1, 2. 1) ¿Kʼusi tskoltautik sventa xkuch kuʼuntik li jvokoltike? Albo smelolal. 2) ¿Kʼusi ta jkʼelbetik batel skʼoplal li ta xchanobil liʼe?

KʼALAL kuch xa ox kuʼuntik jtosuk vokolile, xuʼ van xi la jnoptike: «Muʼyuk tsal kuʼun ta kipal jtuk». Xuʼ van jaʼ jech chkaltik kʼalal mu jnaʼtik kʼuxi kuch kuʼuntik jtosuk tsatsal chamel o kʼalal oy buchʼu cham kuʼuntik ti jkʼanojtik tajeke. Vaʼun, te chkakʼtik venta ti jaʼ ta skoj xchʼul espiritu Jeova ti tsal kuʼuntik jujukoj li jvokoltike, yuʼun jaʼ laj yakʼbutik «li juʼelal ti mu kʼusi xkoʼolaj-oe» (2 Kor. 4:7-9).

² Jech xtok, ta jkʼantik ti akʼo skoltautik li chʼul espiritu sventa mu jchanbetik stalelal li xchopol balumil Satanase (1 Juan 5:19). Maʼuk noʼox, yuʼun skʼan xkakʼtik persa stsalel li «pukujetik ti toj chopolik» tajeke (Efes. 6:12). Laj xa kalbetik tal skʼoplal ti ep kʼusitik xuʼ xakʼ jvokoltike, jaʼ yuʼun jkʼeltik batel chaʼtos kʼuxi tskoltautik li chʼul espiritue. Vaʼun, jaʼo ta jkʼeltik kʼusi skʼan jpastik sventa x-abtej lek ta jtojolaltike.

3. ¿Kʼuxi xuʼ skoltautik li chʼul espiritu sventa xkuch batel kuʼuntik li jvokoltike?

³ Li xchʼul espiritu Jeovae chakʼ juʼeltik o kipaltik sventa spas batel kuʼuntik li kʼusitik jbainojtike akʼo mi ep kʼusitik ta jnuptan li ta jkuxlejaltike. Li jtakbol Pabloe laj yal ti jech-o chtun batel ta stojolal Jeova akʼo mi te stsʼikoj li svokoltake, yuʼun snaʼoj lek ti chkoltaat yuʼun «li sjuʼel Kristoe» (2 Kor. 12:9). Kʼalal bat ta xchibal velta ta misioneroale, maʼuk noʼox laj yakʼbe yipal xcholel mantal, yuʼun abtej xtok sventa sman li kʼusitik chtun yuʼune. Kʼalal jaʼo te oy ta Korintoe, te kom ta sna Akila xchiʼuk Prisila ti jaʼ yabtelik spasel karpanaetike. Jaʼ yuʼun, li Pabloe te jmoj lik abtejuk xchiʼukik jayibuk kʼakʼal ta xemana ta  skoj ti snaʼ spasel karpanaetik eke (Ech. 18:1-4). Pe sventa spas yuʼun li yabtele xchiʼuk ti xuʼuk yuʼun xcholel li lekil aʼyeje, jaʼ koltaat yuʼun li xchʼul espiritu Jeovae.

4. Jech kʼuchaʼal chal 2 Korintios 12:7 kʼalal ta 9, ¿kʼusi vokol laj yaʼi stsalel li Pabloe?

⁴ (Kʼelo 2 Korintios 12:7-9). Xi laj yal li Pabloe: «Laj kichʼ akʼbel chʼix ta jbekʼtal». ¿Kʼusi la skʼan laj yal taje? Sventa xkaʼitike, jnoptik noʼox kʼu to van xkʼuxul chkaʼitik ti x-och chʼix ta jbekʼtaltike. Ti jech la skoʼoltas li jtakbole, jaʼ ta skoj ti oy kʼusi yakal chil-o svokole. Jaʼ yuʼun, li kʼusi la snuptane xkoʼolaj laj yaʼi ti jaʼ «jun yaj-anjel Satanas» ti jech-o chyayijesat li jtakbole. Xuʼ van maʼuk pajbat yuʼun Satanas xchiʼuk spukujtak li chʼix ta sbekʼtale, jaʼ xkaltik, li kʼusi tsvul-o yoʼontone. Pe kʼalal laj yilik ti chil svokol ta sbekʼtal li Pabloe, xuʼ van mas to la spajilanbeik ochel ta yut sbekʼtal, jaʼ xkaltik, ti yantik to mas laj yakʼbeik svokole. Pe ¿kʼusi van la spas?

5. ¿Kʼuxi takʼbat s-orasion yuʼun Jeova li Pabloe?

⁵ Li Pabloe tskʼan ox ti xlokʼ ta j-echʼel li «chʼix» ta sbekʼtale. Xi laj yale: «Oxib velta la jkʼanbe vokol Kajvaltik ti akʼo lokʼuk ta [jtojolale]». ¿Mi sakchʼay van batel li svokole? Muʼyuk, akʼo mi xvokolet la skʼan ta orasion. Pe maʼuk me skʼan xal ti muʼyuk xtakʼbat s-orasion yuʼun li Jeovae, yuʼun akʼo mi muʼyuk lokʼesbat li svokole, akʼbat yipal sventa xkuch batel yuʼun. Xi albat yuʼun li Jeovae: «Lek xa tsʼakal ta atojolalik li juʼel kʼalal kʼunoxuke» (2 Kor. 12:8, 9). Li jtakbole jun-o yoʼonton laj yaʼi sba xchiʼuk xmuyubaj noʼox ta skoj ti koltaat yuʼun Diose (Filip. 4:4-7).

6. 1) ¿Kʼuxi tstakʼ j-orasiontik li Jeovae? 2) Li tekstoetik talem ta parafoe, ¿kʼusi jamal chal ti tspat koʼontontike?

⁶ ¿Mi oy jkʼanojbetik vokol Jeova sventa slokʼesbutik jtosuk vokolil jech kʼuchaʼal la spas li Pabloe? Kʼalal chkiltik ti muʼyuk tsakchʼay batel jvokoltik o ti yantik stsatsaj batel akʼo mi te noʼox xijvulvun-o ta spasel orasione, xuʼ van xi ta jnoptike: «Muʼyuk xa lek chilun jnaʼ li Jeovae». Pe teuk ta joltik ti takʼbat onoʼox s-orasion yuʼun Jeova li Pabloe, jaʼ yuʼun jaʼ jech tspas ta jtojolaltik ek. Melel onoʼox ti muʼyuk van tslokʼes ta j-echʼel jvokoltik li Diose, pe xuʼ stunes xchʼul espiritu sventa xakʼ kipaltik yoʼ mu xijlubtsaje (Sal. 61:3, 4). Xuʼ van chkichʼtik jipel ta lum, pe mi jaʼuk onoʼox bu chiktautik li Jtotik Jeovae (2 Kor. 4:8, 9; Filip. 4:13).

7, 8. 1) ¿Kʼu yuʼun xkoʼolaj ta ikʼ li chʼul espiritue? 2) ¿Kʼuxi la xchapbe smelolal jtakbol Pedro ti kʼu yelan ch-abtej li chʼul espiritue?

⁷ ¿Kʼuxi to yan tskoltautik li chʼul espiritue? Kalbetik skʼoplal li varkoetik ti te oy ta oʼlol nab ti xyukʼlajet tajeke. Sventa lek xkʼot ta skotleb li varkoetike, xuʼ xjochatik batel yuʼun li ikʼe. Jaʼ jech ek li chʼul espiritue, xuʼ skoltautik ta stsalel li vokoliletik ti xkoʼolaj ta nab ti xyukʼlajet tajeke xchiʼuk chikʼutik batel li ta achʼ balumil yaloj chakʼ Diose.

⁸ Ta skoj ti jaʼ jun jtsakchoy echʼ li jtakbol Pedroe, snabe lek skʼoplal li xanbal ta varkoe. Jaʼ yuʼun, kʼalal laj yalbe skʼoplal kʼu yelan ch-abtej li chʼul espiritue, la stunes jpʼelantik kʼop ti snitojbe sba skʼoplal xchiʼuk li xanbal ta varko ta skoj van ti snabe lek skʼoplale. Xi laj yale: «Yuʼun mu ta yoʼontonuk krixchanoetik ti jech laj yichʼ alel li albil kʼopetike, moʼoj, yuʼun likem talel ta stojolal Dios li kʼusi laj yal li viniketik kʼalal tijbat yoʼontonik yuʼun li chʼul espiritue». Kʼalal «tijbat yoʼontonik» xi li ta griego kʼope, jaʼ skʼan xal jochatik batel o ikʼatik batel (2 Ped. 1:21).

9. ¿Kʼusi la skʼan laj yal Pedro kʼalal ikʼatik batel xie?

⁹ ¿Kʼusi la skʼan laj yal Pedro kʼalal ikʼatik batel xie? Li Lukas ti jaʼ la stsʼiba li slivroal Echose jaʼ jechtik laj yalbe skʼoplal ek ta sventa li  jkot varko ti chujat batel yuʼun li ikʼe (Ech. 27:15). Xi laj yal jun vinik ti chchanbe skʼoplal Vivliae: «Kʼalal laj yal Pedro ti laj yichʼik ikʼel batel li jtsʼibajometik yuʼun Vivliae, la stunes jun skoʼoltasobil ti kʼu yelan chanav jkot varko ta nabe». Li jtakbole laj yakʼ ta aʼiel ti jaʼ beiltasatik yuʼun chʼul espiritu li jtsʼibajometik ta Vivlia xchiʼuk li j-alkʼopetik sventa spas yuʼunik li kʼusi la sbainike. Jaʼ jech kʼot ta pasel kʼuchaʼal jkot varko ti chjochat batel yuʼun ikʼ sventa xkʼot ti bu tskʼane. Xi to laj yal li vinik taje: «Xkoʼolaj ti la xlichʼan lek spokʼal svarkoik li j-alkʼopetike». Li Jeovae koltavan ta yakʼel talel li ikʼe, jaʼ xkaltik, li xchʼul espiritue. Mu teuk noʼox smeyoj kom skʼobik li jtsʼibajometik ta Vivlia eke, yuʼun la xchʼunik li beiltasel chakʼ chʼul espiritue.

10, 11. ¿Kʼusi skʼan jpastik sventa x-abtej lek ta jtojolaltik li chʼul espiritue? Albo junuk skʼelobil.

¹⁰ ¿Mi yakal-o tstunes xchʼul espiritu Jeova sventa xakʼ ta tsʼibael li Vivliae? Muʼyuk xa. Pe yakal-o tstunes sventa sbeiltas li yajtuneltake. Ta onoʼox skoltautik li Jeovae, jaʼ noʼoxe skʼan me mu teuk noʼox tsʼijil xijkom, skʼan oyuk kʼusi jpastik sventa x-abtej lek ta jtojolaltike. ¿Kʼuxi tspas kuʼuntik taje?

¹¹ Kalbetik junuk skʼelobil. Li jtsʼotvarkoe oy chaʼtos kʼusi skʼan spas sventa xjochat batel yuʼun li ikʼe. Baʼyel, skʼan xikʼ batel svarko ti bu lek tsots chjelav ikʼe, yuʼun mi te noʼox kotol ta skotlebe, muʼyuk chanav batel. Xchibal, skʼan stoy muyel xchiʼuk xlichʼanbe lek li spokʼaltake, yuʼun jaʼ to chlik xanavuk batel mi tsmaj lek ikʼ li spokʼaltak varkoe. Jaʼ me jech ek li voʼotike, jaʼ noʼox xuʼ xijtun-o batel ta stojolal Jeova mi tskoltautik li xchʼul espiritue. Oy chaʼtos kʼusi skʼan jpastik: baʼyel, skʼan xijbat ti bu ch-echʼ li ikʼe, jaʼ xkaltik, ti jpasbetik yabtel Dios sventa sbeiltasutik li xchʼul espiritue. Xchibal, jlichʼantik lek li spokʼal jvarkotike, jaʼ xkaltik, ti jpastik bu kʼalal xuʼ kuʼuntik li yabtel Diose (Sal. 119:32). Mi jech la jpastike, li chʼul  espiritue tsnitutik batel sventa tukʼuk-o xijtun ta stojolal Jeova akʼo mi xtal ta jujujot kontrainel xchiʼuk vokoliletik. Maʼuk noʼox, yuʼun chikʼutik batel li ta achʼ balumil yaloj chakʼ tal Diose.

12. ¿Kʼusi chlik jkʼelbetik batel skʼoplal?

¹² Laj xa jkʼeltik talel chaʼtos kʼuxi tskoltautik li chʼul espiritue. Chakʼ kipaltik xchiʼuk tskoltautik sventa tukʼuk-o xkakʼ jbatik akʼo mi xlik xkaj noʼox li jvokoltike. Tskoltautik xtok sventa jechuk-o xijtun ta stojolal li Jeovae xchiʼuk chikʼutik batel ta sbelel kuxlejal sbatel osil. Jkʼeltik batel chantos kʼusi skʼan jpastik sventa x-abtej lek ta jtojolaltik li chʼul espiritue.

13. 1) ¿Kʼuxi xuʼ skoltautik li Vivlia jech kʼuchaʼal chal 2 Timoteo 3:16 xchiʼuk 17? 2) ¿Kʼusi skʼan jpastik?

¹³ Baʼyel, jchantik lek li Skʼop Diose (kʼelo 2 Timoteo 3:16, 17). Li kʼusi laj yichʼ jelubtasel ta griego ti «laj yakʼ ta naʼel Dios» xie jaʼ skʼan xal «vuchʼtabil tal yuʼun Dios». Li Jeovae la stunes xchʼul espiritu sventa xvuchʼta tal xkaltik o laj yakʼbe ta snopben jtsʼibajometik li kʼusi skʼan stsʼibaik ta Vivliae. Jech oxal, mi ta jchantik lek li Skʼop Diose xchiʼuk mi ta jnopbetik skʼoplale, chlik ochuk ta jnopbentik li smantaltak Jeovae xchiʼuk chyal batel ta koʼontontik. Vaʼun, jaʼ tskoltautik sventa jaʼuk jpastik li kʼusi lek chil Diose (Evr. 4:12). Pe sventa x-abtej lek ta jtojolaltik li chʼul espiritue, skʼan jchʼakbetik yorail xchanel jujun kʼakʼal li Vivliae xchiʼuk pajkutik ta snopbel skʼoplal. Mi jech ta jpastike, jaʼ xa tskoltautik sventa jaʼuk jpastik xchiʼuk ti jaʼuk xkalbetik skʼoplal li kʼusitik lekike.

14. 1) ¿Kʼu yuʼun chkaltik ti te oy ta jtojolaltik chʼul espiritu li ta tsobajeletike? 2) ¿Kʼusi skʼan jpastik yoʼ lichʼiluk lek spokʼal jvarkotik xkaltik kʼalal chijbat li ta tsobajeletike?

¹⁴ Xchibal, jmojuk xkichʼtik ta mukʼ Jeova (Sal. 22:22). Li ta tsobajeletike, te chanav li ikʼe, jaʼ xkaltik, te oy ta jtojolaltik li xchʼul espiritu Jeovae (Apok. 2:29). ¿Kʼu yuʼun jnaʼojtik lek ti jaʼ jeche? Yuʼun kʼalal te xa tsobolutik xchiʼuk li kermanotaktike, ta jkʼantik ta orasion ti xakʼ talel xchʼul espiritu li Diose, ta jkʼejintatik kʼejojetik ti lokʼemik ta Vivliae xchiʼuk ta jchikintatik mantaletik ti tsjelubtas ermanoetik ti yichʼojik biiltasel ta chʼul espiritue. Li ermanaetik eke chkoltaatik yuʼun chʼul espiritu kʼalal chchapanik xchiʼuk kʼalal tsjelubtasik li sparteike. Pe ¿kʼusi skʼan jpastik sventa x-abtej lek ta jtojolaltik li chʼul espiritue? Jaʼ ti jlichʼan lek spokʼal jvarkotike, jaʼ xkaltik, ti lekuk jchapan jbatik batel li ta tsobajeletik sventa xkakʼ jloʼiltike.

15. ¿Kʼusi skʼan jpastik yoʼ skoltautik ta cholmantal li chʼul espiritue?

¹⁵ Yoxibal, lokʼkutik ta cholmantal. Mi ta jkʼan tskoltautik li chʼul espiritue, skʼan jtunestik li Vivlia kʼalal ta jcholtik mantal xchiʼuk kʼalal chkakʼtik estudioe (Rom. 15:18, 19). Pe sventa x-abtej lek ta jtojolaltik li chʼul espiritue, skʼan nopolik noʼox xijlokʼ ta cholmantal xchiʼuk jtunestik Skʼop Dios ti bu kʼalal stakʼe. ¿Kʼusi van xuʼ skoltautik sventa xijtojob mas ta slikesel jloʼiltike? Jaʼ mi jech ta jpastik jech kʼuchaʼal chal li Jkuxlejaltik xchiʼuk Kabteltik sventa Diose, programa xchiʼuk bu chijtsʼibaj.

16. ¿Kʼuxi xuʼ jtatik li chʼul espiritue?

¹⁶ Xchanibal, jpastik orasion (Mat. 7:7-11; Luk. 11:13). Ta me xakʼbutik xchʼul espiritu Jeova mi ta jkʼanbetike. Muʼyuk kʼusi xuʼ smak ta be li j-orasiontike, mi jaʼuk li chukinabe mi jaʼuk li Satanase, yuʼun persa onoʼox chkʼot ta stojolal Jeova li kaʼyejtike xchiʼuk ta onoʼox xakʼbutik li xchʼul espiritue (Sant. 1:17). ¿Kʼu yelan skʼan jpastik orasion yoʼ x-abtej lek ta jtojolaltik li chʼul espiritue? Sventa jnaʼtike, kalbetik skʼoplal jun loʼil ti jaʼ noʼox te ta jtatik  li ta Evanjelio yuʼun Lukas * ti jaʼ chalbe skʼoplal li orasione.

17. ¿Kʼu yelan skʼan jkʼantik ta orasion li chʼul espiritu jech kʼuchaʼal laj yal Jesus ta Lukas 11:5-9 xchiʼuk 13?

¹⁷ (Kʼelo Lukas 11:5-9, 13). Li lokʼolkʼop laj yal Jesuse chakʼ kiltik kʼuxi xuʼ jkʼantik li chʼul espiritue. Yuʼun li ta loʼile, chalbe skʼoplal jun vinik ti laj onoʼox sta kʼusi tskʼan «ta skoj ti solel te xkʼankʼune» xchiʼuk ti muʼyuk la smak yoʼonton ta skʼanbel vokol yamigo akʼo mi oʼlol xa ox akʼobal (kʼelo li bu chalbe mas smelolal Lukas 11:8 ta Jkuxlejaltik xchiʼuk Kabteltik sventa Diose, programa xchiʼuk bu chijtsʼibaj, julio ta 2018 ti bu chal: «Ti solel te xkʼankʼune»). Li kʼusi laj yal Jesuse jaʼ jech skʼan jpastik ek kʼalal ta jpastik orasione. Xi laj yale: «[Kʼanilanik], vaʼun cha-akʼbatik; saʼilanik, vaʼun chataik; kʼojilanik li tiʼ nae, vaʼun chajambatik». ¿Kʼusi chakʼ jchantik taje? Jaʼ ti skʼan teuk xijkʼankʼun-o sventa jtatik li chʼul espiritue.

18. ¿Kʼu yuʼun xuʼ jpat koʼontontik ti chakʼbutik onoʼox xchʼul espiritu li Jeovae?

¹⁸ Li lokʼolkʼope chakʼ kiltik xtok kʼu yuʼun chakʼbutik xchʼul espiritu li Jeovae. Li vinik ta lokʼolkʼop laj yal Jesuse laj yakʼ ta yoʼonton skoltael li yuloʼ akʼo mi nax xa ox akʼobal kʼot ta sna. Manchuk mi mu kʼusi x-ayan yuʼun, la skʼel kʼusi xuʼ xakʼbe. Jaʼ yuʼun, bat skʼanbe tal pan li slakʼnae, akʼbat onoʼox ta skoj ti te xkʼankʼun-oe. ¿Kʼusi xuʼ jchantik li ta loʼile? Xuʼ jpat koʼontontik ti chakʼbutik onoʼox xchʼul espiritu Jeova mi te xijkʼankʼun-oe. Akʼo mi maʼuk tukʼil krixchano li vinik laj yalbe skʼoplal Jesuse, lokʼ ta yoʼonton skoltael li slakʼna ta skoj ti te xvulvun-oe. Mas to me jech tspas ta jtojolaltik li jkʼanvanej Totil kuʼuntike: chakʼbutik xchʼul espiritu mi ta jkʼanilanbetik-oe (Sal. 10:17; 66:19).

19. ¿Kʼu yuʼun jpʼel skʼoplal ti voʼotik ta jpastik kanale?

¹⁹ Li Satanase jech-o tsaʼilanutik ta kʼop ta skoj ti tskʼan tsjiputik ta lume, akʼo mi jech, jpʼel skʼoplal ti voʼotik ta jpastik kanale. ¿Kʼu yuʼun? Yuʼun tskoltautik li chʼul espiritue: chakʼ kipaltik sventa jtsaltik komel li vokoliletike xchiʼuk xuʼ smajbutik lek li spokʼal jvarkotike, jaʼ xkaltik, tsnitutik batel sventa xijtun-o ta stojolal Jeova jaʼ to mi lijkʼot li ta achʼ balumile. Jaʼ yuʼun, jkʼeltik kʼuxi xuʼ x-abtej lek ta jtojolaltik li chʼul espiritu yoʼ skoltautike.