Spasel li kʼusi leke: Nopo atuk li kʼusi skʼan xapase
Ti buchʼu ta jkʼan ta jchʼunbetik smantale xuʼ me sjel li jkuxlejaltike. Taje snaʼoj lek li Jeovae, jaʼ yuʼun tskʼan ti jchʼunbetik li smantaltake.
Li Jeovae tskʼan ti xijmuyubaje xchiʼuk ti junuk noʼox koʼontontike.
«Voʼon Jeovaun, voʼon Adiosun, voʼon ta jchanubtasot sventa xatabe sbalil atuk, voʼon ta jbeiltasot batel ti bu beal skʼan xatam batele. ¡Oy ta koʼonton ti xatsʼet chikinta li jmantaltake! Vaʼun bi, li jun oʼontonal avuʼune chkʼot kʼuchaʼal jun ukʼum xchiʼuk li tukʼilal avuʼune chkʼot kʼuchaʼal li nab ti mu xpaj ta yukʼlajetele» (Isaias 48:17, 18).
Voʼotik ta jnop jtuktik ti kʼu yelan ta jkʼan chijkuxie. Pe li Jeova ti jaʼ Jpasvanej kuʼuntike oy ta yoʼonton ti jchʼuntik li beiltaseletik yakʼoje, yuʼun snaʼoj ti jaʼ sventa jlekilaltike. Mi la jchʼunbetik li smantaltak Diose, mu ta naʼeteluk ti lek kʼusi chkʼot ta jtojolaltike. Jech xtok, lek kʼusi chkʼot ta nopel kuʼuntik, vaʼun jun noʼox koʼontontik xchiʼuk xijmuyubaj noʼox.
Muʼyuk tskʼanbutik Jeova li kʼusi mu spas kuʼuntike.
«Li mantal yakal chkalbot avie mu toj tsotsuk ta chʼunel, mu toj nomuk oy ta atojolal» (Deuteronomio 30:11).
Sventa xkakʼ ta jkuxlejaltik li smantaltak Diose, yikʼaluk van skʼan jel li jtalelaltike xchiʼuk li jnopbentike. Pe li Jeovae, mu epuk kʼusi tskʼanbutik. Ta skoj ti jaʼ Jpasvanej kuʼuntike, snaʼoj li kʼusi spas kuʼuntike xchiʼuk li kʼusi muʼyuke. Kʼalal chkojtikintik leke, chkakʼtik venta ti «mu toj tsotsuk ta chʼunbel li smantaltake» (1 Juan 5:3).
Li Jeovae tskolta li buchʼu chchʼunbat smantale.
«Jtsakoj lek abatsʼikʼob voʼon ti Jeovaune, voʼon li Adiosune, xi chkalbote: ‹Mu xaxiʼ. Voʼon ta jkoltaot›» (Isaias 41:13).
Ta skoj ti tskoltautik li Diose, xchʼunbej kuʼuntik li smantale. Jaʼ tstunes Vivlia sventa skoltautik, xakʼ kipaltik xchiʼuk ti xakʼ spatobil koʼontontike.
Ta smiyonal noʼox krixchanoetik ta spʼejel balumile yakʼojik venta ti mas xa lek xkuxlejalik ta skoj ti chchʼunik li mantaletik ta Vivliae. ¿Mi oy ta avoʼonton chakʼan chachan li Vivliae? ¿Mi chakʼan chanaʼ kʼusi tojobtaseletik yichʼoj? Xuʼ xlik achan li foyeto Kʼupino akuxlejal. Xuʼ ta moton xata xchiʼuk te oy ta jw.org. Yichʼoj tal li oxib xchanobil liʼe:
-
«¿Kʼuxi xuʼ skoltaot li Vivliae?».
-
«Li Vivliae chakʼ spatobil koʼontontik».
-
«¿Mi melel li kʼusi chal Vivliae?».
Mi la achan li Skʼop Diose, te chavakʼ venta ti jtunel tajek kuʼuntik li tojobtasel yichʼoj tale xchiʼuk ti «xuʼ jpat-o koʼontontik avie xchiʼuk ta sbatel osil» (Salmo 111:8). Mi la jchʼuntik li mantaletik ta Vivliae, chlekub-o yuʼun jkuxlejaltik. Pe li Diose muʼyuk tsujutik ta xchʼunel (Deuteronomio 30:19, 20; Josue 24:15). Ta jujuntal ta jnoptik mi ta jchʼuntik.
