NOPO noʼox avaʼi liʼe: li buchʼu ch-abtej ta radioe yabinoj ti chnopaj xa tal jun tsatsal ikʼaloʼ ta jun jteklum ti bu ep jnaklejetike. Ta skoj ti mu skʼan ti oyuk kʼusi snuptanike, chal ta anil ta radio li kʼusi chkʼot ta pasele.

Jaʼ jechtik tspas li Jeova eke, yuʼun yakal tspʼijubtas krixchanoetik ti jutuk xa tajek skʼan xtal jun tsatsal vokolil ti mas to xibal sba kʼuchaʼal li tsatsal ikʼaloʼ laj kaltike. ¿Kʼuxi yakal tspas? Xchiʼuk ¿kʼuxi jnaʼojtik ti baʼyel xa onoʼox chpʼijubtasvan Jeova sventa oyuk kʼusi spasike? Jkʼeltik batel jayibuk loʼil ta Vivlia ti chakʼ kiltik kʼuxi la spʼijubtas krixchanoetik ta voʼne li Jeovae.

Li ta voʼnee, li Jeovae ep ta velta laj yal ti chakʼbe kastigo li buchʼutik yolbaj mu skʼan xchʼunbat smantale (Prov. 10:25; Jer. 30:23). Pe jujukoj kʼalal pʼijubtasvane, baʼyel xa onoʼox laj yal li kʼusi chkʼot ta pasele. Maʼuk noʼox, yuʼun laj yal xtok kʼusi skʼan spas li jtoybaetik sventa lekuk x-ilatike (2 Rey. 17:12-15; Neh. 9:29, 30). Jaʼ yuʼun, la stakanan batel yajtuneltak yoʼ xbat yalik li kʼusi vokol xuʼ snuptanike, sventa stijbe yoʼontonik yoʼ jaʼuk xlik spasik li kʼusi lek chil Jeovae xchiʼuk ti ta aniluk noʼox jech spasike (Amós 3:7).

Jun yajtunel Dios ti jech la spase jaʼ li Noee. Li krixchanoetik vaʼ orae toj simaronik xchiʼuk naka mulivajel tspasik. Kʼalal epal jabil toʼox skʼan xtal li Nojelal ta voʼe, kak xa onoʼox la spʼijubtas li krixchanoetike (Gén. 6:9-13, 17). Laj yalanbe xtok kʼusi skʼan spasik yoʼ kuxuluk xkomike. Laj yakʼ tajek ta yoʼonton xcholel mantal li Noee, jaʼ yuʼun laj yichʼ alel «ti la xcholbe skʼoplal li tukʼilale» (2 Ped. 2:5).

Li krixchanoetike, ¿mi laj van xchʼunik li kʼusi albatik yuʼun Noee? Muʼyuk, akʼo mi ep ta velta laj yichʼik albel. Te laj yakʼik ta ilel ti chʼabal xchʼunel yoʼontonike. Jaʼ yuʼun, kʼalal tal li Nojelal ta voʼe, «kuchatik batel skotolik» (Mat. 24:39; Evr. 11:7). Ta melel, mu xuʼ spak skʼoplalik ti muʼyuk x-albatik yuʼun li Diose.

Mu onoʼox skotoluk velta ti jal laj yakʼbe yorail Jeova sventa spʼijubtasan krixchanoetik kʼalal skʼan toʼox xakʼ talel kastigoe. Pe ¿mi jaʼ skʼan xal ti mu xa kʼusi stakʼ spasik ta skoj ti anil xa noʼox ch-albatike? Mu jechuk. Jkʼeltik kʼusi kʼot ta pasel kʼalal laj yakʼ talel li lajuneb vokolil ta Ejipto li Jeovae. Li svukubal vokolile jaʼo kʼalal la stak tal mukʼtikil bot ti cham-o yuʼun li krixchanoetik xchiʼuk li chonbolometike. Kʼalal jun xa ox kʼakʼal skʼan xakʼ tale, laj yalbe Moises xchiʼuk Aaron ti akʼo xbat spʼijubtasik li faraon xchiʼuk yaj-abteltake. ¿Mi laj to van spoj sbaik ta skoj ti jun xa ox kʼakʼal skʼan xtal li kʼusi albatike? Xi chal li Vivliae: «Oy jayibuc xchiʼiltac ta abtel faraón ixi’ic yu’un c’usi laj yal li Muc’ul Diose, jech la stsobic ochel ta na li smozoique xchi’uc li sts’unub yovolique. Pero oy yantic muʼyuc tsots sc’oplal laj ya’yic; te no’ox la scomtsanic ti bu ono’ox oy yu’unique» (Éx. 9:18-21). Jamal xvinaj ti baʼyel xa onoʼox pʼijubtasvan li Jeovae, yuʼun li buchʼutik laj noʼox xchʼunike muʼyuk laj yil svokolik.

Kʼalal skʼan toʼox xtal li slajunebal vokolile, li Jeovae baʼyel xa onoʼox la spʼijubtasan xtok li faraon xchiʼuk li yaj-abteltake. Pe mi jsetʼuk la xchikintaik (Éx. 4:22, 23). Jaʼ yuʼun, kʼalal la sta yoraile te skʼelojik cham li sba xnichʼonike (Éx. 11:4-10; 12:29). Ti jech kʼot ta pasele, ¿mi jaʼ van ta skoj ti muʼyuk jal x-akʼbatik yorail yuʼun Jeova yoʼ oyuk kʼusi spasike? Mu jechuk. Yuʼun li Moisese laj yalbe j-israeletik xtok li kʼusi tsnuptanike xchiʼuk li kʼusi skʼan spasik yoʼ spojik li  sba xnichʼonike (Éx. 12:21-28). ¿Jayvoʼ la xchʼunik li kʼusi albatik yuʼun Diose? Yaʼeluke, oy oxib miyon krixchanoetik ti muʼyuk la snuptan svokolike xchiʼuk ti lokʼik batel li ta yosilal Ejiptoe. Taje te kapal skʼoplal j-israeletik xchiʼuk «ep ta chop stsʼunubal cristianoetic» ti te van oy jayvoʼuk j-ejiptoetik eke (Éx. 12:38).

Jamal xvinaj ti kʼalal laj yakʼ talel kastigo li Jeovae, baʼyel xa onoʼox la spʼijubtas li krixchanoetike (Deut. 32:4). ¿Kʼu yuʼun ti jech la spase? Xi laj yalbe smelolal li jtakbol Pedroe: «Mu skʼan ti oy buchʼu xbat ta lajelal junuke», li kʼusi tskʼane jaʼ ti akʼo sutes yoʼontonike (2 Ped. 3:9). Li Jeovae oy tajek ta yoʼonton li krixchanoetike, jaʼ yuʼun tskʼan ox ti akʼo sutes yoʼontonik xchiʼuk ti xchʼunik mantal kʼalal muʼyuk toʼox yakʼoj tal kastigoe (Is. 48:17, 18; Rom. 2:4).

Li avi eke, ta spʼejel balumil yakal ta xichʼ albel skʼoplal jun pʼijubtasel ti skʼan xa noʼox xchikintaik skotol li krixchanoetike. ¿Kʼusi van jaʼ? Kʼalal ay ta balumil li Jesuse, laj yal ti jaʼo chlaj li chopol balumil kʼalal xyaket jun «mukʼta tsatsal [vokolile]» (Mat. 24:21). Laj yal jun albil kʼop ti bu jamal la xchapbe smelolal li kʼusitik chilik xchiʼuk li kʼusitik tsnuptanik li yajchankʼoptak kʼalal jutuk xa ox skʼan xkʼot ta pasel li vokolil taje. Laj yal ti oy kʼusitik chkʼotanuk ta pasel ta spʼejel balumile. Taje jaʼ xa jech yakal chkakʼtik venta li avie (Mat. 24:3-12; Luk. 21:10-13).

Jaʼ yuʼun, li Jeovae yakal chalbe skotol krixchanoetik ti akʼo xchʼunik mantal xchiʼuk ti akʼo xtunik ta stojolale. Oy tajek ta yoʼonton ti xmuyubajikuk noʼox xkuxiik avi xchiʼuk ti staik epal bendision ta achʼ balumil li buchʼutik chchʼunbeik smantale (2 Ped. 3:13). ¿Kʼusi spasoj Jeova yoʼ xchʼunik li kʼusitik jamal yaloj tspase? Jaʼ ti yakal xa chichʼ cholbel skʼoplal «li lekil aʼyejetik ta sventa li [Ajvalilale]». Mi la xchʼunik li aʼyej taje, xuʼ me xkolik-o. Xi laj yal li Jesuse: «Ta xichʼ cholel ta spʼejel balumil sventa xaʼi skotol li jteklumetike» (Mat. 24:14). Jech oxal, xchapanoj yajtuneltak yoʼ xcholik mantal ta 240 lumetik. Jech spasoj tal ta skoj ti oy tajek ta yoʼonton ti epuk buchʼutik xaʼiik li pʼijubtasele, vaʼun ti xkolik komel mi laj yakʼ talel kastigoe (Sof. 1:14, 15; 2:2, 3).

Jech kʼuchaʼal laj xa jchantik tale, li kʼusi mas tsots skʼoplal skʼan xkaʼibetik smelolale maʼuk ti kʼu sjalil tspʼijubtasan krixchanoetik li Jeova kʼalal chakʼ talel kastigoe, yuʼun baʼyel xa onoʼox chal tal. Li kʼusi tsots skʼoplal skʼan xkaʼibetik smelolale jaʼ mi ta xchʼunik li pʼijubtasel yoʼ to oy yoraile. Jaʼ yuʼun chaʼa, ¿kʼusi skʼan jpastik li yajtunelutik Diose? Jaʼ ti xkakʼtik-o batel persa skoltael li krixchanoetik yoʼ kuxuluk xkomik mi tal slajeb li chopol balumile.