XCHANOBIL 10
¿Kʼusi xuʼ stij avoʼonton sventa xavichʼ voʼ?
«¿Kʼusi tsmakun sventa xkichʼ voʼ?» (ECH. 8:36).
KʼEJOJ 37 Sjunul koʼnton chitun ta atojol, Jeova
LI KʼUSI TA JCHANTIKE *
1, 2. Jech kʼuchaʼal chal Echos 8:27-31 xchiʼuk 35 kʼalal ta 38, ¿kʼusi tijbat-o yoʼonton li j-etiopia vinik sventa xichʼ voʼe?
¿MI OY ta avoʼonton chavichʼ voʼ xchiʼuk ti xakʼot ta yajtsʼaklom Kristoe? Ep buchʼutik jech spasojik ta skoj ti skʼanojik Jeova xchiʼuk ti tskʼan tstojbeik ta vokole. Kalbetik skʼoplal «jun vinik ti yichʼoj tsots yabtel ta stojolal Kandase ti jaʼ meʼ ajvalil ta Etiopiae».
2 Kʼalal laj yakʼ venta j-etiopia vinik ti chal Tsʼibetik ti skʼan xichʼ voʼe, ta anil noʼox jech la spas (kʼelo Echos 8:27-31, 35-38). Pe ¿kʼusi van tijbat-o yoʼonton? Jaʼ ti tsots skʼoplal chil li Skʼop Diose, yuʼun kʼalal kajal batel ta skaretae, chchan batel li slivroal Isaiase. Vaʼun, kʼalal albat yuʼun Felipe ti oy kʼusi tsots skʼoplal la spas Jesus ta stojolale, ayan ta yoʼonton ti stoj ta vokole. Jech xtok, xuʼ xkaltik ti skʼanoj xa onoʼox li Jeovae, yuʼun li Vivliae chal ti ay yichʼ ta mukʼ Dios li ta Jerusalene. Taje jaʼ skʼan xal ti yiktaoj xa ox li yan srelijione xchiʼuk ti te xa ox skʼoplal li ta steklumal Diose. Ta skoj ti skʼanoj xa onoʼox li Jeovae, jaʼ tijbat-o yoʼonton sventa xichʼ voʼ xchiʼuk ti xkʼot ta yajtsʼaklom Kristoe (Mat. 28:19).
3. ¿Kʼusi xuʼ xmakat ta be li buchʼu tskʼan chichʼ voʼe? (Kʼelo li rekuadro « ¿Kʼu yelan li avoʼontone?»).
3 Mi akʼanoj li Jeovae, xuʼ jaʼ stij avoʼonton sventa xavichʼ voʼ. Pe xuʼ oy kʼusitik smakot ta be sventa mu jechuk xapase. Kalbetik skʼoplal junchibuk. Xuʼ van akʼanoj tajek li avutsʼ avalal xchiʼuk avamigotak ti maʼuk yajtuneltak Diose, jaʼ yuʼun chavul avoʼonton mi sjipoxuk ta yoʼonton mi laj avichʼ voʼe (Mat. 10:37). Jech xtok, oy van kʼusitik nopem xavaʼi spasel ti muʼyuk lek chil Diose xchiʼuk ti vokol tajek chavaʼi yiktaele (Sal. 97:10). Maʼuk noʼox, yuʼun lek van chavil li kʼinetik ti te nitil skʼoplal ta jecheʼ relijion ti ta abikʼtal onoʼox nopem xavaʼi spasele. Ta skoj taje, vokol tajek chavaʼi yiktael akʼo mi anaʼoj ti chopol chil li Jeovae (1 Kor. 10:20, 21). Pe tsots skʼoplal ti xanopbe skʼoplal liʼe: «¿Buchʼu o kʼusi ti mas jkʼanoje?».
¿BUCHʼU AKʼANOJ TA SJUNUL AVOʼONTON?
4. ¿Kʼusi skʼan stij avoʼonton sventa xavichʼ voʼe?
4 Kʼalal lik avichʼ estudioe, xuʼ van tsots xa onoʼox skʼoplal chavil li Vivliae, akʼanoj xa onoʼox li Jesuse xchiʼuk oy to van yan kʼusitik ti ep sbalil chavile o ti akʼanojane. Jech xtok, avi ti xavojtikin xa li stestigotak Jeovae, lek van chavaʼi ti xachiʼinan ta loʼile. Pe ¿mi bal noʼox taje? Moʼoj, yuʼun li kʼusi mas tstij avoʼonton yoʼ xkʼot ta nopel avuʼun ti xavakʼbe akuxlejal Jeova xchiʼuk ti xavichʼ voʼe jaʼ mi akʼanoj tajeke. Muʼyuk chavakʼ kʼusi smakot ta be yoʼ xatun-o batel ta stojolal ti mi jaʼ oy tajek ta avoʼonton li Jeovae. Kʼalal akʼanoj tajeke, maʼuk noʼox tstij avoʼonton yoʼ xavichʼ voʼ, yuʼun tskoltaot xtok yoʼ tukʼ-o xatun batel ta stojolale.
5. ¿Kʼusitik ta jkʼeltik batel li ta xchanobil liʼe?
5 Xi laj yal jun velta li Jesuse: «Skʼan xakʼan ta sjunul avoʼonton li Jeova Dios avuʼune, ta sjunul akuxlejal, ta sjunul anopben xchiʼuk ta sjunul avipal» (Mar. 12:30). ¿Kʼusi skʼan xapas sventa jechuk xakʼan Jeova xchiʼuk xavichʼ ta mukʼ jech kʼuchaʼal laj yal li Jesuse? Jaʼ mi la anopbe skʼoplal ti kʼu yepal skʼanojutike (1 Juan 4:19). Li ta xchanobil li’e, ta jkʼeltik batel kʼusitik xuʼ xapas sventa xakʼan li Jeovae xchiʼuk ti xavichʼ voʼe. *
6. ¿Kʼuxi xuʼ xavojtikin Jeova jech kʼuchaʼal chal Romanos 1:20?
6 Xuʼ xavojtikin Jeova mi la anopbe skʼoplal li spasbentake (kʼelo Romanos 1:20; Apok. 4:11). Mi la achotan aba ta skʼelel kʼu yelan meltsanbil li teʼetik xchiʼuk chonbolometike, te chavakʼ venta ti toj echʼ xa noʼox spʼijil li Jeovae. Sabo skʼoplal xtok ti kʼu yelan labal sba pasbilutike (Sal. 139:14). Xchiʼuk nopbo skʼoplal liʼe: «¿Kʼu van yepal yip o xkʼixnal laj yakʼbe kʼakʼal li Jeovae?». Teuk ta ajol ti ta smiyonal xa noʼox kʼanaletik oy li ta vinajele (Is. 40:26). * Mi jech chapase, mas to chlik avichʼ ta mukʼ li Jeovae. Pe taje jaʼ noʼox uni jtoschaʼtos ti kʼuxi xuʼ xanopaj ta stojolale, yuʼun skʼan to xavojtikin mas sventa xakʼan ta sjunul avoʼontone.
7. ¿Kʼusi skʼan xachʼun ta melel yoʼ xakʼan ta sjunul avoʼonton li Jeovae?
7 Toj tsots me skʼoplal ti xachʼun ta melel ti oyot ta yoʼonton li Jeovae. Pe xuʼ van xi chavale: «¿Mi yilojun ta melel li buchʼu la spas vinajel balumile xchiʼuk mi oy jbalil chilun?». Mi jaʼ jech chavaʼi abae, teuk ta ajol ti «muʼyuk onoʼox bu nom oy ta jtojolaltik ta jujuntal» li Jeovae (Ech. 17:26-28). Li David eke xi laj yalbe li skerem Salomone: «Li Jeovae jaʼ chchaj ta kʼelel li koʼontontike». Jech oxal, jamal yaloj ti «chakʼ sba ta saʼel» «mi chasaʼe» (1 Kron. 28:9). Mi yakal xa chachan li Vivliae, jaʼ ta skoj ti laj yikʼot tal stuk li Jeovae (Jer. 31:3). Mas to me chlik akʼan mi laj avaʼibe smelolal li kʼusitik spasoj ta atojolale.
8. ¿Kʼuxi xuʼ xatojbe ta vokol Jeova ti skʼanojote?
8 Jtos ti kʼuxi xuʼ xatojbe ta vokol ti skʼanojot li Jeovae jaʼ mi chakʼopone. Mas to me chlik akʼan mi chachapbe skotol li sloʼil avoʼontone xchiʼuk mi chatojbe ta vokol li kʼusitik spasoj ta atojolale. Jech xtok, chkʼot ta avamigo kʼalal chavil ti tstakʼbot li a-orasione (Sal. 116:1). Yuʼun chavakʼ venta ti xaʼibe smelolal ti kʼu yelan chavaʼi abae. Pe oy to me yan kʼusi skʼan xapas sventa masuk to xanopaj ta stojolal li Diose: skʼan xavaʼibe smelolal li kʼusi tsnope xchiʼuk li kʼusi tskʼan ti akʼo xapase. Sventa spas avuʼune, skʼan xachanbe li Skʼope.
Kʼalal ta jchantik li Vivliae, mas to chijnopaj ta stojolal Jeova xchiʼuk te chkiltik li kʼusi tskʼan akʼo jpastike. (Kʼelo parafo 9). *
9. ¿Kʼuxi xuʼ xavakʼ ta ilel ti tsots skʼoplal chavil li Vivliae?
9 Tsotsuk tajek skʼoplal xavil li Skʼop Diose. Jaʼ noʼox xuʼ te xata ta Vivlia li kʼusi melel chal ta sventa Jeova xchiʼuk li kʼusi oy ta yoʼonton ti akʼo xapase. Pe ¿kʼuxi xuʼ xavakʼ ta ilel ti tsots skʼoplal chavile? Jaʼ mi chachan jujun kʼakʼale, mi chachapan aba jujukoj kʼalal chavichʼ a-estudioe xchiʼuk mi chavakʼ ta akuxlejal li kʼusi chachane (Sal. 119:97, 99; Juan 17:17). ¿Mi oy yorail avuʼun sventa xachan jujun kʼakʼal li Avivliae xchiʼuk mi chatsak ta venta?
10. ¿Kʼusi toj labal sba yichʼoj tal li Skʼop Diose?
10 Jtos li kʼusi toj labal sba yichʼoj li Skʼop Diose jaʼ ti chalbe skʼoplal li kʼusi la sloʼiltaik junantik krixchanoetik ti laj yil ta sat stukik li Jesuse. Jech xtok, muʼyuk yan livro ti lek xchapet chalbe skʼoplal li kʼusi la spas ta atojolal li Jesuse. Mi la achanbe skʼoplal li kʼusitik la spas xchiʼuk laj yale, chakʼan xa chavamigoin avaʼi.
11. ¿Kʼusi xuʼ skoltaot sventa masuk to xakʼan li Jeovae?
11 Mi akʼanoj li Jesuse, mas to chlik akʼan li Jeovae. ¿Kʼu yuʼun ti jech chkaltike? Yuʼun li Jesuse jaʼ jech stalelal kʼuchaʼal li Stote (Juan 14:9). Nopbo skʼoplal liʼe: li Jesuse kʼuxubaj ta yoʼonton li krixchanoetik ti muʼyuk tsakbilik ta venta ta skoj ti povreike, ti ipike xchiʼuk ti kʼunik noʼoxe. Jech xtok, chakʼbot lekil tojobtaseletik ti xuʼ xatabe sbalil mi laj avakʼ ta akuxlejale (Mat. 5:1-11; 7:24-27). Jaʼ yuʼun, mi laj avojtikin lek li Jesuse, mas to chanopaj ta stojolal li Jeovae xchiʼuk mas to chlik akʼan.
12. ¿Kʼusi xuʼ stijbot avoʼonton spasel mi laj avojtikin lek li Jesuse?
12 Mi la anopbe skʼoplal li kʼusi la spas ta atojolal Jesus yoʼ xata perton ta skoj li amultake, mas to van chlik akʼan-o (Mat. 20:28). Jech xtok, mi laj avakʼ venta ti ta sjunul yoʼonton laj yakʼ xkuxlejal ta atojolale, xuʼ van stij avoʼonton sventa xasutes avoʼonton xchiʼuk ti xakʼanbe perton li Jeovae (Ech. 3:19, 20; 1 Juan 1:9). Vaʼun, mi mas to lik akʼan li Jeova xchiʼuk Jesuse, jaʼ xa mas lek chavaʼi ti xachiʼin li buchʼutik jech chaʼi sbaik eke.
13. ¿Kʼusi yakʼojbot li Jeovae?
13 Kʼano li yutsʼ yalal Jeovae. Li avutsʼ avalal xchiʼuk avamigotak ti maʼuk stestigotak Jeovae xuʼ van mu xaʼibeik smelolal kʼu yuʼun ti chakʼan chavakʼbe akuxlejal li Jeovae. Maʼuk noʼox, yuʼun xuʼ van xlik skontrainoxuk-o. Pe mu xavul avoʼonton, yuʼun li Jeovae chakʼbot yan avutsʼ avalal. Mi nopol oyot ta stojolal li yutsʼ yalal Jeovae, ta skoltaoxuk xchiʼuk tskʼanoxuk (Mar. 10:29, 30; Ebr. 10:24, 25). Xuʼ van ta mas tsʼakale, chlik tunikuk ta stojolal Jeova li avutsʼ avalal eke xchiʼuk chchʼunbeik li smantale (1 Ped. 2:12).
14. Jech kʼuchaʼal chal 1 Juan 5:3, ¿kʼu yelan avilojbe li smantaltak Jeovae?
14 Tsotsuk skʼoplal xavil li smantaltak Diose xchiʼuk akʼo ta akuxlejal. Kʼalal mu toʼox xavojtikin li Jeovae, xuʼ van jaʼ chapas li kʼusi tskʼan avoʼontone. Pe avie, aviloj ta akuxlejal ti mas to toj lek mi chachʼunbe li smantaltake (Sal. 1:1-3; kʼelo 1 Juan 5:3). Nopbo skʼoplal li tojobtaseletik ch-akʼbatik yuʼun Vivlia li malaliletik, ajnilaletik, totil meʼiletik xchiʼuk li alab nichʼnabiletike (Efes. 5:22–6:4). ¿Mi mas xa xmuyubaj avutsʼ avalal ta skoj ti avakʼoj ta akuxlejal li beiltaseletik taje? ¿Mi mas xa lek kʼusitik chapas ta skoj ti chatʼuj lek li avamigotake? ¿Mi mas xa xamuyubaj? (Prov. 13:20; 1 Kor. 15:33). Xuʼ van «¡jech!», xachi.
15. ¿Kʼusi xuʼ xapas mi mu xanaʼ kʼuxi chavakʼ ta akuxlejal li beiltaseletik ta Vivliae?
15 Bakʼintike, xuʼ van mu xanaʼ kʼuxi chavakʼ ta akuxlejal li beiltaseletik ta Vivliae. Pe tskoltaot li Jeovae, yuʼun tstunes s-organisasion sventa xakʼ avil ta vunetik «li kʼusi tukʼe xchiʼuk li kʼusi muʼyuk tukʼe» (Ebr. 5:13, 14). Mi la achan lek li vunetik taje, chavakʼ venta ti toj jtunelike xchiʼuk ti xuʼ skoltaote. Vaʼun, tstij van avoʼonton yoʼ xatal li ta steklumal Jeovae.
16. ¿Kʼu yelan xchapanoj steklumal li Jeovae?
16 Ojtikino lek li s-organisasion Jeovae xchiʼuk ichʼo ta mukʼ li kʼusi xchapanoje. Toj lek xchapanoj steklumal li Jeovae, yuʼun yakʼoj tsobobbailetik xchiʼuk svaʼanoj kʼuchaʼal «jolil ta stojolal tsobobbail» li Xnichʼone (Efes. 1:22; 5:23). Li Jesus eke svaʼanoj uni jtsop viniketik ti tʼujbil chbatik ta vinajel sventa jaʼuk xchapanik li abtelal ti oy ta yoʼonton ti akʼo xichʼ pasel avie. Li ermanoetik taje laj yichʼik biiltasel yuʼun Jesus kʼuchaʼal «tukʼil xchiʼuk pʼijil mosoil». Xchiʼuk chakʼik persa spasel li kʼusi sbainojike, jaʼ xkaltik, tsmakʼlinoxuk ta mantal xchiʼuk tskoltaoxuk yoʼ lekuk-o xavil aba xchiʼuk li Jeovae (Mat. 24:45-47). ¿Kʼuxi yakal chchabiot li tukʼil xchiʼuk pʼijil mosoile? Jtose jaʼ ti svaʼanojik lekil jchabichijetik li ta tsobobbailetike (Is. 32:1, 2; Ebr. 13:17; 1 Ped. 5:2, 3). Li jchabichijetik taje tspas ti bu kʼalal xuʼ yuʼunik sventa skoltaoxuk, spatik avoʼonton xchiʼuk ti masuk to xanopaj ta stojolal li Jeovae. Pe oy to kʼusi xuʼ spasik ta atojolal ti mas to tsots skʼoplale: chakʼ avil kʼuxi xuʼ xachanubtas yantik ta sventa li Jeovae (Efes. 4:11-13).
17. Jech kʼuchaʼal chal Romanos 10:10, 13 xchiʼuk 14, ¿kʼu yuʼun skʼan jchanubtastik yantik ta sventa li Diose?
17 Koltao yantik sventa xlik skʼanik li Jeovae. Li Jesuse laj yalbe mantal yajchankʼoptak ti skʼan xchanubtasik yantik ta sventa li Diose (Mat. 28:19, 20). Xuʼ van jech ta jpastik ta skoj ti persa jech skʼan pasele. Pe mi lik akʼan mas li Jeovae, jech chavaʼi aba kʼuchaʼal li jtakbol Pedro xchiʼuk Juan ti xi laj yalike: «Mu xuʼ xkikta jbakutik ta yalel li kʼusi kilojkutik xchiʼuk li kʼusi kaʼiojkutike» (Ech. 4:20). Ta melel, xijmuyubaj tajek kʼalal oy buchʼu ta jkoltatik sventa xlik skʼan li Jeovae. Nopo noʼox avaʼi kʼu yelan xkuxet yoʼonton Felipe kʼalal la skolta li j-etiopia vinik yoʼ xojtikin kʼusi chal ta melel li Tsʼibetike xchiʼuk kʼalal laj yichʼ voʼe. Mi jaʼ jech la apas kʼuchaʼal li Felipee xchiʼuk mi lik achol mantale, jaʼ me jech chavakʼ ta ilel ti chakʼan chakʼot ta stestigo Jeovae (kʼelo Romanos 10:10, 13, 14). Vaʼun, xuʼ van xi chajakʼbe aba eke: «¿Kʼusi tsmakun sventa xkichʼ voʼ?» (Ech. 8:36).
18. ¿Kʼusi ta jkʼelbetik skʼoplal li ta yan xchanobile?
18 Mi kʼot ta nopel avuʼun ti chavichʼ voʼe, jaʼ me li kʼusi mas tsots skʼoplal chapas ta akuxlejale. Ta skoj taje, skʼan me xanopbe lek skʼoplal kʼusi smakoj li ichʼvoʼe. ¿Kʼusi skʼan xanabe skʼoplal ta sventa li ichʼvoʼe? Xchiʼuk ¿kʼusi skʼan xapas kʼalal skʼan to xavichʼ voʼ xchiʼuk kʼalal avichʼoj xa oxe? Jaʼ ta jkʼelbetik skʼoplal li ta yan xchanobile.
KʼEJOJ 2 Jeova li abie
^ par. 5 Junantike mu xkʼot ta nopel yuʼunik mi chichʼik voʼ xchiʼuk ti xkʼotik ta yajtunel Jeova akʼo mi skʼanojik li Diose. Mi jaʼ jech chavaʼi aba eke, li xchanobil liʼe chalbe skʼoplal junantik li kʼusi xuʼ xapas sventa xavichʼ voʼe.
^ par. 5 Jelelutik ta jujuntal, jech oxal xuʼ van jelajtik kʼu yelan chlik jpastik li kʼusi xcholet chalbe skʼoplal li xchanobil liʼe.
^ par. 6 Xuʼ xasabe mas skʼelobiltak li ta jpajinatik jw.org o ta JW Library ti bu chal: «¿Mi oy van buchʼu la spas?».
^ par. 61 LI KʼUSI XVINAJ TA LOKʼOLE: Jun ermana ti yakal chmanolaje chakʼbe jlik tratado jun tseb.
