1. ¿Kʼuxitik xuʼ koʼol xij-abtej xchiʼuk li Jeovae?

KʼALAL la spasutik li Jeovae, oy ox ta yoʼonton ti jkolta jbatik ta sventa li kʼusitik oy ta yoʼonton tspase. Akʼo mi jpas mulilutik xa li avie, pe xuʼ to jkoltatik ta abtel sil kʼakʼal li Jeovae. ¿Kʼuxi tspas kuʼuntik taje? Li Skʼop Diose chal ti xuʼ ‹jchiʼintik ta abtel Dios› kʼalal ta jcholtik mantal xchiʼuk kʼalal ta jpastik ta yajtsʼaklom Kristo li krixchanoetike (1 Kor. 3:5-9). Li Jpasvanej kuʼuntik ti skotol xuʼ yuʼune sta-o chil ti jkoltatik li ta jun abtelal ti toj tsots skʼoplale, ta melel jaʼ jun mukʼta matanal. Pe oy to yan kʼuxitik xuʼ jchiʼintik ta abtel li Jeovae. Jaʼ yuʼun li ta xchanobil liʼe ta jkʼeltik batel junantik. Baʼyel, jaʼo kʼalal ta jkoltatik li kutsʼ kalaltik xchiʼuk li ermanoetike. Xchibal, kʼalal lek jnaʼ xijchʼamvane. Xchiʼuk yoxibal, jaʼo kʼalal chlokʼ ta koʼonton jtuktik skoltael li j-organisasiontike xchiʼuk kʼalal chkepajes li kabteltik ta mantale (Kol. 3:23).

2. ¿Kʼu yuʼun mu stakʼ jkoʼoltas jbatik xchiʼuk yantik ta sventa li kʼusitik spas kuʼuntik ta yabtel Jeovae?

² Mi la jtambetik batel skʼelel li xchanobil liʼe, mu me xlik jkoʼoltas jbatik xchiʼuk yantik ta sventa li kʼusitik spas kuʼuntik li ta yabtel Jeovae. Skʼan teuk ta joltik ti jelajtik li jabilaltike, li kʼusitik ta jnuptantike, li kʼusitik xijtojob spasele xchiʼuk oy jlome iputik noʼox xchiʼuk yantike mu masuk jnaʼ xij-ipajutik. Xi akʼbat snaʼ yuʼun Dios li  jtakbol Pabloe: «Ta jujuntal kʼelo abaik ta skoj li kʼusi chapasike, vaʼun oy srasonal sventa xkuxet noʼox avoʼontonik ta atojolal atukik, maʼuk xamuyubajik ta skoj ti chakoʼoltas abaik xchiʼuk li yantike» (Gal. 6:4).

3. ¿Kʼu yuʼun chkaltik ti yakal tskoltaik ta abtel Jeova li buchʼutik chakʼbe kʼusi chtun yuʼun yutsʼ yalalike?

³ Li Jeovae oy ta yoʼonton ti xchabi yutsʼ yalalik li yajtuneltake. Jech kʼuchaʼal liʼe, jlome persa skʼan x-abtejik yoʼ xakʼbe li kʼusi chtun yuʼun yutsʼ yalalike. Jech xtok oy ep meʼiletike chkom xchabi yalabik li ta snaike, junantik ermanoetik xtoke skʼan xchabi stot smeʼik ta skoj ti yijik xae. Taje jaʼik li kʼusitik persa skʼan pasele, yuʼun xi chal li Skʼop Diose: «Mi oy buchʼu mu xakʼbe kʼusi chtun yuʼun li buchʼutik oy ta sba skʼelele, mas to li buchʼutik te oyik ta snae, laj xa spʼaj li xchʼunel oʼontonale, mas to me chopol chkʼot, jaʼ mu sta li buchʼu chʼabal xchʼunel yoʼontone» (1 Tim. 5:8). Kʼalal jaʼ jech yakal ta jnuptantik taje, xuʼ van mu spas kuʼuntik skotol li kʼusitik sventa mantale akʼo mi oy ta koʼontontik. Pe skʼan mu xijchibaj, yuʼun li Jeovae xmuyubaj tajek kʼalal chkakʼbetik li kʼusi chtun yuʼun kutsʼ kalaltike (1 Kor. 10:31).

4. 1) ¿Kʼusi xuʼ spasik li totil meʼiletik sventa baʼyeluk xakʼ ta xkuxlejalik li Ajvalilal yuʼun Diose? 2) ¿Kʼusi lek chkʼot ta pasel mi jech la spasike?

⁴ Yan xtok ti kʼuxi xuʼ koʼol x-abtejik xchiʼuk Jeova li totil meʼiletike jaʼo kʼalal tstijbeik yoʼonton yalab xnichʼnabik yoʼ xtunik mas ta stojolal li Jeovae. ¿Kʼu yuʼun ti jech chkaltike? Yuʼun mi jech tspasik li totil meʼiletike, chtijbat yoʼonton li ololetik sventa xlik tunikuk ta tsʼakal ora xchiʼuk ti nom chbat tunikuke. Junantike chtunik ta misioneroal, yantik xtoke te chtunik ta prekursor yoʼ bu chtun tajek jcholmantaletike xchiʼuk jlome te chtunik ta Betel. Ta skoj ti nom to chbatik ta nakleje, li totil meʼiletike nom staj to chil li yalab xnichʼnabike akʼo mi tskʼan xa tskʼelik yaʼiik. Akʼo mi jech, li totil meʼiletik ti maʼuk tspasik li kʼusi tskʼan stukike tstijbeik yoʼonton yalab xnichʼnabik sventa teuk-o xtunik ti bu batemike. ¿Kʼu yuʼun ti jech tspasike? Yuʼun xmuyubajik tajek kʼalal chilik ti jaʼ baʼyel yakʼoj ta xkuxlejalik li Ajvalilal yuʼun Diose (3 Juan 4). Epal totil meʼiletik ti jaʼ jech tspasike jaʼ van jech chaʼi sbaik kʼuchaʼal li Anae, yuʼun li stuke laj yal ti laj yakʼbe Jeova li skerem ti Samuel sbie. Jech oxal, xuʼ snopbeik skʼoplal ti jaʼ jun matanal kʼalal jech tspasik eke xchiʼuk ti mu kʼusi xkoʼolaj-oe (1 Sam. 1:28).

5. ¿Kʼuxitik xuʼ xijkoltavan li ta tsobobbaile? (Kʼelo li lokʼol ta slikebale).

⁵ Pe ¿kʼusi xuʼ jpastik mi muʼyuk kʼusi jbainojtik skʼelel jech kʼuchaʼal li kʼusi laj yichʼ alel tale? Xuʼ van jkoltatik li ermanoetik ti yijik xae, li buchʼutik ipik noʼoxe o li buchʼutik oy kʼusi chtun yuʼunike. Jech xtok xuʼ jkoltatik li buchʼutik oy ta sbaik xchabiel li ermanoetik laj xa kaltike. ¿Kʼu yuʼun mu xa chakʼbe yorail sventa xakʼel mi oy buchʼu xuʼ xakolta li ta tsobobbaile? Jnoptik noʼox ti oy jun ermana ti yakal chchabi stot ta skoj ti yij xae, ¿kʼu yuʼun mu xbat jkoltatik li ermano ti yij xa sventa xuʼuk kʼusi yan spas li stsebe? Jech xtok, lek me ti xlokʼuk ta koʼontontik yikʼel batel ta tsobajel junuk ermano, ti xbat jmanbetik tal li kʼusi chtun yuʼun yantike o ti oy buchʼu xkikʼtik batel ta ospital mi te oy junuk yutsʼ yalale. Mi jech la jpastike, xuʼ van jaʼ jech ta jkoltatik Jeova yoʼ stakʼbe s-orasion li ermanoetike (kʼelo 1 Korintios 10:24).

6. ¿Kʼusi skʼan xal kʼalal ‹lek xachʼamvanik› xie?

⁶ Li buchʼutik tskoltaik ta abtel li Diose ojtikinbilik ti toj lek snaʼ xchʼamvanike. Li ta Tsʼibetik ta Griego Kʼop ti ‹lek xachʼamvanik› xie, jaʼ skʼan xal ‹ti xkakʼtik ta ilel slekil koʼontontik ta stojolal li jyanlumetike› (Evr. 13:2, tsʼib ta yok vun). Li Vivliae yichʼoj epal loʼiletik ti xuʼ xchanubtasutik sventa lekuk jnaʼ xijchʼamvane (Gén. 18:1-5). Toj lek me ti jnopes jbatik ta  skoltael li yantike, mu ventauk mi jaʼ «li buchʼutik koʼol xchʼunel koʼontontik jchiʼuktike» o mi maʼuk (Gal. 6:10).

7. ¿Kʼu yuʼun skʼan lek jchʼamtik li buchʼutik chtunik ta tsʼakal orae?

⁷ Koʼol chij-abtej xchiʼuk Jeova kʼalal lek ta jchʼam ta jnatik li buchʼutik chtunik ta tsʼakal orae (kʼelo 3 Juan 5, 8). Yuʼun kʼalal jech ta jpastik taje, koʼol «ta jtsatsubtasbe jba koʼontontik» (Rom. 1:11, 12). Kalbetik skʼoplal li ermano Olafe, leʼ xa talel jayibuk jabil kʼalal mas toʼox kereme kʼot ta vulaʼal ta stsobobbail jun jkʼelvanej ta sirkuito ti muʼyuk nupuneme, pe chʼabal bu xuʼ xkom li jkʼelvanej ta sirkuitoe. Li stot smeʼ Olafe maʼuk stestigotak Jeova, pe la sjakʼbe mi xuʼ te xkom ta snaik li jvulaʼale. Vaʼun albat yuʼun stot smeʼ ti xuʼe, jaʼ noʼox ti ta siyon chkom vayuk li stuke. Pe lokʼ venta ti jech la spase, yuʼun chvul ta sjol ti toj echʼ xa noʼox lek jelav yuʼun li jun xemana taje. Xi chal kaʼitike: «Jujun kʼakʼale sob chilik xchiʼuk li jkʼelvanej ta sirkuitoe xchiʼuk kʼupilik sba kʼusi ta jloʼiltakutik kʼalal chiveʼkutik ta sobe. Li kʼusitik laj yalbune la stijbun koʼonton sventa xitun ta tsʼakal ora». Li Olafe tunem xa tal mas ta 40 jabil ta misioneroal ta epal lumetik.

8. ¿Kʼu yuʼun skʼan xkakʼtik ta ilel yutsil koʼontontik akʼo mi mu stojik ta vokol yilel? Albo junuk skʼelobil.

⁸ Ep ta tos kʼuxi xuʼ xkakʼbetik ta ilel yutsil koʼontontik li buchʼutik mu xkojtikintike akʼo mi mu stojik ta vokol li ta sba veltae. Kalbetik junuk skʼelobil. Li ta lum Españae oy jun ermana ti chakʼbe estudio jun ants ti likem ta Ecuador xchiʼuk ti Yésica sbie, lik tʼomuk yokʼel kʼalal yakal chichʼ li estudioe. Vaʼun li ermanae la sjakʼbe kʼusi tsvul-o yoʼonton, li Yesicae lik yalbe ti abol toʼox tajek sba kʼalal te toʼox nakalik ta Ecuadore xchiʼuk ti oy jun veltae chʼabal kʼusi kom stam slajesik. Kʼajomal noʼox oy jsetʼ yaʼal sventa xakʼbe yuchʼ li stsebe, kʼalal te spetoj ta skʼob li yuni tseb yoʼ svayubtase, lik spas orasion. Ta mas tsʼakal jutuke, vul tijbatuk stiʼ snaʼ yuʼun chaʼvoʼ stestigotak Jeova, pe li Yesicae jaʼ noʼox la stsakan ta utel xchiʼuk la sjat li revista laj yichʼ akʼbele. Xi tsots la stakʼanbee: «¿Mi jaʼ chkakʼbe slajes jtseb li revista liʼe?». Li ermanaetike tskʼan ox tslamajesbeik yoʼonton, pe muʼyuk kʼuxi laj yutik. Jaʼ yuʼun kʼalal jelav kʼuk sjalile, te laj yiktabeik komel jun moch ta stiʼ sna ti noj ta veʼlile. Avie, labal to chaʼi kʼalal tsvules ta sjol li slekil yoʼonton laj yakʼik ta ilel li ermanaetike, pe chopol chaʼi sba xtok yuʼun snaʼoj ti takʼbat s-orasion yuʼun li Diose, jaʼ noʼoxe muʼyuk la stsak ta venta li stuke. Ta skoj li slekil yoʼonton laj yakʼik ta ilel li ermanaetike, li Yesicae jpʼel ta yoʼonton tskʼan chtun ta stojolal li Jeovae (Ecl. 11:1, 6).

9, 10. 1) Li ta voʼneal Israele, ¿kʼusitik ora ti oy buchʼutik lokʼ ta yoʼontonik koltavanike? 2) ¿Kʼusitik skʼan kʼelel li ta tsobobbailetike?

⁹ Li ta voʼneal Israele oy jayibuk velta ti persa laj yichʼ alel ti oyuk buchʼu xlokʼ ta yoʼonton xkoltavanike (Éx. 36:2; 1 Crón. 29:5; Neh. 11:2). Li avi eke, ep ta tos kʼuxi xuʼ jchʼak jkʼakʼaltik ta stojolal li kermanotaktike, ti xkakʼbetik li kʼusi oy kuʼuntike xchiʼuk ti jkoltatik ta sventa li kʼusi xijtojob spasele. Ep sbalil ta jtatik mi jech ta jpastike, chakʼ-o jmuyubajeltik xchiʼuk ta busanbil noʼox bendisionetik ta jtatik.

¹⁰ Li Skʼop Diose tstijbe yoʼonton keremetik sventa xkʼotik ta jtunel o ta moletik ta tsobobbail, vaʼun jaʼ jech chchiʼinik ta abtel li Jeovae (1 Tim. 3:1, 8, 9; 1 Ped. 5:2, 3). Kʼalal jech tspasike, jaʼ ch-ayan-o ta yoʼontonik skoltael ta mantal li yermanoike xchiʼuk ta sventa li kʼusi chtun yuʼunike (Ech. 6:1-4). ¿Mi oy yalojbutik li moletik ta tsobobbail ti akʼo jkolta jbatik ta jcholvanej, ti jkʼeltik li vunetik ta tsobobbaile, ti jbaintik skʼelel li yosilal cholmantale, ti xijkoltavan ta skʼelel li salon yoʼ lekuk noʼox oye o ti jkolta jbatik ta yan kʼusitike? Li buchʼutik oy jech sbainojike xuʼ van chalik ti tskʼupinik tajeke yuʼun jaʼ jech ta skoltaik li yantike.

11. ¿Kʼusi sbalil la sta jun ermana ti la saʼ yamigatak li ta svaʼanel Salonetik sventa Tsobobbaile?

 ¹¹ Toj ep tsta yamigoik li buchʼutik chkoltavanik ta junuk abtelal li ta s-organisasion Jeovae. Kalbetik skʼoplal li ermana Margie ti oy xa ta 18 jabil abtejem tal li ta svaʼanel Salonetik sventa Tsobobbaile. Li ermanae chchanubtasan ta abtel li tsebal ermanaetike, jech xtok chal ti te tspatbe sba yoʼontonik ta jujuntal kʼalal jmoj ch-abtej xchiʼuk li yan ermanaetike (Rom. 1:12). Vaʼun kʼalal oy kʼusitik tsots la snuptan ta xkuxlejale, patbat tajek yoʼonton yuʼun skotol li yamigatake. ¿Mi oy batemutik jkojuk li ta svaʼanel Salonetik sventa Tsobobbaile? Xuʼ xijbat li ta abtelal taje akʼo mi mu noʼox kʼusi jnaʼtik spasel yaʼeluk.

12. ¿Kʼuxi xuʼ xijkoltavan kʼalal ch-echʼ jun tsatsal nikel, nojelal ta voʼ o yan kʼusi chkʼot ta pasele?

¹² Yan ti kʼuxi xuʼ jchiʼintik ta abtel li Jeovae, jaʼo kʼalal ta jkolta kermanotik ta sventa li kʼusi chtun yuʼunik kʼalal ch-echʼ jun tsatsal nikel, nojelal ta voʼ o yan kʼusi chkʼot ta pasele. Jtos li kʼusi xuʼ jpastike jaʼ ti xkakʼtik matanal takʼin ta sventa li buchʼutik jech chil svokolike (Juan 13:34, 35; Ech. 11:27-30). Jech xtok, xuʼ xbat koltavankutik ta xchʼubael xchiʼuk ta xchaʼmeltsanel li kʼusitik lom yuʼunike. Jun ermana ta Polonia ti Gabriela sbie batsʼi laj ta j-echʼel sna ta skoj ti echʼ jun nojelal ta voʼe, pe xkuxet to laj yaʼi kʼalal laj yil ti tal koltaatuk yuʼun ermanoetik ti te noʼox nopol stsobobbailike. Xi chal kaʼitike: «Mu jkʼan xkalbe skʼoplal li kʼusi laj kuʼune, yuʼun jnaʼoj onoʼox ti jlikel te jkʼelojbe sat li kʼusitik oy kuʼune. Jaʼ mas lek chkaʼi ti xkalbe skʼoplal li kʼusi lek kʼot ta pasele, yuʼun jaʼ laj yakʼbun jchʼun ti stuk xa noʼox jech ti te kapal jkʼoplal li ta steklumal Diose xchiʼuk ti xuʼ te jta jmuyubajele». Kʼalal chichʼ koltael li ermanoetik ti bu ch-echʼ jun tsatsal nikel, nojelal ta voʼ o yan kʼusi chkʼot ta pasele, ep buchʼutik chalik ti tstabeik sbalil li kʼusi tspas yantike. Li buchʼutik chkʼot koltavanikuke toj lek chaʼi sbaik ek (kʼelo Echos 20:35; 2 Korintios 9:6, 7).

13. Kʼalal chlokʼ ta koʼontontik skoltael li yantike, ¿kʼuxi tskoltautik yoʼ masuk to jkʼantik li Jeovae? Albo junuk skʼelobil.

¹³ Jun ermana ti Stephanie sbi xchiʼuk yan jcholmantaletike koʼol abtejik xchiʼuk Jeova ta skoltael junantik ermanoetik ti jatavemik lokʼel tal ta slumalik ta skoj li paskʼope xchiʼuk ti te xa oyik li ta Estados Unidose. La skolta sbaik ta sabel sna li ermanoetike xchiʼuk li kʼusitik  chtun ta yut nae. Xi chal sloʼil li Stephanie: «Kʼot tajek ta koʼontonkutik ti muyubajik xchiʼuk ti la stojik ta vokol kʼalal laj yilik ti skʼanoj sbaik li ermanoetik ta spʼejel balumile. Jech xtok li stukike tsnopik ti jaʼ laj yichʼik koltaele, pe jamal xkaltike mas to ep kʼusi la spasik ta jtojolalkutik. Yuʼun kʼalal kilkutik ti skʼanoj sbaike, ti oy lek xchʼunel yoʼontonike, ti jmoj noʼox tsobolik xchiʼuk ti spatoj yoʼontonik ta stojolal Jeovae mas to lik jkʼankutik li Jeova eke. Jaʼ la skoltaunkutik xtok sventa xkichʼkutik ta kʼux li kʼusitik chakʼ s-organisasion Diose».

14, 15. 1) ¿Kʼu yelan stalelal laj yakʼ ta ilel li j-alkʼop Isaiase? 2) ¿Kʼuxi xuʼ jchanbetik stalelal li j-alkʼope?

¹⁴ ¿Mi oy ta avoʼonton ti xachiʼin ta abtel mas li Jeovae? ¿Mi jpʼel ta avoʼonton chabat ta naklej ti bu chtun mas jcholmantaletik chil li j-organisasiontike? Melel onoʼox ti mu persauk xkikta komel jnatik yoʼ xkakʼtik ta ilel li slekil koʼontontike, pe junantik ermanoetike stakʼ chilik ti nom xbat tunikuke. Jaʼ jech chakʼ ta ilel stalelalik kʼuchaʼal li j-alkʼop Isaias ti xi jakʼbat yuʼun li Jeovae: «¿Bochʼo ta jtac batel? ¿Bochʼo xuʼ chbat cʼopojuc ta jventatic?», vaʼun li stuke xi la stakʼe: «Liʼ oyun vuʼune, tacun batel» (Is. 6:8). Kʼalal xuʼ kuʼuntik chkiltik o mi jech laj kichʼtik albele, ¿mi jaʼ jech ta jtakʼtik ta sjunul koʼontontik kʼuchaʼal li Isaiase? ¿Kʼuxitik xuʼ xijkoltavan li avie?

¹⁵ Li Jesuse xi laj yalbe skʼoplal li cholmantal xchiʼuk ti ta jpastik ta yajtsʼaklom Kristo li krixchanoetike: «Toj ep kʼusitik tsʼunbil ti skʼan tsobbel sate, pe jaʼ toj jutuk li j-abteletike. Jaʼ yuʼun chaʼa, kʼanbeik vokol li Yajval Abtel ti akʼo stak batel j-abteletik ta stsobbel sat li kʼusitik tsʼunbile» (Mat. 9:37, 38). ¿Mi xuʼ van xbat tunkutik ta prekursor ti bu skʼan to cholel mas mantale? ¿O mi xuʼ jtijbetik yoʼonton junuk ermano yoʼ xbat tunuke? Oy ep ermanoetike te yakal chtunik ta prekursor ti bu chtun mas jcholmantaletike, ti jech tspasike jaʼ sventa xakʼbeik ta ilel Dios ti skʼanojike xchiʼuk ti skʼanojik li krixchanoetike. ¿Mi oy to yan kʼuxi xuʼ xijtun mas ta stojolal li Jeovae? Mi jech la jpastike, xijmuyubaj noʼox me.

16, 17. ¿Kʼusitik yan xuʼ jpastik mi ta jkʼan chijtun mas ta stojolal li Jeovae?

¹⁶ ¿Mi ta jchʼamtik ti jech xkichʼtik takel ta ikʼel ta Betel o li ta svaʼanel Salonetik sventa Tsobobbail akʼo mi oy noʼox kʼuk sjalil xbat abtejkutik o ti junchib noʼox kʼakʼal ta xemana xbat koltavankutike? Chtun tajek ermanoetik ti ta sjunuluk yoʼonton xchʼamik kʼusuk noʼox abtelal xchiʼuk ti buyuk noʼox xtakatik batele. Taje xuʼ van te tsakal skʼoplal ti jchʼamtik junuk abtelal ti bu tskʼanik koltaele akʼo mi oy kʼusi yan xijtojob spasel xchiʼuk ti jchanojtik leke. Mu ventauk li kʼusi xijtojob spasele, yuʼun li Jeovae ep sbalil chil li buchʼutik ta sjunul yoʼonton tspasik li kʼusi chichʼ kʼanele (Sal. 110:3).

¹⁷ Kʼalal oy ta koʼontontik ti xkichʼtik chapanel mas sventa xijtun ta stojolal Jeovae, xuʼ van xnoj kuʼuntik li kʼusi chichʼ kʼanel sventa xijbat li ta Chanob vun sventa j-al lekil aʼyejetik yuʼun Ajvalilal yuʼun Diose. Li ta chanob vun taje te chichʼ chanubtasel ermanoetik xchiʼuk ermanaetik ti yakal chtunik ta tsʼakal ora yoʼ xtunesatik mas li s-organisasion Jeovae. Jech oxal, li buchʼutik tskʼan chbatik li ta chanob vun taje skʼan xchʼamik ti bu chtakatik batel kʼalal mi tsuts li xchanunike. ¿Mi oy ta avoʼonton chabat li ta chanob vun taje xchiʼuk ti oyuk kʼusi xabain mas li ta steklumal Jeovae? (1 Kor. 9:23).

18. ¿Kʼusitik sbalil ta jtatik mi ta jchiʼintik ta abtel sil kʼakʼal li Jeovae?

¹⁸ Li yajtunelutik Jeovae oy ta koʼontontik ti xkakʼtik ta ilel sil kʼakʼal li slekil koʼontontike, ti jnaʼuk xijkʼanvane, ti oyuk xkʼuxul koʼontontike xchiʼuk ti jkoltatik li yantike. Mi jech ta jpastike, jun noʼox koʼontontik, chakʼ xkuxetel koʼontontik xchiʼuk chakʼ jmuyubajeltik (Gal. 5:22, 23). Mu ventauk li kʼusitik yakal ta jnuptantike, xuʼ me xijmuyubaj kʼalal ta jchanbetik slekil yoʼonton Jeova xchiʼuk ti te jkʼoplaltik ti jaʼ jchiʼiltik ta abtele (Prov. 3:9, 10).