TA SKOJ ti yantik xa stsatsaj batel li kuxlejal ta «slajebal xa kʼakʼale», li yajtunelutik Jeovae skʼan ti oyuk stsʼikemal o smalael kuʼuntike (2 Tim. 3:1-5). Yuʼun li krixchanoetik avie nopem xaʼi ti tskʼan sba stukike, ti mu spas ta jmoj skʼopike xchiʼuk ti mu snaʼ spajes sbaike. Li buchʼutik jech stalelalik taje muʼyuk stsʼikemal yuʼunik. Jech oxal, toj lek me ti xi jakʼbe jbatike: «¿Mi jaʼ xa jech chkakʼ ta ilel jtalelal kʼuchaʼal li yan krixchanoetike? ¿Kʼusi skʼan xal ti oyuk smalael kuʼune? Xchiʼuk, ¿kʼusi xuʼ jpas sventa jechuk-o xkakʼ ta ilel ta jkuxlejal li talelal taje?».

¿Kʼusi skʼan xal kʼalal oy smalael kuʼuntik xi li Vivliae? Maʼuk noʼox skʼan xal ti ta jtsʼiktik junuk vokolile. Persa oy srasonal ti kʼu yuʼun tstsʼik jtosuk vokolil li jun krixchanoe, jaʼ xkaltik, spatoj lek yoʼonton ti ta onoʼox xlekub li kʼusitik oye. Te smakoj xtok ti maʼuk noʼox tspas li kʼusi lek chaʼi stuke, moʼoj, yuʼun chakʼ ta yoʼonton li yantike akʼo mi jaʼ li buchʼutik ch-ilbajinat yuʼune. Jech xtok, tskʼan ti akʼo xlekub ti kʼu yelan xil sba xchiʼuke. Jaʼ yuʼun chaʼa, muʼyuk labal sba chkaʼitik kʼalal chal Skʼop Dios ti mi jnaʼ xijkʼanvane oy smalael kuʼuntik (1 Kor. 13:4). * Xchiʼuk te tsakal skʼoplal xtok li ta «talelaletik chakʼ chʼul espiritue» (Gal. 5:22, 23). Pe ¿kʼusi skʼan jpastik sventa oyuk smalael kuʼuntike?

Sventa oyuk smalael kuʼuntike, skʼan jkʼanbetik li xchʼul espiritu Jeovae, yuʼun li stuke chakʼbe li buchʼutik spatoj yoʼontonik ta stojolale (Luk. 11:13). Akʼo mi tsots li sjuʼel Jeovae, pe skʼan onoʼox xkakʼ ta ilel ta jkuxlejaltik li kʼusi ta jkʼanbetik ta orasione (Sal. 86:10, 11). Jaʼ xkaltik, ti skʼan xkakʼtik persa yakʼel ta ilel skotol kʼakʼal ti oy smalael kuʼuntike, mi jech ta jpastike, chlik chʼiuk mas li ta koʼontontike. Akʼo mi jech, oy to van kʼusi skʼan jpastik sventa jechuk-o xkakʼtik ta ilel li ta jkuxlejaltike. Pe ¿kʼusi jaʼ taje?

Mi ta jkʼelbetik lek skʼoplal xchiʼuk mi ta jchanbetik slekil talelal li Jesuse, xuʼ x-ayan kuʼuntik li smalaele. Kʼalal laj yalbe skʼoplal jtakbol Pablo «li achʼ talelale», te laj yalbe skʼoplal ek li smalaele, xi laj yalbe li ermanoetike: «Akʼo sventain avoʼontonik li jun oʼontonal yuʼun Kristoe» (Kol. 3:10, 12, 15). Yoʼ jaʼuk «sventain» koʼontontik li jun oʼontonale, skʼan jchanbetik ti tsots laj yakʼ ta ilel xchʼunel yoʼonton li Jesuse, yuʼun jnaʼojtik ti jaʼ noʼox xuʼ xchapan Dios li kʼusitik ta jvul-o koʼontontike. Mi jaʼ la jchanbetik li Kristoe, muʼyuk me chchʼay kuʼuntik li jun oʼontonale akʼo mi jeltos kʼusi ta jnuptan li ta jkuxlejaltike (Juan 14:27; 16:33).

Ta jkʼantik xa tajek ti xtal li achʼ balumil ti yaloj onoʼox chakʼbutik li Diose. Pe kʼalal ta jnopbetik  skʼoplal ti oy tajek smalael yuʼun Jeova ta jtojolaltike, ta jchantik ek ti skʼan oyuk mas smalael kuʼuntike. Xi jamal chalbutik li Chʼul Tsʼibetike: «Li kʼusi yaloj Jeova chkʼot ta pasele mu yuʼunuk chjalij jech kʼuchaʼal tsnopik junantike, yuʼun stsʼikojboxuk to, mu skʼan ti oy buchʼu xbat ta lajelal junuke; moʼoj, li kʼusi tskʼane jaʼ ti xasutes avoʼonton akotolike» (2 Ped. 3:9). Kʼalal ta jnopbetik skʼoplal ti oy smalael yuʼun li Jeovae, ¿mi mu jechuk ti mas chkakʼtik ta ilel smalael kuʼuntik ta stojolal li yantike? (Rom. 2:4). Skʼan teuk ta joltik taje, yuʼun ta jkʼelbetik batel skʼoplal ti butik skʼan xkakʼtik ta ilel li smalael o stsʼikemal kuʼuntike.

Ep kʼusi ta jnuptan ta jkuxlejaltik ti skʼan xkakʼtik ta ilel li smalael kuʼuntike. Jech kʼuchaʼal liʼe, bateltike oy kʼusi ta jkʼan ta xkaltik ti tsots tajek skʼoplale, pe skʼan oyuk smalael kuʼuntik sventa mu jtuchʼtik ta be li sloʼil yantike (Sant. 1:19). Skʼan van xkakʼtik ta ilel smalael xtok kʼalal te jchiʼuktik ermanoetik ti oy kʼusi nopem xaʼiik pasel ti mu lekuk chkiltik li voʼotike. Jaʼ yuʼun skʼan mu anil kʼusi chopol jnoptik ta stojolalik, jaʼ mas lek ti jnopbetik skʼoplal kʼu yelan chakʼ ta ilel stalelalik li Jeova xchiʼuk Jesus ta sventa li kʼusitik skʼan xlekub kuʼuntike. Yuʼun maʼuk tskʼelik li kʼusitik muʼyuk lek chbat kuʼuntike, jaʼ tstsakik ta venta li kʼusi oy ta koʼontontike xchiʼuk ti chkakʼ kipaltik sventa xijlekube (1 Tim. 1:16; 1 Ped. 3:12).

Xuʼ van skʼan xkakʼtik ta ilel smalael kuʼuntik kʼalal oy buchʼu chal ti muʼyuk la lek kʼusi laj kaltik o ti oy la kʼusi chopol la jpastike. Kʼalal jech chkaʼitike xuʼ van chopol chkaʼitik xchiʼuk ta jpak jkʼoplaltik ta anil. Pe li Skʼop Diose xi chalbutik li kʼusi skʼan jpastike: «Jaʼ lec me tstsʼic cuʼuntic scotole; jaʼ chopol me jtoybautic noʼoxe. Mu me ta aniluc noʼox xaʼilin, yuʼun li ilinele jaʼ jech stalelic li bochʼotic bolique» (Ecl. 7:8, 9). Akʼo mi jecheʼ ta jyalel li kʼusi chkichʼtik albele, skʼan me jnoptik lek li kʼusi ta jtakʼtik sutele. Taje jaʼ jech kʼot ta stojolal Jesus kʼalal jecheʼ noʼox laj yichʼ akʼel ta kʼexlale (Mat. 11:19).

Li totil meʼiletike skʼan ti oyuk smalael yuʼunik kʼalal persa chilik ti tstukʼibtas li yalab xnichʼnabik sventa mu spasik li kʼusi chopole. Kalbetik skʼoplal jun ermano ti Mattias sbie xchiʼuk ti chtun ta Betel ta Escandinaviae. Kʼalal skeremal toʼoxe, chlabanat tajek yuʼun li xchiʼiltak ta chanun ta skoj li srelijione. Ta slikebale, mu snaʼ stot smeʼ mi jech chichʼ labanel. Pe kʼalal laj yaʼiike lik skʼelik kʼuxi xuʼ skoltaik, yuʼun mu xa ox xchʼun lek li kʼusi chal Vivliae. Xi chvul ta sjol li stot ti Gillis sbie: «Laj kakʼbekutik yil ti oy smalael kuʼunkutik ta stojolale». Li Mattiase xi lik sjakʼilane: «¿Buchʼu jaʼ li Diose? ¿Mi ta melel jaʼ yuʼun Dios li Vivliae? Xchiʼuk, ¿kʼuxi ta jnaʼtik mi jaʼ chal Dios li kʼusitik skʼan jpastike?». Xi to chalbe li stote: «¿Kʼu yuʼun chopol chavaʼiik mi mu jechuk ta jpas li kʼusi achʼunojike?».

Xi to chalbutik li Gillise: «Li jkeremkutike xkapet noʼox sjol tskʼoponunkutik, pe maʼuk xkapet sjol ta jtojolalkutik, jaʼ ta stojolal li Vivliae yuʼun jaʼ chakʼbe smulin li kʼusi yakal tsnuptane». ¿Kʼusi la spas li stote? Xi chale: «Oy jaykojuk ti jal la jchiʼin ta loʼile, pe jaʼ noʼox ta jchikintabe li kʼusi chale xchiʼuk bateltike oy kʼusi ta jakʼbe sventa xkaʼibe smelolal li kʼusi  tsnope xchiʼuk ti kʼu yelan chaʼi sbae. Bateltike oy kʼusi ta jchapbe smelolal xchiʼuk chkalbe ti akʼo snopbe skʼoplal sjunul kʼakʼal o mu sta sventa jchiʼin jbakutik ta loʼil yan veltae. Bateltik xtoke, chkalbe ti ta jkʼan junchibuk kʼakʼal sventa jnopbe skʼoplal li kʼusi laj yalbune. Koliyal ti nopajtik noʼox la jchiʼin ta loʼil li Mattiase, lik yaʼibe smelolal li chanubtasel chkakʼtik ta sventa li pojelale, li mukʼul pasmantal yuʼun Jeovae xchiʼuk li kʼanelal yuʼune. Jal onoʼox laj yichʼ kuʼun skoltael xchiʼuk bateltike vokol tajek laj kaʼi, akʼo mi jech, ta kʼunkʼun lik chʼiuk li kʼanelal yuʼun ta stojolal Jeovae. Ximuyubajkutik tajek xchiʼuk kajnil ti laj kakʼkutik ta ilel smalael ta stojolal Mattias kʼalal skeremal toʼoxe, yuʼun kʼot ta yoʼonton li kʼusi chal Vivliae».

Kʼalal jaʼo tskolta skeremik li Gillis xchiʼuk yajnile, spatoj tajek yoʼontonik ti chkoltaatik onoʼox yuʼun li Jeovae. Xi chal li totile: «Ep ta velta xi laj kalbekutik li Mattiase: ‹Jkʼanojkutik tajek, jaʼ yuʼun la jkʼanbekutik Jeova ta sjunul koʼontonkutik ti akʼo skoltaot ta yaʼibel smelolal li kʼusi chal Vivliae›». Xmuyubajik tajek li stot smeʼ Mattias ti muʼyuk xlubtsajik ta yakʼel ta ilel li smalael yuʼunike.

Li yajtsʼaklomtak Kristo eke skʼan ti oyuk smalael yuʼunik kʼalal chchabiik junuk yutsʼ yalalik o yamigoik ti tsakbilik ta tsatsal chamele. Jkʼelbetik skʼoplal li Ellen * ti te nakal ta Escandinavia eke.

Leʼ xa ta vaxakib jabile, li smalal Ellene chaʼkoj to paj ta abtel li xchinabe (ataque cerebral). Ta skoj taje mu xa xkʼuxubaj yoʼonton ta stojolal li yantike, muʼyuk xa xmuyubaj xchiʼuk muʼyuk xa kʼusi kʼux chaʼi mi oy kʼusi kʼot ta pasele. Taje jaʼ chlubtsanat-o li Ellene. Xi chal sloʼile: «Skʼan tajek ti oyuk smalael kuʼune xchiʼuk ti jkʼopon tajek li Jeovae». Xi to chale: «Li jkʼupil teksto ti jaʼ tspatbun-o koʼontone, jaʼ li Filipenses 4:13 ti xi chale: ‹Oy jtsatsal ta skotol ta sventa li buchʼu chakʼbun juʼele›». Koliyal ti chkoltaat yuʼun Jeova xchiʼuk ti ch-akʼbat yipale, kuchem talel yuʼun li kʼusi yakal tsnuptane (Sal. 62:5, 6).

Li Jeovae jaʼ li buchʼu mas slekil kʼelobil kuʼuntike (2 Ped. 3:15). Yuʼun li ta Vivliae ep ta velta chvinaj ti laj yakʼ ta ilel ti oy smalael yuʼune (Neh. 9:30; Is. 30:18). Jkʼeltik kʼu yelan laj yakʼ ta ilel stalelal kʼalal oy kʼusi jakʼbat yuʼun Abraan ta skoj ti tslajes li Sodomae. Kʼalal oy kʼusi la sjakʼ ta sba velta li Abraane, li Jeovae muʼyuk la smak ta be xchiʼuk la stsʼet chikintabe li kʼusi tsvul-o yoʼontone xchiʼuk li kʼusi mu xaʼibe smelolale. Ta tsʼakale, li Jeova laj yakʼbe yil ti la xchikintabe li kʼusi tsvul-o yoʼontone xchiʼuk laj yal ti muʼyuk tslajes Sodoma akʼo mi lajuneb noʼox krixchanoetik ti tukʼ yoʼontonike (Gén. 18:22-33). ¡Jaʼ jun slekil kʼelobil kuʼuntik li Jeova ti oy smalael yuʼun xchiʼuk ti snaʼ spajes sbae!

Jaʼ yuʼun chaʼa, kʼalal oy smalael kuʼuntike te tsakal skʼoplal li ta achʼ talelal ti tsots skʼoplal skʼan oyuk kuʼuntike. Jech oxal mi laj kakʼbetik yipal ti bu kʼalal xuʼ kuʼuntik sventa oyuk kuʼuntik li talelal taje, jaʼ me jech chkichʼtik ta mukʼ li jkʼanvanej Totil ta vinajel ti oy smalael yuʼune xchiʼuk ta jparteintik ek ‹li kʼusi albil xa onoʼox ta skoj ti oy xchʼunel koʼontontik xchiʼuk ti oy smalael kuʼuntike› (Evr. 6:10-12).