LI JTAKBOL Pabloe akʼbat snaʼ yuʼun Dios baluneb talelaletik ti chakʼ li chʼul espiritue * (Gal. 5:22, 23). Skotol taje jaʼ li kʼusi ch-akʼbat tspas yuʼun achʼ talelal li yajtsʼaklom Kristoe (Kol. 3:10). Jech kʼuchaʼal jpets teʼ ti chakʼ lek sat kʼalal lek kʼuxubinbile, li jun krixchanoe ta me xakʼ ta ilel lek stalelal kʼalal ch-abtej ta xkuxlejal li xchʼul espiritu Diose (Sal. 1:1-3).

Li baʼyel talelal laj yalbe skʼoplal li Pabloe jaʼ li kʼanelale. ¿Kʼu yuʼun toj tsots skʼoplal li talelal taje? Li Pabloe xi laj yale: «Mi mu jnaʼ xikʼanvane, muʼyuk kʼusi jtu un bi», xi (1 Kor. 13:2). Pe, ¿kʼusi jaʼ li kʼanelale? ¿Kʼu yelan xuʼ jchʼiestik? Xchiʼuk ¿kʼu yelan xuʼ xkakʼtik ta ilel ta jkuxlejaltik skotol kʼakʼal?

Vokol ta alel ta jaypʼeluk noʼox kʼop kʼusi jaʼ li kʼanelale, pe li Vivliae chalbutik kʼuxi xuʼ xkakʼtik ta ilel. Jech kʼu chaʼal liʼe, chal ti «xmalaj yuʼun xchiʼuk lek yoʼonton» li kʼanelale, «jaʼ xkuxet-o yoʼonton li kʼusi melele», «stsʼik yuʼun skotol li kʼusitike, xchʼun yuʼun skotol, spatoj yoʼonton ta skotol xchiʼuk xkuch yuʼun skotol». Jech noxtok, li buchʼu chkʼanvane oy ta yoʼonton xchiʼuk skʼanoj ta melel li yantike xchiʼuk jaʼ jun tukʼil amigoil. Pe li buchʼu mu snaʼ xkʼanvane, jaʼ noʼox ch-itʼixaj, tstoy sba, muʼyuk lek chakʼ ta ilel stalelal, jaʼ noʼox tsnop li kʼusi tskʼan stuke, oy skʼakʼal yoʼonton xchiʼuk mu snaʼ x-akʼvan ta perton. Jaʼ yuʼun, mu jaʼuk jpastik li kʼusi muʼyuk leke xchiʼuk li kʼusi chakʼ jvokoltike, jaʼuk jchʼiestik li kʼanelal ti «maʼuk tsaʼ li kʼusi lek chaʼi stuke» (1 Kor. 13:4-8).

«Jaʼ kʼanelal li Diose». Ta melel, taje jaʼ li stalelal mas tsots skʼoplal li Jeovae (1 Juan 4:8). Skotol li kʼusitik spasoje xchiʼuk li kʼusitik tspase chakʼ ta ilel ti jaʼ jeche. Li bu mas to laj yakʼ ta ilel ti chkʼanvan tajeke jaʼo kʼalal la stak talel ta Balumil li Xnichʼon sventa xil svokol xchiʼuk xcham ta jtojolaltike. Xi la stsʼiba li jtakbol Juane: «Laj yichʼ akʼel ta ilel ta jtojolaltik li kʼanelal yuʼun Diose, yuʼun la stak talel ta balumil li jun noʼox Xnichʼon sventa jtatik li kuxlejal ta stojolale. Xi yelan li kʼanelale, mu yuʼunuk voʼotik la jkʼantik li Diose, moʼoj, yuʼun jaʼ la skʼanutik xchiʼuk la stakbutik talel Xnichʼon kʼuchaʼal milbil matanal sventa jmultik yoʼ lek xkil jbatik xchiʼuk li Diose» (1 Juan 4:9, 10). Koliyal li kʼanelal yuʼun Diose xuʼ xkichʼtik pasbel perton jmultik, oy spatobil koʼontontik xchiʼuk xuʼ xijkuxi sbatel osil.

Li Jesus eke laj yakʼ ta ilel ti skʼanoj tajek li krixchanoetike, yuʼun jech la skʼan o lokʼ ta yoʼonton tal ta Balumil sventa spas li kʼusi tskʼan yoʼonton Diose. Xi la stsʼiba li Pabloe: «Ta sventa ‹li kʼusi tskʼan yoʼonton› taje, laj kichʼtik chʼultajesel ta sventa ti laj yakʼ sbekʼtal ta jun noʼox velta ta j-echʼel li Jesukristoe» (Evr. 10:9, 10). Liʼe jaʼ li smukʼta kʼelobil kʼanelal xuʼ spas jun krixchanoe. Xi laj yal li Jesuse: «Muʼyuk buchʼu yan ti toj echʼ noʼox snaʼ xkʼanvane, jaʼ noʼox li buchʼu chakʼ xkuxlejal ta stojolal li yamigotake» (Juan 15:13). Pe,  ¿mi xuʼ van jchanbetik ti kʼu yelan chakʼ ta ilel kʼanelal li Jeova xchiʼuk Jesuse? Xuʼ, akʼo mi jpasmulilutik. Jkʼeltik kʼu yelan.

Xi tstij koʼontontik li Pabloe: «Chanbeik li kʼusi tspas Diose, yuʼun skʼanbil nichʼnaboxuk xchiʼuk jechuk-o me xakʼan abaik jech kʼuchaʼal la skʼanutik li Kristoe, ti laj yakʼ sba stuk ta jkojtik jech kʼuchaʼal [matanale]» (Efes. 5:1, 2). Jaʼ yuʼun, sventa jechuk-o xijkʼanvane skʼan xkakʼ ta ilel ta jkuxlejaltik, maʼuk noʼox me ti chkaltike. Xi la tstsʼiba li Juane: «Kuni nichʼnab, skʼan xijkʼanvan, yuʼun maʼuk noʼox ti chkaltike o ti ta ketik noʼox chlokʼe, moʼoj, yuʼun skʼan xkakʼtik ta ilel ta melel ta sventa li kʼusitik ta jpastike» (1 Juan 3:18). Jech kʼuchaʼal liʼe, li kʼanelal chkaʼitik ta stojolal Jeova xchiʼuk ta stojolal li krixchanoetike jaʼ tstij koʼontontik sventa jcholtik li «lekil aʼyejetik ta sventa li [Ajvalilale]» (Mat. 24:14; Luk. 10:27). Jech xtok, chkakʼtik ta ilel kʼanelal kʼalal oy smalael kuʼuntike, kʼalal oy slekil koʼontontike xchiʼuk kʼalal jnaʼtik xij-akʼvan ta pertone. Xi tstojobtasutik li Vivliae: «Jech kʼuchaʼal muʼyuk la sjalanboxuk perton li Jeovae, jech me skʼan xapasik ek» (Kol. 3:13).

Kʼalal chijkʼanvan ta melele maʼuk me skʼan xal ti te noʼox jkʼelojtik li kʼusitik chopol chichʼ pasele. Junantik totil meʼiletike tspasik skotol li kʼusi tskʼan xnichʼnabik sventa mu x-okʼe. Pe jaʼuk li buchʼutik skʼanoj ta melel xnichʼnabike tspasbeik onoʼox li kʼusi chalbeik mi sta-o chilike. Jaʼ jech li Jeova eke «tstukʼibtas li buchʼu skʼanoje» akʼo mi jaʼ kʼanelal li stuke (Evr. 12:6). Jaʼ yuʼun, kʼalal chijtukʼibtasvan mi jech sta-o chkiltike jaʼ jech chkakʼtik ta ilel ti chijkʼanvane (Prov. 3:11, 12). Pe skʼan me teuk ta joltik ti naka jpasmulilutike, jaʼ yuʼun muʼyuk bu chkakʼtik ta ilel kʼanelal bakʼintik. Jech oxal, oy onoʼox bu skʼan jel jtalelaltik. Jkʼeltik batel oxtos ti kʼusi xuʼ skoltautike.

Baʼyel. Jkʼanbetik Dios ti akʼo xakʼbutik li xchʼul espiritue. Xi laj yal li Jesuse: «[Li Jeovae] chʼul espiritu chakʼbe li buchʼutik tskʼanike» (Luk. 11:13). Mi ta jkʼantik ta orasion li chʼul espiritue xchiʼuk mi chkakʼtik persa spasel li kʼusi tskʼane, jaʼ me tskoltautik sventa mas chijkʼanvan-o (Gal. 5:16). Jech kʼuchaʼal liʼe, li moletik ta tsobobbaile xuʼ me skʼanbeik xchʼul espiritu Dios sventa ta kʼanelaluk xakʼik li tojobtaseletik ta Vivliae. Jech noxtok, li totil meʼiletike xuʼ me skʼanbeik xchʼul espiritu Dios sventa ta slekiluk yoʼonton xalbeik mantal li yalab xnichʼnabike.

Xchibal. Jnopbetik skʼoplal ti kʼu yelan laj yakʼ ta ilel Jesus ti jech-o chkʼanvan akʼo mi laj yichʼ ilbajinele (1 Ped. 2:21, 23). Taje jaʼ skʼelobil kuʼuntik, mas to kʼalal oy buchʼu kʼux kʼusi chalbutike xchiʼuk kʼalal muʼyuk tukʼ kʼusi tspasbutike. Kʼalal jech ta jnuptantike, xuʼ van jakʼbe jbatik kʼusi tspas jechuk li Jesuse. Jech la sjakʼbe sba jun ermana ti Leigh sbie, taje jaʼ koltae sventa snop baʼyel li kʼusi tspase. Xi chale: «Jun veltae, li jchiʼil ta abtele la stakbe batel jun koreo li yan j-abteletike, chopolik tajek kʼusi laj yal batel ta jtojolal xchiʼuk ta sventa ti kʼu yelan chi-abteje. Toj kʼux bat ta koʼonton. Pe xi lajakʼbe jbae: ‹¿Kʼusi van la spas jechuk li Jesuse?›. Kʼalal la jnopbe skʼoplale, la skoltaun sventa mu masuk xkakʼ ta venta li kʼusi laj kichʼ albele. Ta tsʼakale laj kaʼi ti yuʼun tsots ipaj li jchiʼil ta abtele, jaʼ yuʼun chat tajek yoʼonton. Jech oxal laj kaʼibe smelolal ti mu yolbajuk jech la spase. Jech xtok, ti kʼu yelan laj yakʼ ta ilel kʼanelal li Jesuse jaʼ la skoltaun sventa jkʼanojuk li jchiʼil ta abtele». Jaʼ yuʼun, ta me xkakʼtik ta ilel kʼanelal mi ta jchanbetik stalelal li Jesuse.

Yoxibal. Oyuk kʼusi jpastik ta stojolal li yantike, akʼo mi xkil-o jvokoltik. Jaʼ jech tsnaʼik skotolik ti voʼotik melel yajtsʼaklomutik Kristoe (Juan 13:34, 35). Xi tstij koʼontontik li Vivliae: «Jechuk me anopbenik» kʼuchaʼal li Kristo Jesuse. Yuʼun lokʼ ta yoʼonton yiktael skotol li kʼusitik oy toʼox yuʼun ta vinajele xchiʼuk lokʼ ta yoʼonton cham ta jkojtik akʼo mi laj yil svokol (Filip. 2:5-8). Mi chkakʼtik persa oyuk kʼusitik jpastik xchiʼuk chijkʼanvanutik jech kʼuchaʼal li Jesuse, jaʼ me tskoltautik sventa  jechuk jnopbentik xchiʼuk jechuk xkaʼi jbatik kʼuchaʼal li stuke. Jech xtok, jaʼ tskoltautik sventa baʼyel xkakʼ ta koʼontontik li kʼusi chtun yuʼun li yantike. Pe, ¿kʼusi van sbalil ta jtatik mi ta jchʼiestik li kʼanelale?

Ep me sbalil ta jtabetik mi chijkʼanvanutike. Jkʼeltik batel chaʼtosuk.

• JMOJ OYUTIK XCHIʼUK LI KERMANOTAKTIK TA SPʼEJEL BALUMILE. Ta skoj ti jkʼanoj jbatik ta jujuntale buyuk noʼox li tsobobbail chbat jvulaʼantike ta sjunul yoʼonton chchʼamutik li ermanoetike. Ta melel jaʼ jun bendision ti jech jmoj jkʼanoj jbatik ta spʼejel Balumile (1 Ped. 5:9). Yuʼun jaʼ noʼox ta steklumal Jeova jech chichʼ akʼel ta ilel.

• JUN NOʼOX KOʼONTONTIK. Kʼalal ta slekil koʼonton ta jtsʼikbe jbatike xuʼ me jkʼupintik ti jun noʼox koʼontontike (Efes. 4:2, 3). Jech kaʼiojtik li jun oʼontonal ta tsobajeletik xchiʼuk li ta asambleaetike, taje muʼyuk onoʼox bu jech chkiltik ti bu nakalutik li avie, yuʼun xchʼakoj sbaik tajek (Sal. 119:165; Is. 54:13). Jech xtok, kʼalal chkakʼtik persa ti lekuk xkil jbatik xchiʼuk li yantike, jaʼ me jech chkakʼtik ta ilel ti jkʼanojtik tajek li kermanotike xchiʼuk chkakʼtik akʼo muyubajuk li Jtotik ta vinajele (Sal. 133:1-3; Mat. 5:9).

Xi laj yal li Pabloe: «Li kʼanelale jaʼ tstsatsubtasvan» (1 Kor. 8:1). ¿Kʼu yuʼun jech laj yal taje? Jaʼ ta sventa ti maʼuk tsaʼ kʼusi lek chaʼi stuk li kʼanelale (1 Kor. 10:24; 13:5). Xchiʼuk ta sventa ti oy smalael yuʼun, ti tstsak ta venta li yantike xchiʼuk ti lek yoʼontone jaʼ chkoltavan sventa masuk skʼan sbaik li utsʼ alaliletike xchiʼuk ti jmojuk oy li tsobobbaile (Kol. 3:14). Skotol taje jaʼ te laj yalbe smelolal Pablo li ta kapitulo 13 li ta baʼyel skarta la stakbe batel jkorintoetike.

Li kʼanelal chkaʼitik ta stojolal Jeovae toj echʼ xa noʼox kʼupil sba xchiʼuk tstsatsubtasvan. Ta skoj li kʼanelal taje xuʼ koʼol xchiʼuk xmuyubaj chtunik ta stojolal Jeova li krixchanoetike akʼo mi jeltos stsʼunbalik, slumalik xchiʼuk skʼopik (Sof. 3:9). Jaʼ yuʼun, kakʼtik ta ilel ti bu kʼalal xuʼ kuʼuntik li talelal chakʼ chʼul espiritu taje.