LI TA spʼejel balumile ta smilal xa noʼox stestigotak Jeova laj yichʼik akʼbel yabtelik ta mol o ta jtunel ta tsobobbail li echʼ jabile. Mi avichʼoj biiltasel eke, xamuyubaj van tajek yuʼun li amoton la atae.

Akʼo mi jech, xuʼ van chaxiʼ jutuk, pe taje stalel onoʼox. Xi laj yal jun kerem ti chtun ta mol ta tsobobbail ti Yeison sbie: «Kʼalal laj kichʼ biiltasele la jnop ti mu spas kuʼun li epal abtelale». Jaʼ jech laj yaʼi sbaik ek li Moises xchiʼuk Jeremiase, mu spas yuʼun laj yaʼiik li abtelal akʼbatik yuʼun li Jeovae (Éx. 4:10; Jer. 1: 6). ¿Mi oy jech avaʼioj aba ek? ¿Kʼusi xuʼ xapas yoʼ mu jechuk xavaʼi aba xchiʼuk ti xachʼi-o batel ta mantale? Jkʼelbetik batel xkuxlejal li Timoteoe (Ech. 16:1-3).

Li Timoteoe xuʼ van 20 toʼox sjabilal kʼalal lik xchiʼin ta cholmantal ta yantik lum li Pabloe. Xuʼ van xiʼ li ta slikebale xchiʼuk vokol van laj yaʼi ta spasel li yabtel ta tsobobbaile (1 Tim. 4:11, 12; 2 Tim. 1:1, 2, 7). Pe kʼalal jelavem xa ox lajunebuk jabile, li Pabloe xi laj yalbe batel li ermanoetik ta Filipose: «Oy ta koʼonton ta jtakboxuk noʼox talel Timoteo mi jech skʼan Kajvaltik Jesuse [...]. Yuʼun muʼyuk buchʼu yan ti lek baxbol kʼuchaʼal stuke» (Filip. 2:19, 20).

¿Kʼuxi ti lek tun ta mol ta tsobobbail li Timoteoe? Jkʼeltik vaktosuk kʼusitik xuʼ jchanbetik.

1. Oy ta yoʼonton li yantike. Xi laj yalbe batel ermanoetik ta Filipos li Pabloe: «Oy ta yoʼonton chchabioxuk [li Timoteoe]» (Filip. 2:20). Jaʼ jech, li Timoteoe oy tajek ta yoʼonton li yantike, yuʼun tskʼan tstsatsubtas ta mantal li ermanoetike xchiʼuk ep kʼusi oy ta yoʼonton tspas ta stojolalik.

Li William ti mas xa ta 20 jabil chtun ta mol ta stsobobbaile, xi tstojobtas li buchʼutik achʼ to laj yichʼik biiltasele: «Ta slekiluk avoʼonton xakʼopon li ermanoetike, kʼelo kʼusi jtunel yuʼunik, maʼuk noʼox xbat ta avoʼonton li kʼusitik akʼbil abaine». Mu jechuk xapas kʼuchaʼal li jtsʼot autovus ti jaʼ noʼox tsvul yoʼonton sventa xkʼot ta yorail li ta skotlebe, ti jaʼ xa mu stsak ta venta li spasajerotake.

2. Jaʼ mas tsots skʼoplal laj yil li kʼusitik ta mantale. Kʼalal laj xa ox yalbe skʼoplal Pablo li stalelaltak Timoteoe, xi to laj yale: «Skotol li yantike jaʼ noʼox tsaʼik li kʼusi tskʼan stukike, maʼuk tsaʼik li kʼusi tskʼan Jesukristoe» (Filip. 2:21). Jaʼo te oy ta Roma kʼalal la stsʼiba taje xchiʼuk laj yakʼ venta ti jaʼ batem ta yoʼontonik spasel li kʼusi tskʼan stukik li ermanoetik tee. Xuʼ xkaltik ti juteb tajek tspas yabtelik ta stojolal Diose. Pe mu jechuk la spas li Timoteoe, yuʼun kʼalal xuʼ chaʼie, ep tajek ta xchol mantal, xkoʼolaj xchiʼuk li j-alkʼop Isaias ti xi laj yale: «Liʼ oyun vuʼune, tacun batel» (Is. 6:8).

¿Kʼusi xuʼ xavut yoʼ spas avuʼun li kʼusitik ta mantal xchiʼuk li yan kʼusitik chapase? Baʼyel, skʼan xatsak ta venta li kʼusi mas tsots skʼoplale. Li Pabloe la yal ti skʼan jnaʼtik «stʼujel li kʼusi mas tsots skʼoplale» (Filip. 1:10). Jaʼuk me baʼyel xapas li kʼusi tsots skʼoplal chil Diose. Xchibal, mu xavakʼ ti xchʼaybot akʼakʼal li yan kʼusitike. Xi albat yuʼun Pablo li Timoteoe: «Jatavan  lokʼel ta sventa li kʼusi stalel tskʼan yoʼonton kerem tsebetike, jaʼ saʼo batel li tukʼilale, li xchʼunel oʼontonale, li kʼanelale, li jun oʼontonale» (2 Tim. 2:22).

3. Tsots abtej ta stojolal Jeova. Xi albatik yuʼun Pablo li ermanoetik ta Filipose: «Li voʼoxuke anaʼojik ti laj yakʼ ta ojtikinel ti lek sta-oe, ti xkoʼolaj kʼuchaʼal jun nichʼonil xchiʼuk stot kʼalal la xchiʼinun ta abtel sventa chichʼ akʼel ta ojtikinel li lekil aʼyejetike» (Filip. 2:22). Lek baxbol ta abtel li Timoteoe, jaʼ yuʼun, tsots abtej xchiʼuk li Pabloe, vaʼun mas to laj yamigoin sbaik.

Toj ep abtel skʼan pasel li ta s-organisasion Jeovae, chamuyubaj tajek mi chakoltavane xchiʼuk mas me lek chavil aba xchiʼuk li ermanoetike. Oyuk-o me ta avoʼonton tsots xa-abtej ‹ta sventa li yabtel Kajvaltike› (1 Kor. 15:58).

4. La spas li kʼusi la xchane. Li Pabloe xi laj yalbe li Timoteoe: «Li voʼote lek onoʼox atsʼaklioj talel li chanubtaseletik kuʼune xchiʼuk lek atsʼetanoj achikin, ti kʼu yelan likuxi tale, li kʼusi oy ta koʼonton staele, li xchʼunel koʼontone, ti tsʼikem kuʼune, li kʼanelal kuʼune, ti kuchem kuʼune» (2 Tim. 3:10). Ta skoj ti la spas li kʼusi la xchan li Timoteoe, akʼbat to sbain yan abtelaletik (1 Kor. 4:17).

¿Mi oy junuk ermano ti yij ta mantal xchiʼuk ti jaʼ tstojobtasote? Mi muʼyuke, ¿kʼu chaʼal mu xa saʼ junuk? Xi laj yal Tom ti jal xa tunem tal ta mol ta tsobobbaile: «Oy jun mol ta tsobobbail ti laj yakʼ ta yoʼonton skoltaelune, jech kʼot ta kajchanubtasvanej. Nopolik noʼox ta jkʼanbe tojobtasel xchiʼuk chkakʼ ta jkuxlejal, taje la skoltaun yoʼ junuk noʼox koʼonton».

5. Chʼi-o talel ta mantal. Xi to albat li Timoteoe: «Akʼo ta avoʼonton stael ti chakʼan chavakʼ ta ilel ti chavichʼ ta mukʼ Diose» (1 Tim. 4:7). Jun krixchano ti chchan anilajele, skʼan oyuk buchʼu xchanubtasat, akʼo mi jech, skʼan onoʼox xchanilan stuk. Jaʼ yuʼun, li Pabloe xi laj yalbe li Timoteoe: «Akʼo-o me ta avoʼonton li skʼelel chʼul tsʼibetik ta stojolal krixchanoetike, akʼo-o me ta avoʼonton li tojobtasvaneje xchiʼuk li chanubtasvaneje [...]. Nopbo skʼoplal li kʼusitik taje; akʼo me tajek ta avoʼonton sventa lek jamal xil skotol krixchanoetik ti lek chbat avuʼune» (1 Tim. 4:13-15).

Li voʼote xuʼ to xachan batel, mu xapajtsan aba, chʼian-o me batel li ta mantale. Chano li beiltaseletik tslokʼes tal li s-organisasion Jeovae, mu xapat tajek avoʼonton ta atuk. Mu xanop ti mu xa persauk xachʼakbe yorail saʼel yan beiltaseletik ta skoj ti lek xa achanoje. Jech kʼuchaʼal li Timoteoe, jechuk-o me xakʼel aba atuk xchiʼuk li kʼusi chavakʼ ta chanele (1 Tim. 4:16).

6. La spat yoʼonton li ta beiltasel chakʼ xchʼul espiritu Jeovae. Xi to tojobtasat yuʼun Pablo li Timoteoe: «Chabio me lek li lekil kʼulejal akʼbil abain ta sventa li chʼul espiritu ti oy ta jtojolaltike» (2 Tim. 1:14). Yoʼ ‹xchabi› Timoteo li lekil kʼulejal akʼbile, skʼan spat yoʼonton ta stojolal li chʼul espiritue.

Xi laj yal Donald ti voʼne xa chtun talel ta mol ta tsobobbaile: «Li ermanoetik ti biiltasbilik li ta tsobobbaile skʼan tsotsuk skʼoplal xilik li abtelal akʼbilike xchiʼuk ti kʼu yelan xil sbaik xchiʼuk li Jeovae. Mi tskʼanik li chʼul espiritue xchiʼuk mi tspasbeik li yabtele, ep tstabeik sbalil li ermanoetik ta tsobobbaile» (Sal. 84:7; 1 Ped. 4:11).

Toj kʼupil sba ta kʼelel ti yakal chachʼiik ta mantal ti jayib achʼ to avichʼojik biiltasele. Xi chal li Yeison ti laj kalbetik skʼoplal ta slikebale: «Ti kʼu xa sjalil tunemun tal ta mol ta tsobobbaile, ep xa kʼusi jchanoj xchiʼuk mas xa jun koʼonton. Ta jkʼupin tajek xchiʼuk jaʼ jun mukʼta matanal chkil li kʼusi jtaoje».

Li voʼote, ¿mi oy ta avoʼonton chachʼi-o batel ta mantal? Akʼo avip ta xchanel li kʼusi la spas Timoteoe. Vaʼun, jaʼ jech chakʼot ta jun bendision ta stojolal li ermanoetike.