Li ta orijinal ta evreo kʼope xuʼ xakʼ ta aʼiel ti jaʼ laj yal li steklumal Diose o li jyanlum krixchanoetike. Pe li srasonaltak ta jkʼeltik batel liʼe chakʼ ta ilel ti jaʼ laj yalik o la skʼanik li steklumal Diose. Jkʼeltik chibuk srasonal.

1. Lek snup-o sba xchiʼuk sjunul li Salmo 144. Li bendisionetik chalbe skʼoplal ta versikulo 12 kʼalal ta 15 jamal chakʼ ta aʼiel ti jaʼ tskʼanik li buchʼutik tukʼike; ti jaʼ li buchʼutik xi tskʼanik vokole: «Coltaun me, loqʼuesun me ta scʼob li [jyanlum krixchanoetik ti toj chopolike]» (versikulo 11). Jaʼ jech chakʼ ta aʼiel ek li ta versikulo 15, yuʼun li buchʼu chib to velta ch-albat skʼoplal ti «xcuxet noʼox [yoʼontonike]» jaʼ onoʼox li buchʼutik tukʼike, ti jaʼ «li jun ta lum ti jaʼ Dios yuʼunic li Mucʼul Diose».

2. Snup-o tajek sba xchiʼuk yan tekstoetik ti jaʼ chalbe skʼoplal li bendisionetik tsta ta tsʼakal li steklumal Diose. Li Salmo 144 chakʼ ta ilel ti solel xchʼunoj lek ajvalil David ti chichʼik bendision li j-israeletike, ti ch-akʼbat skʼulejalik xchiʼuk smuyubajelik yuʼun Jeova kʼalal mi laj yichʼik pojel lokʼel ta stojolal li yajkontratakike (Lev. 26:9, 10; Deut. 7:13; Sal. 128:1-6). Jech kʼuchaʼal li Deuteronomio 28:4 xi chale: «Chichʼ bendición avalab anichʼnabic xchiʼuc scotol cʼusitic chatsʼunic. Xchiʼuc lec chchʼi yalab smeʼ avacaxic, xchiʼuc achijic, xchiʼuc scotol li cʼusitic yan oy avuʼunique». Kʼot ta pasel skotol li bendisionetik laj yichʼ alel taje. Ti kʼu sjalil ajvalilaj li xnichʼon David ti Salomon sbie, jun yoʼonton kuxi li jteklum Israele xchiʼuk ayan ep kʼusitik yuʼunik; taje muʼyuk bu jech yilojik-o. Junantik li kʼusitik kʼot ta pasele, jaʼ svinajeb li bendisionetik chakʼ tal ta jelavel li Ajvalilal yuʼun Mesiase (1 Rey. 4:20, 21; Sal. 72:1-20).

Ti kʼu xa yelan lek xkaʼibetik smelolal li Salmo 144, snup-o tajek sba xchiʼuk li kʼusi voʼne xa onoʼox tajek jmalaojtik li yajtunelutik Jeovae: ti xichʼ lajesel li chopol krixchanoetike, ti junuk xa noʼox koʼonton xijkuxie xchiʼuk ti x-epaj li kʼusitik yuʼunik li tukʼil krixchanoetike (Sal. 37:10, 11).