EPAL ermanoetik sut xa batel ta slumalik ti batemik toʼox ta lumetik ti bu lek ta tael takʼine. Ta skoj ti skʼanojik Jeova xchiʼuk li krixchanoetike, te bat tunikuk ti bu chtun mas jcholmantaletike (Mat. 22:37-39). ¿Kʼusi laj yiktaik komel xchiʼuk kʼuxi akʼbatik bendision yuʼun li Jeovae? Kalbetik skʼoplal li jteklum Camerún ti te xkom ta África occidentale.

Li ta 1998, jun ermano ti Onésime sbie lokʼ batel ta Camerún xchiʼuk te naki 14 jabil ta yan lum. Jun velta li ta Salon sventa Tsobobbaile, xi la skoʼoltas jun ermano li abtelal ta cholmantale: «Jnoptik noʼox ti chaʼvoʼ amigoiletik ti yakal tstsakik choy ta jeltos yaviltake, li june mas ep yakal ta stsak choy, li buchʼu jutuk ta stsak choye, ¿mi mu jechuk ti te chbat ti bu oy yamigo ti mas ep choy te ta tsakele?».

Kʼalal laj yaʼi li skoʼoltasobil taje, la snop ti jaʼ lek ti sut batel ta Camerún ti bu oy epal krixchanoetik tskʼan chchanik li Vivliae. Yuʼun tskʼan tskolta li ermanoetik ta xchanubtasel li krixchanoetike. Pe la snop ti vokol chaʼi chnop ta slumal ta skoj ti epal jabil nakiem ta yan lume. Jaʼ yuʼun, sventa spas prevae, bat vakib u ta Camerún, vaʼun li ta 2012, te xa bat-o ta naklej.

Xi chal li Onesimee: «Jaʼ to te linop ti toj kʼixine xchiʼuk ti kʼu yelan li kuxlejal tee. Li ta Salon sventa Tsobobbaile, jaʼ to te la jnopes jba ta xchotlebinel uni vankaetik ti toj yijike. Pe xi to stseʼet ta xale: «Pe kʼalal mas ta xkakʼ ta koʼonton li kʼusitik ta xichʼ alel teye, muʼyuk xa ta xvul ta jol li chotlebaletik ti lek sputspun ta chotlebinele».

Li ta 2013, li Onesimee nupun xchiʼuk li Géraldine ti jaʼ toʼox sut talel ta Camerún ek ti ay toʼox ta naklej baluneb jabil ta Franciae. ¿Kʼuxi laj yichʼik akʼbel bendision yuʼun Jeova ti jaʼ baʼyel laj yakʼ ta xkuxlejalik li mantale? Xi chal li Onésime: «Libatkutik li ta Chanob vun sventa j-al lekil aʼyejetik yuʼun Ajvalilal yuʼun Diose xchiʼuk litunkutik ta Betel. Li echʼ jabile, laj yichʼik voʼ 20 ta voʼ li buchʼu toʼox chichʼik estudio ta jtsobobbailkutike. Li avie, chkaʼi ti te oyun ti bu oy epal ‹choyetike›» (Mar. 1:17, 18). Xi chal li Géraldine eke: «Muʼyuk toʼox bu jnopoj mi ta jta epal bendision».

Li Judith ti te toʼox batem ta naklej ta Estados Unidose tskʼan mas ta xchol mantal, xi ta xale: «Kʼalal chbat jvulaʼan li kutsʼ kalal ta Camerune, xi-okʼolet xa kʼalaluk ta xisut talele, yuʼun mu jkʼan xkikta li krixchanoetik ti lik xa kakʼbeik estudioe». Akʼo mi jech, mu toʼox skʼan sut batel li ta slumale. Staoj lek yabtel xchiʼuk xtoj yuʼun li poxiletik chichʼ akʼbel stot te ta Camerune. La spat yoʼonton  ta stojolal Jeova, vaʼun sut batel. Chal ta jamal ti tsnaʼ sutel li kʼusitik oy toʼox lekik yuʼun ta Estados Unidose. La skʼanbe koltael Jeova sventa xnop xaʼi, vaʼun patbat yoʼonton yuʼun jun jkʼelvanej ta sirkuito xchiʼuk li yajnile.

¿Kʼusi kʼot ta stojolal un? Xi chale: «Ta oxib noʼox jabile, la jkolta chanib krixchano sventa xichʼik voʼ». Maʼuk noʼox, yuʼun laj yichʼ biiltasel kʼuchaʼal prekursora espesial. Li avie, jmoj xa chtunik ta jkʼelvanej ta sirkuito xchiʼuk li smalal ti Sam-Castel sbie. Pe ¿kʼusi kʼot ta stojolal li stot une? Li Judith xchiʼuk li yutsʼ yalale la staik jun ospital ta yan-o jteklum ti jaʼ tstojik skotol li operasione, vaʼun lek lokʼ s-operasion li stote.

Jun ermano ti Víctor sbie bat ta naklej ta Canadá. Kʼalal laj xa ox skʼel jun mantal li ta revista Li Jkʼel-osil ta toyol ti chalbe skʼoplal li chanun ta universidade, la snopbe skʼoplal li chanun stsakoje, vaʼun laj yikta komel li universidade, laje la xchan jtos abtelal ti mu to jaluk yichʼoje. Xi chale: «Koliyal taje, la jta noʼox kabtel ta anil vaʼun la jpas li kʼusi oy onoʼox ta koʼonton spasele: ti xitun ta prekursore». Ta mas tsʼakale nupun xchiʼuk Caroline, vaʼun batik ta Camerún. Kʼalal jaʼo te oyike, bat svulaʼanik Betel, vaʼun te tijbat yoʼontonik mi xuʼ te xkom tunikuk li ta Camerune. Xi chal li Victore: «Muʼyuk srasonal kuʼunkutik ti moʼoj xichikutike. Ta skoj ti muʼyuk onoʼox kʼusi mas x-ayan kuʼunkutike, la jchʼamkutik li takel ta ikʼele». Akʼo mi ip noʼox li Carolinee, la spasik li kʼusi laj xa onoʼox yalike.

Li Víctor xchiʼuk Carolinee lik tunikuk ta prekursor regular sventa skoltaik li krixchanoetik ti oy ta yoʼontonik xchanel Vivliae. Te van kʼuk sjaliluke, jaʼ kuxiik-o li yuni takʼin stsobojike, ta tsʼakale sut abtejikuk jayibuk u ta Canadá sventa sutik ta Camerún xchiʼuk ti te xtunik-o ta prekursor regulare. ¿Kʼuxi akʼbatik bendision yuʼun Jeova? Batik ta Chanob vun sventa j-al lekil aʼyejetik yuʼun Ajvalilal yuʼun Dios, tunik ta prekursor espesial, li avie te xa chtunik ta svaʼanel salonetik. Li Victore xi chale: «Ti laj kiktakutik li kʼusitik lekik toʼox x-ayan kuʼunkutike, jaʼ te la jkilkutik ti kʼuxi chkoltavan li Jeovae».

Li ta sjabilal 2002, jun ermano ti Alain sbie te toʼox yakal chchanunaj ta universidad ta Alemania. Pe kʼalal la xchan li tratado Joven, ¿qué harás con tu vida?, tijbat yoʼonton sventa oyuk kʼusi xakʼ ta yoʼonton stael ta mantal. Li ta 2006, bat li ta Chanob vun sventa Xchanubtasel Jtuneletike (li avie jaʼ xa sbi Chanob vun sventa j-al lekil aʼyejetik yuʼun Ajvalilal yuʼun Dios), vaʼun takat batel ta Camerún ti jaʼ onoʼox te slumale.

Te la sta yabtel ti junchib noʼox kʼakʼal ta x-abteje, ta mas tsʼakale la sta yan yabtel ti mas toyol chtojate, pe la svul yoʼonton mi muʼyuk xa mas ta xakʼbe yipal li cholmantale. Jaʼ yuʼun, kʼalal laj yichʼ albel mi xuʼ xtun ta prekursor espesiale, la xchʼam noʼox ta anil. Pe li yajval yabtele albat ti chmuyesbat stojol sventa mu xlokʼ li ta yabtele, pe li Alaine muʼyuk la xchʼam. Ta mas tsʼakale, nupun xchiʼuk li Stéphanie ti te toʼox naki jayibuk jabil ta Franciae. ¿Pe kʼusitik la snuptan li Stéphanie kʼalal batik ta naklej ta Camerune?

Xi chal li Stéphanie: «Li-ipaj uni jutuk xchiʼuk la stsakun alerjiaetik, pe la jtabe jutuk xpoxil, vaʼun te likol batel». Li Jeovae laj yakʼbe bendision li nupultsʼakal taje. Xi chal li Alaine: «Kʼalal ay jcholkutik mantal ta Katee,  ta jun jteklum ti nom to bu chʼikile, la jtakutik jayvoʼuk krixchanoetik ti oy ta yoʼontonik chchanik Vivliae. Laj kakʼbekutik s-estudioik ta telefono. Chaʼvoʼ li estudianteetik taje laj yichʼik voʼ, vaʼun te laj yichʼ pasel jun grupo». Li Stéphanie xi to chale: «Chakʼ tajek muyubajel kʼalal ta jkoltatik li krixchanoetik ta yojtikinel li Jeovae xchiʼuk ti chakʼ xkuxlejalik ta stojolale. Ti liʼ oyunkutik ta Camerune ep ta velta laj kaʼikutik li muyubajel taje». Li avie, li Alain xchiʼuk li Stéphanie yakal chtunik ta jkʼelvanej ta sirkuito.

Li Giselee jaʼo te laj yichʼ voʼ kʼalal te chchanbe skʼoplal poxiletik ta Italiae. Toj labal sba laj yil ti buchʼu akʼbat estudioe, yuʼun jaʼik jun nupultsʼakal ti lek noʼox sba li xkuxlejalike xchiʼuk ti chtunik ta prekursor regulare. Vaʼun, ayan mas ta yoʼonton xcholel mantal ek. Kʼalal yakal toʼox ta chanune, och ta prekursora regular.

Li Giselee tskʼan tsut ox batel ta Camerún sventa xchol mas mantal, pe oy kʼusi tsvul-o jutuk yoʼonton. Xi chale: «Pe chixiʼ mi xchʼay sbalil li svunal ti bu chal ti xuʼ liʼ xikom ta naklej ta Italiae xchiʼuk ti muʼyuk xa te jchiʼuk li kamigotak xchiʼuk li kutsʼ kalaltak ti te oyik ta Italiae». Akʼo mi jech kʼot ta stojolal, li ta mayo ta 2016, sut batel ta Camerún. Ta mas tsʼakale, nupun xchiʼuk li Léonce, vaʼun albatik yuʼun Betel ti te xbat tunikuk ta jun jteklum ti Ayos sbie ti bu chʼabal mas jcholmantaletike.

¿Kʼu yelan li kuxlejal te ta jteklum taje? Xi chal kaʼitik li Giselee: «Ep ta velta muʼyuk jlus likomkutik jayibuk xemana, jaʼ yuʼun muʼyuk xa kʼuxi xuʼ jkʼixnakutik li kuni telefonokutike. Vaʼun, jutuk mu skotoluk velta tupʼem li jtelefonokutike. La jchankutik spasel jveʼelkutik ta un siʼ, li ta akʼobaltike chbat jlup tal kaʼalkutik ta karretiya xchiʼuk chkichʼ batel kuni jokokutik ta skoj ti jaʼ jutuk krixchanoetike». Li Giselee chal li kʼusi koltaat-o sventa xkuch yuʼune: «Koliyal li xchʼul espiritu Jeovae, kuch batel kuʼunkutik, la jkolta jbakutik ta jujuntal, la spat koʼontonkutik li kamigotakutike xchiʼuk li kutsʼ kalalkutike, jech xtok bakʼintike la skoltaunkutik ta takʼin».

¿Mi xmuyubaj Gisèle ti sut ta slumale? Xi chale: «Ta melel, ximuyubaj tajek. Akʼo mi la jnuptankutik vokoliletik xchiʼuk lichibajkutik li ta slikebale. Pe kʼalal laj kiktakutik komel skotole, li jmalal xchiʼuk voʼone laj kakʼkutik venta ti jaʼ la jpaskutik li kʼusi skʼan onoʼox jpaskutike. Avie, mas xa ta jpat koʼontonkutik ta stojolal Jeova xchiʼuk mas nopol oyukutik ta stojolal». Li Léonce xchiʼuk li Giselee ayik li ta Chanob vun sventa j-al lekil aʼyejetik yuʼun Ajvalilal yuʼun Dios xchiʼuk chtunik kʼuk sjaliluk ta prekursor espesial.

Li jtsakchoyetike chakʼik persa sventa staik ta tsakel epal choyetik, li ermanoetik ti tsutik ta slumalik eke jpʼel ta yoʼonton chiktaik kʼusi x-ayan yuʼunik sventa xbat skoltaik li krixchanoetik ti oy ta yoʼontonik chaʼiik li lekil aʼyej sventa li Ajvalilal yuʼun Diose. Ta melel, li Jeovae muʼyuk chchʼay ta sjol ti tsots ch-abtejik li jcholmantaletik taje xchiʼuk ti skʼanojbeik li sbie (Nee. 5:19; Ebr. 6:10). Mi te nakalot ta yan lum xchiʼuk mi anaʼoj ti chʼabal mas jcholmantal ti bu alumale, ¿mi xuʼ van xasut batel? Mi jech la apase, ta me xakʼbot epal bendision li Jeovae (Prov. 10:22).