STALEL onoʼox ti oy ta koʼontontik ti xkichʼtik ojtikinel kʼuchaʼal jun lekil krixchano o ti tukʼ kʼusi jnaʼ jpastike, pe taje mu kʼunuk ta pasel li avi kʼakʼale. Yuʼun li yan krixchanoetike «muʼyuk skʼanojik li kʼusi leke» (2 Tim. 3:3). Jech xtok, jaʼ tspasik li kʼusitik tskʼan yoʼonton stukike, tsnopik ti lek li kʼusi chopole xchiʼuk ti jaʼ chopol li kʼusi leke (Is. 5:20). Ta skoj ti jpasmulilutik jkotoltike xchiʼuk ti jeltos kʼusi jelavem ta jkuxlejaltike, xuʼ van jech ta jnoptik kʼuchaʼal jun ermana ti jal xa tunem talel ta stojolal li Jeovae, xi chale: «Vokol tajek chkaʼi xchʼunel ti jaʼun jun lekil krixchanoe».

Jkotoltik xuʼ jchʼiestik li slekil koʼontontik xchiʼuk ti jkʼupintike, yuʼun jaʼ yabtel li chʼul espiritue xchiʼuk jaʼ mas tsots yip ti jaʼ xkom to li jvokoltike o li kʼusi yakal ta jtsaltike. Jkʼeltik batel kʼusi smelolal li slekil oʼontonale xchiʼuk kʼu yelan xuʼ xkakʼtik iluk li ta jkuxlejaltike.

Ta jpʼel chaʼpʼel noʼoxe, li slekil oʼontonale jaʼ jtos stalelal jun lekil krixchano ti muʼyuk chopole xchiʼuk ti tukʼ yoʼontone. Li krixchano ti oy slekil yoʼontone tskʼel kʼuxi chut sventa skolta li yantike o ti oyuk kʼusi lek spas ta stojolalike.

¿Mi mu jechuk ti oy krixchanoetik ti jpʼel ta yoʼontonik spasel kʼusitik lek ta stojolal yutsʼ yalalik xchiʼuk li yamigoike? Jech, pe ta sat Jeovae oy to yan kʼusitik skʼan spas li jun lekil krixchanoe. Li Vivliae jamal chakʼ iluk ti mu onoʼox spas kuʼuntik ti lek xa tajek chkakʼtik ta ilel li talelal taje, yuʼun xi jamal chale: «Ta melel muʼyuc bochʼo liʼ ta banamil ti batsʼi ven tuqʼue ti me jutuc mu sta smule» (Ecl. 7:20). Xi jamal laj yal li jtakbol Pablo eke: «Yuʼun jnaʼoj ti ta jtojolale, jaʼ xkaltik, li ta jbekʼtale, chʼabal kʼusi lek oy» (Rom. 7:18). Jech oxal chaʼa, mi ta jkʼantik chvinaj ta jkuxlejaltik li talelal taje, skʼan jchanbetik lek skʼoplal li Jeovae, yuʼun jaʼ sniʼoal li slekil oʼontonale.

Jaʼ noʼox Jeova xuʼ xal li kʼusi leke. Xi laj yal jun jtsʼibajom yuʼun salmoe: «Li voʼote toj lecot, xchiʼuc toj lec cʼusitic chapas; chanubtasun lec ta xchʼunel li amantale» (Sal. 119:68). Jkʼeltik batel chaʼtos kʼu yelan chakʼ ta ilel slekil yoʼonton Jeova ti te vinaj li ta teksto liʼe.

Toj lek yoʼonton. Li Jeovae jaʼ jech-o stalelal ti oy slekil yoʼontone. Jkʼeltik kʼusi kʼot ta pasel kʼalal xi laj yalbe li Moisese: «Xuʼ ta xcacʼbot avil scotol cʼu xʼelan slequil coʼnton». Li Jeovae laj yakʼbe yil Moises li smukʼulal xchiʼuk li slekil yoʼontone, vaʼun laj yaʼi oy buchʼu kʼoponat tal li Moises ti xi chale: «Vuʼun Mucʼul Diosun. Vuʼun Mucʼul Diosun. Jcʼuxubinvanejun, toj lec coʼnton, muc ta aniluc chiʼilin; toj ep cʼuxubinel cuʼun, xchiʼuc melel cʼusi chcal. Cʼux ta coʼnton epal mil cristianoetic; ta jchʼaybe ta coʼnton li smulique, li stoyobbailique, li xchopolilique. Pero mu teuc noʼox jqʼueloj li bochʼo ta saʼilan smule; ta persa chcacʼbe stoj» (Éx. 33:19; 34:6, 7). Jamal xvinaj ti xuʼ te xkilbetik slekil yoʼonton Jeova li ta yan stalelaltake. Jech xtok, kʼalal tal ta balumil li Jesuse jaʼ noʼox stuk lek laj yakʼ  ta ilel li slekil oʼontonale, pe xi jamal laj yal xtoke: «Muʼyuk onoʼox buchʼu lek, jaʼ noʼox jun, jaʼ li Diose» (Luk. 18:19).

Lek kʼusitik tspas. Li slekil yoʼonton Jeovae jaʼ te chvinaj li ta kʼusitik tspase. Xi chal li Vivliae: «Li Mucʼul Diose toj lec yoʼnton ta stojol scotol; toj cʼux ta yoʼnton scotol li yabtele» (Sal. 145:9). Li Jeovae mu snaʼ xtʼujvan, chakʼbe xkuxlejal li krixchanoetike xchiʼuk parejo chakʼbe li kʼusi chtun yuʼunike, jamal xvinaj ti oy slekil yoʼontone (Ech. 14:17). Maʼuk noʼox, yuʼun chakʼutik ta perton. Xi laj yal jun jtsʼibajom yuʼun salmoe: «Ti voʼot une, Cajval, oy yutsil slequil avoʼnton, ta xachʼay ti mulil coloʼile» (Sal. 86:5 Ch). Xi jamal yaloj Jeova ti tspat koʼontontike: «Li bochʼotic tucʼ yoʼntonique muʼyuc chjalanbatic o li cʼusitic leque» (Sal. 84:11).

Jkotoltik xuʼ kuʼuntik spasel li kʼusitik lek xchiʼuk ti oyuk slekil koʼontontike, yuʼun jaʼ slokʼolutik li Jeovae (Gén. 1:27). Xi chkichʼtik albel ta Vivlia li yajtunelutik Jeovae: «Jaʼ chanic spasel li cʼusitic leque» (Is. 1:17). Jkʼeltik oxtos kʼusitik xuʼ skoltautik yoʼ oyuk slekil koʼontontike.

Baʼyel, skʼan jpastik orasion sventa jkʼanbetik xchʼul espiritu Jeova yuʼun jaʼ tskoltautik yoʼ lekuk xilutike (Gal. 5:22). Li xchʼul espiritu Jeovae jaʼ tskoltautik sventa jkʼantik li kʼusi leke xchiʼuk ti jpʼajtik li kʼusitik chopole (Rom. 12:9). Li Vivliae jamal chal ti xuʼ skoltautik Jeova sventa lekuk skotol li kʼusi jpastike xchiʼuk li kʼusi chkaltike (2 Tes. 2:16, 17).

Xchibal, skʼan jchantik li Skʼop Jeova ti jaʼ yakʼoj ta naʼele, vaʼun jaʼ jech chakʼbutik ta ilel «scotol cʼusi lec ta pasel» xchiʼuk chchapanutik sventa xijtojob ta «spasel skotol li lekil abtelale» (Prov. 2:9; 2 Tim. 3:17). Kʼalal ta jchantik li Skʼope xchiʼuk mi ta jnopbetik skʼoplale, ep kʼusi ta jchantik ta stojolal li Jeovae xchiʼuk ta jnaʼtik li kʼusi oy ta yoʼontone. Mi jech ta jpastike, xkoʼolaj ti ta jtsob jkʼulejaltik ti xuʼ jtunestik kʼalal jaʼo chtun kuʼuntike (Luk. 6:45; Efes. 5:9).

Yoxibal, skʼan xkakʼ kipaltik yoʼ jchantik «spasel li kʼusi leke» (3 Juan 11). Li Jeova xchiʼuk Jesuse jaʼik li buchʼutik xuʼ jchanbetik li slekil yoʼontonike, pe li ta Vivliae xuʼ jtatik ep skʼelobil sventa slekil oʼontonal ti xuʼ jchantik eke. Xuʼ van chtal ta joltik li kʼusi la spasik li Tabita xchiʼuk li Bernabee (Ech. 9:36; 11:22-24). ¿Kʼu yuʼun mu jkʼeltik kʼusi chal Vivlia ta stojolalik o ti kʼuxi la skoltaik li yantike? Jkʼeltik xtok kʼusi bendision la staik ti jech la spasike. Li voʼotik eke jnopbetik skʼoplal kʼuxi xuʼ jkoltatik junuk ermano o kutsʼ kalaltik, vaʼun xuʼ jtatik bendision ek mi jech ta jpastike.

¿Kʼuchaʼal mu jnopbetik skʼoplal xtok li buchʼutik chakʼik ta ilel slekil yoʼontonik jech  kʼuchaʼal li moletik ta tsobobbaile? Li stukike tsots ch-abtejik xchiʼuk skʼanojik li kʼusi leke. Jaʼ jech tspasik ek li baxbol ermanaetike, yuʼun chakʼik ta ilel ta yabtelik xchiʼuk ta skʼopojelik ti jaʼik ‹jchanubtasvanejetik ta sventa li kʼusi leke› (Tito 1:8; 2:3). Xi chal jun ermana ti Roslyn sbie: «Oy jun kamiga ti yakʼoj tajek ta yoʼonton skoltael xchiʼuk stsatsubtasel li ermanoetik ta tsobobbaile. Tskʼel kʼu yelan oyik xchiʼuk nopem xaʼi ti oy kʼusi xakʼbee o tskʼel kʼuxi xuʼ skoltaanan. Toj lek yoʼonton chkil».

Xi chalbe Jeova li yajtuneltake: «Jaʼ xasaʼic li cʼusitic leque» (Amós 5:14). Kʼalal jech ta jpastike, maʼuk noʼox chlik jkʼantik li smantaltak Jeovae, moʼoj, yuʼun tstsʼun ta koʼontontik spasel li kʼusi lek chile.

Pe mu jnoptik xtok ti labalik xa sba kʼusi skʼan jpastik yoʼ xvinaj ti oy slekil koʼontontike. Xi jkoʼoltastike: kʼalal ta jtsʼuntik jtekʼuk teʼe, mu baluk noʼox ti jun velta jpulbetik voʼ yoʼ xchʼie, moʼoj, yuʼun skʼan jmaltatik ep ta velta. Jaʼ jech li voʼotik eke, sventa xvinaj ti oy slekil koʼontontike, xuʼ ep ta velta oy kʼusi jpastik ta stojolal yantik akʼo mi juteb noʼox.

Li Vivliae chal ti skʼan lek chapalutik sventa jpastik li kʼusitik leke (2 Tim. 2:21; Tito 3:1). Jech oxal, mi te jsatik ti kʼu yelan oy li kermanotaktike, chkakʼtik venta kʼuxi xuʼ jkoltatik «sventa slekilalik xchiʼuk sventa jtsatsubtasbetik yoʼontonik» (Rom. 15:2). Taje xuʼ van te smakoj ti xkakʼbetik li kʼusi x-ayan kuʼuntike (Prov. 3:27). Jech xtok, xuʼ oy buchʼu xkikʼtik ta veʼel ta jnatik o xkikʼtik tal sventa jpatbe jba koʼontontike. ¿Kʼusi xuʼ jpastik mi jnaʼojtik ti oy buchʼu ipe? Xuʼ oy kʼusi jtsʼibabetik batel o jtakbetik junuk mensaje, bat jvulaʼantik o jkʼopontik batel. Ta melel, mu albajuk yepal kʼuxi xuʼ xkaltik «li kʼusi lek ti tstsatsubtasvan kʼalal jech chtune, sventa stabe sbalil [...] li buchʼu chchikintae» (Efes. 4:29).

Sventa lekuk kʼusi jpasbetik yantik jech kʼuchaʼal tspas li Jeovae, skʼan mu xijtʼujvan. Jtos ti kʼuxi xuʼ xkakʼtik ta ilele jaʼ ti xkalbetik krixchanoetik ta sventa li Ajvalilal yuʼun Diose. Akʼo mi oy buchʼutik tspʼajutik, chkakʼtik persa ti lekuk kʼusi jpasbetik jech kʼuchaʼal laj yal li Jesuse (Luk. 6:27). Kʼalal oy slekil koʼontontik xchiʼuk lek jtalelaltike, jaʼ me li kʼusi mas lek xuʼ jpastike, yuʼun «chʼabal mantal ti tskontrain li kʼusitik taje» (Gal. 5:22, 23). Akʼo mi xkichʼtik kontrainel o mi oy jvokoltik, pe mi muʼyuk ta jyoch jbatik ta spasel li kʼusi leke, xuʼ van jkoltatik yan krixchanoetik sventa xlik yojtikinik li mantale xchiʼuk ti xichʼ ichʼel ta mukʼ li Jdiostike (1 Ped. 3:16, 17).

Xi chal li Vivliae: «Li bochʼo lec cʼusi tspase ta onoʼox xil lequilal yuʼun li yabtelique» (Prov. 14:14). ¿Kʼusitik sbalil ta jtabetik? Jaʼ ti xuʼ van chichʼutik ta mukʼ li krixchanoetike (Prov. 14:22). Akʼo mi mu jechuk tspasik, pe mi jech-o chkakʼbetik ta ilel slekil koʼontontike xuʼ xjel stalelalik xchiʼuk xuʼ van stsakutik ta venta (Rom. 12:20).

Ep buchʼu xuʼ xal kʼusi sbalil staoj ti yiktaojik spasel li kʼusitik chopole, xi chal sloʼil li Nansie: «Kʼalal yantik xichʼi tale, mu jventa-o kʼusi ta jpas, mu jnaʼ xi ichʼvan ta mukʼ xchiʼuk lik mulivajkun. Pe kʼalal laj kojtikin li smantaltak Jeovae xchiʼuk ti lik jkuxlebine, jaʼ to te lik muyubajkun, oy xa jbalil chkaʼi jba xchiʼuk lik kichʼ jba ta kʼux».

Li Jeovae xmuyubaj tajek kuʼuntik kʼalal oy slekil koʼontontike, taje jaʼ srasonal sventa xkakʼbetik yipal ti oyuk kuʼuntik li talelal taje. Li yantike xuʼ van mu stsakik ta venta li kʼusi ta jpastike, pe jaʼuk li Jeovae, skʼeloj lek. Yiloj lek kʼusi ta jpastik xchiʼuk li kʼusi ta jnoptike (Efes. 6:7, 8). Oy sbalil mi jech ta jpastike, yuʼun xi chal li Vivliae: «Li bochʼo leque ta sta coltael yuʼun li Mucʼul Diose» (Prov. 12:2). Jech oxal, kakʼbetik yipal yoʼ xkakʼtik ta ilel slekil koʼontontik, xi jamal tspat koʼontontik li Jeovae: «Skotol li buchʼutik jaʼ tspasik li kʼusi leke, tstaik mukʼulal, ichʼel ta mukʼ xchiʼuk jun oʼontonal» (Rom. 2:10).