok. 3:14).
«‹JECHUC›, XIIC. JECH ICHʼBIL TA MUCʼ ICʼOT LI MUCʼUL DIOSE»
Li j-israeletik eke «jechuc» xiik kʼalal tsmuyubtaik li Jeovae o kʼalal tspasik orasione (Neh. 8:6; Sal. 41:13). Jech oxal, sventa xakʼik ta ilel ti lek chaʼiik li kʼusi chichʼ alel ta junuk orasione, skʼan «jechuc» xiik ek kʼalal mi tsutse. Ti jech tspasike jaʼ chakʼ ti masuk to kʼupiluk sba xjelav li stsobajelike. Jaʼ jech kʼot ta pasel kʼalal laj yichʼ batel ta Jerusalen li xkaxail smantal Dios li Davide, la spasik jun kʼin xchiʼuk la skʼejintaik jun kʼejoj ti xkoʼolaj ta jun orasion ti jaʼ la spas li Davide (1 Crón. 16:8-36). Li kʼusi la skʼejintaike toj kʼotel ta yoʼonton li j-israeletike, vaʼun xi laj yal skotolike: «‹Jechuc›, xiic. Jech ichʼbil ta mucʼ icʼot li Mucʼul Diose». Kʼalal jech komon laj yalike, jaʼ laj yakʼ ti masuk to xmuyubajike.
Jaʼ jechtik la spasik li yajtsʼaklomtak Kristo ta baʼyel sigloe, yuʼun «jechuk» xiik ek kʼalal jaʼo chichʼik ta mukʼ li Jeovae. Junantik jtsʼibajometik ta Vivliae ep ta velta la stunesik li jpʼel kʼop «jechuk» kʼalal la stsʼibaik li skartaike (Rom. 1:25; 16:27; 1 Ped. 4:11). Li ta slivroal Apokalipsis eke chalbe skʼoplal junantik anjeletik ti yakal chichʼik ta mukʼ Jeova te ta vinajele, xi chalike: «¡Jechuk! ¡Kʼupil kʼoptaik li Jae!» (Apok. 19:1, 4). Li yajtsʼaklomtak Kristo ta baʼyel sigloe «jechuk» xiik ek kʼalal chlaj yoʼontonik spasel orasion ta junuk tsobajele (1 Kor. 14:16). Pe mu stakʼ jech xalik ta skoj ti nopem noʼox xaʼiike.
¿KʼU YUʼUN TSOTS SKʼOPLAL TI «JECHUK» XIJCHIE?
Jech kʼuchaʼal laj xa jkʼeltike, tsots skʼoplal ti «jechuk» xijchie. Kʼalal jech ta jtsutses li j-orasiontike, jaʼ svinajeb ti melel li kʼusi laj kaltike. Jech xtok, kʼalal oy buchʼu tspas orasion xchiʼuk mi «jechuk» xijchie, jaʼ svinajeb ti lek laj kaʼitik li kʼusi laj yichʼ alele akʼo mi kʼun o tsots chkaltik. Jkʼeltik to batel yan srasonal kʼu yuʼun tsots skʼoplal ti «jechuk» xijchie.
Jaʼ svinajeb ti lek tsʼetel jchikintik xchiʼuk ti chkichʼtik ta mukʼ li Diose. Kʼalal «jechuk» xijchie maʼuk noʼox jech chkichʼtik ta mukʼ li Jeovae, yuʼun skʼan xkichʼ jmeloltik xtok kʼalal yakal chichʼ pasel li orasione. Kʼalal lek tsʼetel jchikintik xchiʼuk lek ta jpas jtalelaltike, xuʼ ta sjunul koʼontontik chkaltik «jechuk».
Chakʼ ti jmoj tsobolutike. Kʼalal oy buchʼu tspas orasion ta tsobobbaile, jkotoltik koʼol ta jchikintatik li kʼusi chichʼ alele (Ech. 1:14; 12:5). Jech oxal, kʼalal «jechuk» xijchi jkotoltike, jaʼ chakʼ ti jmojuk tsobolutike. Mu ventauk mi kʼun o mi tsots ti jech chkaltike, li Jeovae chaʼi kʼusi ta jkʼan jkotoltik xchiʼuk jaʼ mas chtijbat-o yoʼonton yoʼ xakʼbutike.
Kʼalal «jechuk» xijchie, chkichʼtik-o ta mukʼ li Jeovae.
Chkichʼtik-o ta mukʼ li Jeovae. Akʼo mi mu epuk kʼusi spas kuʼuntik yoʼ xkichʼtik ta mukʼ li Jeovae, li stuke stsakoj lek ta venta (Luk. 21:2, 3). Li Jeovae xil kʼusi oy ta koʼontontik. Jaʼ yuʼun, mu ventauk mi ta telefono ta jchikintatik li tsobajeletike, li Jeovae tstsak lek ta venta kʼalal «jechuk» xijchie, yuʼun jmoj yakal chkichʼtik ta mukʼ xchiʼuk li tsobobbaile.
Kʼuchaʼal laj xa kiltike, tsots skʼoplal ti «jechuk» xijchie akʼo mi mu toj tsotsuk skʼoplal chkiltik li voʼotike. Li livro Perspicacia chal ti kʼalal «jechuk» xijchie, chkakʼtik ta aʼiel ti «jpatoj koʼontontike, ti lek chkaʼitik li kʼusi laj yichʼ alele xchiʼuk ti oy kʼusi jmalaojtike». Jech oxal, kʼalal jech chkaltike yakal ta jmuyubtabetik yoʼonton li Jeovae (Sal. 19:14).
