1. ¿Kʼusi yakʼoj jnop jtuktik li Jeovae?

LI Jeovae chakʼ jnop jtuktik li kʼusi ta jkʼan ta jpas ta jkuxlejaltike. Akʼo mi jech, baʼyel xa onoʼox chchanubtasutik yoʼ lekuk kʼusi jpastik xchiʼuk tskoltautik mi lek bat ta nopel kuʼuntike (Sal. 119:173). Pe ¿kʼusi skʼan jpastik yoʼ lekuk kʼusi chkʼot ta nopel kuʼuntike? Jaʼ ti xkakʼ ta jkuxlejaltik li pʼijil tojobtaseletik ta jtatik ta Vivliae (Evr. 5:14).

2. ¿Kʼusi van vokol chkaʼitik spasel kʼalal jnopojtik xa ox li kʼusi ta jpastike?

² Xuʼ van vokol chkaʼitik bateltik xtok stsutsesel li kʼusi la jlikestik spasel akʼo mi lek bat ta nopel kuʼuntik. Kalbetik junchibuk skʼelobil. Jun kereme tsnop chchan Svivlia. Tstambe xchanel, pe ta junchib noʼox xemanae, chikta sba xchanel. Jun ermana xtoke tsnop ch-och ta prekursora, pe muʼyuk bu tslikes ta skoj ti te noʼox xnopnun-oe. Li moletik ta tsobobbail eke xuʼ van chchap skʼopik yoʼ mas nopolikuk noʼox xbat svulaʼanik li ermanoetike. Chjelav kʼuk sjalil, pe mi junuk buchʼu la svulaʼanik. Akʼo mi jelajtik kʼusi kʼot ta nopel yuʼunik li buchʼutik laj xa kalbetik tal skʼoplale, pe mi junuk buchʼu pas yuʼun. Jaʼtik jech kʼot ta stojolalik ek li yajtsʼaklomtak Kristo ta Korintoe. Jkʼeltik batel kʼusi chakʼ jchantik li kʼusi kʼot ta stojolalike.

3. ¿Kʼusi kʼot ta nopel yuʼun li jkorintoetike, xchiʼuk kʼusi kʼot ta pasel?

³ Li ta sjabilaltik 55 kʼalal talem xa ox Jesuse, li ermanoetik ta Jerusalen xchiʼuk ta Judeae laj yil tajek svokolik ta takʼin. Jaʼ yuʼun, li yan tsobobbailetike la xchap skʼopik ti tskoltaik ta takʼine. Jaʼ jech lokʼ ta yoʼontonik ek li tsobobbail ta Korintoe, yuʼun laj yakʼ li kʼusitik x-ayan yuʼunik ta skoj ti oy slekil yoʼontonike.  Laj yichʼbeik ye jtakbol Pablo ti kʼuxi xuʼ skolta sbaike, vaʼun albatik mantaletik xchiʼuk la svaʼan Tito sventa jaʼuk xkoltavan ta stsobel li takʼine (1 Kor. 16:1; 2 Kor. 8:6). Pe ¿mi kʼot onoʼox ta pasel yuʼunik li kʼusi la snopike? Muʼyuk, yuʼun kʼalal echʼ xa ox jayibuk ue, laj yaʼi Pablo ti muʼyuk bu stsobojik-oe xchiʼuk ti mu xa van stsob yuʼunik ta anil kʼalal mi bat yichʼ akʼel ta Jerusalen li takʼine (2 Kor. 9:4, 5).

4. Jech kʼuchaʼal chal ta 2 Korintios 8:7, 10 xchiʼuk 11, ¿kʼusi albatik yuʼun Pablo ti akʼo spasik li jkorintoetike?

⁴ Toj lek li kʼusi kʼotem xa ox ta nopel yuʼunik li jkorintoetike, jaʼ yuʼun kʼupil kʼoptaatik yuʼun Pablo ta skoj ti lek tsots xchʼunel yoʼontonike xchiʼuk ti muʼyuk tsjalanik li kʼusitik x-ayan yuʼunike. Pe xi to albatike: «Akʼo ta avoʼontonik stsutsesel xtok li kʼusi la alikesik ta sventa li kʼusitik chatsobike» (kʼelo 2 Korintios 8:7, 10, 11). ¿Kʼusi chakʼ jchantik li kʼusi kʼot ta stojolalike? Jaʼ ti jkotoltik xuʼ vokol chkaʼitik spasel li kʼusi chkʼot ta nopel kuʼuntike akʼo mi lek yakal chijtun ta stojolal Jeova.

5. ¿Kʼusitik ta jtakʼtik batel li ta xchanobil liʼe?

⁵ Xuʼ van vokol chkaʼitik spasel ek li kʼusi chkʼot ta nopel kuʼuntik jech kʼuchaʼal kʼot ta stojolal li jkorintoetike. ¿Kʼu yuʼun? Yuʼun maʼuk tukʼil krixchanoutik xchiʼuk xuʼ van muʼyuk chlik jpastik noʼox li kʼusi kalojtike. Bateltik xtoke, jaʼ van ta skoj ti oy kʼusitik ta jnuptantik ti muʼyuk jmalaojtik jech chkʼot ta pasele (Ecl. 9:11; Rom. 7:18). Pe ¿kʼusi xuʼ jpastik yoʼ lekuk kʼusi xkʼot ta nopel kuʼuntike? ¿Kʼuxi xuʼ xkakʼtik venta mi lek li kʼusi kʼotem ta nopel kuʼuntike o mi skʼan van jeltik? Xchiʼuk ¿kʼusi xuʼ skoltautik sventa jtsutsestik li kʼusi la jlikestik spasele? Jaʼ ta jtakʼtik batel li ta xchanobil liʼe.

6. ¿Kʼu yuʼun van oy bateltik skʼan jeltik li kʼusi kʼotem xa ta nopel kuʼuntike?

⁶ Oy kʼusitik tsotsik skʼoplal ti kʼotem ta nopel kuʼuntik ti mu stakʼ jsutes koʼontontike. Jech kʼuchaʼal liʼe, muʼyuk chkikta jbatik ta yichʼel ta mukʼ li Jeovae xchiʼuk jpʼel ta koʼontontik ti muʼyuk ta jmukul satitik li jnup jchiʼiltike (Mat. 16:24; 19:6). Pe bateltike, oy van yan kʼusitik kʼotem xa ta nopel kuʼuntik ti skʼan jeltik ta skoj ti oy kʼusitik chjel ta jkuxlejaltike. Jaʼ yuʼun, ¿kʼusi xuʼ skoltautik yoʼ lekuk kʼusi xkʼot ta nopel kuʼuntike?

7. ¿Kʼusi skʼan jkʼanbetik li Jeovae, xchi’uk k’u yuʼun?

⁷ Jkʼanbe jpʼijiltik li Jeovae. Xi albat yuʼun Jeova ti akʼo stsʼiba komel li jchankʼop Santiagoe: «Mi oy junuk avuʼunik ti skʼan to spʼijile, akʼo skʼanilanbe Dios, yuʼun tskʼupin yakʼel» (Sant. 1:5). Jkotoltik onoʼox ti ta jkʼan ti oyuk jpʼijiltik kʼalal oy kʼusi ta jpastike. Jaʼ yuʼun, kalbetik Jeova ti akʼo skoltautik ta snopel lek li kʼusi ta jpastike o ti xkakʼtik venta mi lek li kʼusi kʼot xa ta nopel kuʼuntike. Mi jech ta jpastike, ta me skoltautik li Jeovae.

8. ¿Kʼusi skʼan jpastik kʼalal oy kʼusi ta jnop ta jpastike?

⁸ Jsabetik lek skʼoplal. Jkʼeltik lek li kʼusi chal Skʼop Diose, jchantik li vunetik slokʼesoj j-organisasiontike xchiʼuk jakʼbetik yaʼyej junuk ermano (Prov. 20:18). Toj tsots skʼoplal ti jech jpastik kʼalal ta jnop ta jel kabteltike, ti chijbat ta naklej ta yan lume o kʼalal chlik jkʼeltik kʼusi ta jchantik yoʼ xijkuxi-oe xchiʼuk ti jech-o xijtun ta stojolal Diose.

9. ¿Kʼusi lek ta jtatik mi ta jkʼeltik kʼu yuʼun ti jech ta jnop ta jpastike?

⁹ Jkʼeltik lek ti kʼu yuʼun jech ta jpastike. Li Jeovae chchaj ta kʼelel kʼu yelan li yut koʼontontike. Jaʼ yuʼun, kʼalal oy kʼusi ta jnop ta jpastike, tsots skʼoplal chil ti kʼu yuʼun jech ta jpastike (1 Sam. 16:7). Ta me jtabetik slekil mi ta jkʼeltik lek kʼu yuʼun ti jech kʼot ta nopel kuʼuntike, yuʼun jaʼ te chkakʼtik-o venta li kʼusi oy ta koʼontontike. ¿Mi ta melel lokʼ ta koʼontontik spasel o mi muʼyuk? Yuʼun mi mu jechuke, vokol xa me chkaʼitik stsutsesel li kʼusi la jlikestike. Jnopbetik skʼoplal liʼe: jun kerem chlik tunuk ta  prekursor regular. Pe mu ta sjaliluke, mu xa stsʼaki yuʼun li yorae, vaʼun muʼyuk xa tskʼupin li cholmantale. Laj van snop ti jaʼ sventa tsmuyubtabe yoʼonton Jeova ti jech lik tunuk ta tsʼakal orae. Pe ¿mi jech van ta melel? ¿O mi yuʼun jaʼ noʼox tskʼan tsmuyubtabe yoʼonton stot smeʼ o yan buchʼu?

10. ¿Kʼusi tskoltautik kʼalal oy kʼusi ta jkʼan ta jel ta jkuxlejaltike?

¹⁰ Kalbetik yan skʼelobil. Jun vinik ti chichʼ chanubtasel ta Vivliae kʼot ta nopel yuʼun ti muʼyuk xa tsikʼolaje. Manchuk mi vokol tajek chaʼi, chikta sba junchibuk xemana. Pe chlik sikʼolajuk yan velta. Akʼo mi jech, laj onoʼox skomtsan ta tsʼakal. ¿Kʼu yuʼun tsal yuʼun ti tsikʼolaje? Jaʼ ta skoj ti oy ta yoʼonton ti lekuk x-ilat yuʼun Jeova xchiʼuk ti skʼanoj tajeke (Kol. 1:10; 3:23).

11. ¿Kʼu yuʼun skʼan jkʼeltik lek li kʼusi oy ta koʼontontik spasele?

¹¹ Jkʼeltik lek li kʼusi oy ta koʼontontik spasele. Mi jech ta jpastike, jaʼ tskoltautik yoʼ jtsutsestik li kʼusi la jlikestike. Kalbetik chibuk skʼelobil. Akʼo mi jnopoj ta jchan Jvivliatik skotol kʼakʼal, xuʼ van mu spas kuʼuntik mi muʼyuk jpasoj jprogramatike. * Yan xtoke, xuʼ van xchap skʼopik li moletik ta tsobobbail ti nopolikuk noʼox xbat svulaʼanik li ermanoetike, pe mi junuk buchʼu ay svulaʼanik akʼo mi echʼ xa ox kʼuk sjalil. Xuʼ xkoltaatik mi la snopbeik skʼoplal li sjakʼobiltak liʼe: «¿Mi jnopojkutik buchʼutik ti xuʼ xbat jvulaʼankutike? ¿Mi kakʼojbekutik lek yorail ti bakʼin xuʼ xibatkutike?».

12. ¿Kʼusi van skʼan jpastik bakʼintik, xchiʼuk kʼu yuʼun?

¹² Jnoptik lek mi spas kuʼuntik. Melel onoʼox ti mu spas kuʼuntik skotol li kʼusi oy ta koʼontontike, xuʼ van jaʼ ta skoj ti mu noʼox xijxokobe, ti muʼyuk xa van kipaltike o muʼyuk kuʼuntik li kʼusitik chtun yoʼ spas kuʼuntike. Jaʼ yuʼun, skʼan jnoptik lek mi spas kuʼuntik li kʼusi jnopojtike xchiʼuk teuk ta joltik ti oy noʼox spajeb li kʼusi spas kuʼuntike. Bakʼintike, xuʼ van skʼan jeltik li kʼusi jnopojtik xa ox ta skoj ti mu spas kuʼuntike (Ecl. 3:6). Pe mi lik jkʼelbetik skʼoplal jtosuk li kʼusi jnopojtik xae xchiʼuk mi oy kʼusi lik jel ta jkuxlejaltike, yikʼaluk van chkakʼtik venta ti spas to kuʼuntike. Mi jech kʼot ta jtojolaltike, ¿kʼusi xuʼ skoltautik ta stsutsesel li kʼusi la jlikestike? Jkʼeltik batel voʼtosuk.

13. ¿Kʼuxi xuʼ jta kipaltik yoʼ spas kuʼuntik li kʼusi jnopojtike?

¹³ Jkʼanbetik kipaltik Dios yoʼ spas kuʼuntike. Li Jeovae xuʼ xakʼ kipaltik sventa jpastik li kʼusi kʼot ta nopel kuʼuntike (Filip. 2:13). Jaʼ yuʼun chaʼa, jkʼanilanbetik xchʼul espiritu yoʼ spas kuʼuntike. Akʼo mi muʼyuk bu tstakʼbutik ta ora yileluk, jechuk-o jkʼanilanbetik ta orasion. Yuʼun xi laj yal li Jesuse: «Chkalboxuk avaʼiik ti xakʼanilanike, vaʼun cha-akʼbatik [chʼul espiritu]» (Luk. 11:9, 13).

14. ¿Kʼuxi tskoltautik li beiltasel ta Proverbios 21:5 yoʼ jpastik li kʼusi jnopojtike?

¹⁴ Jkʼeltik lek kʼuxi xuʼ jpastik (kʼelo Proverbios 21:5). Yoʼ stsuts kuʼuntik jtosuk abtelale, skʼan jkʼeltik lek kʼuxi chkutik yoʼ spas kuʼuntik xchiʼuk ti jechuk-o jpastik batele. Jaʼ me jech skʼan jpastik xtok kʼalal oy kʼusi chkʼot ta nopel kuʼuntike. Pe ¿kʼuxi tspas kuʼuntik taje? Jpas jlistatik, jtsʼibatik li kʼusitik skʼan jpastik batele. Mi oy kʼusi tsots chkaʼitik spasele, mas lek ti bikʼitik jpastik batele. Vaʼun, te chkakʼtik venta ti oy sbalil li kʼusi tspas batel kuʼuntike. Li jkorintoetike albatik yuʼun Pablo ti akʼo kak stsob stakʼinik «li ta sba kʼakʼal ta jujun xemanae» sventa mu jaʼuk to chlik stsobik ta anil mi te xa ox oy li jtakbole (1 Kor. 16:2). Mi jech ta jpastik eke, muʼyuk ta jvul tajek koʼontontik ta spasel li kʼusi kʼot ta nopel kuʼuntike.

15. ¿Kʼuxi tskoltautik kʼalal ta jtsʼibatik li kʼusitik skʼan jpastik batele?

 ¹⁵ Kʼalal ta jtsʼibatik li kʼusitik skʼan jpastik batele, jaʼ tskoltautik yoʼ xkʼotuk ta pasel kuʼuntik li kʼusi jnopojtik xae (1 Kor. 14:40). Jech kʼuchaʼal liʼe, li moletik ta tsobobbaile ch-albatik ti akʼo svaʼanik junuk mol sventa jaʼuk stsʼiba li kʼusitik chkʼot ta nopel yuʼunike, ti buchʼu tsbaine xchiʼuk ti kʼusi ora skʼan stsutsesik spasele. Mi chchʼunik li tojobtasel taje, mas me kʼun chaʼiik spasel li kʼusi chkʼot ta nopel yuʼunike (1 Kor. 9:26). Xuʼ jechtik jpastik ek, jtsʼibatik jujun kʼakʼal li kʼusitik kechel to kuʼuntik spasele. Vaʼun, ti jaʼuk baʼyel jtsʼibatik li kʼusi ta jkʼan noʼox ta jtsutsestike. Mi jech ta jpastike, tstsuts kuʼuntik li kʼusi la jlikestike xchiʼuk mas anil tspas kuʼuntik.

16. Jech kʼuchaʼal chal Romanos 12:11, ¿kʼuxi xuʼ spas kuʼuntik li kʼusi jnopojtike?

¹⁶ Kakʼtik persa. Sventa jpastik batel li kʼusi jnopojtike xchiʼuk ti jtsutsestik li kʼusi la jlikestike, skʼan me xkakʼtik persa spasel (kʼelo Romanos 12:11). Li Pabloe laj yalbe Timoteo ti akʼo xakʼ ta yoʼonton ti masuk to lek xchanubtasvane xchiʼuk ti jechuk-o spas batele. Li tojobtasel taje xuʼ me skoltautik ek mi oy kʼusi ta jkʼan ta jtatik ta mantale (1 Tim. 4:13, 16).

17. ¿Kʼuxi tskoltautik Efesios 5:15 xchiʼuk 16 yoʼ jpastik li kʼusi jnopojtike?

¹⁷ Jtunes lek jkʼakʼaliltik (kʼelo Efesios 5:15, 16). Jkʼelbetik lek yorail li kʼusi jnopoj ta jpastike xchiʼuk mu me jeltik. Mu jmalatik ti jaʼuk to xlik jpastik mi xuʼ xa ox kuʼuntik chkiltike, yuʼun xuʼ van muʼyuk onoʼox jech chkʼot ta pasel (Ecl. 11:4). Mu jaʼuk xbat ta koʼontontik spasel li kʼusitik mu masuk tsots skʼoplale, yuʼun xuʼ van lubem xa chijkom xchiʼuk te ch-echʼ-o kʼakʼal kuʼuntik. Skʼan jaʼuk jpastik «li kʼusi mas tsots skʼoplale» (Filip. 1:10). Ti mi xuʼ chkiltike, jchʼakbetik yorail sventa jaʼo jpastik kʼalal mu masuk kʼusi chchʼay-o koʼontontike. Kalbetik yantik ti mu jkʼantik chʼaybel koʼontontike, jtupʼ jselulartik xchiʼuk jaʼuk to jkʼel jkoreotik o redes sosiales mi laj xa ox koʼontontike. *

18, 19. Kʼalal oy xa kʼusi jnopojtike, ¿kʼusi tskoltautik yoʼ mu xijchibaj akʼo mi oy kʼusi jnuptantike?

¹⁸ Jkʼeltik li kʼusi lek chkʼot ta pasel kuʼuntike. Jnoptik noʼox ti oy bu ta jkʼan chijbate. Pe jaʼ to chkiltike, makal be. ¿Mi te xa noʼox van chijpaj-o? Muʼyuk, xuʼ van ta joy jbetik ta skoj ti ta jkʼan chijkʼotutike. Jaʼ jech ek kʼalal oy xa kʼusi jnopoj ta jpastike. Mi jaʼ ta jkʼeltik li kʼusitik lek chkʼot ta pasel kuʼuntike, muʼyuk me chijchibaj ta be akʼo mi oy kʼusi vokol ta jnuptantik (Gal. 6:9).

¹⁹ Melel onoʼox ti vokol chkaʼitik snopel lek li kʼusi ta jpastike xchiʼuk ti xkʼotuk ta pasel kuʼuntike. Akʼo mi jech, ¿mi xuʼ van jtsutsestik li kʼusi la jlikestike? Xuʼ, yuʼun tskoltautik li Jeovae, chakʼ kipaltik xchiʼuk jpʼijiltik yoʼ stsuts kuʼuntike.