1, 2. ¿Kʼusi skʼan spas Timoteo jech kʼuchaʼal chal 1 Timoteo 6:20?

KʼALAL oy kʼusi ep sbalil kuʼuntike, xuʼ van chkakʼtik ta kʼejel. Jech kʼuchaʼal liʼe, xuʼ van jtikʼ jtakʼintik ta vanko sventa mu xchʼay kuʼuntik o sventa mu xkichʼtik elkʼanbel. Jaʼ yuʼun, jnaʼojtik xa kʼu yelan kʼalal oy buchʼu chkakʼbetik xchabi li kʼusi ep sbalil kuʼuntike.

² (Kʼelo 1 Timoteo 6:20). Li jtakbol Pabloe la svulesbe ta sjol Timoteo ti oy kʼusi ep sbalil staoje: snaʼoj lek kʼusi tskʼan tspas Dios ta stojolal li krixchanoetike. Jech xtok, li Timoteoe akʼbat sbain yuʼun Jeova ti xchol li «lekil aʼyeje» (2 Tim. 4:2, 5). Xi to albat yuʼun li Pabloe: «Chabio me lek li kʼusi la-akʼbat abaine». Li voʼotik eke oy kʼusitik ep sbalil yakʼoj jbaintik li Jeovae. ¿Kʼusitik jaʼ? Xchiʼuk ¿kʼu yuʼun skʼan jchabitik li jmotontike?

3, 4. ¿Kʼu yuʼun toj ep sbalil li kʼusitik melel chal Vivliae?

³ Li Jeovae ta slekil yoʼonton yakʼoj kojtikintik li kʼusitik melel chal ta Vivliae. Toj ep sbalil taje, ¿kʼu yuʼun? Yuʼun chakʼ kiltik kʼuxi xuʼ xkamigointik Jeova xchiʼuk ti kʼuxi xuʼ xijmuyubaj ta melele. Kʼalal chlik jchantik li kʼusitik melele xchiʼuk mi chkakʼ ta jkuxlejaltike, chijkol lokʼel ta skʼob li jecheʼ chanubtaseletike xchiʼuk li ta mulivajele (1 Kor. 6:9-11).

⁴ Yan srasonal ti kʼu yuʼun ep sbalil li kʼusitik melel chal Vivliae jaʼ ti jaʼ noʼox chakʼbe snaʼ Jeova li buchʼutik bikʼit yakʼoj sbaike xchiʼuk ti «oy lek ta yoʼontonik» mantale (Ech. 13:48). Li buchʼutik bikʼit yakʼoj sbaike lek chaʼiik ti jaʼuk xchanubtasatik ta Vivlia yuʼun li tukʼil xchiʼuk pʼijil mosoile  (Mat. 11:25; 24:45). Persa onoʼox chtun kuʼuntik koltael sventa xkaʼibetik smelolal li kʼusi chal Vivliae. ¡Stuk xa noʼox jech kʼalal chkaʼibetik smelolale! (Prov. 3:13, 15).

5. ¿Kʼusi to mas yakʼoj jbaintik li Jeovae?

⁵ Oy to yan kʼusi yakʼoj jbaintik li Jeovae: jaʼ ti jchanubtastik yantik sventa xojtikinike xchiʼuk ti snaʼik li kʼusi oy ta yoʼonton tspase (Mat. 24:14). Toj ep sbalil li kʼusi chkakʼtik ta chanele, yuʼun xuʼ xkʼotik-o ta yutsʼ yalal Jeova xchiʼuk xuʼ sta-o xkuxlejalik sbatel osil (1 Tim. 4:16). Akʼo mi ep o mi jutuk ta jcholtik mantal, yakal me ta jkolta jbatik spasel li abtelal ti mas tsots skʼoplal ta jkʼakʼaliltike (1 Tim. 2:3, 4). ¡Mu kʼusi xkoʼolaj-o ti xuʼ jchiʼintik ta abtel li Diose! (1 Kor. 3:9).

6. ¿Kʼusi kʼot ta stojolal junantik ermanoetik ta voʼne ti muʼyuk la skʼel sbaike?

⁶ Kʼalal jaʼo kuxi li Timoteoe, oy junantik ermanoetik ti muʼyuk ep sbalil laj yilik ti xuʼ jmoj x-abtejik xchiʼuk Diose. Kalbetik junchibuk skʼelobil. Li Demase «jaʼ la skʼan skotol li kʼusitik oy ta [balumile]», vaʼun muʼyuk xa bat xchiʼin ta abtel li Pabloe (2 Tim. 4:10). Li Fijelo xchiʼuk Ermojenes eke laj yiktaik cholmantal ta skoj ti chiʼik van mi xichʼik kontrainel jech kʼuchaʼal li Pabloe (2 Tim. 1:15). Jech xtok, li Imeneo, Alejandro xchiʼuk Filetoe la svalopatinik komel li mantale (1 Tim. 1:19, 20; 2 Tim. 2:16-18). Li viniketik taje tsotsik toʼox ta mantal, pe ta tsʼakale, muʼyuk xa ep sbalil laj yilik li kʼusi sbainojike.

7. ¿Kʼusitik tstunes Satanas sventa sloʼlautike?

⁷ ¿Kʼusitik tstunes Satanas sventa muʼyukuk sbalil xkiltik li kʼusi yakʼoj jbaintik Jeovae? Jkʼeltik junantik. Tstunes chʼayob oʼontonaletik, li kʼusitik chjelav ta televisione, ta Internet o ta yan kʼusitik sventa sjel jtalelaltik, li kʼusitik ta jnoptike xchiʼuk li kʼusitik ta jpastik ti xuʼ kʼunkʼun xijnamaj-o ta stojolal Jeovae. Jech xtok, tstunes yan krixchanoetik sventa slabanutik o skontrainutik yoʼ x-och xiʼel ta koʼontontik xchiʼuk ti xkiktatik li cholmantale. Tskʼan tsloʼlautik xtok sventa jchikintatik li kʼusi chalik li jvalopatinej mantaletik yoʼ xkiktatik komel li mantale (1 Tim. 6:20, 21).

8. ¿Kʼusi chakʼ kiltik li kʼusi kʼot ta stojolal Daniele?

⁸ Mi muʼyuk laj kichʼ jpʼijiltike, xuʼ van ta kʼunkʼun xkiktatik komel li mantale. Kalbetik skʼoplal Daniel * ti jaʼ toʼox chʼayem-o xchʼulel li tajimol ta videojuegoe. Xi chale: «Te van lajuneb toʼox jabil kichʼoj kʼalal lik tajinkun ta videojuegoe.  Ta slikebe, muʼyuk toʼox mas kʼusitik chopol chitajin-o. Pe kʼunkʼun lik jeluk batel, kʼalal laj kakʼ ventae, jaʼ xa chitajin-o li videojuegoetik ti yichʼoj ep majbaile xchiʼuk ti nitil skʼoplal ta pukujetike». Ta skoj ti meʼin ta yoʼontone, te van 15 ora xa ta kʼakʼal chtajin. Xi to chale: «Laj to kakʼ venta ti yakal tsnamajesun ta stojolal Jeova li kʼusitik chitajin-oe xchiʼuk ti kʼu sjalil te xchʼayet-o koʼontone. Pe pimubem xa ox li koʼontone, jaʼ yuʼun la jnop ti maʼuk jventa li beiltaseletik ta Vivliae». ¿Kʼusi chakʼ kiltik taje? Jaʼ ti xuʼ ta kʼunkʼun xkiktatik-o mantal li kʼusi ta jchʼay-o koʼontontike. Mi jech kʼot ta jtojolaltike, xuʼ van xkiktatik-o komel li kʼusitik ep sbalil yakʼojbutik Jeovae.

9. Jech kʼuchaʼal chal 1 Timoteo 1:18 xchiʼuk 19, ¿kʼusi la skoʼoltajes-o Timoteo li Pabloe?

⁹ (Kʼelo 1 Timoteo 1:18, 19). Li Pabloe la skoʼoltajes ta jun soltaro li Timoteoe xchiʼuk xi laj yalbee: «Jechuk-o me xapas batel li lekil paskʼope». Pe taje maʼuk batsʼi paskʼop, yuʼun jaʼ ta mantal. Li voʼotike, ¿kʼuxi ti xijkoʼolaj ta soltaroetik ti yakalik ta paskʼope? ¿Kʼusi talelaletik skʼan oyuk kuʼuntik ta skoj ti kʼotemutik ta yajsoltarotak Kristoe? Ti koʼoltasvan ta soltaro li Pabloe chakʼ jchantik voʼtos kʼusi xuʼ jpastik sventa mu xkiktatik li mantale. Jkʼeltik batel.

10. ¿Kʼusi smakoj li yichʼel ta mukʼ Diose, xchiʼuk kʼu yuʼun toj tsots skʼoplal?

¹⁰ Ayanuk ta koʼontontik li yichʼel ta mukʼ Diose. Tukʼ chakʼ sba li jun lekil soltaroe. Tsots tspas kʼop sventa xchabi li buchʼu skʼanoje o li kʼusi ep sbalil chaʼie. Li Pabloe la stijbe yoʼonton Timoteo sventa x-ayanuk ta yoʼonton li yichʼel ta mukʼ Diose, jaʼ xkaltik, ti skʼanojuke xchiʼuk ti tukʼuk xakʼ sba ta stojolale (1 Tim. 4:7). Kʼalal mas tsʼunul ta koʼontontike, mas jpʼel ta koʼontontik ti muʼyuk chkiktatik li mantale (1 Tim. 4:8-10; 6:6).

11. ¿Kʼu yuʼun skʼan jchanubtas jbatik ta spasel li kʼusi leke?

¹¹ Jchanubtas jbatik ta spasel li kʼusi leke. Li jun soltaroe skʼan xchanubtas sba lek sventa spas li kʼusi sbainoje. Li Timoteoe lek la spas li kʼusi sbainoj ta skoj ti jaʼ yajsoltaro Kristoe, yuʼun la xchʼun li tojobtaseletik akʼbat yuʼun Pabloe: ti xikta komel li kʼusitik chopol tskʼan yoʼontone, ti xchʼies lekil talelaletike xchiʼuk ti xchiʼin li ermanoetike (2 Tim. 2:22). Sventa spas yuʼun taje, skʼan xchanubtas sba ta spasel li kʼusi leke. Jaʼ jech skʼan jpastik ek sventa mu stsalutik li kʼusi chopol tskʼan koʼontontike (Rom. 7:21-25). Jech xtok, skʼan jchanubtas jbatik lek mi ta jkʼan ta jeltik li jmol talelaltik sventa jaʼuk jlaptik li achʼ talelale (Efes. 4:22, 24). Kʼalal lubem xa chnel kuʼuntik abtel ta mal kʼakʼale, skʼan van xkakʼtik persa sventa xijbat ta tsobajel (Ebr. 10:24, 25).

12. ¿Kʼuxi xuʼ xijtojob mas ta chanubtasvanej?

¹² Sventa xtojob lek stunesel yabtejebtak li jun soltaroe, skʼan nopolik noʼox xchan skʼob o nopolik noʼox stunes. Jaʼ jech li voʼotik eke, skʼan xijtojob lek stunesel li Skʼop Diose (2 Tim. 2:15). Li tsobajeletike xuʼ skoltautik sventa xijtojob stunesele. Pe mi ta jkʼan ta jkoltatik yantik yoʼ xakʼik venta ti ep sbalil li kʼusi chal Vivliae, skʼan oyuk lek yorail kuʼuntik sventa jchan jtuktik li Vivliae. Li Skʼop Diose xuʼ skoltautik sventa stsatsub li xchʼunel koʼontontike. Pe mu baluk noʼox ti jkʼeltike. Yuʼun skʼan jnopbetik skʼoplal li jujun versikulo ta jkʼeltike xchiʼuk ti jsabetik  smelolal ta jvuntik yoʼ xkaʼitik lek xchiʼuk ti xijtojob xchapbel smelolale (1 Tim. 4:13-15). Vaʼun, lek ta jtunestik Vivlia sventa jkoltatik li yantike. Pe mu baluk noʼox ti jkʼelbetik jun teksto ta Vivliae, skʼan jkoltatik sventa xaʼibeik smelolal xchiʼuk ti xilik kʼuxi tstabeik sbalile. Mi nopolik noʼox ta jchantik li Vivliae, mas me chijtojob ta chanubtasvanej (2 Tim. 3:16, 17).

13. Jech kʼuchaʼal chal Ebreos 5:14, ¿kʼu yuʼun skʼan jchanubtas lek li jnopbentike?

¹³ Jchanubtas lek li jnopbentike. Li jun soltaroe skʼan skʼel lek li kʼusi xuʼ sta-o svokole xchiʼuk skʼan mu spas. Jaʼ jech li voʼotik eke, skʼan jkʼeltik li kʼusi xuʼ jta-o jvokoltike, vaʼun skʼan mu jpastik (Prov. 22:3; kʼelo Ebreos 5:14). Jech kʼuchaʼal liʼe, skʼan jtʼujtik lek li kʼusi ta jchʼay-o koʼontontike. Yuʼun ep ta velta chakʼik ta ilel mulivajel li ta television xchiʼuk ta pelikulaetike. Jaʼ yuʼun, muʼyuk ta jkʼeltik, yuʼun jnaʼojtik ti xuʼ kʼunkʼun snamajesutik ta stojolal li Jeovae. Jnaʼojtik ti spʼajoj mulivajel li Diose xchiʼuk ti jaʼ noʼox tsta svokol stuk li buchʼu chmulivaje xchiʼuk chakʼbe svokol li yantike (Efes. 5:5, 6).

14. ¿Kʼusitik la spas Daniel ta skoj ti la stunes lek snopbene?

¹⁴ Li Daniel ti laj kalbetik skʼoplal ta parafo 8 laj yakʼ venta ti muʼyuk lek ti jaʼ chtajin-o li videojuegoetik ti yichʼoj ep majbaile xchiʼuk ti nitil skʼoplal ta pukujetike. La sabe skʼoplal ta Watchtower Library sventa stsal yuʼun li kʼusi meʼinem ta yoʼontone. ¿Kʼusi kʼot ta pasel? Laj yikta li chopol videojuegoetike, la stupʼ sbi ti chtajin ta Internete xchiʼuk laj yikta li xchiʼiltak ta tajimole. Xi chal li Daniele: «Muʼyuk xa te bajalun-o ta yut na chitajin ta videojuego, mas xa lik jchiʼin li ermanoetik ta tsobobbaile o yan kʼusitik ta jpas». Avie, chtun xa ta prekursor xchiʼuk ta mol ta tsobobbail.

15. ¿Kʼu yuʼun xuʼ jta-o jvokoltik li jecheʼ loʼiletike?

¹⁵ Jech kʼuchaʼal la spas li Timoteoe, teuk ta joltik ti xuʼ jta-o jvokoltik li kʼusi jecheʼ tspukbeik skʼoplal li jvalopatinej mantaletike (1 Tim. 4:1, 7; 2 Tim. 2:16). Jech kʼuchaʼal liʼe, xuʼ van chalik jecheʼ loʼiletik ta stojolal kermanotaktik o steklumal Jeova sventa mu xa jpat koʼontontik ta stojolale. Xuʼ me skʼunibtas xchʼunel koʼontontik li jecheʼ loʼiletik taje. Mu xkakʼ  jbatik ta loʼlael, yuʼun te likem talel ta stojolal «li viniketik ti sokem snopbenike xchiʼuk ti mu xaʼibeik smelolal li kʼusi melele», ti jaʼ noʼox tskʼanik ti xlik kʼop kuʼuntike (1 Tim. 6:4, 5). Tskʼan tsloʼlautik xchiʼuk ti mu xa jpat koʼontontik ta stojolal li kermanotaktike.

16. ¿Kʼusitik skʼan mu xchʼay-o koʼontontik?

¹⁶ Mu me xchʼay koʼontontik. Ta skoj ti jaʼ lekil yajsoltaro Kristo Jesus li Timoteoe, skʼan jaʼ xakʼ ta yoʼonton li cholmantale, ti mu jaʼuk xchʼaybat yoʼonton li saʼel kʼulejale o li kʼusitik yan snopoj tspase (2 Tim. 2:3, 4). Li voʼotik eke skʼan mu xkakʼtik ti xchʼay koʼontontik li stsobel kʼulejale. Yuʼun «li jloʼlavanej kʼulejal ti tsots sjuʼele» xuʼ me snamajesutik ta stojolal Jeova, ti mu xa epuk sbalil xkiltik li kʼusi chal Vivliae xchiʼuk ti muʼyukuk xa ta koʼontontik li cholmantale (Mat. 13:22). Lekuk noʼox sba li jkuxlejaltike xchiʼuk jaʼuk xkakʼ ta koʼontontik saʼel «baʼyel li Ajvalilal yuʼun Diose» (Mat. 6:22-25, 33).

17, 18. ¿Kʼusi skʼan jpastik sventa jchabi jbatik ta mantal?

¹⁷ Kak jnoptik li kʼusi xuʼ jpastike. Li jun soltaroe kak xa onoʼox skʼan snop kʼusi xuʼ spas mi oy kʼusi la snuptane. Mi ta jk’an ta jchabitik li kʼusitik yakʼojbutik Jeovae, skʼan ta anil no’ox kʼusi jpastik mi oy kʼusi xibal sba chkiltike. ¿Kʼusi xuʼ skoltautik? Jaʼ mi kak xa onoʼox ta jnoptik kʼusi ta jpastik kʼalal oy kʼusi ta jnuptantike.

¹⁸ Kalbetik junuk skʼelobil. Kʼalal ta jlomestik jtekʼuk teʼe, kak xa onoʼox ta jkʼeltik bu xuʼ xijbat sventa xijatavutik. Taje jaʼ sventa jnaʼojtikuk xa bu chijbat kʼalal chlom li teʼe. Jaʼ jech skʼan jpastik ek kʼalal chij-och ta Internet, ta jkʼeltik pelikula o televisione, yuʼun skʼan jkʼeltik bu xuʼ xijatavutik echʼel xkaltik kʼalal ta jtatik ta ilel li kʼusi te yakʼoj li jvalopatinej mantaletike o kʼalal chvinaj tal mulivajel o majbaile. Mi kak xa onoʼox la jchapan jbatike, oy kʼusi ta jpastik ta anil sventa jchabi jbatik ta mantal xchiʼuk ti lekuk-o xilutik li Jeovae (Sal. 101:3; 1 Tim. 4:12).

19. ¿Kʼusitik ta jkʼupintik mi la jchabitik li kʼusitik ep sbalil yakʼojbutik Jeovae?

¹⁹ Skʼan jchabitik li kʼusitik ep sbalil yakʼojbutik Jeovae: jaʼ ti xkojtikintik li kʼusi melel chal Vivliae xchiʼuk ti xuʼ xkalbetik batel li yantike. Mi jech la jpastike, muʼyuk te xvulvun li jol koʼontontike, lek noʼox jkuxlejaltik xchiʼuk xijmuyubaj kʼalal chkakʼbetik yojtikinik Jeova li yantike. Tskoltautik Jeova sventa jchabitik li kʼusi yakʼoj ta jbatike (1 Tim. 6:12, 19).