Jutuk mu skotoluk li krixchanoetike snaʼojik ti oy kʼusitik lek chkʼot ta nopel yuʼunike xchiʼuk ti oy kʼusitik mu lekuke. Jech xtok, chopol chilik ti oy buchʼu chmilvane, ti chilbajinik junuk ants o vinike xchiʼuk ti chilbajinik li ololetike. Pe jutuk mu skotoluk li krixchanoetike lek chilik li buchʼutik chakʼ ta ilel xkʼuxul yoʼontonik, slekil yoʼontonik xchiʼuk ti jaʼuk xichʼ pasel li kʼusi tukʼe. Pe ¿kʼu yelan skʼan xkiltik li chiʼinejbail ta vayele, li jutkʼope xchiʼuk ti kʼu yelan ta jtsʼitestik li alab nichʼnabile? Epal krixchanoetike chalik ti lek noʼox la skotol li kʼusi chkʼot ta nopel yuʼunike. Jaʼ yuʼun, oy ep krixchanoetik jaʼ tstsakik ta venta li kʼusi lek chaʼi stukik kʼalal oy kʼusi tsnop tspasike o jaʼ chchanbeik li kʼusi tspas yantike. Pe ¿mi lek van skotol taje?

Li jol koʼontontike jaʼ me chalbutik mi lek o chopol li kʼusi kʼot ta nopel kuʼuntike (Romanos 2:​14, 15). Li ololetik eke chopol tajek chaʼi sbaik mi oy kʼusi chopol la spasike xchiʼuk chakʼik venta mi muʼyuk lek kʼusi tspas li yantike. Kʼalal chijchʼiutik tale, jaʼ xa mas ta jchantik li kʼusitik tspasik li kutsʼ kalaltike, li jchiʼiltaktike, li jmaestrotike, li jlakʼnatike xchiʼuk li kʼusi tspasik ta jrelijiontike. Vaʼun, kʼalal oy kʼusi chkʼot ta nopel kuʼuntike, li jol koʼontontike jaʼ xa chalbutik mi la jtsaktik ta venta li kʼusi laj kichʼtik albel o chanubtasele.

Li jol koʼontontike jaʼ tstij koʼontontik sventa xkaʼibetik xkʼuxul svokol li yantike, ti jnaʼuk jtojtik ta vokole, ti tukʼuk kʼusi jpastike xchiʼuk ti oyuk xkʼuxul koʼontontike. Jech xtok, chalbutik ti mu jyayijestik li buchʼu jkʼanojtike, ti mu jpastik li kʼusi xuʼ xakʼutik ta kʼexlale xchiʼuk ti xuʼ chopol xkaʼi jbatik yuʼune.

¿Mi lek van skotol li kʼusi ta jkʼan ta jpastike? Kʼalal kerem toʼox li Garricke, jaʼ la spas li kʼusi tskʼan stuke. Akʼo mi jech, ta tsʼakale laj yakʼ venta ti chopol li kʼusi lek toʼox yaloje. Yuʼun jaʼ lik spas li kʼusitik chopole: ‹lik mulivajuk,  lik slajes droga, lik yuchʼ pox xchiʼuk lek xaʼi saʼkʼop›.

Bateltike, maʼuk ta jpastik li kʼusi chal jol koʼontontike, yuʼun ep ta veltae jaʼ ta jpastik li kʼusi chal yantike. Kʼalal jech ta jpastike, xuʼ onoʼox jchantik yuʼun li kʼusi xchanojike xchiʼuk li spʼijilike. Mi jaʼ ta jpastik li kʼusi lek chilik li kutsʼ kalaltik, li kamigotaktik xchiʼuk ti bu nakalutike, mas me lek chilutik.

¿Mi lek van ti jaʼ jpastik li kʼusi chal yantik ti jaʼ leke? Kʼalal ta stsebal toʼox li Priscilae, jaʼ tspas li kʼusitik tspas li yamigotake; stalel xa noʼox chilik ti buchʼuuk noʼox xchiʼinik ta vayele. Pe laj yakʼ venta ta tsʼakal ti muʼyuk xmuyubaj ta skoj ti jaʼ tspas li kʼusi chal xchiʼiltake. Xi chale: «Chopol tajek laj kaʼi jba ta skoj ti jaʼ jech ta jpas kʼuchaʼal tspas li yantike, bol li kʼusi kʼot ta nopel kuʼune xchiʼuk laj ox jtikʼ jba ta vokol».

Li kʼusi ta jnoptik xchiʼuk li kʼusi tsnop yantike xuʼ onoʼox skoltautik sventa lekuk li kʼusi xkʼot ta nopel kuʼuntike. Pe mi jaʼ noʼox la jtsaktik ta venta taje, mu skotoluk velta ti lek kʼusi chkʼot ta pasele. Bateltike, ta skoj li kʼusi chkʼot ta nopel kuʼuntike, xuʼ xkakʼbe jba jvokol jtuktik o svokol yantik (Proverbios 14:12). Akʼo mi lek kalojtik li kʼusi ta jnoptike o li kʼusi tsnop yantike, xuʼ me mu jechuk, ¡yuʼun xuʼ onoʼox van xjel ta tsʼakal! Oy onoʼox kʼusitik ti chopol toʼox chilike, pe ti lek xa noʼox chilik li avie. Jech xtok, oy junantik talelaletik ti lek toʼox chilike, pe li avie chopol xa chilik.

¿Mi oy van bu xuʼ jtatik junuk lekil beiltasel ti xuʼ skoltautik ta snaʼel li kʼusi lek xchiʼuk li kʼusi mu lekuke? ¿Mi oy van kʼusi xuʼ skoltautik sventa lekuk kʼusi xkʼot ta nopel kuʼuntik ti mu chopoluk xkaʼi jbatik yuʼun ta tsʼakale?

Oy bu xuʼ jtatik lekil beiltasel mu ventauk ti bu likemutik o nakalutike, yuʼun ta jtabetik onoʼox sbalil. Li ta yan mantal chtale, jaʼ tskoltautik sventa jnaʼtik bu xuʼ jtatik li beiltasel ti jaʼ tskoltautik ta spasel kʼusi lek ta jkuxlejaltike.